User:拼音/template-Heonggong

香港係位處華南嘅一個城市，三面環海南至南中國海，西為珠江，東眺南大鵬灣。北面連住中國大陸，隔住深圳河。一九九七年開始，香港行政上係中華人民共和國嘅特別行政區，叫中華人民共和國香港特別行政區。香港塊地原本屬於大清帝國。一八四一年，英國響鴉片戰爭後佔領香港島，響島嘅北面起咗域多利亞城。清庭響一八四二年正正式式割咗個島畀英國。另外響一八六零年，再割埋九龍半島。一八九八年，英國再借埋新界九十九年。英國響一九九七年約滿嗰年，將香港主權還畀中華人民共和國。 中英兩個政府簽定咗《中英聯合聲明》，中華人民共和國政府保證過，一定會響一九九七年之後五十年，香港有高度自治，維持返香港原本制度。而中華人民共和國政府只係負責外交同防務。呢個就係所謂一國兩制。 ==歷史== 主條目：香港歷史 考古證明，香港早響舊石器時代就有人住。響西貢黃地峒發現咗以做整石器架生同石器。喺新界同大嶼山好多地方都搵到新石器時代嘅遺址。旺角就曾經係東漢、隋朝同唐朝人做陶器嘅地方。李鄭屋古墓亦證明香港喺東漢嗰時，係番禺治下。喺唐朝嗰陣，香港由惠州管，果陣軍隊就係駐喺宜家嘅屯門，而呢區個名就係咁嚟咖喇。 喺南宋嗰陣，嗰時得八歲嘅皇帝仔宋端宗畀元朝大軍一直追到嚟香港，據講佢同佢細佬阿趙昺曾經喺一舊石頭處抖過，之後啲人就叫呢塊石做宋王台喇。後來趙昺登基，但係啲元兵係咁殺到嚟，佢就經淺灣（即係家陣嘅荃灣）向西過海去新會，但當架船駛到宜家深圳蛇口左近嘅崖門時，畀啲蒙古大軍追到嚟，於是阿陸秀夫就咩住得嗰八歲嘅皇帝仔阿昺喺崖山跳海死鬼咗喇。 喺1841年，清朝喺第一次鴉片戰爭中俾英國打敗咗，重喺下年簽訂咗《南京條約》，將香港島割讓左俾英國。之後清廷又再輸俾英法聯軍，被逼簽咗《北京條約》，將九龍半島上成日對香港島搞三搞四嘅地區、夾埋昂船洲一齊割讓俾英國。由於果陣嘅清廷已經係日薄西山，喺九龍半島上嘅新邊界只係用好矮的鐵絲網分隔，位置就係喺今日嘅界限街。喺1898年，英國通過同清廷簽訂嘅《展拓香港界址專條》同其他一系列既租借條約，租借埋新九龍、新界同鄰近嘅兩百幾個離島，租期就係99年。 中華民國建立之後，民國政府本來係想取消不平等條約。但係就國力不繼，北伐嘅事情搞到國家政府唔得閒考慮攞番香港嘅主權。但係，果陣港英政府仍然開放中港邊界，兩地市民仲可以自由來往。果陣唔少香港人為咗建設國家，除咗捐錢返國之外，仲身體力行加入國民政府入面做嘢。前國民政府外長阿伍廷芳就係果陣香港嘅名流喇。 抗日戰爭爆發，日軍喺1938年登陸左廣東，仲好快咁佔領左廣州同附近嘅地區。之後香港嘅中國人支持抗戰，出錢出力。日本軍政府因為咁樣表現不滿，曾經好多次向英國嘅領事抗議。喺1941年12月7日，日本偷襲珍珠港之後幾個鐘頭，同時攻打馬來亞同越過深圳河打香港。其間日本同加拿大仲有英印軍發生左好多場好激烈嘅戰事。最後由於駐港嘅英軍戰力唔夠，喺1941年12月25日聖誕節嗰日，果陣嘅港督楊慕琦宣佈向日本投降，開始咗香港三年零八個月嘅日治時期。日治果陣，日本人為左方便統治，多次將啲窮嘅港人搬返去中國大陸。由於苛政連連，到咗香港被佔領嘅中期，新界地區嘅居民仲響應東江游擊隊，喺香港成立「港九縱隊」，加入對抗日本嘅武裝勢力，參加者多數係左派人士。 抗戰勝利之後，中華民國政府一度喺聯合國上要求要收番香港，但礙於果陣國共內戰已經開始咗，中華民國政府無力同英國政府攞返個公道。當中國共產黨喺1949年成立左中華人民共和國政權之後，中、英雙方就香港問題達成協議：中方無意收返香港主權，亦都唔干預前國民政府軍民喺香港嘅活動，用以換取英國對中華人民共和國嘅承認。喺1950年，英國承認中華人民共和國嘅成立，係第一個承認中華人民共和國嘅西方國家。而後來由於中華人民共和國喺朝鮮戰爭同西方世界交惡，搞到俾全世界禁運，令到香港成為中華人民共和國嘅轉運物資、徵集資金、收集情況嘅唯一窗口。 喺1950年代中，發生右派工會暴亂，中華民國政府嘅情報人員從此就唔俾再入香港。 喺1967年，文化大革命席捲中國大陸，紅衛兵好多次意圖越過中港邊境。後來左派公然響應國內造反派嘅號召，喺香港好多地方策動暴亂。果陣喺香港街頭擺滿寫上「同胞勿近」的真假菠蘿(土製炸彈)，搞到香港陷入一片恐慌入面。後來中華人民共和國總理周恩來，以「長期利用、充分打算」嘅方針，堅持唔打算收返香港，先令到這一件事得到平息。 經歷過1960年代尾嘅暴動，港英政府喺1970年代初調整咗政策方針，開始諮詢華人嘅意見，逐步吸納華人進入決策嘅機制。1973年香港經歷咗一次經濟大衰退，不過自從1974年開始了長達20多年嘅高速增長。1970年代中香港地鐵開始動工、廉政公署成立、開始實施九年免費教育、同埋進一步擴展公共房屋嘅計劃，都為香港未來的「經濟奇蹟」奠定咗基礎，令到香港喺1980年代初成為世界著名嘅「亞洲四小龍」之一。 喺1970年代初期，由於新界土地契約嘅問題，令到港英政府唔可以唔考慮香港前途嘅問題。英國政府曾經好多次要求向中華人民共和國政府延續新界嘅租約，但俾中華人民共和國政府拒絕。不過，喺1970年代末，「香港前途問題」已經成為中英兩國嘅正式議題，但究竟係邊方面先提出轉移香港政權，外界就一直都眾說紛紜，不過唔理邊個先提出，「香港前途問題」搞到中英兩國揭開咗長達近20年嘅爭拗序幕。 喺1980年代初，英國曾經提出過分拆香港嘅「主權」同「治權」，前者歸中華人民共和國，不過英國人仍保留治權。唔少香港傳統上流社會嘅政治同商界精英，開始果陣都支持有關嘅建議。傳統英國資金嘅商業力量，好似匯豐銀行、怡和洋行，都有參與遊說嘅工作。 期間，由果陣商界年青領袖李鵬飛率領果陣香港嘅工商界精英組成「年青才俊團」前往北京交流，仲得到果陣嘅領導人鄧小平接見。當佢哋提出有關建議時，俾鄧小平嚴辭指責，這種強烈反對及絕不讓步嘅態度，令到遊說工作註定失敗。中華人民共和國果陣堅持必須收回香港，不過香港人可享有「高度自治、港人治港」，呢樣變成中英兩國談判時的唯一框架。

Yawbin wantlay fong Penkyamp