聖公宗

聖公宗（英文：Anglicanism；又叫聖公會、安立甘宗、英國國教）原本係天主教（大公教會）嘅一個教派，目前係英國（嚴格啲係英格蘭）國教，喺2008年普世聖公宗約有7300萬教徒。

安立甘/安立間（Anglican），意譯係英國教會嘅、英國嘅，形容信徒、制度、教會、甚至禮儀傳統同神學思想係由英格蘭嘅國家教會，英國國教會（The Church of England）所發展出嚟嘅，成為普世聖公宗。呢個詞語可以形容其他喺普世聖公宗團契獨立嘅教會組織個追隨者，佢哋都因為教義同禮儀上與本身嘅教省產生分歧而獨立出嚟。但係，美國同蘇格蘭嘅聖公會英文名就用「The Episcopal Church」。「Episcopal」意思係主教制嘅。普世華人、韓國同日本基督徒都用「聖公會」作公家稱號。

普世聖公宗團契認為自己係神聖大公同使徒所傳嘅教會嘅一部分，係大公又經過改革嘅教會，好多聖公會教友相信聖公宗係新舊教會嘅混合體。有一啲高派教會擁護者覺得佢哋嘅教會係無教宗嘅公教教派，亦唔似其他新教教會有一位舉足輕重嘅代表人物好似馬丁路德、諾克斯、加爾文同約翰衛斯理。普世聖公宗係39個同坎特伯里大主教有聯繫嘅教省神學上嘅交流板同聯合團契。

史

宗教改革前

聖公會傳統地被認為起源係響6世紀末到英國嘅第一位坎特伯雷大主教──坎特伯里聖奧古斯丁。但係追溯再早期，基督教早已響5世紀嘅羅馬時期英國甚至有可能1世紀已經立足英國。第一位英國嘅殉道者──Saint Alban，相信喺4世紀出世。可以響唔少牧區中睇出佢響英國教會裏聲望，因為唔少英國教堂以佢命名，並做守護聖者。

6世紀初愛爾蘭同蘇格蘭傳教士嘅再一次設立，尤其聖博德同Saint Columba，聖公會認為塞爾特人係佢哋教會嘅先驅。

亨利八世確立

改教運動嗰陣，英國國王係亨利八世（1491-1547，1509年登基）。佢係忠誠天主教徒，1521年重寫《確信七聖事》嚟反對馬丁路德，教宗良十世（Pope Leo X）封佢為「信仰嘅維護者」。當年為咗同安妮·博林（Anne Boleyn，1507-1536）結婚，就同無仔生嘅老婆阿拉貢嘅凱瑟琳（Catherine of Aragon，1485-1536）離婚，因為得唔到教宗克勉七世（Pope Clement VII，1523-1534）嘅批准，而怪罪當時嘅大法官兼英國大主教托馬斯·沃爾西（1475-1530）冇盡力疏通，於是誣告托馬斯·沃爾西謀叛，響押去倫敦途中病死咗。亨利八世就任命托馬斯·克蘭麥（Thomas Cranmer，1489-1556）做大主教。並喺1534年經過國會宣佈「最高權法案」（Supremacy Act）：

1. 教宗嘅權唔及英格蘭。
2. 英國國教同教廷分離，國王係英國教會最高領袖。

就咁樣英國國教喺天主教分離。

亨利八世原本諗住維持教義，只係分離教廷管制，但已經無可能喇。繼任嘅愛德華六世（1537-1553，1547年登基）只活到15歲，由同父異母家姐瑪麗女王就任（1516-1558，1553年登基）。瑪麗女王讀過天主教學校，係虔誠天主教徒，佢一上任就開始逼害國教教徒，企圖恢復天主教。好多人咁樣就逃亡到日內瓦，學加爾文教派嘅傳統。

伊利沙伯一世女王（1533-1603，1558年登基）就任之後，先至恢復英國國教。至1559年4月29號，國會再通過一項最高權威法，根據呢個法案，英國完全廢棄教廷嘅權威，唔再畀任何款項到羅馬，同時由伊利沙伯女王任命馬太.柏克做坎特伯里大主教。於是坎特伯里嘅蘭柏宮成為英國國教會嘅精神中心。

1544年坎特伯里大主教托馬斯．克蘭麥頒布聯禱文（litany）。1549年頒行公禱書，當中並無音樂。至1550年先喺John Merberke（1510-1585）譜曲定名「含譜公禱文」（Book of Common Prayer Noted）。

聖公會嘅特色：

1. 主教制
2. 用公禱書
3. 1535年起用英文聖經
4. 英國國教

1920年Lambeth（蘭柏）普世主教會議（1867年舉行首屆會議，召集全球各教區嘅主教，由坎特伯里大主教親自主持會議。10年一次係聖公會最高機制──如同大公會議）確立：

1. 聖經最高權威
2. 兩大禮儀：聖洗禮同聖餐禮
3. 主教制

傳到英國以外嘅地方

17世紀嗰陣，英國國教會開始響美國、澳洲、加拿大、紐西蘭同南非等前英殖民地創立教會。由18世紀開始，由一批聖公宗傳教士響亞洲、非洲同拉丁美洲建立聖公宗教會。響1843年香港島被割讓做咗英國殖民地後，英國聖公會派咗史丹頓牧師嚟香港建立聖公會，成為響中華傳教嘅開始。

聖公宗裏面嘅合一

各地聖公宗教會亦先後離開英國聖公會，成立自主嘅獨立教省，並加入普世聖公宗呢個教會團契，以坎特伯里大主教為精神領袖。

同天主教嘅共融

2009年，羅馬教廷製定頒布《宗座憲章》，回應聖公會信友嘅需求，將設立特別教區，同聖公宗完全共融。同日，坎特伯里大主教同天主教嘅威斯敏斯特總教區總主教響倫敦發表聯合聲明，指出《宗座憲章》嘅發布「打消希望以新方式同天主教共融嘅聖公會團體嘅疑慮。」

按立聖品嘅製度

聖公宗同天主教一樣相信使徒遺傳，特別響按立神職人員嘅續承到。聖公會實行三品聖職，主教（會督，Bishop，和合本聖經譯成「監督」），牧師（會長，Elder，和合本聖經譯成「長老」）同埋會吏（Deacon，和合本聖經譯成「執事」）。

祈禱／禮儀用書

• 公禱書（The Book of Common Prayer）（全球聖公會）
• 1980替用禮文書（Alternative Service Book, 1980）（英國國教會）
• Common Worship（英國國教會）
• 聖餐崇拜禮文（香港聖公會）
• 日常禮讚（香港聖公會）

信條

• 承認普世神聖大公教會嘅三大信經：尼吉亞信經、使徒信經同阿塔拿修信經。

睇埋

• 普世聖公宗

出面網頁

• 教會歷史