寫作過程
寫作過程（粵拼：se2 zok3 go3 cing4）泛指一位作者寫出一份以文字寫嘅作品嘅過程，包括相對簡單嘅日常寫作－例如一個普通人寫雜文或者網誌，又可以包括啲複雜嘅專業寫作－例如專業嘅作家或者編劇寫散文或者劇本。喺專業寫作過程裏面，作者需要創造出一份可以攞出街去俾讀者觀眾睇嘅作品，會對作品質素有嚴格要求[1][2]。
喺創意寫作等嘅領域上，寫作過程係一個相當重要嘅概念：有唔少作家都發覺，佢哋喺寫作過程當中要諗好多嘢，而且仲需要用到好多專業知識，例如作故仔嘅人要用有關橋段嘅知識，務求寫出好睇嘅故仔，而且仲要用修辭手法將個故仔表達出嚟[3]；作家喺寫作途中仲成日會撞到寫作閉塞－即係諗唔到計，好似 kik1 住咗喺度噉[4]。
因為寫作過程咁複雜，有唔少從事寫作相關工作嘅人都有詳細研究寫作過程，例如係同行之間會分享有關「點樣克服寫作閉塞」嘅心得，甚至仲有用心理實驗等嘅方法，剖析寫作過程涉及嘅認知同情緒變化[4]。
基本步驟
編輯睇埋：創意寫作
對於寫作過程應該點做，唔同學者有唔同睇法，而且唔同人會偏好唔同嘅做法。
喺歐美嘅文壇，主流一般都係將寫作過程分三大部份[1][2]：
- 前寫作（prewriting）：作者要對「份成品最後會係點嘅樣」作出基本嘅計劃；攞寫短篇小說嚟做例子，做前寫作涉及對角色、背景設定、情節以及主題等嘅元素作出一啲基本嘅計劃；喺呢個階段，作者往往會
- 做一啲研究先，搜集吓有關個寫作題目嘅資料，例如寫傳記就要去耖吓有關主角生平嘅資料，而寫一篇講人工智能嘅科幻故事就要去學吓有關人工智能嘅知識先... 等等；而且作者往往要去睇吓之前嘅類似作品係點嘅，以免自己唔覺意作出咗一個類似打前作品嘅故仔；然後作者好多時就要將個故仔嘅題目集中啲，例如佢學多啲相關知識之後先發現，人工智能係個好大嘅題目，而佢篇小說預咗係得嗰 5,000 字咁長，唔會處理到晒人工智能上嘅所有重大課題，於是佢就改為將篇小說嘅主題設喺某個特定嘅人工智能課題嗰度。
- 作者要諗出令讀者有共鳴嘅角色同有吸引力嘅設定，及後作者就要度清楚啲情節，包括每個情節大致上發生乜事，仲有係檢查吓啲情節係咪合理等等[5][6]。
- 寫作（writing）：作者要郁手寫返份原稿出嚟；如果係寫故仔嘅話，作者要攞住前寫作階段度好晒嘅嘢，再將啲情節逐一噉用文字等嘅方式表示出嚟。原則上，呢個過程應該係跟足晒事先計劃好嘅情節嘅，但作者往往會突然諗到一啲新諗頭，所以會有少少隨興噉對之前計劃好嘅情節作出一啲更改，另一方面，作者好多時又會發現一啲前寫作階段冇發現到嘅問題；喺寫嗰陣，作者要留意展示，唔好齋噏 嘅原則－意思係唔好好似寫大綱嗰陣噉，直接描述發生緊嘅事，而係描述身處故仔世界嘅人能夠睇到嘅影像、直接感知到嘅嘢同所採取嘅行動[7]。
- 修訂（revising；睇埋編輯）：喺搞掂咗份初稿之後，一般認為一個成功嘅作家往往會喺一段時間後返睇一次自己嘅作品；喺呢個時候，佢通常會發現到一啲第一次寫嗰陣留意唔到嘅問題，於是會作出各種嘅修改－改吓啲字眼、要重新排過啲段落同句子、甚至（如果寫嘅係故仔）發現一個之前注意唔到嘅情節漏洞（指個故仔某啲情節之間邏輯上矛盾）呀噉，一路做到佢覺得滿意為止。如果係文字作品，作者會考慮嘅嘢包括：段字易唔易理解或者喺腦海入面想像？段字有冇包含足夠嘅資訊？段字包含嘅資訊會唔會多得滯？情節嘅流動合唔合理？... 等等[8]。
作家喺寫作過程中成日會撞到寫作閉塞嘅問題，泛指位作家寫嘢嗰陣諗唔到好橋，覺得「好似 kik1 住咗喺度」噉；寫作閉塞呢家嘢可大可小－輕則會搞到寫作人成好幾日都諗唔到橋做嘢冇晒進展，重則可以搞到專業作家有本書寫成幾年都寫唔掂，危害佢嘅事業。因為噉，寫作閉塞嘅概念引起咗唔少寫作界人士嘅關注[9][10]。
睇埋
編輯
文獻
編輯英文文獻：
- Forgeard, M. J., Kaufman, S. B., Kaufman, J. C., & Barry, S. (2013). The psychology of creative writing (PDF). A Companion to creative writing, 320-333.
- Rose, M. (1980). Rigid rules, inflexible plans, and the stifling of language: A cognitivist analysis of writer's block (PDF). College composition and communication, 31(4), 389-401.
引用
編輯- ↑ 1.0 1.1 Flower, L. S., & Hayes, J. R. (1977). Problem-solving strategies and the writing process. College English, 39(4), 449-461.
- ↑ 2.0 2.1 Donald M. Murray, "Teach Writing as a Process Not Product" The Leaflet (November 1972), rpt. in Cross-Talk in Comp Theory, 2nd ed., ed. Victor Villanueva, Urbana: NCTE, 2003.
- ↑ Clayson, Ashley (2018). "Distributed Cognition and Embodiment in Text Planning: A Situated Study of Collaborative Writing in the Workplace". Written Communication. 35 (2): 155-181.
- ↑ 4.0 4.1 Rose, M., & Rose, M. A. (2009). Writer's block: The cognitive dimension. SIU Press.
- ↑ Pattison, Darcy. Paper Lightning:Prewriting Activities to Spark Creativity. Cottonwood Press, 2008.
- ↑ The Writing Process: Step One. Writer's Digest.
- ↑ Hatcher (2000). The Art and Craft of Playwriting. F+W Media. p. 43.
- ↑ Atlee, Nancy (1998). Beginning Writing Lab. San Luis, CA: Prufrock Press Inc. p. 44.
- ↑ Leader, Z. (1991). Writer's block. Johns Hopkins University Press.
- ↑ Rose, M. (1980). Rigid rules, inflexible plans, and the stifling of language: A cognitivist analysis of writer's block (PDF). College composition and communication, 31(4), 389-401.
拎
編輯- （英文） 畀作家用嘅資源，MIT 出嘅.
- （英文） 講故事當中嘅 AI：用機械做共同創作者