探戈

探戈（粵拼：taam3 gwo1；英文：Tango，英文讀音：/tæŋ.goʊ/）係盛行於拉丁美洲以至歐美嘅一套音樂同社交舞。探戈起源自 1880 年代嘅阿根廷同烏拉圭一帶，初時係由啲低下階層嘅人跳嚟自娛嘅，但後嚟大受歡迎而廣傳，仲成功噉進入社會上流階層嘅舞廳同舞會；探戈响 1910 年代嘅歐洲盛極一時，亦都因此出咗多個地區性嘅風格，例如芬蘭嘅人就出嗮名鍾意探戈。

2019 年布宜諾斯艾利斯一角有一對男女喺度跳探戈。

《街巷遊行》（西班牙文：La cumparsita）係一首幾出名嘅探戈樂曲。

探戈嘅樂曲同舞有好多易認嘅特徵：傳統上，探戈音樂會係用鋼琴、低音提琴、小提琴、結他或者笛嚟演奏嘅，多斷音；喺節奏特性上，典型嘅探戈樂曲拍號係 4/4 或者 2/4，而探戈發源地阿根廷嗰種探戈喺速度上一般都中等偏快；啲人跟住探戈音樂嚟跳舞嗰陣，通常會兩個人成雙成對一齊跳，用封閉位分帶領同跟隨噉跳，而且跳舞雙方嘅面或者身體仲會掂住對方，俾好多人認為係一種非常親密同浪漫嘅舞。

探戈嘅文化影響力相當龐大：就算到咗廿一世紀初，探戈喺拉丁美洲嘅舞會嗰度依然係實會見到咁滯，仲有對芭蕾舞等嘅第啲音樂舞蹈傳統產生影響；事實係喺 2009 年，探戈仲犀利到俾聯合國教科文組織列埋做阿根廷同烏拉圭嘅共同非物質文化遺產​——​認定咗探戈嘅文化地位。

特性

睇埋：斷音、班頓里昂同拉丁舞

探戈有以下呢啲特徵：

• 拍號：多數四拍子 4/4 拍號，亦都有 2/4；下圖係探戈嘅典型節奏：

• 速度：阿根廷探戈多數都係喺 90 bpm 至 130 bpm 左右，算係中等偏快。
• 重音：多掕住重音嘅音符。
• 斷音：探戈音樂不嬲都出嗮名多斷音，即係一個音符會短咗，而且個尾好似「斷咗」噉。
• 樂器：探戈六重奏（Tango sextet）傳統上係最標準嗰種探戈演奏方式，六位演奏者，一位彈鋼琴，一位拉低音提琴，兩位拉小提琴，而最後嗰兩位就奏班頓里昂（西班牙文：bandoneón）​——​一種喺阿根廷同烏拉圭嗰頭好受歡迎嘅手風琴。大啲嘅探戈表演團隊（西班牙文：orquesta típica）仲會有結他、笛同鼓等嘅樂器。

據講嚟自 1905 年嘅一個班頓里昂

班頓里昂嘅聲

• 幽怨感：一首探戈歌啲歌詞成日都會表達幽怨嘅情緒，例如係講命運幾咁殘酷或者哀悼過咗身嘅愛人呀噉；好似係《一步之差》（西班牙文：Por una Cabeza）呢首探戈名歌噉，首歌係由著名阿根廷歌手兼作曲家卡洛斯·葛戴爾（Carlos Gardel）作嘅，啲歌詞講一個爛賭嘅男人將佢股賭馬嘅癮比喻成佢對女人嘅愛戀；而事實係就算係冇歌詞嘅純器樂探戈樂曲，都硬係成日會俾人形容係有股幽怨嘅感覺。
• 舞步：探戈舞係種社交舞，會喺社交場合嗰度跳；探戈舞亦係一種拍檔舞，即係話多數都係兩個人（通常一男一女）一對噉嚟跳，會分帶領同跟隨，兩個人會緊抱住對方噉嚟跳，當中阿根廷探戈仲興用到緊抱位，即係兩個人心口或者髖關節個位掂住，因而俾好多人認為係一種非常親密同浪漫嘅舞。

名曲

《粟米芯》

《街巷遊行》

• 《粟米芯》（西班牙文：El Choclo，西班牙文「粟米芯」噉解），源自 1903 年，由探戈音樂先驅之一嘅阿根廷音樂人安高·維魯度作嘅，歌詞係講攞粟米芯嚟做嘢食，亦都成日會俾人做純器樂演奏。
• 《街巷遊行》（La cumparsita），源自 1916 年，首旋律原先係由一個寂寂無名嘅建築學學生寫嚟做嘉年華會嘅進行曲，打後喺同年由阿根廷作曲家羅拔圖·菲力普改編嚟俾管弦樂團表演而成名。
• 《噢，優美嘅新墨西哥》（英文：O Fair New Mexico），源自 1917 年嘅探戈歌，出名在於俾人攞嚟做美國新墨西哥州嘅代表歌。
• 《再見喇，朋友》（Adiós muchachos），由阿根廷音樂人朱利奧·山達斯喺 1927 年作嘅一首探戈歌，歌詞（西班牙文）係講一個患咗重病就嚟死嘅人一路同佢班朋友講再見、一路回想返佢嘅一生，時不時亦會俾人做純器樂演奏。
• 《個世界少噉咗粒螺絲》（Al Mundo le falta un Tornillo），源自 1932 年。
• 《市集歌》（Cambalache），由銀里奇·山度士·迪舍波羅喺 1934 年作。
• 《我最愛嘅布宜諾斯艾利斯》（Mi Buenos Aires querido），由卡洛斯·葛戴爾喺 1934 年作嘅。
• 《一步之差》（Por una Cabeza），由卡洛斯·葛戴爾喺 1935 年作嘅。
• 《黑貓嘅探戈》（日文：黒ネコのタンゴ；日羅：Kuroneko no Tango），由意大利同日本嘅一班細路喺 1969 年作嘅。

... 呀噉。

起源

探戈呢套舞曲起源自 19 世紀尾，結合咗嚟自歐洲、南美同非洲嘅影響：對於探戈嘅確切起源，廿一世紀初嘅學界仲有好多問題係未答得到嘅；例如到咗家陣，啲人對「tango 呢隻字係點嚟嘅」呢條問題都仲未有咩共識可言​——​有人話呢隻字嚟自西非嘅優魯巴文當中對雷神嘅稱呼，又有人話呢隻字查實係嚟自西班牙文入面嘅 tambor，即係西班牙文入面鼓噉解；一般認為可以肯定嘅係，探戈源自 19 世紀後半橛嘅布宜諾斯艾利斯同蒙特維多（烏拉圭首都）嘅中下階層​——​响當時嘅布宜諾斯艾利斯同蒙特維多，有大量中下階層嘅人聚集，包括咗嚟自非洲嘅奴隸同埋嚟自歐洲嘅勞動階層，從而產生咗探戈呢種同時具有歐洲、南美土著同埋非洲特色嘅舞曲。

打後探戈仲大受歡迎而廣傳：證據指，到咗 1900 年代，探戈經已散佈咗去歐洲同美國等地嘅舞會同舞廳度，令到探戈文化有咗全球性嘅影響力；喺 2009 年，探戈勁到俾聯合國教科文組織列埋做阿根廷同烏拉圭嘅共同非物質文化遺產；就算到咗今日，阿根廷等地嘅音樂人仲有持續噉作同表演探戈音樂同舞蹈。

圖庫

• 
  一對男女喺度跳探戈。
• 
  2005 年布宜諾斯艾利斯一角有對男女喺度做探戈表演。
• 
  2009 年布宜諾斯艾利斯一角有人演奏探戈，側邊嗰對男女跟住起舞。
• 
  2009 年有對男女喺室外跳探戈。
• 
  2020 年布宜諾斯艾利斯一角有對男女喺度跳探戈。

睇埋

• 英維嘅出名探戈曲類
• 社交舞同華爾茲
• 普卡
• 芭蕾舞
• 阿根廷

文獻

• Davis, Kathy (2015). Dancing Tango: passionate encounters in a globalising world. NYUP.
• Kassabova, Kapka (2011). Twelve Minutes of Love, a tango story (English), Portobello.
• Nau, Nicole (2000). Tango, un baile bien porteño (Spanish), Editorial Corregidor, ISBN 950-05-1311-0
• Park, Chan (2005). Tango Zen: Walking Dance Meditation (English), Tango Zen House.
• Raymond, A., & Hildebrand, K. (2004). Teaching Ballet with the Passion of Tango. Dance Magazine, 78(9), 85-85.

拎

• （英文） Argentine Tango Radio.
• （英文） Tango in the Movies.