維基百科

黑裝修，紅裝飾，藍罷買，黃幫襯

(由黃店跳轉過嚟)

「黑裝修，紅裝飾，藍罷買，黃幫襯」係香港一個社會運動行動，由LIHKG討論區（連登）網民發起。因應2019年《逃犯條例》修訂問題造成反逃犯條例修訂運動，過程發生好多事，造成社運升級。結果示威升級，出現暴力同埋破壞情況[1][註 1][2]。

「黑裝修」例子：被指同「福建幫」有關係嘅優品360，舖頭畀人打爛嗮
「紅裝飾」例子：由中資企業中國信達經營嘅南洋商業銀行，招牌畀人噴上抗議口號
「黃幫襯」例子：高調撐示威者嘅龍門冰室，有大把人排隊幫襯

意思

編輯

如果遭到示威人士定性做下面「四色」中其中一種，就會有相應差別待遇[3][4]：

  • 「黑裝修」指，建制派、香港特區政府（合稱港共）同埋被指涉事人士（例如：黑社會福建幫、港鐵（黨鐵），或包括大陸國營企業）都可能會俾人打，「裝修」可指破壞。
  • 「紅裝飾」指，中資或者中共國企、國私合營（合稱：赤匪）都會遭到「裝飾」，即係淋油，寫大字報，貼文宣同埋政治海報。例如商店變成「連登農場、連農場（其實指連儂牆）」[5]。
  • 「藍罷買」指，藍絲帶同埋有關支持者撐警人士所有生意，都會冇示威者去幫襯，同埋會有人唱衰佢[6]。
  • 「黃幫襯」指，黃絲帶同埋表明係「逆權運動支持者」旗下所有生意，都會得到歡迎。示威者會叫做「大大力懲罰」，皆因搞到伙記做到冇停手，所以叫「懲罰」[7][8]。

發展

編輯

2019年7月，經濟日報集團石鏡泉去藍絲帶集會台上公然教唆其他人去打人。當時20號「守護香港」集會上，石鏡泉話用藤條同埋水喉通打人係一種「教仔」方法，佢重講到好深入，話要用幾粗同埋幾長，用咩力同埋打身體邊個部位。其後，石鏡泉受到集團員工同埋公會，重有社會各界批評，石最終收返「打仔論」。[9][10]

其實，親建制派一班友入面好多都成日話要打要殺，例如2006年8月6號，《太陽報》專欄作家「紀曉嵐鐵筆」就發表評論對待非建制派做法係「對奸黨唔使論理只須暴打」。又如：2017年極端藍絲組織新界大聯盟舉辦嘅「革走戴耀廷吶喊大會」上，香港立法會議員何君堯講「殺無赦」，而曾樹和就話「必須殺」等恐怖主義言論。

2019年7月21號，七二一元朗襲擊發生，過程中有人影到，同埋無香港警察去阻止，有人試過報警但唔成功。自從福佬打人之後，香港出現有關針對性示威行動，最後發展成「黑裝修，紅裝飾，藍罷買，黃幫襯」現象。另外，何君堯議員本來就係新界佬，早年已被指同埋班福佬有關[11]，2019年七二一元朗襲擊時，成班「白衣人」入面有人同何君堯講：「我福建實力，畀啲能量佢」。何即俾手指公（俾Like）對方，同埋同班白衣人喳手，何重話：「你哋係我英雄」[12]。

同年9月中，何議員辦事處被毀[13]。差唔多時候，16號，北角、炮台山再出現一班大陸口音白衣人打市民事件，有人自稱「福建人」[14]。

同年10月28號晚屯門示威期間，富臨集團旗下龍門冰室海麗花園分店遭到「黑裝修行動」，俾人掟汽油彈[15][16]。

不過自同年11月香港理工大學衝突之後，激進勢力元氣大傷，「黑裝修，紅裝飾」嘅行動變得越嚟越少，只係得返以建立「黃色經濟圈」做目標嘅「藍罷買，黃幫襯」嘅行動可以維持落去。

反應

編輯

親政府團體表明反對，香港警察話口號有「美化暴力」之嫌[8]。中共黨媒《人民日報》話係引火自焚。[17]中聯辦有關報紙亦大肆批判行動，話示威者會長期「亂港」，計劃行動已「地下化」[18]。

另外，「罷鷲行動」過程中有殺錯良民例子，例如一芳水果茶。報指事後一芳得到示威者「還原」，香港總代理表示歡迎。[19][20]大陸手機品牌小米雖然曾經用「五大平台，缺一不可」廣告口號，重遭到國家機器狠批「缺腦如此，無藥可救」，但最終難逃「火攻」命運[21]。有示威網站認為可能過激，網友亦話唔破壞大陸民企，亦有人話真係「生米煮熟飯」、「煲仔飯」，「對準政權」[22]。

2019年10月尾，有連登會員表示如果「政見唔同就要『裝修』」，覺得運動變質似「大陸文革」，有唔少人同意講法[2]。其實，前前後後網上已經出現好多懷疑「借刀」，特指唔係上市公司就好難起底。譚仔雲南米線一直無表態，直至2019年10月26號有分店被貼上反示威標語，令媒體同埋示威者關注[23]。連登人認為加藤屋係「黃絲」所以譚仔都一樣，認為係反日大陸人借刀殺人；亦有要求公開CCTV證明清白前會「罷賣」[24]。譚仔Facebook貼文指係「整蠱」，有條友由鋪頭外面貼上去。

當被認定係「黃絲」後，小商店生意會被帶挈。不過亦有風險，例如藍絲報復。[25]明星食堂龍門冰室表明撐學運後遭到破壞，[26]有YouTuber話馬鞍山黃絲小店俾人拆爛把鎖[27]。

示威散水後，會有趁火打劫，差人都拉唔少，大陸佬、南亞黨、香港中佬，咩賊都有。[28][29][30][21]

有關活動經過爭議去到10月，香港示威慢慢變成「爆買日」行動，強調用消費建設本土主義[31][32]。目的係動員大量支持者去大力幫襯「黃絲店」，行動又叫做「爆買黃店日」，有次行動又叫做「三區爆買日」等等。[33][34]

睇埋

編輯

參考

編輯
  1. ↑ 〈連登文宣解釋針對商戶〉。原著喺2019年10月20號歸檔。喺2019年10月26號搵到。
  2. ↑ 2.0 2.1 成日鬧共產黨搞文革 而家到香港人搞文革？ 連登討論區
  3. ↑ 港人開發《WhatsGap》地圖App　找出附近罷食餐廳位置 unwire
  4. ↑ 【逆權●App】IT男創《WhatsGap》黃藍食店有得揀 「只標示藍店為保護良心小店」 互聯網檔案館嘅歸檔，歸檔日期2019年9月21號，. appledaily 2019年09月12
  5. ↑ 【逃犯條例】「獅子狗」事件續發酵沙田吉野家變連儂牆 互聯網檔案館嘅歸檔，歸檔日期2019年10月26號，. 頭條日報 2019年7月15
  6. ↑ 【新城市廣場罷買日．直播】美心、華為、喜茶圍板　市民展示文宣 香港01 2019-10-26
  7. ↑ 「誓用港幣大大力懲罰呢間黃絲小店」 互聯網檔案館嘅歸檔，歸檔日期2019年10月26號，. appledaily 2019年09月14
  8. ↑ 8.0 8.1 【10.13示威】優品360、美心被砸　警：莫以「裝修」之名美化破壞 香港01
  9. ↑ 《經濟》石鏡泉撤回「藤條打仔」論 互聯網檔案館嘅歸檔，歸檔日期2019年10月26號，. MSN.com
  10. ↑ 【元朗黑夜】石鏡泉倡「藤條教仔」　經濟日報編採聲明：指鹿為馬 香港01
  11. ↑ 【立會選戰】福建幫宴客派月餅　中聯辦、統戰部、何君堯齊現身 2016-09-03
  12. ↑ 【元朗黑夜】網民動員「感謝」何君堯全家　披露何子女資料或違例
  13. ↑ 警拘男子涉刑毀何君堯議員辦事處
  14. ↑ 「福建人」襲黑衣 警制服青年再兜臉「噴椒」 2019年9月16
  15. ↑ 痴撚線 富臨集團開咗間「龍門冰室」
  16. ↑ [【屯門異味】示威者向富臨旗下龍門冰室掟汽油彈　中銀一地玻璃碎]
  17. ↑ 【逃犯條例】《人民日報》示威者擲汽油彈玩火自焚 互聯網檔案館嘅歸檔，歸檔日期2019年10月26號，. 頭條網 2019年9月1號
  18. ↑ 黑衣魔「地下化」 密謀長期亂港 香港文匯報
  19. ↑ 一芳香港被誤會撐中遭「裝飾」 市民今主動清潔還原 立場報道
  20. ↑ 一芳微博譴責罷工 香港總代理發聲明割蓆！網民感混亂：一芳兩制 各自表述？ ulifestyle
  21. ↑ 21.0 21.1 小米旺角舖恐無限期停業 互聯網檔案館嘅歸檔，歸檔日期2019年10月26號，. 蘋果日報 2019年10月25號
  22. ↑ 旺角小米燒到好大火 連登討論區
  23. ↑ 修例風波：男子2店貼拒招待「曱甴」告示 譚仔發天眼截圖追查動機 on.cc 東網 2019年10月26
  24. ↑ 譚仔終表態 連登討論區
  25. ↑ 黃藍標籤帶挈小店 大集團屢遭蹂躪 互聯網檔案館嘅歸檔，歸檔日期2020年3月15號，. 香港浸會大學網站
  26. ↑ 【訪問】龍門冰室紅磡店遭破壞　店主：自己無做錯，繼續撐學生，不信警方未報警 立場新聞 2019年10月24號
  27. ↑ 屌總理呼籲支持被欺凌黃絲小店 MIHK.tv_Youtube第一台
  28. ↑ 修例風波：有人趁火打劫商舖失值250萬財物 on.cc東網台灣 2019年10月21
  29. ↑ 旺角優品360及中移動被爆竊警追緝四名涉案南亞裔男子 香港01 2019年10月6號
  30. ↑ 【10.20遊行】油麻地吉野家起火消防到場見有人持刀爆竊 香港01 2019年10月20號
  31. ↑ 網友發起爆買「黃店」 挺反送中商家出現排隊人龍 UDN.com
  32. ↑ 良心店互相建黃色經濟圈 互聯網檔案館嘅歸檔，歸檔日期2019年10月26號，. 蘋果日報 2019年10月27號
  33. ↑ 修例風波：網民發起「爆買」日　食店大排長龍 東方日報 2019年10月26號
  34. ↑ 【抗暴之戰●爆買日】旺角唇茶賣飲品捐星火 老闆：「盡返香港人嘅責任」 互聯網檔案館嘅歸檔，歸檔日期2019年10月26號，. 蘋果日報 2019年10月26號

註腳

編輯

出面網頁

編輯
由「https://zh-yue.wikipedia.org/w/index.php?title=黑裝修，紅裝飾，藍罷買，黃幫襯&oldid=2006738」收