紅星

  想搵第二個意思嘅話，請睇紅星 (搞清楚)。

  提示：呢篇文講嘅唔係鴻星或洪昇。

紅星（粵拼：hung4 sing1），常見嘅樣係紅色嘅五角星（符號：★），係個常用符號，呢個符號表達嘅含義好多樣，主要係宗敎、政治意味，比如基督教嘅聖誕樹頂有紅星裝飾、意識形態方面有共產主義。呢個符號常見喺呢啲事物度：國徽、國旗、其他類型嘅旗、勳章、節慶裝置、紀念建築、標誌。

紅星

蘇聯國旗度嘅紅星

自20世紀以來，紅星作爲基於列寧主義嘅共產主義嘅特別符號，用得好多下，佢嘅出鏡同另一個共產主義象徵「金星」（又叫黃星）咁上下多，後者可以喺諸如中華人民共和國國旗、越南現行國旗度見到。而喺蘇聯國旗度，紅星鑲喺金星入面，再搭埋錘同鐮喺塊紅旗度。紅星同錘、鐮嘅組合亦見於其他共產主義旗徽度。

不過紅星呢個符號唔係浄衹共產主義嘅意思，亦有其他嘅用法、含義。

共產主義符號

意味

作爲共產主義乃至社會主義嘅象徵，五角紅星嘅五隻角有佢嘅意義。有講法話象徵住勞動者勞動所用嘅五隻手指，同時象徵住世界勞動者分佈嘅五大洲；又有種講法話，呢五隻角代表共產主義領導下嘅五個社會群體，即係後生、軍人、工人、農民、學者（泛指知識階層）。紅星一般象徵住共產主義政黨支配、領導下嘅社會新秩序，而呢種秩序據共產主義意識形態嘅睇法，係正義嘅，所以紅星係佢正義嘅表徵。

起源

紅星作爲共產主義符號，可以追溯到一戰即將結束時嘅俄國內戰（1917年~1922年）。1917年，同德意志帝國、奧匈帝國打仗嘅俄軍輸咗，被迫撤退到莫斯科，同莫斯科啲守軍撈埋一齊。爲咗分開莫斯科本地守軍同撤退嘅俄軍部隊，守軍軍官喺佢啲士兵嘅帽度加粒五角星。日後呢班莫斯科守軍同蘇聯紅軍、布爾什維克政府合流，啲士兵就將粒五角星塗紅，因爲紅色象徵共產主義，於是就有咗紅星呢個共產主義符號。

有種講法話，紅星係紅軍當中嘅猶太人士兵引入嘅嘢。呢種講法話，喺俄國革命時，啲猶太士兵將俄國當作「應許之地」，相信猶太人會喺俄國企返起身，於是佢哋就將自身標誌嘅猶太星塗紅。呢種講法存疑，唔係幾可靠。呢種講法嘅根由在於排猶同反共有重疊之處，當年俄國革命爆發後，掀起排猶風潮，排猶嘅人始終認爲共產主義起勢係猶太人搞鬼。而實際上猶太人標誌嘅大衛星係六角星，共產主義者嘅紅星係五角星，呢兩樣嘢實質唔同，呢種講法可能撈亂咗佢哋，然後曲解出噉嘅睇法。

除咗傳得最開嘅區分守軍嘅講法外，重有種講法話，紅星源自托洛茨基同尼古拉·奇里靈戈一次會面。1917年，作爲布爾什維克成員，奇里靈戈擔任紅軍總司令官，同時佢亦係個世界語者，所以佢隨身戴住世界語嘅象徵綠星徽章。托洛茨基見到後問粒綠星嘅含義，奇里靈戈介紹話粒星嘅五隻角分別象徵世界五大洲。托洛茨基聽咗後，佢有個諗法，就係啲紅軍士兵都應該有粒紅星喺身，個意頭借自綠星。呢種講法有個問題，在於呢場會面冇證據確定係幾時、邊度嘅事，所以呢種講法堅定流係未知嘅。

• 
  蘇聯紅軍旗
• 
  蘇聯紅軍嘅紅星（1918年）
• 
  1920年嘅郵票，上面印住嘅紅軍騎兵戴住寶津挪夫卡帽
• 
  拉脫維亞社會主義蘇維埃共和國國徽（1919年~1920年）

用例

内文：蘇聯加盟共和國國旗

共產紅星嘅典型用法係用喺共產主義國家嘅國旗、國徽度，例如蘇聯國徽、南斯拉夫國旗，佢哋上面就有粒紅星。另外，西班牙加泰羅尼亞文地區嘅紅版獨立星旗（Estelada），上面嘅紅星係同時作爲分離主義同社會主義嘅象徵來用。

古巴國旗。呢款國旗喺古巴革命之前用落，星係表示獨立，無關共產主義

廣義上，紅底嘅五角星都算做紅星，比如紅底黃星，雖然呢種嚴格講起應該叫金星，不過佢嘅意味同共產紅星非常接近，所以亦睇做係紅星。呢種意味嘅紅底黃星可以喺中華人民共和國國旗、越南國旗見到，其中中國大陸政權國旗叫做「五星紅旗」，越南現時國旗叫做「金星紅旗」。又比如遠東共和國嘅人民革命軍嘅軍裝度有黃星，呢粒星嘅含義同紅星一樣。紅星又會同鐮同錘一齊出場，鐮錘嘜頭通常放喺紅星入面或者下面。不過唔係所有紅底五角星都係共產主義象徵，比如古巴國旗有紅底白星，呢款國旗喺古巴革命之前就用落。

1989年東歐劇變時，有好多東歐國家嘅共產政權崩潰，之後新起嘅政權紛紛脫共，鏟走佢哋國旗、國徽度粒紅星。之後浄低嘅共產國家中，蘇聯喺1991年尾解體，南斯拉夫喺1992年4月27號解體，佢哋從中分離嘅國家都喺旗徽度拋棄紅星。不過從南斯拉夫獨立嘅馬其頓共和國，雖然佢嘅國旗喺獨立後唔再用紅星旗，但佢嘅國徽一直有粒紅星，直到2009年先將國徽頂粒紅星除低。

之後更有啲國家禁紅星。比如匈牙利，喺1993年修改刑法，喺公眾場合用紅星呢個符號屬違法行爲，不過歐洲人權法院根據言論自由裁定喺匈牙利戴紅星係基本人權。亦有啲前共產國保留紅星，比如蘇聯軍嘅繼承軍俄羅斯軍，脫共之後，2002年定紅星作爲俄軍軍徽，一直到2014年，俄羅斯軍方先宣佈用新標誌。另外以前作爲蘇聯加盟國嘅現時國家，佢哋嘅軍隊、裝備等有唔少重殘留緊紅星。俄軍方經營嘅新聞紙亦係叫「紅星」（俄文：Кра́сная звезда́，拉丁化：Krasnaya zvezda）。

喺東歐，共產政權時代（1945年~1989年）創立嘅一啲體育會、波隊會用「紅星」做名。比如貝爾格萊德嘅紅星足球會（斯拉夫塞爾維亞文：Црвена звезда，拉丁塞爾維亞文：Crvena zvezda），東德萊比錫嘅「Roter Stern」。不過非共產政權國家嘅波隊都會用「紅星」呢個名，比如法國嘅「Red Star F.C.」，瑞士嘅「FC Red Star Zürich」。

冷戰時，包括美國在內嘅反共主義陣營嘅社會主義者都會用紅星呢個符號。喺西方世界，有時會將紅星作爲激進思想嘅表徵，比如1990年代活躍嘅搖滾樂隊討伐體制樂團，佢哋就用紅星來表示佢哋係激進派。

• 
  蘇聯國旗（1923年~1955年）
• 
  蘇聯國旗（1955年~1980年）
• 
  蘇聯國旗（1980年~1991年）
• 
  南斯拉夫國旗（1945年~1992年）
• 
  阿爾巴尼亞國旗（1946年~1992年）
• 
  北朝鮮國旗
• 
  馬其頓社會主義共和國國旗（1946年~1991年）
• 
  南也門國旗（也門民主人民共和國，1967年~1990年）
• 
  貝寧人民共和國國旗（1975年~1990年）
• 
  經濟互助委員會旗
• 
  蘇聯海軍軍艦旗
• 
  蘇聯海軍艦頭旗
• 
  土耳其革命人民解放黨-陣綫嘅旗
• 
  墨西哥沙帕他民族解放軍嘅旗
• 
  蘇聯國徽（1923年~1936年）
• 
  蘇聯國徽（1946年~1956年）
• 
  蘇聯國徽（1958年~1991年）
• 
  北朝鮮國徽
• 
  蘇聯共產黨嘅黨員徽章
• 
  蘇聯軍帽徽
• 
  莫斯科克里姆林宮紅星
• 
  中國人民解放軍軍徽
• 
  中華人民共和國人民大會堂天花度嘅紅星
• 
  西德紅軍嘅嘜頭

廣義「紅星」

實際除咗紅色，作爲共產主義標誌嘅紅星亦可以有以下廣義版本。

• 
  中華人民共和國國旗
• 
  蒙古國旗（1949年~1992年、蒙古人民共和國）
• 
  越南國旗
• 
  中華蘇維埃共和國（1931年~1937年）國旗
• 
  中國工農紅軍旗
• 
  中國人民解放軍旗
• 
  安哥拉國旗（1975年制定；齒輪同柴刀嘅交叉係表示工人同農民嘅團結，又表示共產主義）
• 
  莫三鼻給解放陣綫旗（1997年~2004年；鋤頭同鎚交叉係表示農民同工人團結，亦表示共產主義）
• 
  意大利琶鐵山（Partisan）第63旅旗（1943年~1945年）
• 
  意大利紅色旅旗

其他用例

除咗共產主義意味，紅星呢個符號又有多種用法，比如徽章（好似開拓使、軍隊嘅徽章）、商標（好似喜力啤酒、梅西百貨、Mozilla瀏覽器嘅嘜頭）。

• 
  巴拿馬國旗
• 
  紐西蘭國旗
• 
  阿爾及利亞國旗
• 
  突尼斯國旗
• 
  北塞浦路斯國旗（1984年制定）
• 
  加州州旗
• 
  美國華府旗
• 
  美國阿拉巴馬州伯明翰市旗
• 
  瑞士華黎（Valais）廣東（Canton）市旗
• 
  墨西哥上加利福尼亞1836年叛亂旗
• 
  日本長崎市旗
• 
  法國嘅軍事獎章（1915年）
• 
  日本愛國婦人會參等有功章
• 
  外洋遠航綫紅星航綫（Red Star Line）嘅旗

相集

旗

• 
  1912年嘅美國總統旗
• 
  意大利皇家軍隊嘅旗
• 
  敘利亞舊國旗
• 
  津巴布韋國旗
• 
  匈牙利國旗（1946年~1956年）
• 
  羅馬尼亞國旗（1965年~1989年）
• 
  保加利亞國旗（1971年~1990年）
• 
  香港特區旗

獎章

• 
  鄂圖曼帝國嘅軍人獎章（1915年）
• 
  鄂圖曼帝國嘅慈善獎章（1878年）
• 
  蘇聯紅星勳章（1930年）
• 
  蘇聯勝利勳章（1945年）

建築、裝飾

• 
  芝加哥大學嘅彩色玻璃紅星圖案
• 
  美國華府嘅國家聖誕樹嘅紅星裝飾
• 
  克里姆林宮塔尖粒紅星

徽號

• 
  查理士達爾文嘅徽號
• 
  紐西蘭國徽（1956年）
• 
  津巴布韋國徽（1981年）
• 
  Pierre de Lannoy嘅徽號（1445年~1510年）
• 
  阿爾及利亞國徽（1971年）
• 
  敘利亞國徽（1930年~1958年、1961年~1963年）
• 
  吉布提國徽（1977年）
• 
  法國當山省（Puy-de-Dôme）疏希阿（Chauriat）徽章
• 
  巴西美那斯謝拉斯州（Minas Gerais）徽章
• 
  奧地利豐他尼拉（Fontanella）徽章
• 
  突尼斯國徽
• 
  斯瓜德里也·卡浦羅尼（Squadriglia Caproni）徽號（1918年）
• 
  德國靠斯多夫（Kaulsdorf）徽章
• 
  西班牙安達盧西亞可達（Jódar）徽章
• 
  意大利國徽
• 
  英國牛津大學薩默維學院（Somerville College）徽章

有關嘅書

• Bogdanow, Alexander A. （亞歷山大·亞歷山德羅維池·波格打諾夫）. 《Der Rote Stern》 (德文). ISBN 9783867411974.
• Edgar Snow（艾德嘉·史諾） (1994年). 《Red Star over China：The Classic Account of the Birth of Chinese Communism》 (英文). Grove Press. ISBN 9780802150936.
  • 作者：（美）埃德加·斯諾；譯者：董樂山 (1979年)。《《西行漫記：紅星照耀中國》》 (簡體中文)。生活·讀書·新知三聯書店。
  • 作者：（美）埃德加·斯諾；譯者：董樂山 (2005年)。《《西行漫記：紅星照耀中國》》 (簡體中文)。東方出版社。ISBN 9787506020732。
  • 作者：（美）埃德加·斯諾；譯者：董樂山 (2011年)。《《紅星照耀中國》》 (簡體中文)。作家出版社。ISBN 9787506020732。
• 長辛店機車車輛工廠廠史編委會 (1960年)。《《北方的紅星：長辛店機車車輛工廠六十年》》 (簡體中文)。作家出版社。
• 今村匡平 (1967年)。《《赤い星の下で 解放軍々医留用8年の記録》》 (日文)。信每書籍出版部。
• 金贊汀 (1988年9月)。《《日の丸と赤い星 中国大陸の朝鮮族を訪ねて》》 (日文)。資訊中心出版局（情報センター出版局）。ISBN 4-7958-0832-5。

睇埋

• 金星，又叫黃星，作爲象徵比如可以喺越南旗度見到
• 銀星，又叫白星，作爲象徵比如可以喺美國旗度見到
• 紅星勳章
• 紅旗
• 鎚同鐮
• 克里姆林宮紅星
• 五角星