注意力經濟

注意力經濟（粵音：zyu3 ji3 lik6 ging1 zai3 | 英文：attention economy）係經濟學同市場學等領域上嘅一套思考方法。注意力經濟嘅概念將消費者嘅注意力睇成一種唔夠分，所以賣家之間會爭嘅資源：想像家陣有一大柞廣告；原則上，一間公司會想自己嘅廣告得到消費者嘅注意力（因為如果消費者連睇都冇睇到個廣告，就唔使旨意佢哋會知件產品存在，更加唔使旨意佢哋會諗住買），所以公司之間就爭住將自己嘅廣告設計到有咁靚得咁靚，想要「爭消費者嘅注意力」。

一大柞廣告牌，間間公司都想消費者留意自己嗰個牌。

因為噉，市場學上嘅研究成日都會諗「點樣先可以攞到消費者嘅注意力」呢條問題：喺最簡單情況下，研究者可以做啲心理實驗，將受試者分做若干組，唔同組會睇同一件產品嘅唔同廣告，呢啲唔同廣告喺特性 $x$ 上有差異；舉個簡單例子，想像家陣將受試者分做幾組，每組各自睇一個廣告，唔同組嘅廣告喺背景色水（$x$）上有差異，但除此之外完全一個板；如果研究者發現某隻色水嘅背景零舍能夠吸引受試者注意力（或者零舍能夠令受試者事後記得件產品），噉佢就可以算係搵到啲對廣告設計嚟講有用嘅資訊。有關呢啲研究嘅詳情，可以睇吓消費者心理學嘅嘢。

基本概念

内文：注意力

睇埋：稀缺性

注意力係一系列嘅認知過程，涉及一隻動物由接收到嘅外界資訊當中篩選一部份出嚟集中處理，並且忽略嗰啲唔係集中處理緊嘅資訊：一隻動物（包括人類）嘅腦無時無刻都喺度接收緊極大量嘅資訊，多到冇可能一吓過處理得嗮；好多時，為咗要有效噉解決佢生存所需要解決嘅問題，隻動物要集中處理同佢生存最有啦掕嗰啲資訊，同時又焗住要忽略嗰啲同佢生存冇咁有啦掕嘅資訊。喺對注意力嘅研究上，認知科學家一般都興將注意力想像成一種有限嘅資源，由個腦嘅某啲系統決定要點樣分配落去唔同嘅資訊源嗰度。

根據廿一世紀初嘅研究，人腦嘅注意力系統大致上可以分做三大子系統，而呢三個系統之間嘅互動就控制住專注同持續注意力等嘅注意力相關功能：

1. 負責令個人意識到周圍資訊嘅警覺系統；
2. 負責將注意力資源由一樣嘢移去第樣嘢嗰度嘅導向（orientation）系統；
3. 負責處理衝突（例如有兩個刺激同時要求注意力）嘅執行控制（executive control）系統。

一隻狼用眼𥄫實佢有興趣嘅物件；定義上，注意力集中點係個心靈資訊處理能力嘅集中之處，一隻動物用眼－收集資訊嘅器官－望實一件物件表示，佢將自己嘅注意力集中喺嗰件物件上。可以睇眼動追蹤。

注意力經濟就係一種商學觀點，將消費者嘅注意力睇成一種稀缺（企業想爭）嘅資源。

相關概念

睇埋：好奇感

Info：Teaser

2006 年一架火車車廂上面嘅一幅 teaser 式圖像，宣傳《達文西密碼》。

Teaser 係營銷手法一種，指做宣傳（尤其係廣告）嗰陣特登唔講嗮啲資訊畀消費者知，用嚟引起消費者嘅好奇感。

電子遊戲同電影等嘅影視娛樂作品成日會用到預告片：預告片係一啲件作品正式出街之前發佈嘅影片，會向 fan 史展示隻遊戲或者套戲入面啲片段；原則上，如果段片夠嗮吸引－例如展示到啲好高質素嘅 CG，就可以引起消費者嘅興趣，吸引佢哋去玩隻遊戲或者睇套戲。

Teaser 片就係預告片（或者第啲預告式材料）嘅一種形式，指短、透露極少資訊嘅預告片，亦有營銷研究者將 teaser 定義做「營銷用信息一種，唔確定噉講明件產品嘅內容，又或者包含嘅資訊唔完整」。例如段片或者幅海報淨係描繪咗一件對套戲嘅情節嚟講重要嘅物品，但唔講明件物件係乜或者點解重要。營銷相關工作者指出，teaser 式嘅做法能夠引起消費者嘅好奇感，而好奇感就會引起一連串嘅認知同行為變化，包括

• 將注意力擺喺 teaser 相關資訊度，
• 用搜尋器摷有關段 teaser 嘅內容嘅資訊，
• 喺 YouTube 度睇片，估吓 teaser 入面嘅嘢係乜意思，

... 呀噉。呢啲由好奇感引起嘅行為，被指能夠令啲消費者成日諗住件產品，最後提升佢哋買隻產品嘅機率，對營銷嚟講好有用。

爾種手法唔限於影片，例如書後面嘅簡介可以算係一種 teaser；報章雜誌喺網站節錄一兩段畀人免費睇，然後叫人想睇全文可以訂閱，都可以算係 teaser 嘅手法。

睇埋

• 落廣告
• 點擊率
• Cyberpunk