澄母

澄母（粵拼：cing4 mou5；中古漢語拼音：dring）係中古漢語聲母，屬舌音中嘅知組，係全濁聲母。呢個聲母接二、三等嘅韻母，同一、四等嘅定母互補。下面係佢嘅例字。

一等	二等	三等	四等
	橙dreng、櫂drauh、宅drak	馳drie，篆dryenx，滯dried，軸driuk

擬音

對澄母嘅擬音分兩派，一派認爲佢係定母嘅顎化，擬爲/ȡ/，另一派認爲佢係定母嘅捲脷音，擬爲/ɖ/。

對上古音嘅研究有個定論係古無舌上音，舌上歸舌頭，亦即澄母係分化自定母嘅。由於定一、四等同澄二、三等互補，係二、三等韻母嘅介音構成咗佢從定母分化嘅條件。

澄母喺粵語清化、塞擦化，平仄送氣狀況各片粵語唔同，喺廣府粵語，平聲送氣（c），仄聲唔送氣（z）。對聲調嘅影響係，澄母字派入陽聲調。

下面係一啲例字嘅古今音對比，第一欄例字，第二欄中古音（切韻），第三欄現代粵音：

調返轉頭，現代粵語中嘅c聲母來源自中古音嘅徹、澄、從、清、初、昌、邪、崇八母，z聲母源自中古音嘅知、澄、從、章、莊、精、俟、邪、崇九母。

對於可以區分平捲脷嘅粵語，澄母屬捲脷音，如吳川話，澄母發[t͡sʰ]（吳川話嘅全濁聲母清化後一律送氣）。成個粵語，平捲分法係濟南型。

澄母喺吳語繼續係濁音，但擦化，對應嘅吳拼係z。

澄母喺普通話歸入捲脷音，清化後送氣狀況同廣府粵語一樣，平聲送氣，讀ch，仄聲唔送氣，讀zh。唯有澤、擇字讀成平脷音，讀zé，不過擇字有白讀音，讀zhái，用喺「擇菜」呢個詞。

喺日文，澄母同定母一樣，吳音讀だ行（[d]／[d͡ʒ]／[d͡z]），漢音讀た行（[t]／[t͡ʃ]／[t͡s]）

喺韓文，澄母二等同定母一等一樣，繼續係塞音，大多讀ㄷ，如茶讀다，少數送氣讀ㅌ，如濁讀탁；澄母三等同定母四等一樣，塞擦化，大多讀ㅈ ，如直讀직，少數送氣讀ㅊ，如蟲讀충。