明富環球
明富環球（MF Global，以前叫Man Financial，紐交所：MF）係美國嘅期貨交易商。喺全球主要城市都有辦事處，包括香港、紐約、倫敦、芝加哥、巴黎、星架坡、悉尼、多倫多、東京、台北、孟買、杜拜同百慕達。
公司提供場內同場外金融衍生工具交易同結算服務，亦設有非衍生工具嘅外匯相關產品同上市證券買賣服務；同時亦提供一系列金融衍生產品，包括利率期貨同期權、股票同相關工具、外匯、能源同金屬期貨、農產品同其他商品期貨。公司客戶層面廣泛，當中包括大型金融機構、跨國工商集團、對沖基金、互惠基金等等。
史
編輯1783年，James Man搞咗壇做糖嘅貿易嘅生意，就係明富環球嘅前身。到1980年代，公司轉型搞金融。
2010年3月，Jon Corzine開始做明富環球嘅主席同埋行政總裁。Corzine之前係投資銀行高盛嘅行政總裁，上任之後銳意將明富環球打造成另外一間高盛，所以積極做一尐高風險交易，例如大舉買歐豬五國嘅債券，市場上都有人將呢間公司叫做「小高盛」。另外，明富環球嘅分析員大降滙豐嘅目標價，亦係明富環球成功出位畀投資者認識嘅原因之一。
隨住2011年歐債危機湧現，明富環球喺2011年10月25號宣佈季度業績嗰陣時話佢哋一季蝕咗1億9160萬美金。因為佢哋投資咗好多落去歐洲政府發行嘅債券，而喺之前穆迪、惠譽等等評級機構將呢尐債券嘅評級降至垃圾級，令呢尐債券嘅價值大跌。
10月31號，明富環球申請破產保護，係美國史上以資產計第七大破產案，200幾年歷史嘅企業好有可能就噉玩完。有報導指，明富環球投資嘅歐洲債券可能達到60億美金。