太安樓

太安樓（英文：Tai On Building），係香港出名嘅舊樓，喺1968年起好，發展商係香港置地集團。呢棟大廈屬於嗰間公司嘅經濟住宅計劃第二期（第一期係月華街觀塘大廈），呢個項目由王伍歐陽建築師事務所有限公司嘅歐陽昭（Lesile Ouyang）建築師同埋工程師負責，至於總承建商就係孫福記營造有限公司。呢棟大廈座落喺香港島東區西灣河嘅筲箕灣道，隔離就係港鐵港島綫嘅西灣河站，大型屋苑太古城都喺附近，大廈被四通八達嘅街道包圍，例如筲箕灣道、東區走廊、太康街、太安街同康祥街。

太安樓商場入面大部份係細鋪頭

大堂嘅開放式𨋢口位

大廈嘅設計

太安樓係一座有唔少單位嘅單幢式物業，地下係屋苑商場。大廈係Ｈ型設計，高28層，總共有1884伙小型單位。1968年賣樓嘅價錢大概係港幣17,300至到27,000之間，太安樓每層都有68個單位同16部𨋢，走廊用咗長直設計同埋用泛光燈，走廊兩邊都係住宅單位，設計同早期香港屋宇建設委員會嘅廉租屋邨冇乜太大分別，所以太安樓有「私人廉租屋」同「善心樓」等等嘅花名。大廈入面有好多非法食肆，成日被執法機構檢控，所以有啲執法人員覺得太安樓係「東區毒瘤」，有啲裁判官甚至話太安樓係「眼中釘」、「無王管」。

由起好到1979年，太安樓依然座落喺海傍。不過去到1980年代，因為填海起樓同埋東區走廊，令到西灣河嘅海傍一直北移。宜家成個鯉景灣同埋附近屋苑都係起喺填海得嚟嘅地，而太安樓嘅地方亦都變成咗內陸。

設施

太安樓地下係商場，最出名嘅係賣嘢食嘅鋪頭、文具鋪菲林鋪同埋影印鋪。商場入面仲有渣打銀行、滙豐銀行、大新銀行、工商銀行等等幾間銀行嘅分行、華潤萬家（2017年8月24號開始轉做同集團嘅U購）、麥當勞、藥房、診所、惠康（2017年9月27號開張）、五金鋪、電器修理鋪、漫畫鋪同埋租碟鋪。

以前地下重有油站同埋戲院（佢哋中間係細工廠），工廠外面有啲泊車位，重有一個供應淡水畀漁船用嘅水站，因為填海之前嘅太安樓外面已經係海邊。商場入面有賣魚、賣肉嘅舖頭同士多、雜貨舖等等，對住電車路重有茶樓，晌地下𨋢口位側邊有公共電話方便住戶，一樓向海（宜家向住鯉景灣）嘅平台係公眾休憩花園。當年太安樓落成嗰時個商場曾經係亞洲最大嘅商場。

1989年，陳永安喺西灣河太安樓創立咗後來出晒名嘅太興燒味，所以佢被封為「燒味大王」。太興後來發展咗做連鎖式嘅茶餐廳。2017年，太興燒味太安樓分店已經搬咗去鯉景灣。

問題

• 早期嘅太安樓係高空擲物嘅黑點：喺1980年代初期，成日有住戶將電視機、紙巾、膠袋、梳化、甚至成個雪櫃喺單位掉落嚟。

• 治安方面，大廈總共有18個保安，業主每個月總共要畀19萬管理費，當中保安公司要收14萬元，其餘5萬用嚟俾電費、水費、第三保、大廈同𨋢嘅維修保養開支。

• 樓入面有啲單位做咗劏房，甚至被流鶯用嚟做一樓一。

事件

2002年11月5號深夜，12樓有個單位對開走廊畀大耳窿縱火，繼而發生咗三級火警。由於走廊平時放咗好多冇用嘅家具雜物，濃煙同火炎沿住通道蔓延，幾千個住客慌忙走落地面。消防處派咗七隊煙帽隊到現場撲救，直到凌晨1點幾，至少有14個住客受傷送院。由於現場大廈電箱爆炸，消防員將成幢大廈嘅居民疏散，令到大廈隔離嘅筲箕灣道一度逼滿喺大廈走出嚟人。

2009年2月12日，東區裁判法院有個𡃁仔喺押送期間逃走。一個14歲嘅失蹤少年被搵返之後送去東區法院少年法庭應訊，法庭判佢入屯門兒童院。判咗之後嗰個𡃁仔喺法院停車場突然發難擺甩警察，飛奔逃去無蹤。警方接報話有個睇落似嗰個𡃁仔嘅人行咗入法院百幾米外嘅太安樓，警方於是派咗30個警察封鎖大廈同商場至少7個出入口，並且帶埋嗰個𡃁仔嘅相上大廈逐層搜查。經過大半日嘅行動，警方都搵唔翻個𡃁仔，不過後來個𡃁仔喺第度被警方拉咗。

2014年中，太安樓OK便利店側邊嘅水管突然爆裂。

2016年中，太安樓8樓發生咗火警。

交通

• 電車
• 港鐵（港島綫西灣河站）
• 巴士
  • 港島路線：2、2A、2X、8H、14、18X、33X、77、77X、81、81A、82、82S、82X、85、85A、99、99X、720、720A、722、N8、N8X
  • 過海路線：102、102P、106、106P、110、307P、606、606A、678、682、682A、682B、682C、682P、694、N122
  • 機場路線：A12
• 專線小巴
  • 港島小巴：20、32、50、61、65、65A、68

睇埋

• 太古城
• 香港中國婦女會中學
• 港島民生書院
• 鯉景灣
• 蘇豪東
• 嘉亨灣
• 筲箕灣避風塘
• 興東邨
• 鰂魚涌公園
• 港島東體育館
• 香港電影資料館

出面網頁

• 太安樓嘅地圖
• 筲箕灣太安樓嘅資料
• 關注太安樓業主權益
• 東區卓越工作贏讚賞 (香港警察)