嬉笑集

《嬉笑集》（粵拼：hei1 siu3 zaap2*6）係一本粵語詩集，紀錄咗清末廣東詩人廖恩燾tou4嘅一啲作品。廖恩燾係廿世紀初嘅一位外交官，得閒嗰陣鍾意寫詩。佢精通粵語，時不時都會寫口語化嘅粵語詩嚟自娛，《嬉笑集》收錄嘅，就係廖恩燾寫嘅呢啲粵語詩作。

身穿朝服嘅廖恩燾

作者

内文：廖恩燾

廖恩燾（1864 年 - 1954 年），字鳳書、鳳舒，號雪崖、懺盦am1等，廣東惠陽出身，係廿世紀初嘅一位外交官兼詞人。佢九歲嗰陣跟屋企人搬咗去舊金山用英文讀書，後嚟返中國搵到機會做外交官，去過古巴、韓國同日本等地做過領事等嘅工作。佢打後喺 1946 年移居香港，同文人名流交遊，一路去到成九十歲先至病死。

詩作

《嬉笑集》收錄咗過百首詩咁多，啲詩冚唪唥都係七言詩，大半都係用粵語白話文寫嘅。《嬉笑集》嘅詩喺題材上好多樣化，涵蓋咗史事—尤其係《漢書》有記載嘅史事、粵港澳嘅民間風情以至「隨口噏」等嘅題材。以下係《嬉笑集》嘅其中一啲詩作：

《木蘭從軍》頭嗰兩行—

亞蘭生得咁風騷，心口誰知有執毛。
老豆當兵偏要替，姑娘擒賊至慌箍。

《秦始皇》其中兩行—

六國吞埋擸吓鬚，安心就咁著龍袍。
收齊爛鐵燒銅像，堆起新書透火爐。

《莫愁湖泛舟》其中兩行—

趁潮來探莫愁家，潮氣千年冇的差。
暈到船頭拋大浪，靚成艇尾擺鮮花。

評價

《嬉笑集》初出嗰陣，已經受到一定嘅好評。當時正值廿世紀初，中國各地開始掀起白話文運動，提倡要「言文一體、我手寫我口」，用口語化嘅文字嚟取代文言文，而語體中文（基於標準官話嘅口語）就係喺呢個時候成形嘅。喺呢股風潮下，《嬉笑集》受到唔少正面評價，例如廣西出身嘅香港作家梁羽生據講就係噉樣嚟評論《嬉笑集》嘅：

廖鳳舒嘅廣東話詩，不論詠史、紀事，往往啟人深思。其中描畫舊社會諸般令人可笑又可恨嘅事物，都係兼具『藝術性』同『社會性』嘅佳作，喺《嬉笑集》當中睇得清清楚楚。

睇埋

• 粵文
• 粵詩
• 三及第
• GitHub 上面嘅粵語/廣東話參考資料，有收錄《嬉笑集》。
• GitHub 上面嘅《嬉笑集》校正電子版
• （英文） CantoWords 粵語資源，當中有提到《嬉笑集》。