城巴1號線

城巴1號線係香港島一條巴士線，來往跑馬地（上）同埋摩星嶺，主要途經跑馬地、銅鑼灣、灣仔、金鐘、中環、上環同埋西營盤等地。

歷史

戰前

1號線係香港島歷史最悠久嘅巴士線之一，1928年11月5號由香港電車公司開辦，來往西環同埋跑馬地，用嚟疏導電車客量。當時呢條線只係輔助線，冇冧巴嘅。開辦幾日後，電車公司將呢條線縮短到上環。

幾年後，當時嘅港英政府實行巴士專營權制度，中巴取得港島區專營權。呢條電車輔助線由1933年6月11號開始由中巴接辦，當時總站設喺中環皇家碼頭。一年後因渡輪服務重整而搬去卜公碼頭，1935年4月1號又再延長至西營盤。

戰後

路線喺第二次世界大戰期間停駛，直到1945年9月22號至重新開辦，來往銅鑼灣同埋中環碼頭，1945年10月延長至水街，1946年1月又縮短至中環街市，但仍然途經跑馬地。1946年5月12號又再將總站搬去中環統一碼頭。

1950年代

戰後初期，中巴唔夠資源，大部分都投放喺電車去唔到嘅地方，所以定線同電車大同小異嘅1號線班次唔係好密。1949年國共內戰，大批中國大陸難民逃到香港，香港人口急升，對1號線需求增加，中巴不斷加密1號線班次應付。1953年9月16號，往中環方向開始繞經跑馬地半山，奠定1號線開始深入跑馬地嘅基礎。

1960-70年代

1963年6月21號，1號線總站搬去蟠龍道（即跑馬地上，家下1號線總站），呢個改動對1號線影響深遠，以後嘅改動，都以當時嘅路線版本作為藍本。1960-70年代係1號線全盛期，當年中巴一引入雙層巴士，就投放到1號線行。1972年7月1號，中巴調整收費制度，將路線分為「市區平路路線」、「市區斜路路線」以及「郊區路線」，1號線收費由兩毫加到三毫。

1980-90年代

1980-90年代，1號線嘅對手開始增加，包括小巴、地鐵等，於是喺1980年2月3號加設分段收費，收「市區平路路線」收費。但幾年後，1985年5月31號地鐵港島綫通車，地鐵、小巴、電車同巴士互相搶客，但1號線處於劣勢，中巴逐漸削減1號線班次。期間亦多次搬總站，1980年搬去中環港澳碼頭、1987年搬去中環林士街。

1993年9月1號，政府將中巴26條巴士線交畀城巴接辦，包括1號線，並全線改派冷氣巴士行。城巴初時重派出12米巴士行，希望挽救1號線，但住喺跑馬地嘅居民唔多，兼且都係有錢人，冇乜人搭巴士。而且跑馬地地理環境唔啱12米車行，1號線好快就改用短身巴士。1999年8月22號，來往堅尼地城同埋跑馬地嘅5A線改為全日服務，而且只收港幣3.4，對當時收$5.1嘅1號線係一大打擊。

21世紀

2003年6月10號，新巴母公司周大福集團收購城巴後，重組旗下巴士線。當時，計劃1號線同5A線合併，並採用冧巴5A。兩線喺2004年5月31號合併，總站改為跑馬地（上）至堅尼地城（卑路乍灣），並降低全程車費。當時由於香港島區議員同埋民間團體認為1號有保留價值，因此城巴提供一段「適應期」，1號同埋5A線路線一樣但係用兩個冧巴，兩條線班次梅花間竹開出。呢次係1號線自1928年11月開辦後幾日撤出西區以來，再次踏足堅尼地城一帶。合併後嘅1/5A線，曾經係香港巴士史上首條有兩個路線冧巴嘅巴士線。當時卑路乍街一帶整緊路，呢項改動俾區議員投訴加重嗰帶交通擠塞，因此自2004年6月28號起堅尼地城總站搬去西寧街巴士總站，以減少班次延誤同埋方便管理。

後來，城巴進行民意調查，訪問咗千幾個乘客，結果顯示較多乘客揀「1號線」做永久嘅路線冧巴。由2004年11月28號起，路線1/5A永久稱為1號線。

2015年，因應西港島綫通車，本線延長到摩星嶺代替停辦嘅5號綫，同時同10號巴士新增八達通轉乘優惠畀乘客往來摩星嶺同銅鑼灣。

行車資料

行車路線

• 摩星嶺開途經：域多利道，加多近街，吉席街，堅彌地城海旁，德輔道西，干諾道西，干諾道中，急庇利街，德輔道中，遮打道，美利道，金鐘道，軒尼詩道，菲林明道，灣仔道，摩理臣山道，體育道，黃泥涌道，成和道，藍塘道，箕璉坊，蟠龍道。

• 跑馬地（上）開途經：蟠龍道，藍塘道，成和道，景光街，山光道，黃泥涌道，摩理臣山道，灣仔道，菲林明道，軒尼詩道，金鐘道，德輔道中，摩利臣街，干諾道中，干諾道西，德輔道西，堅彌地城海旁，山市街，卑路乍街，域多利道。

車站一覽

跑馬地（上）方向			堅尼地城方向
車站	車站名稱	位置	車站	車站名稱	位置
1	堅尼地城	西寧街	1	跑馬地（上）	蟠龍道
2	西市街	域多利道	2	箕璉坊	箕璉坊
3	爹核士街	吉席街	3	桂芳街	成和道
4	卑路乍灣公園	堅彌地城海旁	4	山村道	成和道
5	歌連臣街	堅彌地城海旁	5	景光街	景光街
6	皇后大道西	德輔道西	6	養和醫院	黃泥涌道
7	山道	德輔道西	7	跑馬地馬場	黃泥涌道
8	嘉安街	德輔道西	8	立德里	摩理臣山道
9	西區警署	德輔道西	9	利景酒店	灣仔道
10	正街	德輔道西	10	普樂里	灣仔道
11	東邊街	德輔道西	11	修頓球場	軒尼詩道
12	修打蘭街	德輔道西	12	衞蘭軒	軒尼詩道
13	永安中心	德輔道中	13	太古廣場	金鐘道
14	恒生銀行總行	德輔道中	14	中銀大廈	金鐘道
15	德忌利士街	德輔道中	15	置地廣場	德輔道中
16	皇后像廣場	遮打道	16	中環街市	德輔道中
#	歷山大廈	德輔道中	17	急庇利街	德輔道中
#	遮打花園	德輔道中	18	西港城	干諾道西
17	金鐘站	金鐘道	19	皇后街	德輔道西
18	熙信大廈	軒尼詩道	20	紫薇街	德輔道西
19	柯布連道	軒尼詩道	21	正街	德輔道西
20	譚臣道	菲林明道	22	水街	德輔道西
21	克街	灣仔道	23	山道	德輔道西
22	天樂里	灣仔道	24	中遠酒店	堅彌地城海旁
23	樂活道	黃泥涌道	25	山市街	堅彌地城海旁
24	雅谷大廈	黃泥涌道	26	聯邦新樓	卑路乍街
25	奕蔭街	成和道	27	加惠民道	域多利道
26	昇平樓	成和道	28	堅尼地城	西寧街
27	箕璉坊	箕璉坊
28	跑馬地（上）	蟠龍道

客量

本線係連接跑馬地至摩星嶺嘅唯一路線，而且途徑灣仔、中環等重要嘅商業區，亦都吸引咗唔少流水客，因此本線客量好大。下午繁忙時段往跑馬地方向經常喺灣仔已經滿到上唔到車。

出面網頁

• 新巴/城巴官方網站–城巴1號線