白銀投資
白銀投資（粵拼：baak6 ngan4 tau4 zi1）顧名思義係透過買賣銀（亦有叫「白銀」）嚟做投資：自古以嚟，銀就一路都有畀人類攞嚟整珠寶同雕像等嘅物品，而且價值僅次於金；人類對銀嘅需求會不時上上落落，所以銀嘅價格（銀價）亦會跟住升升跌跌；噉就表示，投資者可以喺銀價低嗰陣時入貨，等到銀價一升返就放咗手上啲銀佢，從中賺取利潤。
.jpg)
白銀投資成日畀人攞嚟同黃金投資比較：金同銀呢兩種金屬喺史上一路都有被視為富貴嘅象徵，但係經濟學方面嘅研究表明，兩者嘅市場特性好唔同，同金比起嚟，銀有更廣泛嘅工業用途，而呢點被指係令到銀價同股票或者債券等嘅資產緊扣；除此之外，銀亦被指係波動性高過金。
銀價
編輯喺人類史上，銀呢種金屬化學元素不溜都係一種有市場價值[e 1]嘅物品：銀有唔少有用嘅物理同化學性質，出晒名襟擺能夠抵抗腐蝕；好似係古埃及、古希臘以至周朝等嘅遠古文明，都有用銀嚟造
銀同其他物品一樣，價錢由市場嘅供應同需求[e 2]帶動，不過一般認為銀算係一種相對穩定嘅資產：想像而家阿明花咗筆錢，買 A 公司呢間新創企業嘅股票，後嚟 A 公司盤生意根本唔掂，搞到要破產，阿明手上揸嘅股票就會一文不值；相比之下，銀可以用嚟整好多嘢——銀仔、珠寶同電子元件等嘅嘢係人類社會一路都需要嘅[註 1][5]；有實際用途就表示，人類對銀永遠梗會有一股需求，永遠有需求就表示價格低極有限；因此，銀廣泛噉被視為一種（同股票比起嚟）算係穩陣嘅投資。
互聯網上周圍都有投資相關嘅網站，會一路𥄫實銀價嘅最新變勢，並且將呢啲資訊公佈出嚟畀投資者查。
|
買賣技巧
編輯
買銀賣銀嘅方式，主要有以下呢幾種[6]：
- 最直接嗰隻做法，係買賣實質嘅銀，包括銀條、用銀造嘅銀仔同埋含銀嘅珠寶等等；
- 互惠基金或者交易所買賣基金（ETF）；
- 期貨或者期權；
- 亦有啲人會買賣銀礦企業嘅股票或者債券，當中中國、墨西哥同秘魯都係廿一世紀初嘅產銀大國；
唔同做法各有利弊。例如買含銀嘅珠寶可以用嚟做裝飾之用，但係珠寶同首飾多數都會為咗好睇而經過大量加工同雕刻，所以佢哋個賣價實會明顯高過「將件嘢熔咗做純銀」所值嗰個價。有意做白銀投資嘅投資者可以去銀行或者金舖等嘅地方買銀條同銀幣，而且個價唔一定好貴——例如喺 2024 年初嘅香港，細條啲（例如一兩安士）嘅銀條可以 500 至 1,000 文港紙就有交易[7]，一般嘅打工仔都負擔得起。
就算係普通嘅打工仔，都可以用平均成本法（DCA [e 3]）嚟做白銀投資：即係每個月或者每兩個月花少少錢嚟買銀條或者銀幣，買咗返嚟用夾萬收埋，或者去搵銀行嘅保險箱服務；如是者，投資者日積月累會儲到好多銀，可以搵日趁銀價高放咗手上啲銀佢，然後佢手上突然多咗筆錢，就可以用筆錢去例如幫手買樓畀首期[8]。
對比黃金
編輯
喺廿一世紀初嘅世界，買銀唔算係主流嘅投資方法。
啲人要分析買銀有幾著數，通常都係攞銀嚟同黃金比較[9][10]。喺用途上，黃金主要係畀人買嚟做投資或者用嚟製作珠寶，而相比之下，銀嘅用途就比較傾向工業性質，呢種差異表示兩種金屬嘅市場特性好唔同，唔可以混為一談。對比金同銀嘅話：
- 多角化[e 4]嘅效果：唔少專家指，銀嘅多角化效果比較遜色；多角投資係一個投資概念，講緊一位投資者應該要同時手持多種資產，即係例如同時揸吓債券又揸吓銀呀噉；多角投資嘅思考亦提到，手上嘅資產彼此之間唔應該喺價格上有太強嘅正相關，即係話佢哋嘅價唔可以傾向一齊升或者一齊跌，否則投資者就好易陷入「手上嘅資產價格全部一齊跌」噉嘅困境[11]；黃金被指係有好強嘅多角化效果——金價同股票債券嘅價之間嘅相關[e 5]近乎係 0 咁滯[12]；相比之下，銀同工業（做生意實會涉及嘅一樣嘢）比較緊扣，所以銀價同股票債券等資產嘅價亦會比較緊扣——事實係有研究發現，銀價同股票債券嘅價有唔強（但係顯著）嘅統計相關。
- 波動性[e 6]有幾勁：銀被指係波動性比較強，個價容易喺短期內大上大落；例如有經濟學研究就試過分析金、銀同鉑嘅價喺 1976 年至 2004 年間嘅變動，指出銀係三種金屬裡便波動性最高嘅——銀價嘅日計標準差[e 7]有成 2.15% 咁高，係標普 500 嘅日計標準差嘅近兩倍咁多[13]。由於銀有呢種特性，唔少金融工作者都建議追求穩中求勝嘅投資者（例如年紀有返咁上下嘅投資者）應該要投資黃金好啲。
- 密度：銀嘅密度明顯冇金咁高；金嘅密度係每立方厘米 19.32 g，而銀嘅密度就係每立方厘米 10.49 g ——金嘅密度近乎係銀嘅兩倍咁滯，而噉就表示攞住一條金條同一條銀條，兩者體積一樣，嚿金會明顯重過嚿銀[14]。
- 金貴過銀：直至廿一世紀初，金不溜都貴過銀；噉就表示，搵一嚿金同一嚿價值相同嘅銀，後者會明顯大嚿啲重啲，而噉亦表示後者可能比較難儲，而且緊急嘅時候比較難帶住佢逃走；不過噉亦都意味住一樣嘢，就係銀嘅入場門檻比較低。
等等。
睇吓
編輯註解
編輯文獻
編輯- ↑ Silver. Energy Education.
- ↑ Huang, G. W., Xiao, H. M., & Fu, S. Y. (2014). based silver-nanowire electronic circuits with outstanding electrical conductivity and extreme bending stability. Nanoscale, 6(15), 8495-8502.
- ↑ Wongnaree, N., Kritsarikun, W., Ma-ud, N., Kansomket, C., Udomphol, T., & Khumkoa, S. (2020, September). Recovery of silver from solar panel waste: an experimental study. In Materials Science Forum (Vol. 1009, pp. 137-142). Trans Tech Publications Ltd.
- ↑ How To Invest In Gold. Forbes.
- ↑ Silver Demand. JM Bullion.
- ↑ GLD Has Changed The Gold Market.
- ↑ 首頁 / 白銀 / 銀條，線上購買銀條
- ↑ Dollar-Cost Averaging with Precious Metals. Goldline.
- ↑ Gold vs Silver: An Investment Guide | December 2023. Nasdaq.
- ↑ Gold vs Silver: 4 Key Differences You Should Know，摩根士丹利。
- ↑ Medo, M., Yeung, C. H., & Zhang, Y. C. (2009). How to quantify the influence of correlations on investment diversification. International Review of Financial Analysis, 18(1-2), 34-39.
- ↑ Invest in Gold A Portfolio Diversifier With Staying Power (PDF) - SSGA.
- ↑ Hillier, D., Draper, P., & Faff, R. (2006). Do precious metals shine? An investment perspective. Financial analysts journal, 62(2), 98-106，佢講咗："Silver had the most volatile return series, with a daily standard deviation of 2.15 percent — about twice the volatility of the S&P 500."
- ↑ Which is Heavier: Gold or Silver?. American Bullion.
拎
編輯
- （香港繁體） 被嚴重低估的貴金屬 —— 價值竟比黃金高？ 【GOGO安啦】，YouTube 有粵語視頻講白銀投資。呢段片嘅製作者主張銀嘅價值被嚴重低估咗。
- （英文） 銀：銀係乜，銀點樣運作，歷史，投資百科講到用銀做投資。