居英權計劃
呢篇文章講嘅係20世紀90年代英國為香港人開放居留權的計劃。想搵廣義的英國居留權，請睇「英國居留權」。居英權計劃，正式叫做英國國籍甄選計劃（英文：British Nationality Selection Scheme），係英國政府根據《1990年英國國籍法令(香港)》[1]喺1990-96年之間喺英屬香港推行嘅一個計劃，俾指定嘅合資格人士能夠有英國居留權。
背景
編輯1984年，中國國務院總理趙紫陽同埋英國首相戴卓爾，代表中英兩國喺北京簽署《中英聯合聲明》，確認1997年嘅香港主權移交。當中英方已經表明咗香港人唔會獲得英國居留權，不過為咗安撫人心，仍然喺1985年制訂咗《1985年香港法案》，新增咗英國國民（海外）嘅身份，並且喺1987年開始向香港人簽發英國國民（海外）護照。
不過，因爲英國國民（海外）嘅身份並冇居英權，所以令唔少港人都覺得失望，香港隨即開始出現咗移民潮。喺1989年六四事件之後，香港嘅移民潮步入高峰。面對移民潮嘅問題，時任行政局議員嘅鄧蓮如女男爵，就曾喺六四事件之後公開懇求英國，唔要將英國嘅人民交俾去「一個毫不猶疑咁用坦克同埋武力嚟鎮壓人民嘅政權」（A regime that did not hesitate to use its tanks and forces on its own people）[2][3]。另外，佢又曾經同另一位行政局議員李鵬飛一齊去倫敦，代表兩局議員，以道義理由喺居英權嘅問題上，同英國進行多番嘅遊說。但係，英國因爲中國政府唔斷施加嘅壓力，同時擔心香港人會湧到去英國住，所以仍然唔肯俾全香港所有嘅英國屬土公民擁有英國居留權。
最後，爲咗平衡英國政府同埋香港人嘅利益之下，英方喺1990年同意批准咗一個折衷方案，容許部份香港人攞到居英權，就係呢個“居英權計劃”。
內容
編輯1990年，時任香港總督嘅衛奕信爵士公佈居英權計劃，提供最高50,000人同佢哋嘅家眷名額，依照《1990年英國國籍法令(香港)》而成為英國公民。根據呢條法例，總督可以向國務大臣推薦最多5萬位香港戶主，嚟登記成為英國公民[4]:1。名額主要俾啲曾經做過敏感職位嘅政府公務員，同埋嗰啲對香港有貢獻、對香港前途有重要性嘅人，亦都包括最有能力同動機去申請移民嘅人。如果主要申請人身份嘅申請獲准，佢嘅配偶同埋18歲以下嘅仔女亦都可以申請登記做英國公民[4]:1。擁有居英權嘅人，可以隨時去英國定居，完全冇需要喺英國逗留所需要嘅年數嚟申請居留權，而持有人嘅仔女亦都可以喺英國讀任何公立嘅中學。呢個方案可以俾所有攞到居英權嘅人，安心咁喺香港生活，但係萬一香港出現啲問題，就可以隨時去英國，嚟減輕香港人才同資金流失嘅問題。由1990年12月1號開始，民政事務處、人民入境事務處辦事處、同埋政府新聞處都會派發申請表格同埋詳細指南[4]:2。所有登記程序喺1996年12月31日完咗。
當時任職行政署署長嘅曾蔭權（後嚟成爲咗第2任行政長官），亦都被委派去推廣居英權計劃。後嚟，透過李鵬飛同鄧蓮如嘅遊說，英國政府最後亦喺1996年同意俾香港嘅退伍軍人之配偶或者寡婦，同埋所有無國籍嘅香港居民，到攞到英國居留權。
符合申請嘅要求
編輯根據法案，申請人需要喺香港定居同埋擁有以下任何一個身份[5]：
符合資格嘅人可以分為四類：
- 擁有特殊專業技能嘅專業人士，一般職業類別，名額36,200[4]:1：醫生、教師、工程師、物理治療師、法官、律師、會計師、同法醫官等等
- 企業家類別，名額500[4]:1：董事長、行政總裁、總經理、同非執行董事等等
- 紀律部隊類別，名額7,000[4]:1：皇家警察、消防處、懲教署、海關、同埋人民入境事務處等等
- 敏感工作類別，名額6,300[4]:1：例如皇家香港警察政治部、香港軍事服務團、同皇家香港輔助空軍等等
大部分嘅申請將會按一般職業嘅類別提出，所有紀律部隊嘅成員應該按紀律部隊類別嚟提出申請，至於屬於敏感工作類別同埋企業家類別嘅人士，將會有邀請去提出申請[4]:1。
一般喺職人士同紀律部隊人士嘅申請係透過計分方式嚟處理。如果申請人擁有英國國籍以外嘅其他國籍（中華人民共和國國籍除外，不過包括中華民國居留權），唔論係唔係自願，都一律喺申請計分嘅時候扣分（每個額外國籍扣200分），不過唔會被視爲唔符合資格[6]。
計分準則
編輯居英權計劃嘅計分準則係以800分為滿分，總共分為下面7個指標嚟計分數：
- 年齡（最高為200分）
- 工作經驗（最高為150分）
- 教育程度（同上）
- 特別程況（同上）
- 英語能力（最高為50分）
- 同英國嘅關係（同上）
- 公共及社會服務（同上）
中方反應
編輯
中華人民共和國方面對居英權計劃表示唔滿，亦對表示唔承認居英權計劃[7]，華裔持有人一般仍然被視為中國公民。由於中方規定喺主權移交後嘅特區政府，出掌要職嘅人士均須為冇有外國居留權嘅中國公民，所以中方唔會俾外國公民喺主權移交後出任政府要職。
現時或曾經擁有英國公民身份之名人
編輯1990年英國國籍甄選計劃
編輯- 林鄭月娥 (已經放棄咗)、丈夫林兆波、兩個仔（林節思、林若希）[8][註 1]
- 葉劉淑儀 (已經放棄咗)
- 周融
- 黎智英
- 李波
- 林新強
- 梁君彥 (已經放棄咗)
- 胡國興 (已經放棄咗)
- 余若薇 (已經放棄咗)
- 楊哲安 (已經放棄咗)
- 李家超 (已經放棄咗)
生於英國
編輯- 李國寶 (已經放棄咗)
居留英國五年或以上
編輯睇埋
編輯註
編輯攷
編輯- ↑ "British Nationality (Hong Kong) Act 1990". 原先內容歸檔喺2010-12-31. 喺2016-02-05搵到.
- ↑ 高馬可 (2007–07). A Concise History of Hong Kong. 香港: 香港大學出版社. p. 192. ISBN 9789622098787. 原先內容歸檔喺2021-02-24. 喺2020-10-26搵到.
{{cite book}}: CS1 maint: date format (link) - ↑ 〈英國大選知識與華人參政面面觀〉。原先內容歸檔喺2021-04-08。喺2020-07-06搵到。
- ↑ 4.0 4.1 4.2 4.3 4.4 4.5 4.6 4.7 《《英國國籍甄選計劃簡介》》。政府印務局。1990。
- ↑ "British Nationality (Hong Kong) (Selection Scheme) Order 1990". 原先內容歸檔喺2021-05-17. 喺2017-01-05搵到.
- ↑ 〈擁有台居留權申請居英權者將被扣二百分〉。《華僑日報》。1990-10-19。
- ↑ 〈中华人民共和国国籍法: 全國人民代表大會常務委員會關於香港的釋法〉。原先內容歸檔喺2017-01-18。喺2017-01-05搵到。
- ↑ 〈林鄭稱不覺得丈夫須棄英籍 讚林生非常配合傳媒〉。《明報》。2017-03-16。原先內容讚林生非常配合傳媒 歸檔喺2020-07-17。喺2020-07-16搵到。
- ↑ 〈做個勇敢中國人〉。《眾新聞》。2020-07-08。原先內容歸檔喺2020-07-16。喺2020-07-16搵到。