輔音

輔音（粵拼：fu6 jam1），又叫子音，係種音素，同元音（母音）相對。具體定義係：「發音器官某一部份形成阻礙，令到伊部份有一定程度嘅緊張，並由較強氣流克服障礙形成嘅語音」。子音分類通常有三套標準：一、發音（又叫調音）位置（又叫部位）；二、發音方式；三、聲帶振唔振動。

通常音節要有元音做音節核，但某啲輔音喺部份語言都可以做音節核。

分類方法

啲人要將輔音分類嗰陣時，正常嚟講都係按調音部位同調音方法嚟分嘅：用粵語入便有嘅音做例子嘅話，

• 例如雙唇鼻音（想像粵拼：maa1）/m/ 同齒齦鼻音（想像粵拼：naa1）/n/ 兩者都係鼻音，都涉及軟腭下垂（相同調音方法），但係調音部位唔同—/m/ 用晒兩塊嘴唇嚟發音，而 /n/ 就係用到脷尖；
• 又或者可以想像吓 /m/ 同 /p/（想像粵拼：baa1）之間嘅差異，兩者嘅調音部位相同，都係用兩塊嘴唇嚟發音嘅，但係調音方法就唔同—/p/ 涉及嘅係聲道空氣流動受阻。

語言比較

唔同語言嘅輔音特性可以幾唔同。廿一世紀初嘅廣東話有19隻輔音，英格蘭話有23隻，河內越南話有20隻－都算係接近平均嘅輔音數量；世上有啲語言得6隻咁少，又有啲語言有成百幾隻咁多。

「有冇呢隻呢隻常見嘅音」都可以攞嚟比較：例如/f/係好常見嘅輔音，據估計49%嘅語言都有佢；喺廿一世紀初嘅世界，由英格蘭話至法國話、廣東話至客家話至標準官話至日本話都有/f/，但韓國話就無。

睇埋

• 音節輔音
• 複輔音