中英聯合聲明
《中華人民共和國政府和大不列顛及北愛爾蘭聯合王國政府關於香港問題的聯合聲明》（英文：The Joint Declaration of the Government of the United Kingdom of Great Britain and Northern Ireland and the Government of the People's Republic of China on the Question of Hong Kong）簡稱《中英聯合聲明》（英文：Sino-British Joint Declaration）係中華人民共和國（以下簡稱中國政府）同大不列顛及北愛爾蘭聯合王國（英國）就香港前途一齊發表嘅聲明；由當時嘅中國國務院總理趙紫陽同英國首相戴卓爾夫人喺1984年12月19號喺北京簽，當時嘅中央軍委主席鄧小平同埋中國國家主席李先念等中國領導人都有喺現場見證。
| 簽署日期 | 1984年12月19號 |
|---|---|
| 簽署地點 | 北京 |
| 生效日點 | 1985年5月27號 |
| 生效條件 | 中華人民共和國同英國確認 |
| 簽署者 | 趙紫陽, 戴卓爾夫人 |
| 締約方 | 2 |
呢份聲明，安排中國政府喺1997年7月1號接收香港、九龍同埋新界嘅主權；同一日，英國要將呢三度嘅主權同治權，夾埋畀中國。呢份文件亦都係今日香港特別行政區憲制基礎嘅一部分。
到咗移交後，中共中央政府卻經常咁違背咗《中英聯合聲明》同《基本法》嘅精神，對香港嘅民主同自治等有較壞嘅影響。而隨著2019年逃犯條例修訂草案風波嘅爆發，到中央政府兜開埋法定程序而強推《香港國家安全法》、通過中央自己出法案去干預埋香港本地嘅選舉制，已經有越來越多西方世界觀點認為，北京違反咗中英聯合聲明。經過咗唔少嘅國會辯論同其他遊說發展等等，英國外相藍韜文就喺2021年3月13號正式宣告 (report) ，話明咗英國政府係認定北京係持續著一個唔遵守咁《中英聯合聲明》嘅狀態[1][2]。
中共喺聲明約定嘅對港基本方針政策
編輯
原喺條約度中共政府係聲明咗接收返香港嘅主權後啲基本方針政策，話明咗：移交之後嘅香港，會係一個直屬中央而享有高度自治權嘅特區，除咗整體防務同外交大權由中央揸著；特區係有自己獨立嘅行政、立法、司法、財政等權力，仲有一定程度國際化嘅管治公職架構；當地係保持返自由港經濟、金融制度同社會生活模式；承認同保護所有受國際公約保證嘅公民權利同自由；保護外國投資者在港嘅利益；特區係可有條件下自己建立一定嘅國際交往關係、自己處理本地嘅出入境同維持返本地公共秩序等等。最尾一條列埋會由香港特別行政區基本法落實返呢一系列嘅承諾，話會保證五十年唔變咁。而睇返基本法嘅第八章，亦講明咗點改基本法，都唔可以抵觸返中央對香港既定嘅基本方針政策。
法律地位同效力
編輯當屆英政府
編輯英國前首相戴卓爾夫人1984年12月19號喺北京簽署《中英聯合聲明》後隨即訪港，並同當時嘅行政立法兩局嘅非官守議員會面，英國國家檔案館（National Archives）解密嘅訪港準備文件，列出戴卓爾夫人會見時嘅講話重點。戴卓爾夫人指中國視《聲明》為有法律效力嘅協議，表明如中國違反《聲明》，英國喺1997年後亦有權提出，而且強調會毫不猶豫噉提出（Britain has the right to raise any breaches with China after 1997. We would not hesitate to do so.）。
喺一批戴卓爾夫人準備會見傳媒嘅問答提示卡中，其中一張指違反具法律效力嘅國際協議喺英國及國際社會均屬嚴重事件，「我哋（英國）當然會向中國政府作出最強烈嘅抗議，以糾正問題（We would of course make the strongest possible representations to the Chinese Government in order to seek remedy.）」[3]。
而戴卓爾夫人仲試過寫信畀美國嘅列根總統，遊說佢撐英國喺《聲明》度嘅立場，強調過份文件係「具國際約束力的協議」（internationally binding agreement）。而倫敦喺游說華府時都引用過字眼，指份文件經過咗英國國會嘅辯論審議、簽署、再由英女皇拍板，強調返「具有國際法中的完整法律效力」（will make the Agreement carry the full legal force of International Law）[4]。
學者觀點
編輯英國法律專家Martin Dinham就話，就著中國大陸當局，如果威脅係撕毀聲明嘅情形，呢份雙方簽署嘅文件係有四點已確立嘅法律原則[5]：
- 條約係具約束力，「約係立嚟遵守嘅」（Treaties are made to be kept），雙方必須誠實履行；
- 而《聯合聲明》係冇終止規定嘅，冇辦法單方面終止；
- 若果違約者出現咗重大違約（material breach），先至會觸發另一方終止履行同懸置條約；
- 唔合法咁推翻個條約（unlawful repudiation），會導致對方唔需要再履行條文嘅責任，亦會令受損嘅一方有權要求返賠償（reparations）。
註
編輯參考
編輯- ↑ 〈英外相﹕宣告英國認定中方持續不遵守《中英聯合聲明》 | 立場報道 | 立場新聞〉。《立場新聞 Stand News》 (英文)。原先內容歸檔喺2021-03-14。喺2021-03-14搵到。
- ↑ "Foreign Secretary statement on radical changes to Hong Kong's electoral system". GOV.UK (英文). 原先內容歸檔喺2021-06-06. 喺2021-03-14搵到.
- ↑ 英國檔案解密（二之一） 互聯網檔案館嘅歸檔，歸檔日期2015年1月1號，.。
- ↑ 鐵娘子游說失敗 列根總統拒撐香港 互聯網檔案館嘅歸檔，歸檔日期2020年4月10號，. 壹週刊 2016-05-06
- ↑ 解密中英聯合聲明一旦毀約 英方可以做什麼？ 互聯網檔案館嘅歸檔，歸檔日期2020年6月23號，. 香港獨立媒體 2019-07-13
