角色發展

角色發展（粵拼：gok3 sik1 faat3 zin2；英文：development），又有叫角色弧（character arc），係指故仔入面嘅一個角色喺行為同心理上嘅變化，反映個角色嘅「心路歷程」。有角色發展嘅角色就算係動態角色，而一個動態角色通常都會係對個故仔嚟講有返咁上下重要嘅角色－例如主角以及比較重要嘅配角等等。

1843 年一幅畫；幅畫描繪守財奴史高治（跪低喺度嗰個），佢喺故仔中途嘅變化係角色發展嘅例子。

角色發展嘅一個典型過程如下：一個動態角色喺故仔開始嗰陣有性格上嘅缺憾，呢啲缺憾會引致佢做一啲錯誤嘅決定，而呢啲錯誤決定會為佢或者佢身邊嘅人造成具體嘅負面後果；喺故仔途中（通常係早期或者中期），佢會有機會或者焗住要改變自己嘅行為；然後佢發現，改咗自己嘅行為之後好咗好多，了解自己之前有個噉嘅缺憾，再學識應該要改變自己嘅行為，完成佢喺呢個故仔入面嘅發展。

角色發展對於作好睇嘅故仔嚟講相當重要：文學理論同創意寫作等領域嘅工作者一般都認同，以角色為主導嘅故仔需要講及角色心理上嘅變化先會精彩－而其中一種最能夠引起讀者觀眾共鳴嘅心理變化就係「主角因為佢嘅缺憾犯錯，搞到佢同身邊嘅人有麻煩，然後佢喺故仔中途學識克服自己嘅缺憾，最後有所成長」。

定義

睇埋：角色同角色缺憾

角色發展係指一個角色喺情節嘅進展途中性格上有所變化。角色發展同角色缺憾（指一個角色喺性格等方面嘅缺憾）息息相關，一個以角色為主導（character-driven）嘅故仔常見做法如下：主角喺故仔開始嗰陣會有一個角色缺憾，呢個缺憾會搞到佢做一啲錯誤嘅決定，為佢同佢身邊嘅人造成具體嘅負面後果，然後喺故仔嘅中途，佢會有機會或者焗住要改變自己嘅行為，發現改變自己嘅行為之後好咗好多，了解自己之前有個噉嘅缺憾，再學識改變自己嘅行為，而呢改變令佢最後得到成功；主角嘅呢種心理旅程好多時就係作者用嚟帶出成個故仔嘅信息嘅嘢係。

用英國維多利亞時代著名作家狄更斯嘅中篇小說《一首聖誕頌歌》做例子（以下內容有劇透）：

• 主角史高治係個守財奴（缺憾），佢好刻薄佢啲員工，又孤寒又唔肯捐錢（錯誤決定），搞到全鎮嘅人都對佢冇乜好感（後果）；有日，佢喺聖誕前夕遇到佢唯一事業夥伴馬里嘅鬼魂，話俾佢知會有三隻幽靈嚟搵佢，每隻幽靈會同佢講一啲嘢；
• 第一隻幽靈同史高治一齊睇佢過去，揭示原來史高治喺細個嗰陣因為俾阿爸阿媽送咗去寄宿學校而好孤單（背景故仔）；
• 第二隻幽靈帶史高治去現在，睇到其他人同屋企人朋友慶祝聖誕好開心（改變嘅誘因）；
• 第三隻幽靈帶史高治去睇未來，見到一個冇人出席佢葬禮嘅財主佬，仲見到有人因為刻薄財主佬死咗而慶祝，史高治知呢個會係自己嘅未來，覺得好驚（另一個改變嘅誘因）。
• 第二朝（有機會改變），史高治改變自己嘅行為，捐錢做慈善，仲加人工俾之前受佢刻薄嘅員工（改變），小鎮嘅居民留意佢轉咗死性，對佢有少少改觀；從此之後，變得好人咗嘅史高治同身邊嘅人關係好轉咗，佢個人亦都開心咗－而「財富唔能夠買到真正嘅快樂」正正就係成個故仔帶出嘅信息，令呢個故仔能夠對讀者觀眾作出更深遠嘅影響。

戲劇結構

睇埋：戲劇結構

戲劇結構（dramatic structure）係指對情節結構嘅思考，最早源於古希臘哲學家阿里士多德喺公元前 335 年寫嘅著作《詩學》（希臘文：Περὶ ποιητικῆς）一書，喺呢本書入面，阿里士多德嘗試分析用劇作講故仔嘅做法同故仔嘅結構；近期啲嘅戲劇結構分析出名例子有 19 世紀德國小說家吉斯塔夫·菲里塔格作嘅模型：菲里塔格分析咗多份文學作品同劇作，認為一個故仔嘅情節大致上可以分做五大橛：

1. 解說（exposition）引入主要嘅角色同背景設定，而呢度會擺低啲伏筆，暗示跟住會發生乜嘢衝突。
2. 昇溫（rising action）會有突然嘅大事發生，打亂角色嘅人生，令角色開始（因為佢哋各自嘅目的）起衝突，帶動情節進展。
3. 高潮（climax）係衝突（同故仔嘅緊張程度）去到最高峰嘅階段，喺昇溫階段所出現嘅衝突最後引致成個故仔最大規模嘅難關，主角所重視珍惜嘅事物會受到極大嘅威脅，焗住要成長同變強嚟應對呢個困難。
4. 降溫（falling action）係高潮過後嘅階段，通常會明顯短過昇溫階段，指大衝突過後，主角同生還嘅角色身心俱疲，並且收拾大衝突造成嘅破壞。
5. 結局（resolution）總括成個故仔，要向讀者觀眾展示主要角色喺經歷咗呢次事件之後有乜嘢成長（即係展示角色發展）。

兩者對應

有學者指，角色發展嘅歷程同呢五大階段可以有好似以下噉嘅對應：

1. 解說：個故仔會展示個角色，仲會俾讀者觀眾睇到佢嘅行動以及同第啲角色嘅關係係點，呢啲行動同關係會俾讀者知啲角色嘅性格（知佢哋有乜角色缺憾），角色缺憾會搞到個角色同佢身邊嘅人唔開心（所以係一個缺憾），但佢本質上依然唔係一個心地壞嘅人（所以讀者觀眾會同情佢）。
2. 昇溫：情節當中發生咗一件大事，打亂角色嘅人生，呢件大事好多時係由角色缺憾引起嘅（等讀者觀眾親眼見到嗰個缺憾會引致嘅具體不良後果），而呢件事會引致角色遇到一連串嘅難關（一般認為，故仔最精彩嘅就係要睇角色點樣克服難關），令佢意識到自己之前有缺憾。
3. 高潮：衝突升溫到最高點，但喺呢個時候，角色經已由之前嘅難關當中學識咗克服自己嘅角色缺憾，作出咗一個佢之前（因為佢嘅角色缺憾）唔會做嘅決定，呢個決定幫佢最後克服高潮嘅衝突，令佢完全明白佢之前有嘅角色缺憾。
4. 降溫同結局：角色完成發展，故仔展示佢成長後嘅生活（往往理想過佢喺成長前嘅生活）。

舉個例說明：

1. 解說：主角係一個好聰明但懶散嘅騎士，佢奉行享樂主義，鍾意索女，遇到問題興用武力解決（多個令佢生活唔開心嘅缺憾）；
2. 昇溫：有一日，佢喺同人打交（錯誤決定）嗰陣，俾對方斬斷咗佢隻右手，搞到佢冇得再用武器（決定引致嘅後果），其後佢俾生得醜樣但善良嘅女主角救咗；喺打後嘅情節當中，佢一路同女主角相處一路旅行，而且因為冇咗隻手用唔到武器，焗住要靠機智解難（被迫要作出改變）；
3. 高潮：佢遇到一個要用機智先解到嘅大難關，經過一輪波折成功解決呢個難關；
4. 降溫同結局：喺呢個過程中，佢學識變成唔再齋靠武力解決問題，仲鍾意咗女主角－開始會欣賞女人嘅內在美，成個人變得成熟咗（角色發展同發展後嘅生活）。

常見類型

有文壇人士指，角色發展可以分做某啲大類（即係角色發展方面嘅橋段）：

成長故仔

内文：成長故仔

成長故仔泛指主角係一個未成年嘅人，喺故仔中途佢遇到各種嘅難關，最後透過克服呢啲難關，成為一個成熟嘅大人，常見於以青少年做主要對象嘅青年小說當中。成長故仔一個出名嘅例子係《哈利波特》呢個奇幻小說系列：

• 喺初頭，哈利仔係一個天真嘅細路，而故仔嘅情節傾向集中於魔法學校嘅同學之間嘅細規模鬥爭；
• 去到故仔中期，情節開始變得愈嚟愈成熟，例如喺第四本小說入面，黑魔王佛地魔復活，哈利仔仲親眼見到佢嘅一個朋友俾佛地魔殺死－同初頭嗰啲同學之間嘅爭執相比，哈利仔同佛地魔之間嘅衝突就嚴肅好多；
• 去到再後啲（由第五本小說開始），哈利仔仲開始要面對一啲政治上嘅鬥爭，開始完全進入大人嘅世界，令到成個故仔以及主角哈利仔同（多數係青少年嘅）讀者一齊成長，而哈利仔最後成功克服呢啲重重難關，成為一個成熟嘅大人。

變得仁慈

另一種常見嘅角色發展涉及個角色變得更加仁慈：一開始嗰陣，個角色係一個本質唔壞但性格唔仁慈嘅人（角色缺憾），而佢嘅不仁往往造成具體嘅負面後果；喺情節途中，佢遇到某個或者某啲人，並且透過同呢啲人一齊克服難關嘅過程當中學識開放自己嘅心，最後成為一個更加仁慈嘅人。例如：

• 想像以下嘅故仔：王子係個以貌取人嘅人（缺憾），有次佢對一個醜樣嘅阿婆唔禮貌（錯誤決定），而個阿婆原來係仙子，跟住仙子仲對佢落詛咒、令佢變成一隻醜樣嘅野獸（後果）；後嚟佢因緣巧合，捉到一個老男人，個老男人嗰個心地善良嘅女（女主角）自願噉用自己嘅自由嚟換取阿爸嘅；及後女主角留喺野獸嘅城堡當中（有機會改變），佢哋兩個相處一輪之後，野獸受女主角影響，學識變得仁慈啲同開放自己嘅心（作出改變），最後成功破解仙子嘅詛咒（角色發展）。
• 想像以下嘅故仔：主角阿古係一個賊，一心淨係想專注於佢嘅事業，而且性格有少少冷漠無情（缺憾），佢嘅性格令佢有錢、但生活得好孤單（後果）；有一次，阿古因緣際會領養咗三個孤兒，而且焗住要好好噉湊住佢哋，暫時扮演養父嘅角色（焗住要作出改變）；及後佢回想起自己嘅童年，原來佢細個嗰陣成日都俾佢阿媽睇唔起，所以先搞到佢咁執著要成功（背景故仔），最後佢作出改變開始重視同屋企人來往，而且亦都得到真正嘅快樂（角色發展）。

變得堅強

另一種常見嘅角色發展涉及個角色變得更加堅強：一開始嗰陣，個角色係一個唔夠堅強嘅人（角色缺憾），而佢嘅軟弱往往造成具體嘅負面後果，例如係俾人利用或者唔能夠保護重要嘅人等等；喺情節途中，佢遇到某啲重大嘅難關，並且克服呢啲難關同成長成一個更加堅強嘅人。例如：

• 想像以下嘅故仔：主角路茜係一個少不更事嘅後生女，俾佢男友呃佢幫手偷毒品（唔夠強），及後毒品大佬殺到，殺咗路茜個男友，而且夾硬開刀將一隻新毒品放入路茜體內，迫路茜幫佢將毒品帶去歐洲（唔夠強引致嘅悲慘結果）；不過原來嗰隻新毒品對人腦有奇異嘅影響，當晚，路茜體內個毒品袋爆咗，隻新毒品影響路茜嘅大腦，令佢腦功能突然暴增，仲得到超能力（因為機遇變強），打後路茜用超能力逃離毒品大佬嘅囚禁，毒品大佬殺上嚟，本來性格軟弱嘅路茜焗住要迎戰（焗住要改變），但佢憑住佢嘅超能力成功打低毒品大佬啲手下，經過一輪激戰之後，成功殺死咗毒品大佬同得到自由（發展）。
• 想像以下嘅故仔：主角思噎仔係個維京人，佢同佢嘅部族住喺一個成日受龍侵襲嘅島上；思噎仔係一個孱仔（唔夠強），俾（好重視力量嘅）維京族人－包括佢阿爸－睇唔起（唔夠強引致嘅結果），不過後嚟佢意外捉到一隻龍，而且仲暗中靠同隻龍相處，學識馴龍，並且喺途中變得更加強壯（因為機遇變強），佢喺高潮嗰陣騎住佢隻龍打低一個大敵，最後得到佢族人嘅尊敬（發展）。

法蘭達化

内文：法蘭達化

法蘭達化（Flanderization）喺寫作上係指攞一個具有某個特徵嘅角色，並且將個特徵慢慢誇張化，最後令到個特徵成為咗嗰個角色嘅代表，尤其常見於會為搞笑而犧牲嚴肅性嘅處境喜劇當中。

法蘭達化一般俾人同處境喜劇聯想埋一齊：「法蘭達化」一詞出自美國嘅處境喜劇卡通《阿森一族》當中嘅一個角色內德·法蘭達（Ned Flander），法蘭達啱啱開始出場嗰陣被描述成一個虔誠嘅基督徒，會定時去教堂做禮拜同捐錢俾教會，但打後阿森一族將法蘭達「虔誠基督徒」呢個特徵誇張化，最後仲將佢描繪成一個狂熱嘅基督教原教旨主義份子，而且佢變到除咗呢一點之外乜嘢特徵都冇；不過都有文壇人士指出，法蘭達化原則上係有可能出現喺有水準嘅寫作嗰度嘅－只要情節當中有理由合理噉解釋點解個角色會隨時間有噉嘅變化。

靜態角色

内文：靜態角色

靜態角色（static）係動態角色（dynamic）嘅相對，指冇角色發展嘅角色。一個靜態角色喺成個故仔中途性格唔會有咩變化。一般嚟講，靜態角色成日俾人同「唔重要嘅閒角」聯想埋一齊，不過喺作故仔嗰陣，靜態角色查實有多種用途：

• 想像一個靜態角色，佢係一個有相當重要性嘅配角，而佢嘅存在可以用嚟突顯佢身邊嘅一個動態角色嘅變化；例：角色 A 係一個靜態角色，成個故仔由頭到尾都係咁好人，而角色 B 係一個動態角色，喺故仔途中就一個衰格嘅人變成一個好人，B 初頭嘅行為同 A 好唔一樣，但去到後尾就變到同 A 好似－A 雖然係靜態，但就起咗「突顯 B 嘅角色發展」嘅作用。
• 作者有陣時可以用「一個角色嘅不變」嚟突顯佢嘅特性，而呢點可以達致激勵性或者悲劇性嘅作用：例如一個好正直不阿嘅角色，佢喺情節途中因為佢嘅正直而屢次俾人陷害，但去到故仔最尾，佢依然保持到佢嘅正直，而呢點能夠突顯佢嘅性格特徵，對讀者觀眾亦會起到一定程度嘅激勵性作用。
• 一個靜態角色唔一定悶，例如一個靜態角色可能由頭到尾性格不變，但情節中途揭示佢嘅背景故仔，背景故仔詳述點解佢嘅性格係好似而家噉嘅樣，令讀者觀眾對佢有更深入嘅了解；即係話雖然一個靜態角色喺性格上冇變化，但讀者觀眾對佢嘅觀感仲係有可能會變，所以依然有可能引起讀者觀眾嘅興趣。

睇埋

• 角色
• 敘事技巧
• 悲劇缺憾
• 背景故仔
• 角色塑造

拎

• （英文） 角色發展，電視橋段網