杘

杘（粵拼：cat⁶）係粵語粗口五大字之一。俗寫「𨳍」（「門」字入面加個「七」字），亦有人認為「柒」先至係原字。

《漢典》中「杘」字嘅第二個解釋係「泛指器物的把」[1]，可能廣府人因此由「器物嘅柄」嘅意思引申到為「男性嘅柄」嘅意思。「杘」字喺《唐韻》中嘅讀音爲「丑利切」，喺《集韻》中嘅讀音爲「丑二」切，《韻會》就讀做膩，上聲。呢啲同廣府音都無關。唯有《集韻》多收咗一個音「抽遲」切，即就係國語音嘅「絺」，廣府音則應該係「癡」。呢個音同國音「七」字相當，於是廣府音又索性將佢讀做七[2]——喺度睇得出呢個字轉讀變化之大。

呢個字嘅原本意思其實並唔係指賓舟嘅嗰條莖嘅部份，而係單單指膥袋，不過後來啲人一知半解就一律將佢概括俾人叫成副賓舟做「杘」。

不過講膥袋又好，講賓舟又好，雖然話呢個正式嘅字只係人體器官之一，但係要講就始終會好核突好難登大雅之堂，偏偏只有文化比較低嘅人鍾意將佢成日公開咁講，重當埋粗口咁用，咁喺冇人願意企出嚟糾正之下，加上普羅大眾冇特別去深究，於是就將呢個字變成代表賓舟，而寫法就由「杘」字直頭簡單噉寫成代表數字嘅「七」或者「柒」，之但係其實佢哋並唔共通。

「杘」嘅意思

• 名詞，賓舟嘅意思，量詞係「碌」。例子：

碌杘六七吋，隊到好𡳞遠。（賓舟長達六七吋，延伸到好遠嘅地方。）

• 形容詞，形容過咗時、好難睇、笨拙嘅形象，又可以指明形容思想，係好鮮明嘅形容用字。例子：

條友好杘（嗰個人嘅外表好過時、難睇、笨拙。）

條友啲思想好杘（嗰個人嘅思想好過時、笨拙。）

杘頭杘腦（笨笨拙拙，傻更更嘅。）

杘咗！（蠢咗。多數用喺發現自己做咗一件蠢事嘅自嘆。）

杘頭皮！（賓舟放喺頭皮上。）

• 語氣助詞，本身冇意義。可以同「𡳞」、「㞗」、「屄」字互相調換使用。例子：

玩乜杘嘢呀？（「玩夠未呀！？」；有就嚟發難嘅意味。）

邊杘個呀？（「究竟邊個呀？」；同上。）

搞乜杘呀？（「究竟喺度做乜呀？」；有嫌人阻掟嘅意味。）

點杘知！（「我點會知道？」；有真係唔知，要人唔好再問嘅意味。）

助詞例

打杘佢！　　將佢打到變成好難睇嘅樣！

其實都係將嗰個人打到好慘嘅詞語，但係如果呢度換咗個「㞗」字，意義層面上就會有少少唔同。箇中嘅學問係於：「前者有着重於得出嚟嘅結果，要打到佢變晒型咁先至肯收手；而後者呢就着重於個過程，總之狠狠咁打佢一餐，令到佢知痛嗌晒救命咁就可以。」由此可見，唔係每個詞語都可以將助語粗口字求其替換使用（可以參照「㞗」字嘅《「㞗」字作助詞用嘅其它例子》）。

形容詞例

貌似北京狗，杘到冇人有。　　市井創作俗句之一，即係話：樣貌好似隻北京狗噉，難睇笨拙到冇人比得上。

注：杘到冇人有，可以用杘到冇朋友 代替（難睇笨拙到識唔到朋友或者由有朋友變成冇朋友）

文法

「杘」同「㞗」用法相同，但係根據已故才子黃霑嘅著作《不文集》裏面所描述，「杘」同「㞗」嘅分別係──「㞗」勃起係硬嘅，而「杘」勃起但就係軟嘅。所謂「戇㞗」同埋「笨杘」，平時兩個詞語同樣都係形容人愚鈍癡呆，但係實際層次上亦有唔同：前者係指賓舟好易會好衝動咁胡亂勃起，後者就係連勃起都冇力嘅樣；所謂唔應該硬而硬嘅係「戇㞗」，應該硬但係唔硬嘅就係「笨杘」。因此，「杘」字就成為咗形容呆笨愚鈍嘅粗口專用字。

「杘」字係使用率最少嘅廣東粗口字。佢雖然可以作為語氣助詞，一樣係夾雜喺句子裏面，但係好多時讀起上嚟都唔係幾順口。「杘」字除咗用嚟做形容詞之外，應用嘅範圍其實唔係多，所以多數俾人用嚟創作一啲市井嘅句子或者俗語。

常見單獨字句應用

杘頭／杘碌　　龜頭，賓舟；呢度係指外表過時、難睇、笨吓笨吓嘅人，亦可單單指髮型。

杘頭皮　　同樣係對人用嘅詞語，多數指男性，但係侮辱力唔係太強，亦冇一定嘅意思；多數用嚟作為同比較熟朋友嘅玩笑式稱呼。例如：「喂杘頭皮，今晚落老蘭蒲預埋你呀！」（喂衰嘢，今晚去蘭桂坊飲酒消遣預埋你嗰份呀！）

笨杘／杘咕碌　　形容超級笨拙嘅人。

杘棘　　原本係指龜頭同陰莖之間交接嘅凹陷地方，但係呢個詞語就多數用嚟形容超等笨拙嘅人。因為「杘棘」呢個位置多數俾包皮遮掩，於是亦可以引申形容嗰啲行為鬼崇古惑，出爾反爾嘅人。

杘下杘下　　同「㞗下㞗下」同埋「烚下烚下」同樣係指人呆鈍，但係爆得粗口嘅話，啲人多數會用「杘下杘下」。

切杘 將賓舟切咗去。

杘是我碌強　　市井創作俗句之一，男性用嚟自誇嘅句子，意思係賓舟之中我係最強嘅。

𡳞到用時方恨杘　　市井創作俗句之一，意思係話到咗要用賓舟嚟做愛嘅時候，先至悔恨自己平時冇乜鍛練，搞到而家抬唔起頭。

切杘煲湯派街坊　　市井創作俗句之一，用嚟鬧嗰啲冇咩用嘅人。例句：你都係冇𡳞用㗎啦，不如切杘煲湯派街坊好過啦！（睇你做乜都唔掂咁冇鬼用，不如將賓舟切出嚟煲湯，然後分畀啲左鄰右里好過啦。）

杘𡳞懵懵食甜筒　　市井創作俗句之一，形容好似舔著雪糕咁呆呆鈍鈍嘅人。

吮杘 同「含𡳞」一樣，指口交。