六七暴動大事記

以下係香港六七暴動大事記：

1967年

4月

• 4月13號：新蒲崗香港人造花廠頒布10項同紀律、人工相關嘅新例，有啲工人唔滿意，同老闆交涉。
• 4月28號：新蒲崗香港人造花廠即時炒咗92人，第二日又關閉咗倒模部，有566人冇咗份工。

5月

• 5月6號：有啲新蒲崗香港人造花廠嘅工人聚埋喺工廠門口，唔畀工廠出貨，防暴警察到場戒備，但啲工人唔肯走，後尾同警察發生衝突，廿一個工人俾警察拉咗，衝突之中有工人受傷。
• 5月7號：工人、工聯會代表同埋其他支持者上街集會示威。示威者跟中國大陸文革做法，渣住本《毛語錄》喺度嗌中國共產黨口號。警察放催淚彈同木彈驅散示威者，拉咗127人。
• 5月11號：大約有千五個工人喺新蒲崗街道外聚集，防暴警察到場打算趕人走，結果同工人發生衝突，工人用石頭同玻璃樽襲擊警員。警察開槍鎮壓，喺同一晚宣佈東九龍實施宵禁，所有後備警員取消休假候命，事件中拉咗百幾人，重有兩個人受傷。
• 5月12號：左派暴徒係黃大仙新區掟石打死咗一個14歲少年，成為工聯會發起六七暴動嘅第一個死者。
• 5月13號：九龍新蒲崗暴動蔓延到黃大仙東頭村同土瓜灣，大批人喺街上聚集，佢哋放火燒車同黃大仙徙置區職員宿舍，又闖入新區辦事處同學校搗亂。當局出動大批英軍同防暴隊鎮壓，又將宵禁時間提前到傍晚6點開始。
• 5月15號：中國外交部向英國代辦提出抗議，同時表示支持香港左派抗爭運動，又發動北京群眾喺英國駐華代辦門外示威。
• 5月16號：「港九各界同胞反對港英迫害鬥爭委員會」成立，簡稱「鬥委會」。
• 5月17號：17個鬥委會代表上港督府搵當時嘅港督戴麟趾抗議，但係戴麟趾唔肯出嚟。
• 5月20號：近三千人以「反英抗暴」為口號，拎住本《毛語錄》走去港督府示威遊行，又喺港督府門口貼大字報。港督府一度成為集體抗議示威嘅主要目標。港府重申要維持法律秩序，限制到港督府請願人數，抗議行動於是轉去中環花園道同皇后像廣場一帶。港九各地陸續有集會示威，參加嘅除咗工人，亦有學生同其他群眾。
• 5月21號：暴動蔓延到中環，警方發射催淚彈鎮壓。
• 5月22號：中區騷亂入面示威者同警察發生流血衝突，拉咗167人。暴動工人及學生以左派報館、銀行、國貨公司、學校等為據點，出動示威，襲擊警察同埋重行緊嘅公共交通。防暴警察到場以催淚彈、警棍等驅散後，示威群眾迅速撤回據點，令警察疲於奔命，當局最後喺港島北岸實施宵禁，係香港島自二次大戰以來第一次宵禁。
• 5月23號：巴士、電車、煤氣公司、天星小輪等開始定時罷工。
• 5月24號：中國總理周恩來提出對港英政府嘅鬥爭要「有理、有利、有節」。
• 5月25號：英國航空母艦堡壘號嚟咗香港，同香港嘅駐港英軍做咗次演集。

6月

• 6月1號：海事處油麻地船排廠有左派工人發動停工，助理海事處長許雨時畀左派工人非法禁錮。
• 6月3號：《人民日報》發表社論，呼籲香港左派「隨時響應祖國號召，粉碎英帝國主義反動統治。」
• 6月9號：一個係大陸派嚟香港華潤公司嘅幹部係北角電車站嘅路軌放土製炸彈企圖炸電車，但炸彈引爆失敗。
• 6月10號：《人民日報》再次發表社論，呼籲全國工民同解放軍支援香港同胞鬥爭
• 6月24號：左派工會發動聯合大罷工。六萬幾個工人響應。政府同公共交通工具公司強硬對付罷工，炒晒啲曠工嘅僱員。
• 6月24號：港督戴麟趾放假返英國，由姬達接手處理暴動事件
• 6月27號：左派學校罷課一日。
• 6月29號：左派發動聯合大罷市，副食品價格上漲。

7月

• 7月2號：罷市停止。
• 7月8號：大約三百人過咗華界邊境，喺沙頭角向警崗掟石同土制炸彈，重有民兵同香港警察發生槍戰，有五個香港警察殉職，啹喀兵進駐增援。同時香港出現傳言，話北京打算收返香港
• 7月10號：周恩來傳達毛澤東指示對香港「不動武」。
• 7月11號：新華社記者薜平畀警察以煽動暴動拉咗。左派嘅暴力行動進一步升級，開始以罐頭罐製造土製炸彈及珠江汽水嘅汽水樽來製造燃燒彈襲擊警署，並以鏹水（鹽酸同硝酸嘅混合物）從高處襲擊經過嘅警車同公共交通，左派學校嘅實驗室成為炸彈嘅製作工場。
• 7月12號：警察同英軍搜查工會，總共拉咗成 40 人，並使用緊急法例嘅權力，拘捕及關押一啲左派份子阿頭，將佢哋拘押喺摩星嶺白屋嘅政治部囚室，部分人之後被逮解出境。
• 7月12號：黃大仙警署俾人掟炸藥，開始咗一連串炸彈浪潮。港英政府同時喺港九兩地實施宵禁，係暴亂爆發兩個幾月來第一次。
• 7月15號：鬥委會成員影星傅奇、石慧、凌雲仁、張秋萍俾警察拉咗
• 7月19號：新華社記者薜平判監兩年
• 7月25號：警方搜捕摩分，拉咗曾向群等42人

8月

• 8月4號：政府出動大批英軍，夾埋空軍用直昇機支援，上下夾攻喺北角嘅僑冠、新都城同明園大廈，又喺僑冠大廈地下嘅華豐國貨搜出各種炸彈武器，重搵到一間設備完善，有手術室嘅地下醫院。行動入面拉咗 26 人，包括鬥委會副主任兼漢華中學校長黃建立
• 8月9號：警方拉咗《香港夜報》社長兼《新午報》董事胡棣周，《田豐日報》社長潘懷偉同督印人陳艷娟，南昌印務公司董事長李少雄同經理翟暖暉。三份報紙勒令停刊。
• 8月10-11號：文錦渡華界工人捉咗英軍邊防指揮官同大埔理民府官員，逼佢哋簽「認罪保証書」。港府宣佈除咗羅湖之外所有邊境關卡封閉
• 8月20號：一對小姊弟－－8歲嘅黃綺文同4歲嘅黃兆勳喺北角清華街俾土製炸彈炸死咗
• 8月21號：中國政府將駐北京路透社記者格雷軟禁，報復香港判薜平坐監
• 8月22號：英國駐北京代辦處俾紅衞兵放火燒毀
• 8月24號：商業電台播音員林彬喺返工嗰時俾人掟氣油彈，佢同佢堂細佬林光海一齊燒死。有一個叫「地下鋤奸突擊隊」承認責任。《明報》社長查良鏞亦因為喺報紙明確反對文革及暴動，收到死亡恐嚇而一度離港暫避。
• 8月28號：英軍中士華克曼（Charles Workman）去獅子山頂諗住拆一個炸彈嗰陣當場被炸死

9月

• 9月3號：一個消防隊長、兩個啹喀兵俾土製炸彈炸死
• 9月4-7號：胡棣周、潘懷偉、陳艷娟、李少雄同翟暖暉判監3年。
• 9月8號：港府實施緊急法例，禁止收藏煙花炮竹
• 9月24號：港督戴麟趾放完假返返香港

10月

• 10月13號：19歲警員杜雄光係灣仔告士打道俾土製炸彈炸死咗，同一晚係灣仔莊士敦道有電車俾左仔掟炸彈，19歲學生唐德明俾個炸彈爆炸嘅碎片打穿頭骨，傷重不治。
• 10月14號：新界衝鋒隊高級督察胡禮喺文錦渡俾人捉咗入華界，之後困咗喺一間軍方旅館入面

11月

• 11月5號：政府搞咗個香港週呼籲香港人用香港貨，左仔為咗唔俾市民參加，周圍放真假炸彈，仲特登針對交通設施放炸彈，英籍高級幫辦麥基雲（Ronald John McEwen）喺怡和街見到一個旅行袋俾人擺咗係電車軌，佢檢查時個袋裡面嘅炸彈發生爆炸，麥基雲當場被炸死咗。
• 11月8號：左派分子喺深水埗荔枝角道放炸彈，當場炸傷三十幾人，其中一人當場死亡，另有兩人喺幾日之後救唔返，警方拉咗一人（羅水欣），告佢三項謀殺罪。
• 11月20號：胡禮自己走甩返咗香港，重開記者會講返事件經過
• 11月23號：高等法院第一次審炸彈案，判處兩個廿幾歲嘅後生仔（葉達成、朱志添）終身監禁，佢哋涉嫌喺荃灣區好多個地方放炸彈，炸傷咗3個市民同兩個警察
• 11月27號：中華中學一個學生（蕭偉民）喺整炸彈嗰陣炸斷手，之後警察到場拉咗6個人
• 11月28號：政府宣佈中華中學封校9個半月，之後又喺旺角勞工子弟學校拉咗108個師生

12月

• 12月9號：華籍警員李觀生俾左派暴徒搶槍射死咗

1968年

5月

• 中華總商會召開大會，話會俾機會俾工聯會誤導參加暴動嘅左派工人投入返正常社會，係會上講解「復、轉、改」，即係復工、轉工或者改行，罷工嘅工人亦陸續復工、轉工或者改行。

1969年

10月

• 10月2號：最後一個囚禁嘅左派記者黃澤放返出嚟
• 10月4號：格雷放返出嚟

12月

• 12月29號：原太古船塢華員職工會主席、各界鬥委會常任委員鄧全，喺監獄服刑嗰陣病死咗。

1971年

9月

• 9月22號：喺錦田殺死警員李觀生嘅兇徒何祥卒之俾警察拉咗，高等法院判佢死刑

1973年

5月

• 5月3號：最後兩個囚禁嘅左派人士（葉達城、朱志添）放番出嚟

參考

• 《六七暴動秘辛》 經濟日報出版社 ISBN 962-678-086-X
• 《香港左派鬥爭史》周奕 著，利文出版社2002年7月初版，ISBN 962-988-098-9