芥花籽

芥花籽（粵拼：gaai3 faa1 zi2；學名：Brassica napus），又叫油菜籽（jau4 coi3 zi2），係開花植物中嘅十字花科蕓薹屬二年生草本植物，開好多細朵淺黃色花，係食油來源一種，製成品叫芥花籽油。作爲油料作物，芥花籽喺世界各地都有種，比如亞洲、歐洲、紐西蘭等，係世界第三大植物油來源。喺英文，芥花籽嗌「rapeseed」，其中嘅「rape」來源於蕓薹（Brassica rapa），呢個種下面既有油菜又有白菜。芥花籽喺1753年由林奈起學名。

How to read a taxobox 芥花籽
芥花籽
物種分類
界 植物界 （未分級） 開花植物 門 被子植物門 （未分級） 真雙子葉植物 綱 雙子葉植物綱 （未分級） 薔薇類植物 目 十字花目 科 十字花科 屬 蕓薹屬 種 芥花籽
二元學名
Brassica napus L. 1753

品種

芥花籽分兩種，大油菜同小油菜，小油菜原產地中海沿岸到中亞高原地帶，佢嘅花係黃色，而啲籽係赤褐色，所以又嗌做赤種、帚種。大油菜又嗌西洋種、朝鮮種、黑種，原產北歐斯間地那維亞半島到西伯利亞、高加索地區，花都係黃色，不過帶少少青，而啲籽係黑褐色。由於遺傳變異，有啲大油菜開嘅係白花。雖然大油菜嗌做朝鮮種，實質上佢係直到1960年代初先開始喺韓國作爲主要油料作物而廣泛種植。喺早春時開喺河邊、河床類似油菜花嘅植物，唔係芥花籽，而係芥菜。

唔同種嘅油菜有唔同嘅特點，由於大油菜大樖啲，片葉闊大啲，啲籽嘅含油量豐富，所以係主要推廣品種。不過大油菜之下亦分有好多個種類，佢哋嘅感光性、感溫性都唔同，要產量大、品質好、耐寒、耐濕、生得快先爲之良種。

濟州島嘅油菜花田

基因組構成上，芥花籽屬於異源四倍體（複二倍體），換言之，芥花籽實質係雜交種，佢有兩對來源唔同嘅染色體，其中一對來源蕓薹（B.rapa），另一對來源甘藍（B.oleracea）。由於芥花籽係蕓薹屬，有個U三角嘅理論表明而家嘅蕓薹屬作物都係由三種蕓薹屬植物雜交而成。

樣

條梗（gwaang2）高30─150厘米，表面光滑，綠色。啲葉披針形，不過葉尖鈍。條梗下面啲葉，葉柄長，葉緣有比較深嘅裂紋；而梗上面嘅葉，無葉柄，包住條梗來生，而葉尖比較尖細，呢個就係同佢似樣嘅芥菜所唔同之處。大油菜嘅葉嘅質地係比較厚嘅革質，表面有層蠟質物，而小油菜嘅葉係淡綠色，葉肉就唔係革質嘅，葉面亦無蠟質物。一條菜梗可以生30─50片葉，而啲花係總狀花序，花菻（lam1）由菜梗叾（duk1）頂係噉生，生到落後就會開花。花係單瓣嘅，而支花梗可以生到10厘米長。單朵花可以有一厘米直徑大，花瓣同花萼都係分爲四片，有雄蕊六條、雌蕊一條、蜜腺四條。未開時花萼包住朵花，開後四片花萼會對應喺四片花瓣下面。籽莢長八厘米，圓筒形，個筒有條縫合綫，等籽莢熟咗時，條縫合綫會打開，啲籽就會散落泥。

用途

喺蜂業，油菜花係緊要嘅蜜源。芥花籽本身可以做肥，比如啲農民割咗秋禾後，會喺田度撒菜籽，由佢生成一片油菜花田，到來年花期一過，鋤地時將呢啲菜鋤入泥，噉就可以肥田喇。芥花籽可以食，不過有啲芥花籽嘅葉度有層白蠟粉，所以一般食嘅係菜薳（coi3 jyun5）。同時亦係種好緊要嘅油料作物，佢製成嘅食用油嘅消費量喺世界上排名前三，喺中國則排喺大豆油同棕櫚油之後，係第三大植物油。榨油時係榨佢啲籽，所以呢啲脂肪油嗌做菜籽油、菜種油、芥花籽油。菜籽油除咗可以食，亦可以做發動機潤滑油、生物柴油、軟膏基劑、同埋油性注射液嘅溶劑。不過一般嘅菜籽油含有芥子油苷（又叫硫苷）同芥酸（Erucic acid），傳統菜籽油有好大酖（zam6）味，兼且入口苦澀（gip3），就係因爲有1%～2%嘅芥子油苷，而且呢種苷有毒，會傷到甲狀腺、肝；而芥酸係種脂肪酸，含量高過30%，亦對人體有害，會損害心臟。正因爲佢大味，兼食多唔好，舊時美加無人食呢種油，浄係搦去工業用，比如潤滑機器。

二戰時，北美需要大量菜籽油做潤滑油，而亞歐度斷貨，於是加拿大開始大量種油菜，戰後唔使咁多潤滑油，於是油菜改爲做飼料，但因爲味大，餼唔到畜牲，於是啲科學家去搵低硫苷品種嘅油菜，然後用雜交育種嘅方式培育出新品種。1978年，加拿大爲新種註冊咗商標「Canola」，呢種油嗌做加拿大芥花油、雙低菜籽油、或者音譯爲卡羅拉油。新種嘅芥花油無論芥酸定芥子油苷都係低含量，其中芥酸量喺2%以下、芥子油苷低於30毫摩爾/克，所以相比一般嘅菜籽油健康好多，同時啲味亦清淡好多。「Canola」係個專門商標，之所以起噉嘅名，除咗表示係新種，亦有個避忌：一般嘅菜籽油英文叫rapeseed oil，衰在個rape好易睇成解做「強姦」嗰個rape，實質上呢個rape來源自拉丁學名嘅rapa（蕓薹）；而舊時菜籽油作爲工業用油，令美加民眾覺得唔係人食嘅。就係噉，費事啲人誤會，加拿大油菜協會（Rapeseed Association of Canada）起咗個名做Canola，由Can（加拿大噉解）同ola（油噉解）合成，亦有人解讀成Can（Canadian，加拿大）o（oil，油）l（low，低）a（acid，酸）做「低酸加拿大油」。

生物柴油

油菜花田

芥花籽油可以作爲燃料，整成生物柴油，可以用喺供暖系統，或者溝咗石油之後用喺摩托度。生物柴油可以唔溝嘢就用喺新淨嘅發動機度，又唔會損害機器；而一般來講係喺石油柴油度溝入2%─20%之間嘅生物柴油來用。不過用芥花籽油整成嘅生物柴油，成本比較高，種植、榨取、煉油嘅使費都好貴，呢種新興能源嘅成本始終高過化石能源，所以直到而家生物柴油未有咁普遍應用。喺歐洲，啲人好睇好芥花籽油，歐洲生物柴油嘅原料有80%源自芥花籽，有部分原因來自於，相比其他油源，如大豆油，喺單位土地面積上，芥花籽嘅產出油量更加之高，而最主要嘅原因在於，喺各類植物油中，芥花籽油嘅凝膠成份最少。歐盟估計2010年─2011年期間有66%嘅芥花籽油用咗去整生物柴油。

芥花籽係需氮量較大作物，種時要落高濃度氮肥，不過氮肥會轉化出一氧化二氮，呢種氣體係犀利過二氧化碳好多嘅溫室氣體，造成嘅溫室效果係二氧化碳嘅296倍。而家推算施畀芥花籽嘅氮肥中有3─5%嘅氮轉化爲一氧化二氮。

產量

芥花籽最多生產地區
（百萬噸）

國	1965	1975	1985	1995	2000	2005	2007	2009	2011	2012	2013
加拿大	0.5	1.8	3.5	6.4	7.2	9.4	9.6	11.8	14.2	15.4	17.9
中國	1.1	1.5	5.6	9.8	11.3	13.0	10.5	13.5	13.4	14.0	14.4
印度	1.5	2.3	3.1	5.8	5.8	7.6	7.4	7.2	8.2	6.8	7.8
德國	0.3	0.6	1.2	3.1	3.6	5.0	5.3	6.3	3.9	4.8	5.8
法國	0.3	0.5	1.4	2.8	3.5	4.5	4.7	5.6	5.4	5.5	4.4
澳洲	<0.007	<0.06	0.1	0.6	1.8	1.4	1.1	1.9	2.4	3.4	4.1
波蘭	0.5	0.7	1.1	1.4	1.0	1.4	2.1	2.5	1.9	1.9	2.7
烏克蘭	<0.007	<0.06	<0.03	<0.1	0.1	0.3	1.0	1.9	1.4	1.2	2.4
英國	<0.007	0.06	0.9	1.2	1.2	1.9	2.1	2.0	2.8	2.6	2.1
捷克	0.07	0.1	0.3	0.7	0.8	0.7	1.0	1.1	1.0	1.1	1.4
俄羅斯	N/A	N/A	N/A	0.1	0.1	0.3	0.6	0.7	1.1	1.0	1.4
美國	<0.007	<0.06	<0.03	0.2	0.9	0.7	0.7	0.7	0.7	1.1	0.9
羅馬尼亞	0.01	0.02	0.04	0.04	0.1	0.1	0.4	0.6	0.7	0.2	0.7
丹麥	0.05	0.1	0.5	0.3	0.3	0.3	0.6	0.6	0.5	0.5	0.7
白俄羅斯	N/A	N/A	N/A	0.03	0.07	0.1	0.2	0.6	0.4	0.7	0.7
立陶宛	N/A	N/A	N/A	0.02	0.1	0.2	0.3	0.4	0.5	0.6	0.5
匈牙利	0.008	0.1	0.1	0.1	0.2	0.3	0.5	0.6	0.5	0.4	0.5
全球總計	5.2	8.8	19.2	34.2	39.5	46.4	50.5	61.6	62.5	64.8	72.5
來源： 聯合國糧食及農業組織（FAO）

相

• 
  花
• 
  菜梗
• 
  葉
• 
  油菜花田
• 
  籽莢同啲籽

連出去

• 邱園; 哈佛大學、澳洲植物名稱索引 (編)。"Brassica napus"。《國際植物名稱索引》。喺2013年9月6號搵到。
• 美國農業部（USDA GRIN）嘅植物分類