廣東話拼音方案
廣東話拼音嘅方法
(由廣東話拼音跳轉過嚟)
現實情況改
香港政府目前要嚴謹標註香港字讀音嗰陣,會用香港語言學學會1993年頒佈嘅粵拼。另外,直接用萬國音標(IPA)標註,都係一個幾常用嘅做法,不過通常用嘅係黃錫凌喺《粵音韻彙》度用嘅寬式萬國音標(寬式IPA),佢只要區分音位就得,對音素嘅紀錄寬鬆過嚴格嘅萬國音標。
除咗呢啲標準嘅拼音方案之外,香港人都會用下港式拼音,一種實際上唔能夠準確標示讀音,但係可以方便兩個講廣東話嘅人喺無得打中文嘅時候用英文字母嘅組合代替中文字來溝通。港式拼音無乜規矩,只要寫同睇兩個人明白就得。亦係因為噉,港式拼音唔算得上係一套真正嘅「拼音方案」。
喺香港亦有唔少敎材用教育學院拼音方案,或者一個教院方案同埋萬國音標撈埋嘅拼音方案。喺香港教科書入面用到嘅廣東話拼音就通常係教育學院拼音方案,或者一個教院方案同埋萬國音標撈埋嘅拼音方案。
有啲外國敎材會用耶魯粵語拼音,不過佢嘅聲調標註得幾複雜,有啲敎材會自己改裝成數字標調。
另外,廣東省敎育部其實都頒佈過廣州拼音方案,不過問題比較大,有啲音甚至標唔到,佢過份遷就普通話拼音,對習慣講粵語嘅人嚟講唔太親切,即使饒秉才教授喺1980年修訂過佢,用嘅人依然唔算多,通常淨係喺大陸出版嘅粵語敎材先見到。
劉錫祥拼音亦都係一套早期比較多人用嘅方案,啲拼寫比較似英文習慣。
各套拼音比較改
下面會比較香港語言學學會嘅粵拼、敎院方案、耶魯粵語拼音、黃錫凌嘅寬式音標、嚴格嘅萬國音標、廣州拼音方案、劉錫祥拼音。
聲母改
例字 | 粵拼 | 敎院 | 耶魯 | 寬式 音標 |
萬國 音標 |
廣州 | 劉錫祥 |
---|---|---|---|---|---|---|---|
巴 | b | b | b | b | p | b | b |
爬 | p | p | p | p | pʰ | p | p |
媽 | m | m | m | m | m | m | m |
花 | f | f | f | f | f | f | f |
打 | d | d | d | d | t | d | d |
他 | t | t | t | t | tʰ | t | t |
娜 | n | n | n | n | n | n | n |
啦 | l | l | l | l | l | l | l |
家 | g | g | g | g | k | g | g |
卡 | k | k | k | k | kʰ | k | k |
哈 | h | h | h | h | h | h | h |
牙 | ng | ng | ng | ŋ | ŋ | ng | ng |
渣 | z | dz | j | dz | tʃ | z/j | j |
叉 | c | ts | ch | ts | tʃʰ | c/q | ch |
沙 | s | s | s | s | ʃ | s/x | s |
也 | j | j | y | j | j | y | y |
蛙 | w | w | w | w | w | w | w |
瓜 | gw | gw | gw | gw | kʷ | gu | gw |
跨 | kw | kw | kw | kw | kʷʰ | ku | kw |
註:
- 例字淨係取聲母。
- 「渣、叉、沙」嘅聲母,二百年前嘅粵語分開做「章知組」同「莊精組」[1]。今日好大部份粵語地區已經合流[2],得番個別粵方言片或者某啲口音入面保留區別。當中「將、鏘、私」傾向發做清齒齦音([ts]、[tsʰ]、[s])或者清顎齦音([tʃ]、[tʃʰ]、[ʃ]),「張、昌、是」傾向發做清齦顎音([tɕ]、[tɕʰ]、[ɕ]),不過具體音值要視乎嗰個方言片實際發音而定。
- 廣州拼音方案雖然有「z、c、s」和「j、q、x」兩組聲母,但係個方案講明兩組嘅音值冇分別,只係喺拼寫唔同韻母嗰陣寫法不同。「z、c、s」同韻母首音「a、e、ê、é、o、u、ê」相拼,「j、q、x」同韻母首音「i」和「ü」相拼。噉做只係令啲拼寫結果似普通話拼寫多啲,冇實際區分意義。
韻母改
例字 | 粵拼 | 敎院 | 耶魯 | 寬式 音標 |
萬國 音標 |
廣州 | 劉錫祥 |
---|---|---|---|---|---|---|---|
丫 | aa | aa | a | a | aː | a | a |
挨 | aai | aai | aai | ai | aːi | ai | aai |
拗 | aau | aau | aau | au | aːu | ao | aau |
啱 | aam | aam | aam | am | aːm | am | aam |
晏 | aan | aan | aan | an | aːn | an | aan |
𦉍 | aang | aang | aang | aŋ | aːŋ | ang | aang |
鴨 | aap | aap | aap | ap | aːp̚ | ab | aap |
押 | aat | aat | aat | at | aːt̚ | ad | aat |
軛 | aak | aak | aak | ak | aːk̚ | ag | aak |
矮 | ai | ai | ai | ɐi | ɐi | ei | ai |
歐 | au | au | au | ɐu | ɐu | eo | au |
庵 | am | am | am | ɐm | ɐm | em | am |
奀 | an | an | an | ɐn | ɐn | en | an |
鶯 | ang | ang | ang | ɐŋ | ɐŋ | eng | ang |
噏 | ap | ap | ap | ɐp | ɐp̚ | eb | ap |
兀 | at | at | at | ɐt | ɐt̚ | ed | at |
搤 | ak | ak | ak | ɐk | ɐk̚ | eg | ak |
爺 | e | e | e | ɛ | ɛː | é | e |
希 | ei | ei | ei | ei | eːi | éi | ei |
掉* | eu | eu | ɛu | ɛːu | |||
舔* | em | em | ɛm | ɛːm | |||
円* | en | en | ɛn | ɛːn | |||
贏* | eng | eng | eng | ɛŋ | ɛːŋ | éng | eng |
夾* | ep | ep | ɛp | ɛːp̚ | |||
坺* | et | et | ɛt | ɛːt̚ | |||
吃 | ek | ek | ek | ɛk | ɛːk̚ | ég | ek |
衣 | i | i | i | i | iː | i | i |
腰 | iu | iu | iu | iu | iːu | iu | iu |
淹 | im | im | im | im | iːm | im | im |
煙 | in | in | in | in | iːn | in | in |
英 | ing | ing | ing | iŋ | ɪŋ | ing | ing |
葉 | ip | ip | ip | ip | iːp̚ | ib | ip |
熱 | it | it | it | it | iːt̚ | id | it |
益 | ik | ik | ik | ik | ɪk̚ | ig | ik |
柯 | o | o | o | ɔ | ɔː | o | oh |
哀 | oi | oi | oi | ɔi | ɔːi | oi | oi |
奧 | ou | ou | ou | ou | ou | ou | o |
安 | on | on | on | ɔn | ɔːn | on | on |
盎 | ong | ong | ong | ɔŋ | ɔːŋ | ong | ong |
渴 | ot | ot | ot | ɔt | ɔːt̚ | od | ot |
惡 | ok | ok | ok | ɔk | ɔːk̚ | og | ok |
靴 | oe | oe | eu | œ | œː | ê | euh |
央 | oeng | oeng | eung | œŋ | œːŋ | êng | eung |
約 | oek | oek | euk | œk | œːk̚ | êg | euk |
銳 | eoi | oey | eui | œy | øy | êu | ui |
潤 | eon | oen | eun | œn | øn | ên | un |
律 | eot | oet | eut | œt | øt̚ | êd | ut |
烏 | u | u | u | u | uː | u | oo |
煨 | ui | ui | ui | ui | uːi | ui | ooi |
豌 | un | un | un | un | uːn | un | oon |
甕 | ung | ung | ung | uŋ | ʊŋ | ung | ung |
活 | ut | ut | ut | ut | uːt̚ | ud | oot |
屋 | uk | uk | uk | uk | ʊk̚ | ug | uk |
於 | yu | y | yu | y | yː | ü | ue |
淵 | yun | yn | yun | yn | yːn | ün | uen |
月 | yut | yt | yut | yt | yːt̚ | üd | uet |
唔 | m | m | m | m̩ | m̩ | m | m |
吳 | ng | ng | ng | ŋ̩ | ŋ̩ | ng | ng |
註:
- 例字淨係取韻母。
- 有「*」號嘅例子,表示口語變讀。當中有啲讀音係比較新近先出現,所以有啲方案拼唔到,會漏空咗。
- 喺廣州拼音方案,聲母「j、q、x」係用嚟拼寫「i、ü」韻;另外「ü」行嘅韻母用來拼「j、q、x」嗰陣,省略「ü」嗰兩點;「êü」亦都省略成「êu」。
聲調改
調名、音值 | 例字 | 粵拼 | 敎院 | 耶魯 | 寬式 音標 |
萬國 音標 |
廣州 | 劉錫祥 |
---|---|---|---|---|---|---|---|---|
陰平,53 | 溫 | 1 | 1 | à | ˈa | ˥˧ | 1 | 1 |
陰平變讀,55 | 瘟 | 1 | 1 | ā | ˈa | ˥ | 1 | 10 |
陰上,35 | 搵 | 2 | 2 | á | ˊa | ˧˥ | 2 | 2 |
陰去,33 | 困 | 3 | 3 | a | ˉa | ˧ | 3 | 3 |
陽平,21或11 | 雲 | 4 | 4 | àh | ˌa | ˨˩ 或 ˩ | 4 | 4 |
陽上,13或23 | 蘊 | 5 | 5 | áh | ˏa | ˩˧ 或 ˨˧ | 5 | 5 |
陽去,22 | 運 | 6 | 6 | ah | ˍa | ˨ | 6 | 6 |
陰入(上陰入),5 | 屈 | 1 | 7或1 | āt | ˈat | ˥ | 1 | 1 |
陰入變調,35 | 核* | 2 | 2 | át | ˊat | ˧˥ | ||
中入(下陰入),3 | 挖 | 3 | 8或3 | at | ˉat | ˧ | 3 | 3 |
陽入,22 | 鷸 | 6 | 9或6 | aht | ˍat | ˨ | 6 | 6 |
註:
- 表中嘅平、上、去聲以「a」音爲例,入聲以「at」音爲例。
- 有「*」號嘅例字,表示口語變讀。
- 耶魯粵語拼音喺陽聲調嘅元音後面加「h」。
睇埋改
參考文獻改
- ↑ "萬波、甄沃奇:從《廣東省土話字彙》看二百年前粵語古知莊章精組聲母的分合類型" (PDF). 原著 (PDF)喺2018年9月22號歸檔. 喺2019年8月2號搵到.
- ↑ "嚴棉:中古精莊章知四系在漢語方言中的歷史音變" (PDF). 原著 (PDF)喺2018年9月22號歸檔. 喺2019年8月2號搵到.
連出去改
- 粵語審音配詞字庫
- 小學中文科常用字研究:真人讀常用字粵音、粵語拼音查詢
- 粵語書院 - 粵語協會
- 香港語言學學會
- 粵語拼盤:多種粵語拼音方案自學教程
- 語音導修室