香港度量衡
香港度量衡，指香港所用嘅度量衡，有三制並用。一者，承襲大清，用唐人度量衡，叫庫平制。二者，承襲英國，用英國度量衡，叫英制。三者，十進制，世界公制。由於香港處於華洋交匯，生意頻繁。故此，香港政府有必要定制，定好度量衡點樣轉換，如今仍見於香港法例第六十八章[1]。
一九七六年起，香港政府推行十進制，一直搞十進制運動，又有十進制委員會，到一九九八年，已經廣泛使用而解散。二〇一二年起，政府近乎乜嘢，都用十進制，好似路牌之類。然而香港各行各業，仍可用傳統或英制，三者混用亦都好常見。
中華民國同中華人民共和國，推行市制，香港無用過。香港按返傳統，一斤十六両。若用市制，一斤十両。咁會招惹麻煩，以為對方呃秤。
度
編輯
度長、度高、度闊、度深、度遠，傳統用里、引、丈、尺、寸、分、釐、毫。日常已經好少用，舊日文件上仍然有。有時傳統制，加華字分辨，以防與英制搞亂，如華里。又或者唐，如唐尺。按理大清制有分裁衣尺、量地尺同營造尺，香港法例唔分，一律訂明，一尺為〇點三七一四七五米。
日常用英制同十進制。
英制有哩、碼、呎、吋。用以分別傳統，有時會加個英字，英里、英尺、英寸。哩有時以音譯做咪，地名如青山道十三咪半。碼最常見係足球十二碼，買布亦叫幾多碼。呎同吋仍然用得幾廣泛。哩已好少用，十進制代替咗。香港法例定明，一碼為〇點九一四四米
十進制以米為單位，大嘅會千米計，細嘅用厘米、毫米、微米。其他字頭有就有，然而日常少見。臺灣興以用公字表十進制，香港某啲都有用，如米叫公尺，千米叫公里，厘米叫公分，其他就少見。科學而言，多以米做單位，用指數記數法表示。
面積大細
編輯度面積大細，傳統分兩種。一種以度前加方字，方里、方丈、方尺、方寸等，已經少用。另一種，頃、天、畝、分、釐、毫、弓。畝度地，多用於田大細。
日常用英制同十進制。
英制度地，通常用𠺖，現今已由十進制取代，用公頃。按理英制度可加平方字，如平方呎，屋宇面積常用，日常只嗌呎，如廳一百呎。
十進制喺度上，冠以平方。基本以平方米為單位，亦有平方千米。跟臺灣叫法，即平方公尺，平方公里。其他日常少見，只見於某啲精細工業。科學平方米為單位，用指數記數法。另有公頃，用以量地。
量
編輯量為容積。傳統有石、斛、斗、升、合、勺、撮。現今難以見到。現今升指公升。傳統上，量米用升斗，不過依家賣米係斷重計，如幾斤米。
英制有兩類。一類按立方量度，如立方呎、立方吋。一類為容量度，多用於液體，加侖、夸脫、品脫、及耳、液安士，多都改用十進制，以公升同毫升代替。有啲入口美國貨容積會見英制單位，實情美制同英制，名同實異。香港法例定明，一加侖為四點五四六〇九立方分米。
十進制容積，都分兩類。一類度立方，如立方米，立方千米。一類度容積，公升。日常公升都寫做升，細嘅用毫升，其他就少見。一公升為一立方分米，即千分之一立方米，如此簡單計算到。
衡
編輯衡為量重。傳統有石、擔、斤、両、錢、分、釐、毫、絲。擔斤両錢，日常用得好廣。街市買菜、買肉、買魚常用，輕喺見於藥材之上。両字通為兩異字，為咗分辨兩両，重量專寫作両。香港法例所訂，一斤為〇點六〇四七八九八二公斤。
英制日常只用到磅同安士，其他就少見。西洋凍肉通常斷磅計，生菓都用磅多。其他好似英坭之類，都有斷磅賣。以舊日來講，入口洋貨用磅，唐人地方出就用斤両，今日就睇行業習慣。人度重用磅，現今多以千克計。香港法例所訂，一磅為〇點四五三五九二三七公斤。
金銀
編輯金銀買賣，量重有啲例外。香港用両，西方用安士。兩者同其他量重，輕重稍有差異。一般唔用十進制。
香港法例定落，一金衡安士，為一百七十分之十二磅。一金衡両，為三十七克四二九。
時
編輯大清制一歲以冬至到冬至計，一年以為正月初一到正月初一計。一月以朔日到朔日計。時刻，一日分十二時，細分初正，就二十四小時，一日又分九十六刻，一刻一百分，一分一百秒。
英制同公曆一樣，用額我畧曆。時刻一日二十四小時，一小時六十分，一分六十秒。廣東話小時就叫鐘，分又可以叫分鐘。十五分鐘對大清制為一刻，香港亦叫一個骨，英文quarter而來。
能量
編輯英制能量有兩種。一者，食物能量，又叫熱量，以卡路里計。人所消耗都用卡路里。二者，英國熱量計位（BTU），多用於冷氣，之不過日常唔係咁用，而以一個鐘計功率，叫匹。
功率
編輯十進制叫瓦，不過香港通常讀鑊，英文Watt而來。
冷熱
編輯冷熱量度叫溫度。
英制以華氏計，而日常都轉晒用攝氏。香港得探體溫至用華氏，尤其係發燒探熱。攝氏分一百度，華氏就分一百八十度，華氏精細近乎兩倍，而且探熱整數好讀啲。攝氏探熱，要讀埋小數位先準。