旁置成本
旁置成本（粵拼：pong4 zi3 sing4 bun2；可以理解做擺咗埋一邊嘅成本噉解），又叫既出之物[1]，係經濟學同商業決策入面嘅一個術語，指已經發生咗或者應承咗人要支付、所以無得收返嘅成本支出。呢個概念通常係用喺項目嘅投資決策上嘅—原則上，決策者做決定嗰陣要忽略過去嘅旁置成本，因為呢啲旁置成本無論如何都係攞唔返嘅。
阿偉：「我哋已經
舉例說明，想像家陣要開發一隻視像遊戲，遊戲開發者實要使錢，請人返嚟做程式編寫同埋製作電腦圖像等嘅工作；順利嘅話，佢哋會開發出一隻好賣嘅遊戲，吸引到夠多人買，最後賺到利潤；而想像喺開發途中，佢哋同一位編程員簽好咗約，應承會支付若干咁多人工請佢返嚟寫程式，喺簽約嗰一刻份簽已經返唔到轉頭，佢哋將要畀嘅呢一筆錢就係旁置成本嘅一個例子。
基本概念
編輯2001 年諾貝爾經濟學獎得主之一嘅美國經濟學家約瑟夫·斯蒂格里茨用過一個生活例子唻解釋旁置成本係乜嘢。佢話[未記出處或冇根據]：
「假如你花 7 文美元買咗一張戲飛，你懷疑齣電影值唔值 7 文。睇咗半個鐘頭之後，你嘅所見證實咗你最擔心嘅嘢：齣電影好唔掂。你應該離開戲院嗎？喺做呢個決定嘅時候，你應該唔理嗰 7 文，佢係旁置成本，無論你走唔走，錢都收唔返。」
斯蒂格利茨喺呢度唔單止生動噉講清楚乜嘢係旁置成本，而且仲指明人對待旁置成本應該持點樣嘅態度。
順帶一提，旁置成本喺概念上都係固定成本（固定成本：成本一種，指就算盤生意產出同賣出嘅貨品服務嘅量升，都唔會升跌嘅成本），但固定成本唔一定係旁置成本：旁置成本定義上就係定死咗無得變嘅，所以一件旁置成本實會係固定成本；而家想像買咗部機器返嚟幫手做生產，部機器係固定成本，因為就算賣得多咗貨，買入部機同（例如）維修部機要用嘅錢都係固定咗唔會變嘅，不過假如部機有得退貨而且仲會原銀奉還，噉買呢部機造成嘅成本就唔係旁置成本[2][3]。
行為謬論
編輯原則上，做商業決策嗰時理應淨係在意啦更成本—即係自己而家嘅選擇可以影響得到嘅成本。旁置成本已經無咗，無論將來做啲乜都唔會挽回得到，所以理應唔納入商業決策嘅考慮範圍內。不過現實表明，啲人做決策嗰陣往往會受到旁置成本影響。
學者同決策者講旁置成本謬論，正正就係指企業同人做商業或者經濟決策嗰陣成日有嘅一種心態[4][5]：啲人成日諗住
持有呢種心態嘅企業或者個人，往往會持續噉抌錢落去蝕緊嘅生意嗰度，最後損失慘重，當初及早收手反而會有利好多；例如想像一個爛賭嘅人去賭場，佢轆咗幾次老虎機之後輸咗 2,000 文港紙咁多，佢有旁置成本謬論，覺得自己「都使咗咁多錢，點都要繼續賭落去」，然後就繼續賭並且損失更多嘅錢，而唔係及時做出「收手」呢個理性啲嘅決定。廿一世紀初嘅商學界一般認為，旁置成本謬論噉嘅心態係唔理性嘅，屬於謬論嘅一種。
唔少經濟學方面嘅研究者都有興趣研究「旁置成本謬論點解會發生」呢條問題。有一種睇法係主張旁置成本謬論源於損失規避：損失規避係人類嘅一種經濟行為傾向，指人類硬係覺得損失好似影響大啲噉，損失 10 文慘嘅程度大過得到 10 文嘅開心程度；損失規避令人有種傾向，想出盡全力避免損失，如果一個人遇到一盤生意抌極錢都無得賺，就會覺得係蝕咗錢，所以就想靠住「抌多啲錢」嚟扭轉形勢，不過最後都係無用[4]。
Info：教育嘅旁置成本
有行為經濟學家喺 2010 年發表咗篇文，講佢哋做嘅一場實驗。場實驗係噉嘅[6]：研究者搵咗 400 幾位讀緊本科嘅學生返嚟，叫佢哋喺虛擬環境下做決策；場決策如下—受試者得到一個工作柯
化 ，個柯化要求佢哋上一個短嘅課程，個課程（A）大約要 100 文美金學費，無得退錢，合格率係 75% 咁高；而喺呢個時候，研究者暗中將受試者分咗做三組，當中
- 第一組受試者可以用 50 文美金嘅價上堂；
- 第二組受試者可以用 100 文美金嘅價上堂；
- 第三組受試者就要用 150 文美金嘅價上堂；
啲受試者唔知自己同其他受試者係邊組。畀咗學費之後，研究者就講畀佢哋知，話佢哋嘅朋友咁啱搵到一個免費嘅課程（B），而且嗰個課程合格率仲有成 85% 咁高；原則上，最理性嘅選擇係完全放棄課程 A 走去上課程 B，因為無論上邊個課程都係已經蝕咗課程 A 啲學費，但上課程 B 合格率高啲所以著數啲；但實驗結果表明，有唔少受試者選擇繼續上合格率得 75% 嘅課程 A，而且畀咗貴學費（150 文美金）嘅受試者更加大可能會噉做。
一般認為，呢場實驗係展示咗旁置成本謬論：受試者已經投放咗資源去上課程 A —尤其係畀咗貴學費嗰班人，所以佢哋有股行為傾向，想去上課程 A，就算搵到一個合格率更高（客觀回報高啲）又免費嘅課程，佢哋依然照樣繼續上。
睇吓
編輯| 「 | 」 | |
——可以睇睇《楊修之死》 | ||
參考
編輯以下係文中用咗嘅重要概念嘅英文名：
- ↑ 〈自言自語 - WYJimmy: 管理會計(三)-「轉移定價」(Transfer pricing)〉。
- ↑ （英文） 乜嘢係旁置成本—同埋旁置成本謬誤？，投資百科。
- ↑ Navarro, A. D., & Fantino, E. (2005). The sunk cost effect in pigeons and humans. Journal of the experimental analysis of behavior, 83(1), 1-13.
- ↑ 4.0 4.1 Why are we likely to continue with an investment even if it would be rational to give it up?. The Decision Lab.
- ↑ Strough, J., Mehta, C. M., McFall, J. P., & Schuller, K. L. (2008). Are older adults less subject to the sunk-cost fallacy than younger adults?. Psychological Science, 19(7), 650-652，呢場實驗顯示，年老嘅人似乎無咁易受旁置成本謬論影響。
- ↑ Coleman, M.D. Sunk Cost, Emotion, and Commitment to Education. Curr Psychol, 29, 346–356 (2010).
拎
編輯- （英文） 乜嘢係旁置成本—同埋旁置成本謬誤？，投資百科。
- （英文） 集換式遊戲 - II：利用我哋搜集嘅衝動嚟搵錢；呢段 YouTube 片講到集換式咭遊戲（TCG）等有收集成份嘅遊戲，討論呢類遊戲點樣引誘玩家想一路 kip1 住玩落去，期間有提到旁置成本嘅概念—簡單講，佢哋提出有玩開 TCG 儲開咭嘅人投放咗相當量嘅錢買咭，所以會有股旁置成本式嘅衝動想繼續玩落去。