青衣門
青衣門，香港一海門，洋面夾喺新界大陸荃灣一邊，同青衣一洲之間。英人叫佢做Rambler Channel，可以譯成藍巴勒海峽，亦都有青衣海峽之名。最闊嘅位有九百米。
因為藍巴勒海峽喺維多利亞港嘅範圍，所以亦都受到保護海港條例規管。法例規定維港範圍內唔准游水，所以市民唔可以喺藍巴勒海峽游水。
名
編輯
青衣門，故名意義，青衣對出海面有如門。海面窄處，水上人稱門。
英文Rambler Channel，個名源自 1884 至 1907 年服役嘅軍艦藍巴勒號（HMS Rambler），喺探測香港海港水深同繪製航海圖嘅貢獻[未記出處或冇根據]。
地理
編輯
青衣門，夾喺新界大陸同青衣一洲之間，兩岸有山做屏風。大陸有大帽山等山，青衣亦都有青衣山等等嘅山，船艇可以避風。加上原本兩岸多海灣同淺灘，以前嗰陣時水上人都會避風修船。
青衣門好似曲尺咁，北面成東西向，東面呈南北向，中間屈過荃灣。洋面由青衣西北面入，迎向馬灣、雞踏門、急水門、龍鼓水道，洋面北面近大陸汀九處起，過荃灣，過牙鷹洲門仔塘後屈折，再過青衣塘，過青洲，到擸𢶍灣、春花洋出。出面海面有芒洲。如今荃灣，門仔塘、青衣塘，全部填為地。春花洋兩岸，填窄如水道，青衣門今下要到昂船洲西面至出到。
古時船多數過急水門，或者現今大船過雞踏門，青衣門並非主要航道，多數入青衣門各處，先至會行。
史
編輯青衣門古史上所載唔多。多數記載都有關荃灣，荃灣原名淺灣，大明《粵大記》海圖有記，就喺青衣門北面，原本係大海灣，灘地淺。由於水上人多，而同陸上人交易，荃灣變為墟市。而鄉人亦都填海造地，種米，叫做鹹田。
一八四一年，英國殖民香港。人口開始增加，而糧食嘅需求因為咁慢慢增多，荃灣靠近香港之城，墟市繁盛，農人種養唔同食品，水上人運到城中買賣，青衣門係必經之路。
一八六〇年，英人攞到九龍半島。一八九八年，大清租借新界畀英國，擴展香港同九龍，起青山公路，荃灣墟市擴大，紛紛填海造地，灘地變鬧市。
到二十世紀六十年代，中國大量難民逃難去香港，香港人口暴增，必要大興土木，開山填海，青衣門日漸收窄，尤其為荃灣新市鎮同葵青貨櫃碼頭。荃灣固然有填海，而葵涌一邊，本為鄉郊擸𢶍灣，率先填平，一直到青洲芒洲，七十年代完成。自始青衣門，就無咗擸𢶍灣出口。葵涌填地填到去荔枝角灣。青洲同荔枝角灣，變成葵涌貨櫃碼頭。擸𢶍灣填地，日後變成葵芳同葵興。青洲到荃灣海邊，就變成避風塘。而擸𢶍灣水上人，就搬到青衣塘、門仔塘。
一九七二年，青洲同青衣洋面，開始起青衣大橋，到一九七四年完工。此為青衣門第一條大橋。
到八十年代，又再拓展荃灣新市鎮，輪到青衣洋面填海，青衣塘、門仔塘填平，青衣東岸拉成直綫。青衣門又收窄。
到九十年代，貨櫃碼頭要拓展，起公園，船廠等，填平荔枝角灣，美孚新邨對出洋面，填到昂船洲。之後再填埋青衣東南岸，做貨櫃碼頭，春花洋收窄，青衣門伸到去昂船洲對出。貨櫃碼頭，亦改名葵青貨櫃碼頭。此時青衣門上，有好多條橋落成，第一青衣北橋。之後興建高速公路同鐵路，要通去新建赤鱲角機場。汀九橋、青荔橋、長青橋，紛紛落成。而青衣大橋要重修，再起多條葵青橋。
到二十一世紀，青衣門南端，昂船洲同青衣南灣之間，要起高速公路，又起多條昂船洲大橋。
交通
編輯
舊日有渡輪，荃灣同青衣各有碼頭，分別係荃灣碼頭，青衣碼頭，來往兩地同中環。因為起咗多條大橋，搭車交通方便，渡輪無法競爭，之後停航。
青衣門上面行車大橋六條，同鐵路橋一條，駁通兩岸：
- 青衣大橋，又叫青衣南橋
- 青荃橋，即係青衣北橋
- 汀九橋，連埋青衣島同埋屯門公路同大欖隧道
- 長青橋，係葵青公路（三號幹綫）一部份，通去長青隧道
- 葵青橋，即係青衣複制南橋
- 昂船洲大橋，連住青衣島同昂船洲
- 青荔橋，港鐵用
