維基百科

廣州無軌電車

  提示：呢篇文講嘅唔係廣州有軌電車。

 廣州無軌電車（粵拼：gwong2 zau1 mou4 gwai2 din6 ce1） 係中國廣東廣州嘅無軌電車系統，由廣州市電車公司負責營運，主要喺廣州荔灣區、越秀區、海珠區同埋白雲區、天河區行。

從1984年到1998年期間用過嘅廣州無軌電車[1]
而家嘅廣州無軌電車

佢係廣東省，亦係華南唯一有無軌電車系統嘅城市，又係廣州用得最耐嘅其一交通工具。

史

編輯

廣州早喺1915年已經有計劃起電車[2][3]，不過由於廣州成日打仗，加上經濟困難，所以一直都起唔到無軌電車[4][3]，直到1960年秋天先至有無軌電車投入營運。

電車夢

編輯
 
廣東電車有限公司喺1921年嘅股票

1915年，美籍華人伍藉磐將無軌電車嘅經驗帶到嚟廣州而發展咗廣州嘅交通事業[2]。喺電車未開通之前，廣東電車有限公司（而家係廣州電車公司）買咗好幾部嗌「Leus」嘅四個轆啲車到廣州市區入面搭客[4]，但係呢啲車嘅質量差到笑甩大牙，加上成日發生車禍，結果嗰時嘅政府唔再畀呢啲車出街。後嚟到咗1937年，廣州市政府正式批准咗成立無軌電車籌備委員會，嗰時市政府凈係借錢嚟搬無軌電車[4]。不過喺1938年廣州淪陷，佢哋買返嚟嘅大多數電車設備同器材都放嗮喺英國同香港，所以無軌電車都冇起到[4][5]。

初期籌備

編輯
 
1951年8月24號，廣州市人民政府同有關嘅本市政府部門話批准咗搞電車嘅公文。

喺中華人民共和國成立咗之後，廣州話要重新搞返電車嘅初期準備工作，就喺1951年8月24號，廣州市人民政府財政經濟委員會批准成立籌委會嚟負責起無軌電車[6]。喺1958～1959年，籌委會派咗技術人員同工人去咗北京電車公司嗰邊學嘢[7]。1960年9月15號，而家中山五路95號嗰頭整咗第一條電車路線桿出嚟。廣州電車史上第一座臨時整流電站（桂番街電流站）同埋第一橛電車線網（中山路同解放路嗰橛）都整咗出嚟。

正式通車

編輯
 
廣州電車喺1960年10月1號通咗車之後，發行嘅1號電車試坐紀念飛[8]。

籌備咗9年之後，無軌電車卒之喺1960年9月27號開始試營運[9]，中華人民共和國成立11週年之前一日（1960年9月30號）正式通車[10][6][8][11]。喺嗰時凈係開咗部1號電車（越秀公園⇄大東門）[註 1]嘅10部車出嚟[11]。

通車之後到改革開放之前

編輯

1961年，廣州電車第一次實現咗供電系統無極接地同發，同年亦開埋2號電車（農林下路⇄南方大廈）[11]。而廣州市電車公司喺1962年成立咗之後，再喺1963年同1966年分別通咗3號電車（越秀公園⇄南方大廈）同埋4號電車（大東門⇄珠江大橋東橋腳）[註 1]。

到咗1970年1月29號，廣州電車唔單止第一次實現咗無軌電車電路系統從電阻調速到可控矽調速控制嘅升級換代[3]。過多4年，廣州電車就同廣州客車廠（喺2000年執咗笠）一齊搞無軌電車嘅改裝，最後出咗GZK643型嘅車款。

改革開放之後

編輯
 
1991年嘅廣州地區，GZ660型電車。

到咗1982年——1985年，廣州嘅無軌電車又發展到新嘅里程，佢先後開咗5號電車（越秀公園⇄南方大廈）、6號電車（大東門⇄南方大廈）同埋7號電車（農林下路⇄珠江大橋東橋腳）。雖然話噉，但係喺1——7號呢7部電車出現咗之後嘅第二年（1986年）就按中華人民共和國嘅國家標準改咗冧巴嗌101、102、103、104、105、106、107[12]。而1987年第一次喺人民路高架橋底用咗預捷構件嘅方式嚟整無桿線網出嚟[3]，再喺1994年開咗第一部空調嘅電車路線（128號車）[13]。而105號電車同104路電車差唔多噉行，加上客流太少嘅關係，結果105號電車喺1990年就停咗[12]。喺1996年，廣州電車已經開始有佢自己第一個既可以通信同監控功能嘅變電站，喺1997年實現咗用輔助電源嘅無軌電車（SK5105GP型）。而128號電車喺開咗無耐之後，由於廣州地鐵1號綫施工嘅關係，行咗無耐就取消咗[13]。

起地鐵嘅影響

編輯

1993至1997年，廣州起緊1號綫，搞到從中山七路到中山二路一帶出現交通癱瘓，影響嗮嗰時101、102、104同107號電車嘅營運而兜嗮去東風路嗰邊行[12]，甚至重出現「有咗地鐵之後，重使唔使搞電車？」嘅講法[1]。但係廣州市當局重係支持繼續發展無軌電車，喺1997年1號綫中山路段嘅工程搞掂咗之後，101、102、104同107號電車又行返之前嘅中山路嗰度[12][1]。

電車路線嘅延長

編輯

由1985年去到1998年，電車嘅路線除咗北邊嘅總站變咗去而家嘅機場路同廣園中路嘅交界西南邊嘅三元里村入面、大東門總站因為東濠涌高架橋嘅工程而搬咗去農林下路口嗰度（而家嘅東山總站）、南方大廈站改咗名嗌文化公園站同埋珠江大橋腳總站移咗嚟而家嘅中山八路汽車客運站（而家嘅廣佛汽車客運站）嘅對面之外，其它都冇乜點變嘅。但係到咗1999年，廣州市人民政府批准咗新一期嘅廣州發展規劃而搞新一輪嘅電車發展經歷。以前停運咗嘅5號電車（105，文化公園⇄機場路）重新開返，跟住就開埋廣州史上第8條嘅電車路線——108（東山⇄機場路）[12]。2000年再開埋第9條（109，中山八路⇄沙河）、10號電車（110，解放南⇄沙河）[12]；喺2001年，廣州開咗11號電車（111，沙河⇄黃石路口）之後嘅第二年，重將8號電車嘅北邊總站延長到而家嘅黃石路口嗰度，改變咗之前電車嘅北邊總站一直係機場路嘅歷史[12]。甚至嗰年重延長咗6號電車嘅東邊總站，一直去到而家嘅錦城花園（東風東）嗰頭，改變埋東邊總站一直係東山嘅歷史[12]。

第一次過珠江到河南

編輯
 
2007年嗰時嘅廣州地區，SK-5102GP品種（四方頭）嘅電車。

喺2002年，廣州電車第一次用咗二桿合一嘅方式，喺中山路同埋而家嘅康王路同埋三元里大道嗰邊搞電車路線網[11]。喺2003年1月23號，廣州電車第一次喺人民橋、解放橋同埋江灣大橋嗰度搞路線網。由於12號（112）、13號（113）、14號（114）嘅電車通咗車，廣州電車第一次入咗河南[14][15][11][1][12]。

首次出現自己嘅知識產權電車

編輯
  • 2004年，廣州嘅109、110、111號電車因為廣園東路同恆福路交界嘅立交橋施工嘅關係，縮短到恆福路總站；同年114號電車亦試過因增埗橋拆除重建施工影響而縮短到和平新村總站。直到2005年冚唪唥先至先後恢復返到而家嘅天平架（109、110、111）同羅沖圍（114）總站。
  • 2007年初，廣州市第一批有自己知識產權嘅電車（廣圃GT5110DGJ3同駿威GZ5110型）正式開始營運。同年6月買咗幾十部無障礙新型無軌典雅之星I型電車（春田花花品種）[16]。
 
廣州街頭喺1999～2013年用過嘅SWB5105GP-3（兔耳仔）電車。
  • 2008年初，廣州電車引入咗比較多嘅無障礙新型無軌典雅之星II型電車（變形金剛品種）[17][18]。
  • 2010年，廣州電車引入咗新型無障礙無軌典雅之星III型電車（電鯊品種）。

舊巴退出歷史，首入天河

編輯
  • 2012年7月13號，廣州市第一條夜班電車（夜78號，中山八路⇄廣州東站）正式開通，實現咗加里程式嘅營運[19][11]。
  • 2013年3月30號，之前嘅7號電車改咗路線，東邊原先嘅東山總站延長到而家嘅花城廣場西總站，呢個係廣州史上第一次有電車行入天河區嘅珠江新城[20]。
  • 2013年10月8號深夜，最後一部非空調電車D1-288（SWB5105GP-3型，左邊嗰張相）喺11號電車到咗總站收車之後正式退役，之後廣州嘅巴士全部踏入空調化時代[13][21]。
  • 2014年底，廣州電車引咗福田電車BJ5120A（貓頭鷹品種）入嚟，並逐步報廢之前廣州駿威客車廠整嘅GZ6105（靚仔版嗰啲）。而呢啲車入面有眨燈路線圖同埋廣州電車歷史圖。
  • 2016年11月26號，廣州嘅7號電車同8號電車改咗路線，其中7號電車向東延長到興民路總站[22]，8號電車向北延長到南悦花苑總站，改變咗最東邊總站係花城廣場同埋有住17年最北邊總站係黃石路口站嘅歷史。
  • 2018年2月1號深夜，最後一部典雅之星Ⅱ（駿威GZ5110型）喺1號電車到咗總站之後正式踏入維修廠而正式退役，從而廣州街頭冇嗮自產嘅無軌電車響度[23]。

第一次過珠江到芳村

編輯
  • 2018年8月18～20號，受到8號綫喺文化公園站南邊嘅電車總站搞B出入口嘅影響，5號電車喺同年月18號改咗路線，南邊原先嘅文化公園總站縮短到黃沙總站[24]；而6號電車西南邊總站從原先嘅文化公園總站延長到芳村嘅茶滘路總站，亦係廣州史上第一次有電車行入芳村範圍[24]。

大規模改線

編輯
  • 2019年6月1號，7號電車嘅東邊總站縮短到華成路（高德置地廣場）。

出現環綫營運

編輯
  • 2019年12月21號，11號電車改成黃石路口環綫，唔再行小北以東北嘅地方。
  • 2020年9月30號，因中山八路總站重建，令部份巴士改線，其中4號電車改成海印橋環綫。而9號電車改行康王中、南路，到文化公園為止[25]。
  • 2020年11月8號，3號電車改成鶴洞環綫，唔再行東風西路以北一帶[26]。

用過嘅電車車款

編輯

廣州開始營運無軌電車以嚟，出現過成15款無軌電車。佢從之前嘅「可以搭車」變成跟住落嚟嘅「搭快車」同「搭靚車」。

 
SK644型電阻式單卡電車
SK644型電阻式單卡電車[27][28] 
 
GZ662型絞接通道無軌電車
GZ662型絞接通道無軌電車[29] 
 
SK-5102GP型無軌電車（四方頭版）
SK-5102GP型無軌電車（四方頭版）[27] 
 
廣州產空調電車（金屬漆版）
廣州產空調電車（金屬漆版）[30] 
 
駿威GZ5101型空調無軌電車
駿威GZ5101型空調無軌電車[31] 
 
GTQ5110DGJ3型無軌電車
GTQ5110DGJ3型無軌電車[16] 
 
ZK6120ECQAA型無軌電車
ZK6120ECQAA型無軌電車[32] 

SK644、SK663型電阻式單卡

編輯

呢兩種電車由1960年9月30號用到1979年[28]，其中SK644型係單卡無軌電車，而SK663型係鐵接通道無軌電車[33]。佢哋係用解放牌CA-10B嘅汽車底盤、60kW嘅電動機嚟做動力。呢啲車用電阻式嚟做調速控制，控制級數有11級。

呢兩種電車車型舊，又嘥電；喺打着火同加速嗰陣都好難操作下[33]。

GZ660、GZ661、GZ662型絞接通道

編輯

呢三種電車由1974年用到1989年[29]。佢哋係用解放牌載重汽車嘅底盤，喺車嘅前面同後面用大弧度嘅擋風玻璃。嗰時因為中國內地嘅工業技術比較落後嘅關係，加上都重未夠條件加啲新車，搞到客流量成日超過營運能力，結果整汽車嗰個團隊佢哋將技術改革咗，攞單卡車嘅車廂改成絞接型通道車嚟加大營運能力。呢啲車種有另一個名「細改大」[29]。

SK-5102GP型

編輯

呢種電車由1990年代用到2009年[34]。佢係用嗰時國際比較興嘅方形設計，車型既靚又貼體，佢重係中國內地第一批有輔助電源嘅商業化無軌電車[34]。呢啲車俾好多人話係「四方頭」[27]。

駿威GZ5101型空調電車金屬漆版（靚仔）02款

編輯

呢種電車係2002年到2013年用嘅品種，佢係凈用咗IGBT嘅驅動控制技術就乜都冇喇，而且成個車身都係用金屬漆嚟油嘅[30]。呢種電車喺2002年出世之後，打破咗廣州冇空調電車嘅格局[35]。

駿威GZ5101型空調電車（靚仔）04款

編輯

呢種電車係2004年到2014年用[36]。佢喺廣州產空調電車嘅金屬漆品種嘅基礎度，加咗高性能嘅空調技術同埋優化咗車嘅配置，重幫冚唪唥嘅電車實現咗動力輔源化[31]。

廣通GTQ5110DGJ3型（典雅之星Ⅰ型、春田花花）

編輯

呢種電車喺2007年開始用，係中國內地第一部無障礙觀光無軌電車[37]。由於佢嘅樣比較靚，加上車身嘅圖都係花嘅樣比較多，所以俾好多廣州當地嘅市民話咗佢係「春田花花」[37]，呢種車係引入咗交流變頻技術，佢優化咗空調同變頻系統嘅同時，重提高咗成部車嘅技術性能[37][16]。

駿威GZ5110型（典雅之星Ⅱ型、變形金剛）

編輯

呢種電車係由廣州市電車公司自己設計同開發，由廣州市電車公司同廣州駿威客車有限公司夾手一齊出，用咗2007年嗰時嘅國際先進客車技術同理念嚟研發嘅一種電車[38][17]。佢用咗好多中國內地同西方國家入面，啱嗮城市公共交通嘅新型技術、結構同工藝，冚唪唥都用咗技術先進同有一定成熟經驗嘅中國內地產品，夠嗮高配置、齊全，技術先進、成熟，啱嗮性價比同費效比嘅要求[38][18]。

宇通增程式ZK6120ECQAA型（典雅之星III型、電鯊）

編輯

呢種電車喺2010年開始用[32]。佢係通過用鋰電池系統等新能源嘅先進技術，充分將純電動車同無機電車嘅優勢合埋一齊嚟實現佢嘅電動運行[32]。呢啲車俾好多人話係「電鯊」[32]。

福田BJ5120A型（貓頭鷹）

編輯

2014年底，廣州電車引入咗福田電車BJ5120A（貓頭鷹品種），並逐步報廢之前廣州駿威客車廠整嘅GZ6105（靚仔版嗰啲）。呢啲車入面有眨燈路線圖同埋廣州電車歷史圖。

路線

編輯

而家嘅電車有14條日班路線，1條夜班路線。

路線 往返 票價 使用車型
101 機場路↔海印橋 ￥2 GZ5110、ZK5120A
102 東山（農林下路）↔文化公園 ￥2 ZK6120BEVG1、ZK6120EGQAA、ZK5120A1、ZK5120A、GZ5110
103 鶴洞環綫 ￥2 GTQ5110DGJ3
104 海印橋環綫 ￥2 BJ5120A
105 黃沙↔棠安路 ￥2 ZK6120BEVG2、GJQ5110DGJ3、ZK5120A1、GZ5110
106 錦城花園（東風東）↔茶滘路 ￥2 GZ5110
107 興民路↔中山八路 ￥2 ZK6120EGQAA、ZK5120A、ZK6120BEVG1、ZK5120A1
108 東山（農林下路）↔南悦花苑 ￥2 ZK6120EGQAA、ZK5120A、ZK6120BEVG1、ZK5120A1
109 文化公園↔天平架（行康王路） ￥2 BJ5120A、ZK5120A1
110 文化公園↔天平架（行人民路） ￥2 ZK5120A1
111 黃石路口環綫 ￥2 ZK5120A1
112 南田路↔天平架 ￥2 ZK5120A1
113 南田路↔棠安路 ￥2 ZK6120BEVG1、ZK5120A1
114 南田路↔羅沖圍（松南路） ￥2 GZ5110、ZK5120A1、ZK5120A
夜78 中山八路↔廣州火車東站 ￥3 ZK6120BEVG1

睇埋

編輯

註同攷

編輯
註
  1. ↑ 1.0 1.1 呢兩條路線嘅東邊總站喺1990年改咗去而家嘅海印橋北邊嘅橋底嗰度停
攷
  1. ↑ 1.0 1.1 1.2 1.3 陈颖雅、吴敏忠 (2010-05-25)。〈广州电车：驾车廿余载见证电车发展史〉。《新快报》。頁 AⅡ06版。原著喺2015-04-02歸檔。
  2. ↑ 2.0 2.1 广州市电车公司荣获“老字号”称号 互聯網檔案館嘅歸檔，歸檔日期2015年4月2號，. 網易汽车 （2012-04-05）
  3. ↑ 3.0 3.1 3.2 3.3 〈五、无 轨 电 车〉。原著喺2015年4月2號歸檔。喺2015年2月17號搵到。
  4. ↑ 4.0 4.1 4.2 4.3 民国广州“电车梦” 互聯網檔案館嘅歸檔，歸檔日期2016年3月9號，. 羊城晚报 （2013年04月27号 B10版）
  5. ↑ 民国广州“电车梦” 互聯網檔案館嘅歸檔，歸檔日期2015-07-03. 财经网 （2013-04-27）
  6. ↑ 6.0 6.1 印迹:广州电车 互聯網檔案館嘅歸檔，歸檔日期2020年3月16號，. 中國知網 （成篇嘢必須要下載咗先至有得睇）
  7. ↑ 广州无轨电车诞生50年 互聯網檔案館嘅歸檔，歸檔日期2018年9月22號，. 中國知網 （成篇嘢必須要下載咗先至有得睇）
  8. ↑ 8.0 8.1 古老电车站搬新家告别“露宿”街头 互聯網檔案館嘅歸檔，歸檔日期2015年4月2號，. 中国广州网
  9. ↑ 广州电车 互聯網檔案館嘅歸檔，歸檔日期2015年4月2號，. 太平洋电脑网
  10. ↑ 越秀山脚下广州首辆无轨电车徐徐开出 互聯網檔案館嘅歸檔，歸檔日期2015年4月2號，. 廣州圖書館
  11. ↑ 11.0 11.1 11.2 11.3 11.4 11.5 百年电车 广州记忆 互聯網檔案館嘅歸檔，歸檔日期2015年4月2號，. 广州市电车公司
  12. ↑ 12.0 12.1 12.2 12.3 12.4 12.5 12.6 12.7 12.8 广州电车：沧海桑田 互聯網檔案館嘅歸檔，歸檔日期2020年9月8號，. 广州市电车公司
  13. ↑ 13.0 13.1 13.2 广州非空调公交车将“荣休” 互聯網檔案館嘅歸檔，歸檔日期2015年4月2號，. 羊城晚报 （2013年10月07号 A2版）
  14. ↑ 中国广州发布 新浪微博
  15. ↑ 2003年1月23号嘅羊城晚报头版报纸
  16. ↑ 16.0 16.1 16.2 客车(典雅之星Ⅰ型) SooPAT
  17. ↑ 17.0 17.1 客车(典雅之星Ⅱ型) [失咗效嘅鏈] 专利之星
  18. ↑ 18.0 18.1 广州电车~GZ5110~ 巴士之家
  19. ↑ 广州第一条夜班电车线路开通 东站至中山八 互聯網檔案館嘅歸檔，歸檔日期2015年4月2號，. 新快报 （2012-07-15）
  20. ↑ 107路电车要开到花城广场 互聯網檔案館嘅歸檔，歸檔日期2015年6月2號，. 南都网 （2013-03-20）
  21. ↑ 巴士迷盼建 巴士博物馆 互聯網檔案館嘅歸檔，歸檔日期2015年4月2號，. 南都网 （2013-10-10）
  22. ↑ 〈CBD白领注意了！107路电车珠江新城总站调整〉。《南方都市报》。腾讯。2016-12-05。原著喺2020-09-08歸檔。喺2016-12-21搵到。
  23. ↑ 〈广州告别自产无轨电车〉。《南方都市報》。奧一。2018-02-04。原著喺2020-07-19歸檔。喺2018-03-19搵到。
  24. ↑ 24.0 24.1 〈广州"辫辫车"首进芳村 106路延伸至茶滘路〉。《金羊网》。2018-08-20。
  25. ↑ 〈广州市交通运输局网站 - 关于临时调整公共汽车中山八路总站部分运营线路的告示〉。jtj.gz.gov.cn。原著喺2022-06-07歸檔。喺2020-10-29搵到。
  26. ↑ 〈广州市交通运输局网站 - 关于调整公共汽车103路的告示〉。jtj.gz.gov.cn。原著喺2021-08-31歸檔。喺2020-12-22搵到。
  27. ↑ 27.0 27.1 27.2 广州市电车公司 互聯網檔案館嘅歸檔，歸檔日期2016年3月5號，. 点力文秘网
  28. ↑ 28.0 28.1 10年前影的無軌電 互聯網檔案館嘅歸檔，歸檔日期2016年3月4號，. 中国巴士网
  29. ↑ 29.0 29.1 29.2 广州产通道电车 互聯網檔案館嘅歸檔，歸檔日期2016年3月5號，. 广州市电车公司
  30. ↑ 30.0 30.1 GZ5101无轨空调电车2002年广州市电车公司敬赠1；38 7788.com
  31. ↑ 31.0 31.1 骏威新型空调电车 互聯網檔案館嘅歸檔，歸檔日期2020年9月8號，. 广州电车公司
  32. ↑ 32.0 32.1 32.2 32.3 〈典雅之星Ⅲ型增程式电车（电鲨）〉。原著喺2020年9月8號歸檔。喺2015年6月27號搵到。
  33. ↑ 33.0 33.1 上海产单卡电车 互聯網檔案館嘅歸檔，歸檔日期2016年3月5號，. 广州市电车公司
  34. ↑ 34.0 34.1 上海产Ⅱ型电车（四方头） 互聯網檔案館嘅歸檔，歸檔日期2020年9月8號，. 广州市电车公司
  35. ↑ 骏威新型空调电车 互聯網檔案館嘅歸檔，歸檔日期2020年9月8號，. 广州电车公司
  36. ↑ 广州电车全新换代 互聯網檔案館嘅歸檔，歸檔日期2015年6月14號，. 金羊网 （2004-08-11）
  37. ↑ 37.0 37.1 37.2 典雅之星Ⅰ型（春田花花） 互聯網檔案館嘅歸檔，歸檔日期2016年3月5號，. 广州市电车公司
  38. ↑ 38.0 38.1 典雅之星Ⅱ型（变形金刚） 互聯網檔案館嘅歸檔，歸檔日期2020年9月8號，. 广州市电车公司

連出去

編輯
 
維基同享有多媒體嘅嘢：
Trolleybuses in Guangzhou

出面網頁

編輯
由「https://zh-yue.wikipedia.org/w/index.php?title=廣州無軌電車&oldid=2170727」收