修辭手法

修辭手法（粵拼：Sau1 ci4 sau2 faat3），又叫修辭技巧，係一系列運用語言嘅結構、詞彙同語氣嘅手法，無論係講嘢定寫嘢嗰陣都有機會用到。啲人用修辭手法，通常係想提升表達嘅效果—當中「提升效果」可以係令到一件文學作品（由散文至劇本至歌詞都得）更加有美感或者「節奏更加靚」，又或者係令一場演講生動啲呀噉。

一個人喺度演講；講嘢嗰陣要點樣修飾語言，先可以令講出嚟嘅嘢更加有美感呢？

以下啲例句，會用粵語白話文、中文書面語或者文言文做例子。亦可以睇睇粵語書寫上講到嘅三及第概念。

比喻

呢幅插圖描繪出晒名「肌膚好似雪咁白」嘅白雪公主。

2010 年影到嘅一朵蓮花；簡化版《愛蓮說》：「蓮花係花當中嘅君子，由淤泥生出嚟都唔受玷污。」

内文：比喻

睇埋：聯想意思同語義距離

比喻：用一樣嘢（主體），去指成、比作另一樣有相似之處嘅嘢（喻體）。

• 明喻：句子用喻詞「好似、猶如...」，有提個主體。

  例句：「白雪公主嘅肌膚好似雪咁白，朱唇好似玫瑰咁紅，而秀髮就好似炭咁黑。」

  例句：「離遠嘅一盞盞街燈，就好似夜空上邊嘅星星噉。」

  例句：「如花佢真係人如其名，似一朵花咁靚。」

• 暗喻：句子用喻詞「係...」，有提個主體。

  例子：「蓮，花之君子者也。」（文言）—— 出自好出名嘅北宋古文《愛蓮說》（周敦頤）

  → 粵譯：「蓮花，就係花當中嘅君子。」

  → 呢度將蓮花暗喻為「花當中嘅君子」。

• 借喻：句子唔用喻詞，唔提個主體，直頭用喻體取代咗個主體。

  將上句用借喻改成下句嘅例子：

  A 君：「阿蓮佢又後生又靚，但係嫁畀個咁猥瑣嘅男人。」

  B 君：「一朵鮮花插咗喺牛屎上邊。」

  上句主體 → 下句喻體：阿蓮 → 鮮花

  上句主體 → 下句喻體：猥瑣嘅男人 → 牛屎

比擬

内文：比擬

睇埋：擬人化同人格化

比擬（擬人、擬物、擬聲、形象化、人格化）

• 擬人：將物當成人噉寫；

  例句：「死亡向我一步一步噉迫近。」

  → 死亡係一個概念，理應唔識好似人噉行路。

• 擬聲

  例句：「廚房啲嘢跌晒落地，發出乒鈴嘭唥噉嘅聲。」

借代

借代：用本體嘅一部分，或者同本體有密切關係嘅其他嘢，嚟代替本體嘅整體。

襯托

内文：襯托

睇埋：角色映襯

襯托（正襯、反襯）：比較兩個事物，去突顯主要事物嘅某個特徵。

對比

對比（兩體對比、一體兩面對比）：用兩個相反嘅事物做比較，突出兩者之間嘅差別。

例句：「朱門酒肉臭，路有凍死骨。」（文言）—— 出自杜甫《自京赴奉先詠懷五百字》

→ 粵譯：「大宅嘅紅門彌漫住酒肉味，路邊就有凍死嘅人嘅骨頭。」

→ 呢度用意係突出社經地位幾咁懸殊。

複疊

内文：複疊

睇埋：色名 § 粵語特色

複疊（疊字、疊詞、疊句、複辭、反複）：重複用字。

• 疊字：將一個中文字重複，擺埋一齊連住用。粵語出咗名多疊字，尤其係啲有關顏色嘅字詞。

  形容顏色嘅例子：「青咇咇bi1 bi1」、「紅卜卜bok1 bok1」、「白晒晒saai4 saai4」

  其他形容詞例子：「暖笠笠lap1 lap1」、「脹卜卜buk1 buk1」、「濛查查caa4 caa4」、「甜耶耶je4 je4」、「酸瞇瞇mei1 mei1」、「安安穩穩」

  動詞嘅例子：「睇睇」、「諗諗」、「講講」、「整整」

  名詞嘅例子：「笑哈哈」、「層層疊」

• 複辭：將同一個字詞多次用喺同一個子句，每次表達唔同嘅意思。

  例子：《孟子》入邊有講到：「老吾老，以及人之老；幼吾幼，以及人之幼。」（文言）

  → 粵譯：「尊重自己（屋企）嘅老人家，從而推廣到尊重其他老人家；照顧自己（屋企）嘅細路仔，從而推廣到照顧其他細路仔。」

• 反複（連續反複、間隔反複）：重複使用某啲關鍵嘅詞語、短語或者子句。

  例句：「春天嚟喇，春天嚟喇，萬物都充滿咗無盡嘅生命力。」

排比

排比：將三句或以上結構相似而且意思相關嘅子句或句子排列埋一齊。

例句：「春天，你好似一朵含苞待放嘅紫荊，你好似初出湖水嘅荷芙，你好似一位娉婷嘅少女。」

對偶

對偶：將兩句結構相同、字數相同、意思相關，但係多個詞性相同、字詞唔同嘅子句或句子，前後連住或者對稱噉排列埋一齊。

例句：「其大本擁腫而不中繩墨，其小枝卷曲而不中規矩。」—— 出自《莊子．逍遙遊》

層遞

層遞：順住次序排幾個，含有 有比例關係嘅嘢 嘅子句，將意思一重又一重噉展現出嚟。

例句：「一而十，十而百，百而千，千而萬」

反問

反問：將已經知道咗答案嘅問題反轉問返人。

例子：《論語》入邊有講到：「學而時習之，不亦悅乎？」（文言）

→ 粵譯：「學咗嘢之後時不時反覆溫書，唔係一件好愉快嘅事咩？」

→ 呢度孔子根本認定咗，學咗嘢之後時不時反覆溫書，係一件好愉快嘅事，但照樣用問句表達。

設問

設問：自問自答，藉住問題嚟引起讀者嘅注意，啓發讀者思考。

例句：「得閒睇吓同寫吓維基百科有乜好處呢？咪就係可以學多啲知識，增廣見聞囉。」

頂真

頂真：將上一句句尾嘅字詞或短語作為下句子句嘅開頭。

例句：「歸來見天子，天子坐明堂。」—— 出自《木蘭辭》

互文

互文：交錯省略上下文某啲字，而省略咗嘅意思靠上下文互相補充。

例句：「將軍百戰死，壯士十年歸。」—— 出自《木蘭辭》

回文

回文：用唔同次序讀都有意思嘅句子。

錯綜

錯綜：故意打破整齊嘅句子規律，令文句參差，詞彙別異。

引用

引用：運用其他人嘅名言、事跡或作品，嚟支持作者嘅立場，嚟證明同加強自己所講嘅理論，令到文章嘅內容更為充實。

• 明引：喺引用嘅時候，直接講明所引用嘅內容係出自邊度，畀讀者知道。

  例句：「識得做科學嘅人都應該聽過牛頓話齋，『要求知，就要企喺巨人嘅膊頭上』，將自己嘅思考建基於前人嘅諗頭之上。」

  —呢段講話引用咗「企喺巨人嘅膊頭上」呢句名言，而且指明咗句嘢係邊個（牛頓）講嘅。

• 暗引：喺引用嘅時候，唔指名出處。

  例句：「唔使專修經濟學都應該知，呢個世上冇免費嘅午餐。」

  —引用咗「呢個世上冇免費嘅午餐」呢句經濟學名言，不過句子入邊冇話句嘢係邊個講嘅。

呼告

呼告：一改敘事唔重情感嘅語氣，突然向唔喺現場或者冇可能回答嘅對象呼喊。

通感

通感：將本來用嚟形容一種感官嘅詞語，轉到用嚟形容另一個感官，即係例如將視覺嘅詞語，用嚟形容聽覺感知到嘅嘢。

例句（聽覺通觸覺）：「三粒苦松子，沿著路標一直滾到我的腳前，伸手抓起，竟是一把鳥聲。」（中文書面語）— 洛夫《隨雨聲入山而不見雨》

→ 粵化：「三粒苦松子，沿住路標一路轆到嚟我隻腳前，伸手攞起，竟然係一把雀聲。」

示現

示現（追述示現、預言示現、懸想示現）將過去、未來、或者無法親眼睇到嘅事物，利用想像力，憑住文字嘅描述，將意象呈現喺讀者面前。

摹色

摹色：用摹色詞描寫景物嘅顏色。

誇張

《嬉笑集 · 昭君彈琵琶出塞》：
「抱住琵琶就出關，擘開雙眼萬重山。」—
「哇！昭君一出塞外，就見到萬重山咁廣闊嘅空間。」

内文：誇張

誇張：將事物描繪到明顯超出客觀事實，達致渲染嘅效果。

例句：「抱住琵琶就出關，擘maak3開雙眼萬重山。」—— 出自粵語詩集《嬉笑集》嘅《昭君彈琵琶出塞》

→ 呢度話昭君一擘大眼就見到「萬重山」，唔係話佢真係見到一萬座山峰或者點咁誇張，而係話佢見到好廣闊嘅空間。

婉曲

内文：婉曲

睇埋：雙重意思

婉曲：唔直接噉用啲準確嘅詞句表達原意，而係用啲相關嘅詞句，間接噉烘托、流露或者暗示原意。婉曲通常係用啲冇攻擊性嘅字詞，嚟代替有冒犯性或者會令人反感嘅字詞。

例句：「炸死了你，我的故事就該完了。炸死了我，你的故事還長著呢。」（中文書面語）—— 出自張愛玲《傾城之戀》

→ 粵化：「炸死咗你，我嘅故事就應該完喇。炸死咗我，你嘅故事仲有好長呀。」

反話

反話：表達同字面上意思相反嘅意思。

雙聲

雙聲：接連用同一聲母嘅字。

疊韻

疊韻：接連用同一韻母嘅字。

其他修辭手法

睇埋：敘事技巧同創意寫作

以下一覽式噉列出淨低嘅修辭手法。

• 藏詞
• 轉品
• 引喻
• 雙關

文獻

• 張燕潔. (2013). 潮汕方言俗語的修辭藝術. 江西教育學院學報, 34(5), 102-104 （大陸簡體）

外拎

• （香港繁體） 【都會與我】粵曲修辭結構 英譯必遇挑戰，《文匯報》
• （香港繁體） Cantonese Reduplication 粵語疊詞
• （香港繁體） 幾得意講廣東話資料，講到粵語啲疊字。
• （香港繁體） 【修辭手法大全】 23 種中文修辭手法｜DSE適用｜意思技巧｜例子練習

語言相關

• 語義同語用：呢兩個語言學領域，都係喺度探討「意思點表達」嘅。
• 句尾助詞：粵語一向出晒名有豐富嘅句尾助詞，能夠令句子更生動。
• 語氣詞
• 重述
• 冗餘

垃雜相關

• 修辭學：研究修辭嘅學問，同語言學有相當大嘅重疊。
• 填詞
• 美感
• 廣告
• 橋段