維基百科

和弦

一組三個或以上唔同嘅音符，佢哋同時發出，並且構成埋一個和聲單位。

和弦（英文：chord，粵拼：粵化口語音：kot1），喺音樂理論，係指兩個或者以上連續音程嘅組合。最基本嘅和弦有三個唔同嘅音[1]，叫三和弦（三個音嘅和弦）；基本嘅三和弦由兩個連續嘅三度組成，另外有二度同四度組成嘅和弦，兩個連續嘅四度組成嘅和弦等等。和弦係和音嘅基礎。

根據咁嘅定義，淨得兩個音，原則上唔算和弦，如果有三個音但係有兩個音係重覆音（即係一樣音名，但係唔同八度）亦唔算數[1]，不過喺現實，有啲叫和弦嘅嘢有時會唔足三個音。例如，喺做和音嗰陣有時原則上係實現緊某個和弦，但係因為某種原因需要省略一個音；電結他亦有一種叫 power chord 嘅彈法，名係叫和弦，但係得兩個音，就算係三條線嘅彈法都係用咗重覆音[2]，樂理上唔算數。

\layout { line-width = #72 ragged-last = ##f \context { \Score \override SpacingSpanner.spacing-increment = #1/2 }} \new Staff = "main" \with { \remove Bar_engraver \remove Time_signature_engraver } << \new Voice \transpose c c' { \key e \major << e gis b >> \ottava -2 << e,, b,, >> \ottava 0 e8[gis b gis] << \voiceOne gis4 \new Voice { \voiceTwo e } \new Staff \with { \remove Bar_engraver \remove Time_signature_engraver } \transpose c' c << % undo transpose \new Voice { \clef bass \voiceThree b } \new Voice { \voiceFour e, } >> >> } >>
左到右：一般人心目中嘅 E 大和弦、電結他嘅 E power chord（基本掃法，下面個 15⌟ 表示實際音係低兩個八度）、分解和弦一例、作曲或者編曲嗰陣其中一個可能會用嘅和弦配置。

雖然定義上，和弦係兩個或者以上連續音程嘅組合，但係知道咗係呢個組合係邊幾個音之後，啲音喺邊個八度出現，其實係可以揀嘅。實際上㨂邊幾個音高嚟實現某個和弦，叫和弦配置。

和弦唔一定要一齊彈，亦可以拆散嚟彈，拆散嚟彈嘅叫分解和弦。

一段樂曲通常會用多過一個和弦，所用嘅和弦隨住時間嘅變化叫和弦進行。

順階和弦

編輯
 
上：構成 C 大調嘅七個音；下：喺 C 大調入面對應嘅七個基本三和弦。

無論係乜嘢音階，都可以順住音級，逐個音當做 ｢根音｣（root；根音嘅音名會成為和弦名嘅一部分[1]）去整一系列對應嘅三和弦出嚟，呢啲三和弦中文叫 ｢順階和弦｣[註 1]（英文冇特別名）。

整順階和弦嘅方法係根音加三音[註 2]（根音當係第一個音，順住音階向高數嘅第三個音）再加五音[註 2][1]。例如，如果係 F 大調，根音係 G，對應嘅三和弦就係 G-B♭-D，中間係 B♭ 係因為音階入面嗰個位係 B♭，唔係 B。

順階和弦嘅數量未必等如音階入面音嘅數量；例如，構成大調嘅音有七個，每個大調亦有七個順階和弦，但係旋律小調雖然淨係得九個音（原則上七個音，但係有兩個上落唔同，所以實際上係九個），但係因為除咗根音之外，三音或者五音都可能係上落唔同嘅嗰兩個音，結果係旋律小調有十三個順階和弦而唔係九個。

延伸和弦

編輯
 
左到右：C 大三和弦、大七和弦、大九和弦、大十一和弦。

基本嘅三和弦可以再向上延伸，叫延伸和弦[註 3]（chord extension）或者就咁叫延伸，但係延伸之後嘅名就唔係計有幾多個音，而係延伸到邊度。三和弦延伸一次叫七和弦[註 4]（因為去到第七個音，唔係話佢有七個音），再延伸一次叫九和弦[註 5]，如此類推。

和弦嘅性質

編輯

和弦按佢嘅性質，主要分大和弦[註 1]（major chord）、小和弦[註 1]（minor chord）、增和弦[註 1]（augmented chord）同減和弦[註 6]（diminished chord）四大類，呢四大類同和弦嘅結構有關[3]：

種類 根音同三音之間嘅音程 三音同五音之間嘅音程
大和弦 大三度 小三度
小和弦 小三度 大三度
增和弦 大三度 大三度
減和弦 小三度 小三度

去到延伸和弦，就算啲音全部係相隔三度，咁樣分都唔會再夠用，所以會開始有其他分類，例如，七和弦開始會有一種叫 ｢屬和弦｣[註 7]（dominant chord）嘅分類。

原位同轉位

編輯
 
左至右：原位即係根音（1）係底音，第一轉位即係三音（3）係底音，第二轉位即係五音（5）係底音。

每一個和弦都可以有原位同轉位；原位即係上面講嗰種，根音喺底，轉位即係根音唔喺底。如果三音喺底，叫第一轉位；如果五音喺底，叫第二轉位。喺底嗰個叫 ｢底音｣（base note）。

樂理上，一個和弦係原位定轉位，只係睇根音同底音嘅關係，即係如果根音等如底音，樂理上就算原位，但係例如如果底音係三音，就算係第一轉位。

掛留和弦

編輯
 
掛留和弦示意圖：上：編曲人心目中嘅和弦進行；下：實際出現嘅和弦。

喺和弦進行嘅過程中，作曲或者編曲人有時會將和弦嘅某個音暫時保留，即係理論上應該已經轉咗第個和弦，但係仍然有部份舊和弦嘅音喺度，呢種做法叫延留音[註 8]（suspension）。

延留音嘅出現就係實際上改變咗實現出嚟嘅新和弦，令新和弦冇咗某個應該有嘅音，但係又多咗個本來唔應該有嘅音，呢種唔應該有嘅音喺中文叫 ｢和弦外音｣[註 5]（non-harmony notes）。

延留音本來係種作曲或者編曲技巧，但係實際上出現嘅 ｢掛留和弦｣[註 9]（suspended chords）已經變成一種和弦，指三和弦唔彈三音。

掛留和弦本身冇咗三音，樂理上唔係和弦，所以通常都會寫明加咗邊個延留音（即係中文所講嘅外音）；不過，所謂延留喺現時嘅音樂好多時其實並唔存在，作曲或者編曲人好多時係當成套嘢係一種和弦。

和弦寫法

編輯

除咗用五線譜直接寫明和弦配置之外，寫和弦有幾種方法，都係唔會指明和弦配置（除咗轉位之外）。

結他（古典結他除外）寫和弦係要彈出嚟，所以寫和弦嘅方法通常都好直接；直接寫音名（例如 C 表示 C 大和弦，即係 C-E-G），小和弦註 m 或者 min（例如 Am 表示 A 小調，即係 A-C-E），轉位加斜線再註明底音係乜（例如 C/E 表示 C 大和弦第一轉位，即係 E-G-C）。另外仲有其他符號表示其他嘢。

作曲或者編曲寫和弦嘅目的就係創作需要，所以用一種比較抽象化嘅寫法；呢種寫法係按所用嘅音階，按根音嘅音級由 1 開始編號碼，音階嘅第一個音做根音嘅和弦叫 1，第二個音做根音嘅和弦叫 2，如此類推，但係用羅馬數字寫，大楷表示係大和弦，細楷表示係小和弦。後面可以加 a、b、c 等等表示原位、第一轉位、第二轉位等等。另外仲有其他符號表示其他嘢。

另外有種方法作曲、編曲同結他都有用，類似上面羅馬數字呢種，但係用阿拉伯數字，不過轉位就好似直接寫音名嗰種咁寫成好似分數咁，呢種寫法叫 Nashville Number System（NNS）[4]，有譯 ｢數字和弦｣[註 10]。

再另外有種寫法叫 ｢數字低音｣（figured bass），源於巴洛克音樂[5]。呢種方法係用某種方法標底音（巴洛克時期嗰陣本來係用五線譜[6]），但係上面係邊兩個音（底音為之 1）用上標同下標阿拉伯數字表示，唔標即係  [6]。學術界亦常見，用嚟做分析，佢哋會將數字低音配之前講嗰種羅馬數字，即係羅馬數字標嘅唔係底音，而係根音[7]。

例

編輯

C 大調嘅七個和弦

編輯

構成大調嘅有七個音，對應七個和弦：

五線譜[註 11]
 
 
 
 
 
 
 
構成音 C-E-G D-F-A E-G-B F-A-C G-B-D A-C-E B-D-F
根音 C D E F G A B
寫法 結他 C Dm Em F G Am Bdim[註 12]
羅馬數字 I ii iii IV V vi vii°
數字和弦 1 2- 3- 4 5 6- 7°
數字低音 I 或者 I  ii 或者 ii  iii 或者 iii  IV 或者 IV  V 或者 V  vi 或者 vi  vii° 或者 vii° 

A 自然小調嘅七個和弦

編輯

構成自然小調嘅亦都係七個音，同樣係對應七個和弦；注意 C 大調同 A 自然小調嘅調號一樣，所以呢個例嗰啲和弦同上一個例嗰啲其實完全冇分別，但係除咗結他寫法冇變之外，啲編號全部唔同晒，原因係音階唔同咗：

五線譜[註 11]
 
 
 
 
 
 
 
構成音 A-C-E B-D-F C-E-G D-F-A E-G-B F-A-C G-B-D
根音 A B C D E F G
寫法 結他 Am Bdim[註 12] C Dm Em F G
羅馬數字 i ii° III iv v VI VII
數字和弦 1- 2° 3 4- 5- 6 7
數字低音 i 或者 i  ii° 或者 ii°  III 或者 III  iv 或者 iv  v 或者 v  VI 或者 VI  VII 或者 VII 

轉位

編輯

假設用緊 G 大調，C 大和弦（即係 G 大調嘅第四和弦）嘅原位同轉位會寫成咁：

原位 第一轉位 第二轉位
五線譜[註 11]
 
 
 
構成音 C-E-G E-G-C G-C-E
根音 C C C
底音 C E G
寫法 結他 C C/E C/G
羅馬數字[註 13] IV 或者 IVa IVb IVc
數字和弦      
數字低音[7][8] IV 或者 IV  IV  或者 IV  IV 

借用和弦

編輯
 
副屬和弦示意圖：假設用緊 C 大調，屬音係 G，G 大調嘅屬音係 D，所以 C 大調嘅副屬和弦係 D 大和弦。

喺作曲或者編曲嗰陣，有時會想暫時用一用第個音階嘅和弦，呢種唔屬於用緊嗰個音階嘅和弦叫 ｢借用和弦｣[註 14]（borrowed chord），其中一個常見嘅借用和弦係副屬和弦[註 14]（secondary dominant，又叫 V of V[註 15]，寫 V/V，即係屬音（音階嘅第五個音）做主音嘅嗰個音階嘅屬音做根音喺嗰個音階嘅順階和弦）。

睇埋

編輯

參考資料

編輯
  1. ↑ 1.0 1.1 1.2 1.3 Koutso, Alex. "La formation des accords en musique (accord majeur, mineur…)" (法文). 喺2024年10月20號搵到.
  2. ↑ Keith (2011年7月17號)。《必修電結他入門系列(一):初學者必看 基本技巧 POWER CHORD》。喺2024年10月20號搵到。
  3. ↑ Hutchinson, Robert (2017). "Introduction to Triads". Music Theory for the 21st-Century Classroom (美國英文). 喺2024年10月21號搵到.
  4. ↑ Martin, Dave (July 8, 2022). "The Nashville Number System Demystified". InSync (英文). Sweetwater. 喺2024年10月20號搵到.
  5. ↑ Bultitude, Jade (September 7, 2023). "Figured Bass Made Simple: Tips And Techniques" (英文). 喺2024年10月20號搵到.
  6. ↑ 6.0 6.1 "Introduction to thoroughbass" (英文). 喺2024年10月20號搵到.
  7. ↑ 7.0 7.1 "Chords" (PDF). Music in Theory and Practice (英文). p. 78. 喺2024年10月20號搵到.
  8. ↑ Kulma, David. "Roman Numerals and Inversion Symbols" (英文). 喺2024年10月20號搵到.

註

編輯
  1. ↑ 1.0 1.1 1.2 1.3 譯名見：いちむらまさき 2019, 目錄
  2. ↑ 2.0 2.1 譯名見：徐弦 2016
  3. ↑ 譯名見：〈【吉他小教室】讓和弦變好聽的秘訣–延伸音〉 (臺灣中文)。2021年10月17號。喺2024年10月21號搵到。
  4. ↑ 譯名見：課程發展處藝術教育組 2023, p. 49
  5. ↑ 5.0 5.1 譯名見：課程發展處藝術教育組 2023, p. 36
  6. ↑ 譯名見：課程發展處藝術教育組 2023, p. 16
  7. ↑ 譯名參考：課程發展處藝術教育組 2023, p. 17
  8. ↑ 譯名見：課程發展處藝術教育組 2023, p. 53
  9. ↑ 譯名見：〈司琴教學系列 — 和弦篇：掛留和弦 sus4 (Suspended chord)〉 (香港中文)。2014年2月19號。喺2024年10月22號搵到。；又：〈林家謙唱《冷戰》超驚喜 與鋼琴家張貝芝四手聯彈《特倫斯夢遊仙境 》〉 (香港中文)。2024年7月13號。喺2024年10月22號搵到。
  10. ↑ 譯名見："The Bridge Music" (香港中文). 喺2024年10月20號搵到.
  11. ↑ 11.0 11.1 11.2 五線譜太精確，表達唔到啲咁概念性嘅嘢，所以咁寫純粹係示範性質，呢個只係其中一個可能嘅和弦配置。
  12. ↑ 12.0 12.1 即係 B 減和弦（B diminished），或者寫 Dm6/B，構成音冇分別。
  13. ↑ 呢度指嘅係作曲或者編曲人會用嘅寫法；學術界會用數字低音。
  14. ↑ 14.0 14.1 譯名見：課程發展處藝術教育組 2023, p. 8
  15. ↑ 讀 ｢five of five｣。

書目

編輯
由「https://zh-yue.wikipedia.org/w/index.php?title=和弦&oldid=2202281」收