張國榮告別樂壇演唱會
簡介
編輯演唱會香港站喺香港紅磡體育館搞，由1989年12月21號演出至1990年1月22號。總共33場演出。
1989年9月17號，33歲嘅張國榮突然宣佈退出歌壇，喺記者招待會入面話喺紅磡體育館搞33場個唱嘅原因係因為一場個唱代表一年嘅歲數。由於早前陳慧嫻先喺紅館開完6場《幾時再見演唱會》，而公眾嘅反應都好熱烈，所以有啲報道話哥哥封咪、陳慧嫻去美國留學、譚詠麟38場破紀錄嘅總場數，就象徵緊1990年代嘅香港樂壇將由張學友帶頭，哥哥轉型做電影人，梅艷芳轉移到電影同慈善發展，繼續保住「大姐大」的身分。
黎小田做演唱會嘉賓，以客串身份彈奏張國榮喺華星唱片時代嘅歌《不怕寂寞》同《我願意》。
1989年度十大勁歌金曲頒獎典禮喺1990年1月21號搞，搞緊演唱會嘅張國榮出席唔到頒獎禮。無綫電視派出周慧敏去紅磡體育館現場將十大勁歌金曲《由零開始》同埋最受歡迎男歌星獎座頒畀張國榮。
而張國榮喺最後一場演唱會，喺唱完《寂寞夜晚》後，就同黎小田喺舞台上繞場一圈，行到觀眾席同觀眾握手同收禮物，全場雷動。唱完《由零開始》後，佢同萬幾位紅館觀眾講咗做歌手嘅心得，仲向歌迷透露退休後會開咖啡店，仲講笑話有佢嘅告別樂壇演唱會飛尾嘅觀眾，去佢嘅咖啡店，第一杯咖啡係免費。喺唱緊《共同渡過》嗰陣仲攞到羅文送花多謝，之後仲喺台上喊住咁唱《風繼續吹》，觀眾嘅反應仲喺此起彼落。喺唱完最後一隻《風再起時》向觀眾告別嗰陣，台中央突然冒起白煙，升上一個咪座，佢就將手上嘅銀咪雙手插喺咪座度，然後行返後台，將銀咪高掛，正式告別樂壇。
張國榮重返樂壇後，咖啡店為你鍾情最終喺1996年正式開幕，張國榮都記得承諾，畀手持演唱會票尾嘅觀眾，免費享受咖啡一杯，不過只經營咗幾年就執笠。
以下係張國榮告別樂壇演唱會巡迴演唱行程表（香港站冇計）：
| 地點 |
|---|
| 美國大西洋城 |
| 加拿大卡加利 |
| 加拿大多倫多 |
| 溫哥華 |
| 馬來西亞怡保 |
| 馬來西亞吉隆坡 |
| 馬來西亞檳城 |
| 馬來西亞沙巴 |
| 英國倫敦 |
| 澳洲墨爾本 |
| 澳洲悉尼 |
| 韓國首爾 |
| 台北 |
| 日本東京 |
| 日本大阪 |