大刀岃

大刀岃（Tai To Yan），又寫大刀屻，係香港一山，高五百六十五米。

大刀岃位於新界中部偏北，林村以北，大窩以西南，八鄉以東。行政上係大埔區、元朗區嘅地界。部份地劃入林村郊野公園之內。同西北面北大刀岃，一脈相承。之所叫大刀岃，皆因山脊兩側，都係懸崖或斜坡，形似大刀向天。

名

岃係山好高咁解，大刀就係佢嘅形狀，高而窄，似大刀向天^[1]。一向手寫岃字，但要遷就中文電腦輸入，亦寫屻字。

大刀岃同北大刀岃，係同一山體，北大刀岃佔山體東北部。山體走向，西南到東北，由林村到粉嶺。佢東側係大窩谷地，西側係打石湖嘅谷地。佢東西都有山平而走，東南對住大菴山、小菴山，西面對住鷄公嶺。南面同觀音山相連，相連處有坳位，卽係嘉道理農場入口位。觀音南面，又同香港第一高山，大帽山相連。

大刀岃南到觀音山，兩山分隔兩邊谷地，東面係林村谷地，而西面係錦田、八鄉、石崗谷地。大刀岃南山腳就係石崗，西南係八鄉橫臺山。大刀岃嘅水，分別注入林村河、錦田河同雙魚河。

大刀岃全無車路。要去頂，可以由山南嘉道理農場入口，再行上頂。或者由北大刀岃行過去。