北環綫

  提示：呢篇文講嘅唔係北部循環線、北港島綫或中環北站。

北環綫（英文：Northern Link）係香港計劃起嘅鐵路綫之一，會連接原有嘅港鐵屯馬綫錦上路站同埋東鐵綫嘅落馬洲支綫，並提供第二條連接落馬洲站（福田口岸）嘅路綫。

歷史

北環綫原本係《鐵路發展策略》中西部走廊鐵路近郊客運綫嘅一部份，後來政府將呢段暫緩興建，並稱佢為西鐵第二期。及後喺香港政府嘅《鐵路發展策略2000》被重點提出，係六個主要新鐵路計劃之一，目標2011年至2016年完成，當時計劃更連接羅湖站。近年同廣深港高速鐵路香港段合併為一個項目進行研究，喺廣深港高速鐵路香港段嘅「共用通道方案」下，高速鐵路列車將行經北環綫錦上路至洲頭附近嘅一段路軌；然而共用通道方案喺2007年8月香港政府決定用「專用通道方案」嘅同時被否決。另外，擬建嘅港口鐵路線亦可能同北環綫共用路軌。東鐵綫落馬洲支綫同西鐵綫錦上路站已經預留設施作伸延之用。

呢個狀態維持到而家。雖然九廣鐵路公司嘅鐵路網已經交咗畀香港鐵路有限公司營運50年，而香港鐵路有限公司於2008年年報中有描述「北環綫」嘅路綫，但由於香港特別行政區政府冇表態，北環綫嘅處理亦冇包括喺兩鐵合併嘅內容裏面，所以其實並冇確實嘅結果。

路政署喺2009年向立法會話，北環綫嘅規劃要考慮新界新發展區嘅規劃系數，預計有關土地用途、人口／就業數據嘅初步研究結果會喺2010年初得出，到時會檢討北環綫工程計劃嘅走綫、車站選址同埋實施時間表。而《香港經濟日報》亦喺2009年4月14號引述消息指，港府內部已確定，有需要起北環綫，以配合港深機鐵引發香港同埋深圳地區嘅經濟發展。

定綫

原計劃嘅北環綫，會由西鐵綫嘅錦上路站出發，喺中途嘅凹頭、牛潭尾同埋新田設三個預留車站，取消咗原本喺《鐵路發展策略2000》建議新田同埋古洞之間連接九廣西鐵（西鐵綫）同埋九廣東鐵（東鐵綫）嘅直通路綫，然後喺新起嘅洲頭站接駁東鐵綫落馬洲支線，最後連接支綫既有嘅落馬洲站，兩鐵合併後，港鐵仍然沿用呢個方案。

直至2010年9月，港鐵喺中期報告中修改咗走綫，新路綫同當年嘅《鐵路發展策略2000》提出嘅計劃相似，以「丫」型嘅分岔設計，一方面會同樣連接東鐵綫落馬洲支線嘅落馬洲站，並取消興建洲頭站，改為起另一條分岔線到古洞站作為東鐵綫以及北環綫嘅轉車站，以梅花間竹嘅方式前往落馬洲站或古洞站。若果落實，北環綫會成為通往落馬洲鐵路口岸嘅第二條鐵路。

車站一覽‧接駁路線

			車站套色同埋名	喺邊區	車站接駁	啟用日期
北環綫
			落馬洲	元朗區	東鐵綫	2007年8月15號
			坪輋／打鼓嶺	北區		暫時擱置
			軍地
			粉嶺北
			上水北
			古洞		東鐵綫	預計2027年
			新田	元朗區		預計2034年
			牛潭尾
			凹頭
			錦上路		屯馬綫	2003年12月20號
附註
LMC 原本連接新田站同落馬洲站嘅支線將暫緩興建，等到跨境運輸需求有增加嗰陣先起。 + 凹頭、牛潭尾、新田三站會同北環綫同時啟用。預計喺2025年動工，2034年通車。 - 暫時唔起呢段路，但預留延伸條件等將來發展嗰陣就起。

出面網頁

• 港鐵北環綫項目網站
• 香港立法會北環線資料庫
• 路政署網頁：道路及鐵路網—北環線