曾蔭權
(由煲呔曾跳轉過嚟)
曾蔭權，GBM，KBE（粵拼：zang1 jam3 kyun4，1944年10月7號—），花名「煲呔曾」、「貪曾」、「649」，係第二任香港特別行政區行政長官，亦做過財政司同政務司司長。
| 曾蔭權 | |
|---|---|
 曾蔭權（左）同佢老婆鮑笑薇 | |
| 姓名原文 | 曾蔭權 |
| 出生日 | 1944年10月7號  （80歲） |
| 出生地 | 香港日治時期 |
| 國籍 | 中華人民共和國 |
| 信奉 | 天主敎 |
| 母校 | 香港大學、甘迺迪政府學院、哈佛大學、香港華仁書院 |
| 職業 | 政治人 |
| 配偶 | 曾鮑笑薇 |
| 兄弟姊妹 | 曾蔭培 |
[改維基數據] | |
底細
編輯- 1944年10月7號喺香港出世，屋企排行最大。
- 1964年喺香港華仁書院預科畢業之後，做咗一排輝瑞藥廠推銷員。
- 1967年加入政府打工，做二級行政主任。
- 1971年考到政務主任。
- 1974年調去財政科。
- 1977年借調去菲律賓馬尼拉亞洲發展銀行。
- 1981到1982年得到政府保送去美國哈佛大學，攞咗個公共行政碩士。
- 1982年做沙田政務專員，嗰時佢嘅上司係新界政務司鍾逸傑爵士。
- 1984年做貿易署副署長。
- 1985年做副常務司。
- 1989年做行政署長。
- 1990年負責搞居英權計劃。
- 1991年做貿易署署長，兼總貿易談判代表。
- 1993年做庫務司。
- 1995年做第一位華人財政司。
- 1996年7月6號第一次署任港督。
- 1997年7月1號香港主權交畀中國之後，做財政司司長，於是乎又做埋行政會議嘅成員。
- 1998年8月14號，決定入市。
- 2001年5月1號，頂替陳方安生做香港特別行政區政務司司長。
- 2005年3月12號，因為董建華唔撈而做署理行政長官。根據香港特別行政區基本法，政府喺7月10日選新特首，曾蔭權再署任多六個月，同時兼任政務司司長。
- 2005年5月25號，宣布唔做政務司司長，準備參選新嘅行政長官補選。
- 2005年6月2號，辭職政務司司長嘅請求俾中華人民共和國中央人民政府批咗，正式宣布參加行政長官補選。
- 2005年6月15號上晝 11 點 50 分，到選舉事務處交參選提名表，下晝 5 點選舉主任朱芬齡法官確認佢嘅提名有效。就係咁，曾蔭權一共得到 710 個選委嘅支持，其中包括 674 份提名表格同 36 份支持同意書。
- 2005年6月16號下晝 5 點，行政長官嘅選舉提名期結束，選擧主任宣佈收到嘅六份提名中，其中曾蔭權嗰份得到成 674 個選委提名，係唯一有效嘅提名。因此佢根據《行政長官選擧條例》，宣佈曾蔭權係唯一嘅行政長官候選人，重自動當選新一任特首。
- 2005年6月21號得到中央政府正式任命，嗰日即刻上任。
- 2005年6月24號上晝 9 點喺北京人民大會堂宣誓就職。
- 2007年3月25號喺第3屆香港行政長官選舉入面，以 649 票對 123 票贏咗對手梁家傑，當選第 3 屆行政長官。等埋中華人民共和國國務院正式任命之後，響2007年7月1號連任行政長官。
- 2010年5月14號夜晚10點半透過政府新聞處發出唔參與5月16號投票嘅聲明。
- 2010年6月17號夜晚6點半開始對余若薇嘅政改電視辯論，其間照稿讀，事後自認輸咗，但同年6月尾，香港2012年政改方案成功通過。
- 2012年，曾蔭權被東方日報指佢接受富豪款待，出外公幹要住最豪華嘅酒店，而俾人話佢黐商界同埋亂使錢，於是，煲呔曾就被貶稱為「貪曾」。
- 2015年10月5號，曾蔭權被香港廉政公署起訴兩項公職人員行為失當罪。
- 2017年2月17號，曾蔭權一項「公職人員行為失當」嘅控罪罪名成立。[1]
- 2017年2月22號，煲呔曾被判坐花廳20個月，成為香港開埠以嚟，第一位「監躉特首」[2]。
- 2019年6月26號，曾蔭權喺終審法院打甩公職人員行為失當罪。
榮譽博士
編輯參考
編輯- ↑ 〈曾蔭權藉公職人員行為失當罪成 獲准繼續保釋〉。原著喺2017年2月17號歸檔。喺2017年2月18號搵到。
- ↑ 法官：從未見過有人從如此高處墮落 曾蔭權囚20個月
- ↑ 〈榮譽學位及大學院士名錄 - 香港理工大學〉 (繁體中文)。香港理工大學。
- ↑ 第55屆大會 (1999) | 頒授學位典禮 | 香港中文大學，香港中文大學 （繁體中文）
- ↑ 〈曾蔭權 - 檔案 - 名譽博士學位畢業生 - 香港大學名譽博士學位畢業生〉 (繁體中文)。香港大學。
