短篇小說

短篇小說（粵拼：dyun2 pin1 siu2 syut3），或者譯做短篇故仔，顧名思義係泛指短篇、以散文形式存在嘅虛構故仔。短篇呢隻詞嘅定義查實有些少含糊，大致上指篇小說係正常人可以一口氣噉由頭睇到落尾嘅。

史上好多出名嘅故仔都係可以一吓過睇嗮嘅：

• 左上：《美女與野獸》；右上：《三隻豬仔》；
• 左下：俾細路睇嘅故仔書多數係一嘢睇得嗮嘅；
  
• 右下：《天方夜談》啲故仔多數都係偏短嘅。

到咗廿一世紀初，短篇小說經已成為咗文學界嘅重要部份。好多作家都會寫短篇小說，並且將自己嘅作品喺文學雜誌或者選集等嘅地方發表。例如响 2017 年，短篇小說同選集淨係喺英國就經已創造咗值 5,880,000 歐羅咁多錢嘅銷售量，甚至有文學評論家話短篇小說搶咗長篇小說嘅風頭，搞到後者嘅市場萎縮咗。

基本定義

睇埋：散文同虛構故仔

喺定義上，短篇小說係指「短」嘅散文故仔作品，當中：

• 散文係指篇文寫到似自然講嘢噉，例如廿世紀嘅中文書面語係想寫到似標準官話講嘢，粵語白話文（粵文）係想寫到似粵語講嘢，英文係想寫到似英格蘭話講嘢，呢點令散文同詩歌好唔同；
• 虛構故仔係指篇文係想要表達一個虛構嘅故仔；喺呢點上，短篇小說同中篇小說以及長篇小說一樣，要考慮到角色嘅發展以及情節嘅編排，會想用（例如）情節發展嘅出乎意料嚟令讀者睇咗覺得過癮；

不過「短」呢隻字嘅定義就有些少含糊，到咗廿一世紀初都仲有唔少嘅爭詏。喺最基本上，短篇小說要係一般人可以坐低然後一嘢過由頭睇到落尾嘅，例如美國浪漫主義作家愛倫坡（Allan Poe）就喺 1846 年撰文提到呢點，而俾人譽為英倫科幻之父嘅 H. G. 威爾斯（H. G. Wells）就噉樣描述短篇小說呢樣嘢：

「

（短篇小說）可以係差劣、或者可悲、或者得意、或者令人眼界大開，（短篇小說）淨係得呢一個必要（嘅特徵）－篇嘢淨係需要 15 至 50 分鐘嘅時間就可以大聲噉讀嗮出嚟。

」

字數界定

睇埋：字數

無論係用咩語言嚟寫，「短篇小說」都可以用字數嚟定義。

以廿世紀嘅中文書面語同粵文嚟講，一般係講緊幾千字嘅先會有機會畀人當係短篇小說，長過 10,000 字嘅最少會係中篇小說，而短過 2,500 字嘅好有可能會當係微型小說。

喺廿一世紀初嘅英文圈，一篇散文虛構故仔通常要字數响 1,000 至 10,000 字之間，先至可以算係短篇小說；呢個數字可以視乎地區或者出版者而有異－有啲文學雜誌要求份作品字數响 1,000 至 4,000 字之間先可以算係短篇故仔，而 2020 年嘅美國科幻同奇幻作家協會就話字數要喺 7,500 以下，先肯當係短篇小說噉收份作品；喺實際出版上，短過 1,000 字嘅基本上實會俾人當係微型小說，而長過 10,000 字嘅通常都會俾人當做中篇小說或者長篇小說。英文以外嘅歐洲語言都係咁上下。

起源

「短篇小說」嘅概念係喺 19 世紀左右先成形嘅。

「短嘅故仔」呢家嘢查實歷史好悠久，同語言差唔多一樣咁古老－响公元前以至文明出現之前，一般人之間經已有好多口耳相傳嘅民間故仔，呢啲故仔短（一般人可以一嘢聽完）又可以有虛構性質，不過當時啲人多數唔識字所以冇寫低呢啲故仔；打後中世紀亦有出到好似童話呢啲「一般人可以一吓過睇完」嘅虛構故仔；而現代意義上嘅短篇小說－由玩寫作嘅人特登寫出嚟娛樂人嘅短散文式故仔－就係喺 1790 年代嘅英國度首次出現嘅。

出版

• 文學雜誌
• 選集

睇埋

• 微型小說
• 長篇小說
• 中篇小說

拎

• （英文） Short story，不列顛百科全書講短篇小說呢個概念。
• 第一期《迴響》：短篇小說，Medium
• 粵文短篇小說：夏，Medium
• 粵文短篇小說 — 《逃生艙》，Medium