開主選單
File:GZM Line 13 icon.svg
廣州地鐵13號綫嘅圖標

 廣州地鐵13號綫粵拼gwong2 zau1 dei6 tit3 sap6 saam1 hou6 sin3 ,又叫東西快綫dung1 sai1 faai3 sin3,係起緊嘅廣州地鐵路綫,代表色係黃綠色

歷史

規劃

廣州試過以“穗莞深城際綫廣州聯絡綫”嘅名義偷步起首期路段。2009年10月29號到31號,穗莞深城際鐵路廣州段連接工程(13號綫首期工程)初步設計預審查會議喺廣州大廈召開,通過咗首期初步預審報告。不過後嚟呢個計劃被發改委駁回咗。

2012年7月11號,《廣州市新一輪城市軌道交通建設規劃(2012~2016)》獲得國家發改委批復,13號綫首期喺埋入邊。7月25號,中鐵第四勘察設計院開始公示首期工程(魚珠-象頸嶺)環境影響報告。到咗2013年12月20號,13號綫首期工程可行性報告獲得批復,可以正式開工。

2015年尾,廣州地鐵提出調整13號綫首期為天河公園~象頸嶺,但呢個“偷跑方案”俾國家發改委駁回咗。

2017年初,廣州將13號綫二期同其他9條綫路打包成為第三期建設規劃,上報俾國家發改委。到咗3月20號,廣州地鐵第三期建設規劃獲得國家發改委批復,13號綫二期喺埋入邊。[1]

2017年3月23號,13號綫二期進行咗第一次環評公示。[2]4月26號,綫路進行咗第二次環評公示。公示期間,民間傳出咗增加廣醫站嘅呼聲。[3]

施工

一期

  • 2010年10月,新塘站開始圍蔽。
  • 2012年5月5號,新塘站率先動工。
  • 2012年7月25號,中鐵第四勘察設計院開始公示首期工程(魚珠-象頸嶺)環境影響報告。
  • 2013年12月10號,首個盾構區間(新塘到官湖區間31#~32#)盾構始發。
  • 2013年12月20號,13號綫首期工程可行性報告獲得批復,可以正式開工。
  • 2015年3月28號,白江站(原東洲站)封頂,成爲全綫第一個封頂嘅車站。
  • 2015年4月15號,最後一個車站夏園動工。但冇耐後因多次安全事故一再停工,直到2015年11月先恢復正常施工。
  • 2015年10月8號,中車大連同廣州地鐵簽訂合同,為13號綫首期製作17列8節編組A型列車。
  • 2015年10月28號,新塘站封頂。
  • 2015年12月26號,沙村站(原溫涌路站)封頂。
  • 2016年5月30號,東洲~新塘雙綫貫通。
  • 2016年5月31號,南海神廟站(原廟頭站)封頂。
  • 2016年6月24號,南崗~溫涌路區間雙綫貫通。
  • 2016年6月29號,13號綫首期與知識城綫開始機電工程招標。
  • 2016年7月18號,官湖出入段綫雙綫貫通。
  • 2016年8月8號,豐樂南~文園區間雙綫貫通。
  • 2016年8月30號,官湖站封頂。
  • 2016年10月18號,最後一部盾構機響象頸嶺-官湖區間左綫始發。[4]
  • 2016年10月20號,13號綫開始鋪軌。[5]
  • 2016年11月30號,雙崗站(原文園站)封頂。[6]
  • 2016年12月3號,魚珠站封頂。
  • 2016年12月8號,南夏盾構區間雙向貫通。
  • 2016年12月19號,魚豐區間雙綫貫通。
  • 2016年12月31號,裕豐圍站(原豐樂南站)站封頂。
  • 2017年1月18號,新沙站(原象頸嶺站)封頂。
  • 2017年1月19號,夏園站封頂。
  • 2017年2月10號,文廟區間雙綫貫通。[7]
  • 2017年2月28號,南崗站封頂。[8]至此,13號綫首期全部車站都實現咗封頂。
  • 2017年3月15號,官湖-象頸嶺區間雙綫貫通。
  • 2017年4月7號,市地名普查網掛出公告,擬將原豐樂南站、文園站、廟頭站、溫涌路站、東洲站、象頸嶺站分別改名為裕豐圍站、雙崗站、南海神廟站、沙村站、白江站、新沙站。
  • 2017年5月18號上晝,13號綫首批列車喺中車大連旅順基地交付廣州地鐵。
  • 2017年5月23號,南崗~夏園區間左綫盾構機經過499日嘅艱苦掘進,卒之喺夏園站破墻而出。意味住首期全綫已經實現咗洞通。

二期

營運

2017年12月28號12:00,一期部份(魚珠⇄新沙)正式開通。

綫路

概況

 
13號綫首期圖示

13號綫(東西快綫)係廣州市重要嘅東西走廊,西起白雲區朝陽,經荔灣區、越秀區、天河區、黃埔區,最後到達增城區新塘鎮新沙,途經舊中軸、珠江新城同埋金融城等熱點地區。綫路全長約60.5km,共設34座車站,其中換乘站16座,平均站間距約1.83km,代表色係黃綠色。採用8輛A型列車。

走向

  • 首期係魚珠到增城新沙段。綫路由魚珠站向南引出,轉向東行,沿海員路到達裕豐圍站後轉上黃埔東路,一路東行,下穿廣澳高速、夏園立交同埋廣深沿江高速後,喺黃埔東路新塘大道路口轉上新塘大道,下穿廣深高速後喺東江大道路口轉向北,下穿舊107國道後向東轉上新107國道,喺291縣道路口後設官湖站一路東行,下穿農田後到達新沙大道。

綫路全長26.7km,設置11座車站,其中近期換乘站4座。佢主要功能係對接穗莞深城際綫,加強東部地區同中心城區嘅聯繫。

  • 二期係魚珠至朝陽段,主要沿中山大道、黃埔大道、東風路、增槎路同槎神大道敷設,全長33.8km,新建23座車站。主要功能係同首期共同構建城市東西快綫,加強城市東西部區域同中心城區聯繫。

車站

首期

自西向東行經魚珠裕豐圍雙崗南海神廟夏園南崗沙村白江新塘官湖新沙

有啲車站用過其它名:

站名 用過嘅名
裕豐圍 豐樂路、豐樂南
雙崗 文園
南海神廟 廟頭
沙村 南碱路、溫涌路、溫涌
白江 東洲
新沙 象頸嶺、復昌橋、新沙路

二期

自西向東行經朝陽站、慶豐站、凰崗站、槎頭站、西洲站、松溪站、羅沖圍站、西場站、彩虹橋站、紀念堂站、倉邊路站、建設六馬路站、農林下路站、梅東路站、花城廣場北站、冼村站、石牌南站、馬場站、白馬崗站、天河公園站、棠下站、車陂站、珠村站。

車輛段

  • 首期綫路喺官湖站南側設置官湖車輛段,官湖站係出入段綫嘅接軌站。

13號綫官湖車輛段與綜合基地喺13號綫綫路東端、官湖站嘅南側,段址喺新塘鎮官湖村同石下村境内,環城路(新107國道)、石新公路同新沙大道包住嘅地段,成個地段大致呈東西走向,總徵地面積約41.48公頃。官湖車輛段與綜合基地係廣州市軌道交通A型車嘅第二個大架修基地,設計停車能力係36列位、雙周檢/三月檢4列位、大/架修3列位、定修2列位、臨修、静調、吹掃及鏇輪綫各1列位。佢將會承擔11、13號綫嘅架大修任務。

  • 二期喺慶豐站東側設凰崗停車場,喺魚珠西北側設魚珠停車場。

聯絡綫

綫路喺新塘站設16號綫聯絡綫,喺魚珠停車場入邊設5號綫聯絡綫,喺天河公園站設11號綫聯絡綫,喺槎頭站設12號綫聯絡綫。

換乘站

首期

  • 官湖站:同規劃緊嘅23號綫換乘,由於23號綫係遠期綫路,13號綫建設時未作預留,官方亦未將呢個站列入換乘站。預計為站廳換乘。
  • 新塘站:同規劃緊嘅16號綫換乘,建設時已經預留,為平行跨站台轉乘,13號綫包夾16號綫。車站帶16號綫同埋13號綫嘅聯絡渡綫。
  • 夏園站:同規劃緊嘅5號綫東延段換乘,建設時預留平行站廳換乘條件。
  • 裕豐圍站:同規劃緊嘅7號綫二期換乘,建設時已經喺車站東端預留咗換乘節點。
  • 魚珠站:同運營緊嘅5號綫換乘,5號綫建設時已作預留,為島側節點換乘,不過由於原先嘅預留結構淨係夠停6L列車,13號綫首期建設嗰陣將部分預留結構拆除重建咗。

二期

  • 車陂站:換乘4號綫
    由於4號綫建設嗰陣未作預留,兩條綫只能夠實現平行站廳換乘。
  • 天河公園站:換乘11號綫21號綫
    呢個站亦係21號綫嘅終點站,21號綫建設嗰陣已經同步建設咗部分車站。車站13號綫部分係一島兩側式車站,喺車站西端設換乘節點。同時該站亦會設有同11號綫嘅聯絡綫。
  • 馬場站:換乘19號綫
  • 冼村站:換乘18號綫
  • 花城廣場北站:可能通過連接體育西路站,實現同1號綫3號綫嘅換乘。
  • 農林下路站:可能通過連接區莊站,實現同5號綫6號綫嘅換乘。
  • 建設六馬路站:換乘12號綫
    呢個站係T形節點換乘站,兩條綫同步實施。
  • 紀念堂站:換乘2號綫
    呢個站喺2號綫建設嗰陣未作預留,預計係L形站廳通道換乘。
  • 彩虹橋站:換乘8號綫11號綫
    呢個站喺8號綫建設嗰陣已作出相應預留。11號綫同13號綫為平行跨站台轉乘,8號綫同另外兩綫為節點換乘。
  • 西場站:換乘5號綫
    呢個站喺5號綫建設嗰陣未作預留,係T形換乘,13號綫上跨5號綫,喺5號綫車站西面建設疊側式站台。5號綫站廳將會擴建同13號綫共用。
  • 槎頭站:換乘12號綫
    呢個站係T形節點換乘站,兩條綫同步實施。

附屬設施

  • 綫路控制中心位於官湖車輛段內。
  • 首期綫路喺夏園同新塘各新建主變電站一座。二期綫路喺彩虹橋同天河公園各新增一座主變電站,同8號綫、11號綫合建。

列車

13號綫係廣州首條採用8卡編組A型車、列車最高設計時速爲100公里嘅地鐵。佢喺綫網規劃入邊嘅定位係東西向高運量骨幹綫。根據規劃部門嘅客流預測,13號綫首期開通後,初期日均客流量大概係22萬人次,而近期全綫開通後,日均客流量將達144萬人次。因此,經過綜合考慮,地鐵公司決定使用8卡編組A型列車,呢亦係廣州地鐵歷史上嘅第一次。

困難

多處受阻

即管大部分車站同區間嘅施工比較順利,但仍有一啲「硬骨頭」制約工期。

  • 地質問題。13號綫首期穿過多處上軟下硬地層,非常影響盾構推進,施工方亦增加咗多處礦山法盾構空推段嚟應對呢種情況。譬如,夏南區間中間有大段嘅堅硬地層,原先計劃喺夏園立交前後、岩層最堅硬嘅路段設置幾百米長嘅空推段,無奈盾構機重未到達空推段就遇上硬岩,寸步難行,令到呢個區間成為咗制約全綫貫通嘅硬骨頭。地鐵公司一度要協調進度較快嘅四標跨標段支援呢個區間。後尾通過增加礦山法區間長度,施工方卒之令盾構機喺2017年初進入咗空推段。
  • 重有其它個別站點受周邊居民嘅影響,冇辦法全面開展施工。譬如豐樂南到12#盾構井嘅左綫盾構,由於車站前邊嘅機關大院阻工,導致無法加固地層,直到7月18號先成功始發,比原計劃推遲咗成個月。地鐵公司正同各區及有關部門加強協調,加快解決制約工程嘅難點,努力按照原定建設目標推進工程。