阿布泰國生活百貨
阿布泰國生活百貨（粵拼：a3 bou3 taai3 gwok3 sang1 wut6 baak3 fo3，英文：Abouthai）係香港一間連鎖生活百貨專門店，由香港海關前關員林景楠同佢泰籍太太Bowie Kanokwon喺2016年創辦，主要銷售嚟自泰國嘅進口零食、生活用品、健康產品同個人護理產品，亦有銷售少部分香港本土產品。「ABOUTHAI」品牌名嘅意思係About Thailand，而「阿布泰」只係取自英文名嘅譯音。
| Abouthai | |
 | |
| 開檔 | 2016年 |
|---|---|
| 創辦人 | 林景楠、Bowie Kanokwon |
| 執笠 | 2023年 |
| 總部地址 |  香港 |
| 業務地區 | 香港 |
| 產業 | 零售業 |
| 產品 | 進口零食、生活用品、健康產品、個人護理產品 |
| 網址 | 阿布泰國生活百貨嘅官方網站 |
.jpg)
阿布泰國生活百貨呢幾年嚟不斷擴張，截至2023年8月被收購前香港一共有24間分店，係香港一間大規模泰國連鎖生活百貨之一。
每年4月會喺香港舉行「阿布泰國潑水節感謝禮」購物優惠。[1]
2023年8月，泰國連鎖超市集團Big C收購阿布泰國生活百貨全部店舖，陸續改用Big C名義營運。
社會同政治參與
編輯阿布泰國生活百貨創辦人林景楠係泛民主派支持者（不過後來變節，投奔親政府派），佢曾經參與部分香港修例風波抗議行動，亦喺店舖派發「良知」貼紙，亦喺武漢肺炎期間因應政府未有向前線醫護人員同公務員提供足夠物資，為呢班前線人員優先提供物資。
抗衡梁振英狙擊蘋果日報廣告商
編輯2018年3月開始，前行政長官梁振英持續狙擊《蘋果日報》廣告商，佢成日喺個人社交網站列出喺蘋果日報埋廣告嘅公司，鼓勵其他人唔好幫襯嗰啲商户[2]。到2019年4月，阿布泰國生活百貨喺《蘋果日報》嘅內頁刊登全版廣告，註明「此乃全版廣告，歡迎香港人轉載」，呼應梁振英嘅行動，呢個舉動令到阿布泰國生活百貨開始為人熟悉[3]。
香港修例風波期間
編輯喺6月9號反送中大遊行一百萬人上街之後，政府仲堅持修例草案喺星期三（6月12號）交上立法會二讀，激發唔少市民響應星期三嘅三罷（罷工、罷市、罷課）以及包圍立法會嘅行動。其中得到阿布泰國生活百貨響應，東主仲話「一日生意無咗，可以做得返。但我哋原來嘅香港無咗，就再救唔返。」[4][5]。
2019年7月31號，阿布泰國生活百貨宣佈，8月1同2號將會進行義賣，扣除成本開支，所有收益全數撥捐畀612人道支援基金，強調喺面對社會扭曲、黑白顛倒，港人必須團結、無私、堅持[6]。
武漢肺炎期間
編輯2020年1月爆發武漢肺炎第一波疫情，阿布泰國生活百貨由泰國入口買咗一批口罩。醫管局前線醫護人員、邊境管制站嘅紀律部隊人員，包括海關、入境處同衞生署職員，只需出示工作證件或者委任證就可以唔使排隊，可以喺實名登記後，優先購買口罩。結果當日阿布泰國生活百貨14間門市都有過千名市民排隊[7]。不過，呢個做法亦引起部分親建制派網民不滿，佢哋話呢間舖頭「違反《防止賄賂條例》第3條」，向醫護人員同海關等提供優先購買口罩嘅權利[8]。有網民批評阿布泰國生活百貨會因政見而拒絕出售口罩，但係創辦人林景楠澄清並表示「黃藍是政見，但抗疫是良知」。亦因為良知，阿布泰國生活百貨堅持以良心價售賣口罩，同市民共渡難關[9]。2020年2月，因應確診武漢肺炎香港疫情變嚴重，阿布泰國生活百貨更加喺青衣城以每個港幣1蚊嘅價錢開售口罩，每人限買10個口罩[10]。另外，品牌亦曾經免費派發一萬個口罩畀18歲以下大專生、中學生同所有DSE應屆考生。只要持有有效本地學生證，填寫網上表格登記就可以免費領取一份口罩（每份10片）[11]。
畀海關舉報同搜查
編輯2021年4月8號，海關動員逾 100 人去到阿布泰 25 間分店同喺荃灣嘅貨倉進行搜查，一共檢獲 14 款，共 8,805 件沐浴露、家居清潔劑同衣物漂白劑，估計市值 40 萬蚊。一名 33 歲男董事被捕，涉及未有按照法例喺產品上貼上中英雙語警告標籤。到4月9號，海關消費者保障科總貿易管制主任陳國雄指收到舉報，話喺荃灣同沙田嘅分店出售多款懷疑違規嘅家居清潔劑，所以隨即展開調查。阿布泰喺facebook專頁為疏忽表示歉疚，但係同時批評海關執法程序令人詫異。[12]
其後市民爆買支持，多區分店店員忙到冇停手，而結帳隊伍一度排出店外[13]。人龍最長要排成三個鐘頭咁耐。部份黃店「損己利人」，跨行業跨界別全力撐阿布泰，有黃店收埋自己一啲貨唔賣住，請客人去阿布泰度買；有黃店憑阿布泰張單，買返單據咁多錢嘅嘢唔使畀錢，有飛髮店來送完免費處理之後無嘢獎，另外送一次焗油。[14]
《蘋果日報》記者發現，Donki、價真棧、百佳旗下fusion、萬寧、日本城、759阿信屋、莎莎、卓悅、龍豐藥房等多間連鎖店同樣違規，追問海關會唔會執法，海關只係話會了解，如果有發現違規會執法。有人形容過去兩日好似「全民中文標籤檢測日」，有市民發現大生生活超市出售嘅部份漂白水、洗衣粉同清潔劑等都未有貼中英文標籤。佢影低相後打電話去政府熱線 1823 同海關舉報。[15]
海關喺4月9日至22日，共收到 400 宗關於產品安全標籤嘅舉報，但係一直都仲未執法，部份舉報因為涉及「食品」唔屬於相關法例規管而未能處理。[16]
參考
編輯- ↑ 〈連鎖店賣欠標籤貨 海關無執法 ｜ 蘋果日報〉。《Apple Daily 蘋果日報》 (香港中文)。原著喺2021-04-24歸檔。喺2021-04-23搵到。
- ↑ 沙半山 (2019-04-08)。〈吳文遠眾籌廣告刊《蘋果日報》頭版 「撐」梁振英任國家主席〉。《香港01》 (香港中文)。原著喺2019-04-14歸檔。喺2019-04-14搵到。
- ↑ 〈【挑機梁振英】泰國百貨店《蘋果》賣全版廣告 「歡迎香港人轉載」 | 立場報道 | 立場新聞〉。《立場新聞 Stand News》 (英文)。喺2020-02-16搵到。
- ↑ 區禮城 (2019-06-11)。〈【逃犯條例】阿布泰國生活百貨明罷市 店員：公司唔介意我都支持〉。《香港01》 (香港中文)。喺2020-02-16搵到。
- ↑ 〈13 間分店加入 6.12 罷市 阿布泰國生活百貨：生意無咗做得返 香港無咗救唔返 | 立場報道 | 立場新聞〉。《立場新聞 Stand News》 (英文)。喺2020-02-16搵到。
- ↑ 〈【逆權運動】6.12人道支援基金籌款逾2,000萬 阿布泰國生活百貨義賣2日助抗爭者〉。《Apple Daily 蘋果日報》。原著喺2020-01-05歸檔。喺2020-02-16搵到。
- ↑ 〈全城搶口罩 區議員團購 二千人大排長龍整個下晝 - 朝雲〉。《立場新聞 Stand News》 (中文)。原著喺2021-04-12歸檔。喺2021-03-23搵到。
- ↑ Kwok, Ling (2020-01-31)。〈【買口罩】被指涉嫌違反防止賄賂條例 阿布泰國生活百貨宣布暫停有關優先發售 - 港生活〉。《HK 港生活》 (中文)。喺2021-03-23搵到。
- ↑ 〈撲口罩達人阿布泰老闆林景楠 盡力入貨 「不加價因為良知」〉。《明報》。喺2020-02-02搵到。
- ↑ 〈【口罩售賣】阿布泰國生活百貨快閃開售 5000 個醫護口罩！附開賣地點、時間！ - 網絡生活 - 生活情報 - D200205〉。《ezone.hk 即時科技生活》 (中文)。2020-02-24。喺2021-03-23搵到。
- ↑ 〈阿布泰贈1萬個口罩予18歲以下學生 今晚截止登記〉。《頭條日報》。原著喺2021-04-12歸檔。喺2020-02-27搵到。
- ↑ 〈【搜阿布泰】海關檢沐浴露清潔劑 指警告字句不足 阿布泰表歉疚 質疑執法令人詫異〉。立場新聞。2021-04-08。原著喺2021-04-17歸檔。喺2021-04-09搵到。
- ↑ 〈海關檢阿布泰14款貨品 指無雙語警告 市民爆買支持：今日絕對要買多啲嘢〉。香港獨立媒體。2021-04-09。喺2021-04-09搵到。
- ↑ 〈阿布泰現象的啟示 - 林夕〉。蘋果日報。原著喺2021-04-20歸檔。喺2021-04-11搵到。
- ↑ 〈全民幫海關搜欠標籤商品 當局零執法 凸顯針對阿布泰〉。蘋果日報。原著喺2021-04-11歸檔。喺2021-04-11搵到。
- ↑ 〈搜阿布泰後 海關收400舉報未執法泰〉。蘋果日報。原著喺2021-05-01歸檔。喺2021-04-25搵到。
