巴洛克音樂
西樂風格一種
巴洛克音樂（英文：Baroque music；法文：Musique baroque）係西歐古典樂當中嘅一個時期同風格，大致上始於 1580 年代嘅意大利半島，一路去到 18 世紀中（古典主義音樂早期）左右為止－相當於巴洛克藝術嘅時期。呢個時期出名嘅歐洲作曲家有韓德爾（G. F. Händel）同巴哈（J. S. Bach）呀噉，佢哋嘅作品到咗廿一世紀都仲有好多人鍾意，例如係巴哈嘅《小步舞曲》（Minuets）噉[1]。
巴洛克音樂可以細分做好多種種：
- 加霍（Gavotte）會用 4/4 拍，速度中等，而跟加霍跳嘅民俗舞亦有用到 9/8 同 5/8 [2]；
- 源自法國嘅布尼（Bourrée）就興用 2/2 同埋喺一條小節最後嗰一吓拍子嘅後半橛做起始，速度上傾向快過加霍，亦都出咗名成日俾人攞嚟做芭蕾舞嘅配樂，例如韓德爾（Handel）都作咗幾首布尼曲[3]。
... 等等。
巴洛克音樂對打後嗰幾個世紀嘅歐洲音樂影響深遠。
曲種 編輯
.png)
睇埋：巴洛克舞蹈
巴洛克音樂包括咗好多隻曲種：
- 莎拉班德（Sarabande；西班牙文：Zarabanda）：16 世紀上半橛發源於西班牙嘅一種舞曲同舞蹈，喺古典樂當中相當受歡迎，例如韓德爾（Handel）嘅《D 小調鍵盤組曲 HMV 437》（Keyboard suite in D minor HWV 437）入面嘅第四樂章就係一首好出名嘅莎拉班德[4]；現代嘅莎拉班德舞曲會跟 3/2 拍號跳，有好似下圖噉嘅節奏，速度偏慢，好多時得嗰 70 bpm 左右，俾人形容係「氣氛生動活潑」。啲人喺跟莎拉班德跳舞嗰時，通常數拍子會跟兩段節拍嘅方式數，即係「1 2 3 4 5 6... 1 2 3 4 5 6...」噉數[5]。
第四樂章嘅一個版本
- 阿里曼德（Allemande；法文「德國式」噉解）：源自 16 世紀德國嘅一種舞曲，不過係由法國發揚光大嘅，好似巴哈（Bach）同韓德爾等嘅著名作曲家都作過阿里曼德；喺音樂特性上，阿里曼德 4/4 拍，有好似下圖噉嘅節奏，速度傾向喺 100 bpm 上下（算係微快），形式上傾向用二段體，十六分音符零舍多[6]；有啲學者覺得，阿里曼德係一種好「嚴肅同儀式化」嘅舞，忌切分音（指啲特登唔跟拍子嘅音），傾向表達滿意等正面得嚟輕微嘅情緒，成日俾人攞嚟做一套組曲嘅第一樂章[7]。
- 夏康舞曲（Chaconne / Ciaconne）：喺 1600 年代左右經已存在喺西班牙嗰度嘅一種舞曲同舞蹈，出名嘅作品有巴哈嘅《小提琴第二變奏曲》（Partita for Violin No. 2）嘅最終樂章；喺音樂特性上，夏康舞曲係三拍子，音階上通常係大調，速度冇乜點定，俾人話會令聽嘅人有一種「輕盈」嘅感覺[5]。喺舞步上，傳統嘅夏康舞曲一般會由一男一女一齊跳或者一個女人單獨噉跳，好多時都會帶有些少挑逗性（因而喺初頭嗰陣受到保守啲人士批評）[8]。
小提琴獨奏
- 小步舞曲（Minuet）：源自 17 世紀中嘅法國貴族圈子嘅一種舞曲，例如舉世聞名嘅巴哈小步舞曲就係一首小步舞曲；喺音樂特性上，小步舞曲通常用 3/4 拍號，有好似下圖噉嘅節奏，有陣時亦會用 3/8，數起拍子上嚟通常會係每週期兩段節拍（總共 6 吓拍子）；首音樂多數分兩段，而且兩段都各自成二段體；喺舞步上，小步舞曲通常會係一男一女成雙成對噉嚟跳，雙方會拖住手噉跳，但身體唔會掂得太埋（唔似得例如華爾滋噉會用封閉位），喺巴洛克時期係貴族圈子當中常見嘅社交舞[9]。
- 積古（Gigue；意大利文：Giga）：一種受到英格蘭民俗舞曲積舞曲（Jig）影響嘅法國舞曲，喺意大利都幾盛行；喺音樂特性上，積古嘅拍號傾向係 3/8 或者係 3/8 嘅複合節拍（6/8、9/8 或者 12/8 呀噉），音樂速度上通常偏快（尤其係意大利嘅積古零舍快），好多時會超過 200 bpm 咁快，而另一個特徵係成日都會有好多三個做一組嘅八分音符（好似下圖嗰個例子噉；呢點同積舞曲好相似）；喺組曲當中，基格通常都係做最後嘅樂章。啲人跳積古嗰陣，通常係一對對男女成雙成對噉跳嘅，好似芭蕾舞嘅雙人舞（pas de deux）噉[10]。
- 布尼舞曲（Bourrée）：源自 17 世紀中之後，呢種舞曲出嗮名成日俾人攞嚟做芭蕾舞嘅配樂，而且芭蕾舞入面仲有咗布尼舞步（pas de bourrée）呢隻以布尼舞曲命名嘅舞步；布尼舞曲喺巴洛克舞蹈上都會用到，音樂特性係興用 4/4 拍同埋喺一條小節最後嗰吓拍子嘅後半橛做起始，會有好似下圖噉嘅樣嘅節奏，速度上傾向快過加霍（睇下面），通常起碼會有 130 至 140 bpm 左右；啲人喺跟布尼舞曲跳舞嗰陣，通常會做好多細嘅跳躍彈上彈落噉[11]。
- 加霍（Gavotte）：源自 17 世紀尾嘅一種法國舞曲，好似巴哈同韓德爾等嘅著名巴洛克作曲家都作過加霍；喺音樂特性上，加霍嘅典型拍號係 4/4，有好似下圖噉嘅節奏，亦都有 2/2、9/8 同 5/8 呀噉，速度中等，形式上傾向用二段體，樂句會喺小節嘅中間起始（尤其係 18 世紀法國宮廷嗰啲加霍）；喺舞會上，加霍通常都會喺三拍子嘅小步舞曲之後出現，而响巴洛克嘅組曲裏面就通常會出現喺莎拉班德之後[12]。
... 等等。
睇埋 編輯
攷 編輯
- ↑ Palisca, Claude V. (2001). "Baroque". Grove Music Online (8th ed.). Oxford University Press.
- ↑ Meredith Ellis Little and Matthew Werley, "Gavotte", The New Grove Dictionary of Music and Musicians, 2nd edition, (London: Macmillan Publishers).
- ↑ Scholes, P. (1970). The Oxford Companion to Music, OUP, article; "Bourrée".
- ↑ Hicks, Anthony (2001). "Handel, George Frideric". In Sadie, Stanley; Tyrrell, John (eds.). The New Grove Dictionary of Music and Musicians. x (2nd ed.). London: Macmillan. p. 804.
- ↑ 5.0 5.1 Dance Rhythms for Ballet Pianists. RAD.
- ↑ A Baroque Glossary.
- ↑ Blatter, Alfred (2007). Revisiting music theory: a guide to the practice, p.28.
- ↑ Alexander Silbiger, "Chaconne," The New Grove Dictionary of Music and Musicians, ed. Stanley Sadie and J. Tyrrell (London: Macmillan, 2001).
- ↑ Little, Meredith Ellis. 2001. "Minuet". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
- ↑ Gigue. Encyclopedia Britannica.
- ↑ Scholes, Percy, The Oxford Companion to Music, OUP, 1970, article; Bourrée.
- ↑ Meredith Ellis Little and Matthew Werley, "Gavotte", The New Grove Dictionary of Music and Musicians, 2nd edition, (London: Macmillan Publishers).
拎 編輯
- Handel's Harpsichord Room – free recordings of harpsichord music of the Baroque era.
- Renaissance & Baroque Music Chronology: Composers.
- Orpheon Foundation in Vienna, Austria.