香港公開考試一覽

呢篇係香港公開考試一覽。呢度所講嘅「公開考試」，係指任何人都報得嘅考試（雖然可能會受特定條件限制，例如年齡同學歷），考生唔需要係某間學校嘅學生或者修讀緊某個課程。換言之，公開考試接受自修生報考。例如IB考試唔接受自修生報考，就唔算係公開試。

大學入學考試

香港中學文憑考試（英文：Hong Kong Diploma of Secondary Education Examination，縮寫：HKDSE）係目前唯一一個由香港嘅機構主辦嘅公開大學入學考試，由香港考試及評核局舉辦，2012年係第一屆，取代咗以前嘅香港中學會考同香港高級程度會考作為大學入學考試嘅功能。

香港中學會考（英文：Hong Kong Certificate of Education Examination，縮寫「HKCEE」），1974至2010年由香港考試及評核局（2002年前叫做「香港考試局」）舉辦，一般係中五學生升讀預科嘅時候考。
- 前身包括香港中學畢業會考（Hong Kong School Leaving Certificate Examination，1946–1961）、香港英文中學畢業會考（Hong Kong English School Leaving Certificate Examination，縮寫「HKESCE」，1946–1961）、香港中文中學高中畢業會考（Hong Kong Chinese School Leaving Certificate Examination，縮寫「HKCSCE」，1946–1967）、香港中文中學高中畢業會考（Hong Kong Chinese School Leaving Certificate Examination，縮寫「HKCSCE」，1952–1967）、香港英文中學會考（Hong Kong Certificate of Education Examination (English)，1968–1973）同埋香港中文中學會考（Hong Kong Certificate of Education Examination (Chinese)，1968–1973）^[1]。
香港高級程度會考（英文：Hong Kong Advanced Level Examination，縮寫「HKALE」），1980至2012年由香港考試及評核局舉辦，一般係中七學生升讀大學嘅時候考。
香港高等程度會考（英文：Hong Kong Higher Level Examination，縮寫「HKHLE」），1979至1992年由香港考試局舉辦，一般係中六學生升讀大學嘅時候考，當時香港中文大學行緊四年制，所以比行三年制嘅香港大學早一年招收學生。

香港以往因為學額不足，設立過一啲用嚟分配學位嘅統一考試。呢啲考試雖然只係畀學校考生報考，不過一般都係叫做「公開試」：

香港小學六年級會考（簡稱「小學會考」，英文：The Joint Primary 6 Examination），1949至1961年由香港教育司署舉辦。
香港中學入學試（簡稱「升中試」，英文：The Secondary Schools Entrance Examination），1962至1977年由香港教育司署舉辦，取代咗小學會考。
香港學業能力測驗（簡稱「學能測驗」，英文：Hong Kong Academic Aptitude Test，縮寫：HKAAT），1978至2000年由香港教育局舉辦，作為新嘅中學學位分配辦法嘅一部份取代咗升中試^[2]。
香港初中成績評核試（又稱「中三評核試」、「中三淘汰試」，英文：Junior Secondary Education Assessment），1981至1987年由香港教育司署舉辦，之後隨住高中學位嘅增多而取消。