維基百科

德思禮一家

德思禮一家（英文：Dursley family）係英國奇幻小說《哈利波特》系列裡面嘅一個虛構家庭，主要成員分別係威農·德思禮同埋佩妮·德思禮兩公婆同埋佢哋個仔達力·德思禮，佢哋係成個系列故事嘅主角哈利·波特淨返喺度嘅親人[1]。小說裡面，仲係蘇蝦仔嘅哈利喺自己父母死咗之後就俾鄧不利多擺咗喺德思禮屋企門口俾佢哋收養，等哈利可以繼續受到自己阿媽力量嘅保護，唔好俾佛地魔傷害。不過德思禮一家將哈利睇成係一個負擔，對佢嘅態度同待遇都好鬼差，令到哈利都好唔鍾意佢哋[2]。

小說描述

編輯

當哈利·波特嘅父母俾佛地魔殺咗之後，鄧不利多決意將哈利交俾佢唯一嘅親戚—德思禮一家去扶養，因為莉莉·波特過身嗰陣喺哈利身上施加咗保護魔法，咁樣只要哈利同莉莉有血緣關係嘅親戚一齊住嘅話就唔會受到佛地魔同埋佢啲手下嘅傷害，直到哈利年滿17歲為止[3]。

德思禮一家係典型嘅麻瓜家庭，佢哋盡力去遠離同魔法有關嘅一切事物同埋人，而且仲對呢啲嘢好畏懼咁樣，聽到都驚。佢哋一直試吓去將平時嗰啲睇嚟好似「唔合常理」嘅事物變得合理化，扮到一切完全正常咁樣，例如威農姨丈有一次發現到一隻貓（其實係變咗身嘅麥教授）望實佢之後就認定嗰個係「光線嘅錯覺」[4]。威農姨丈同佩妮姨媽對佢哋個仔達力非常咁縱容，而對哈利嘅態度就好冷漠，淨係俾佢住喺樓梯底下嘅儲物室入面，仲向佢極力隱瞞有關魔法世界嘅任何訊息。喺讀小學嗰陣，達力同佢班同黨仲好鍾意去恰哈利。

喺哈利11歲生日嗰陣，貓頭鷹唔停咁將哈利嘅霍格華茲入學通知送去小惠因區嘅德思禮家，嚇到威農姨丈帶埋屋企人同埋哈利離開屋企匿去一個海中巨岩上面嘅屋仔，但係霍格華茲嘅獵場看守人魯霸·海格好快就搵到佢哋，佢嚇親德思禮一家，仲將哈利帶走咗。德思禮一家自此之後就怕鬼咗哈利[5]。

住所

編輯
 
德思禮一家喺水蠟樹街４號嘅屋。
 
哈利·波特喺電影初期嘅房。

德思禮一家間屋就喺薩里郡小惠因區嘅水蠟樹街４號[6]，嗰間屋有兩層樓高，同埋一個後花園。最初佢哋淨係俾哈利瞓喺樓梯底嘅細細儲物房裡面，但係當哈利收到咗霍格華茲嘅入學通知之後，威農姨丈因為好驚魔法界嘅人知道哈利嘅情況，於是就轉俾佢瞓喺樓上嘅睡房。

喺現實入面，電影裡面嘅「水蠟樹街４號」實際上係喺伯克郡布拉克內爾嘅一棟兩層樓房屋，華納兄弟喺2000年同屋主傾好咗之後就將嗰度用嚟做套戲嘅拍攝場景。呢間屋喺2016年以£47.5萬英鎊嘅價格賣咗[7][8][9][10]；喺2018年5月降價去到£43.5萬英鎊但都仲係賣唔去[11][12]。

成員

編輯

威農·德思禮

編輯
威農·德思禮
首次出場《哈利波特：神秘的魔法石》
扮演理察·葛瑞夫斯（中文：李查·葛瑞夫斯）
配音  李忠強（中文：李忠強）
詳細信息
性別男性

威農·德思禮Vernon Dursley係德思禮一家嘅家長，哈利嘅姨丈、佩妮姨媽嘅老公同達力嘅老豆，身材高大又肥得好大份，有執大鬍鬚。佢係一間鑽機公司格朗寧嘅主管，喺佢嘅職業生涯當中似乎好成功。威農佢好重視地位、成就同財富，好憎啲同魔法有關嘅嘢。佢同佢老婆佩妮「勉為其難」咁湊大哈利，佢哋成日對哈利充滿住敵意，仲制定咗好多規矩俾哈利，又扭曲咗哈利父母嘅真正死因。

喺電影系列入面，威農·德思禮嘅角色係由英國演員理察·葛瑞夫斯（中文：李查·葛瑞夫斯）去做[13]。喺《死神的聖物》嘅刪剪片段入面，德思禮一家搬離小惠因區嘅屋企嗰陣，威農姨丈本來想同哈利握手去講再見，不過佢最後都係無做到[14]。

「威農」呢個名係作者羅琳最唔鍾意嘅名[15]。

佩妮·德思禮

編輯
佩妮·德思禮
首次出場《哈利波特：神秘的魔法石》
扮演費歐娜·蕭（中文：費歐娜·蕭）
配音  陳安瑩
詳細信息
性別女性

佩妮·德思禮Petunia Dursley，佢娘家姓伊凡Evans，佢係莉莉·波特嘅家姐，亦係哈利嘅姨媽。佢被形容做一個瘦削嘅金色頭髮女人，條頸特別長。

佩妮由細個嗰時開始因為妒忌佢個妹—莉莉嘅魔法能力而一直喺度洽對方，仲叫佢做「怪胎freak」；佩妮亦都睇唔起成日同佢阿妹一齊玩嘅嗰個同齡男仔石內卜。當時佩妮甚至仲寫信俾霍格華茲校長鄧不利多，希望自己都可以好似佢阿妹咁樣入去讀書，不過鄧不利多婉拒咗佢嘅要求，搞到憤恨難平嘅佩妮自此就「否定魔法嘅存在」嚟表達佢學唔到魔法嘅不滿。佩妮喺成年後嘅某個時候就入咗去格朗寧公司做嘢，後嚟就識咗威農·德思禮，佢哋兩個最後結咗婚，仲生咗個仔—達力·德思禮。

佩妮對魔法世界嘅了解比她表面上承認嘅仲要多，喺催狂魔襲擊哈利同達力之後，佩妮話佢知道催狂魔守衛著巫師監獄阿茲卡班。喺《死神的聖物》入面，德思禮一家要搬離屋企嗰陣，哈利感覺到佩妮想喺臨走前對佢講啲嘢，但最後佢仍然扭轉頭就走。羅琳後嚟喺訪問入面講到佩妮原本係想祝哈利好運，但係又講唔到出口。

佩妮個名嘅意思係牽牛花，象徵住憤怒同憎恨[15]。

電影入面，佩妮·德思禮嘅角色由費安娜·梭爾（中文：費歐娜·蕭）Fiona Shaw做嘅。喺《哈利波特：死神的聖物1》嘅一個刪除片段入面，佩妮喺哈利面前表達咗佢對無咗妹妹莉莉嘅悲傷同懊悔[16]。費安娜·梭爾就話：「德思禮一家代表住平常人，喺一套魔法電影入面，佢哋代表住『另一類人』[6]。」

達力·德思禮

編輯
達力·德思禮
首次出場《哈利波特：神秘的魔法石》
扮演哈利·梅林（中文：哈利·米爾林）
配音  未知
詳細信息
性別男性

達力·德思禮Dudley Dursley係威農同佩妮兩公婆嘅獨生仔，佢係哈利嘅表哥，佢被形容做一個非常之肥嘅金髮男仔，成個金髮河馬咁樣（就算喺戲入面係啡色頭髮），佢非常之受父母嘅溺愛。達力幾乎都隨心所欲咁去做所有嘅事，表現出被縱壞細路嘅症狀。達力係一隻冷酷無情嘅社會寄生蟲，佢亦都係童黨嘅阿頭，佢成日用啲企唔住腳嘅藉口去打哈利同埋附近地區比較瘦弱嘅細路仔，呢個亦都係佢被形容喺哈利入去霍格華茲之前無朋友嘅原因。就算哈利擅長運動仲攞到好成績，呢個亦成為咗達力最鍾意蝦蝦霸霸嘅目標，佢喺哈利讀小學嗰陣就開始洽佢，搞到啲同學唔敢承認鍾意哈利。達力只係比哈利大一個月，呢個意味住佢嘅生日一定係喺六月尾嗰陣。喺哈利入去霍格華茲嘅同一年，達力去咗佢阿爸以前讀過嘅私立寄宿學校—斯梅爾廷斯學校Smeltings讀書。佢有好多同黨，例如係：皮爾、丹尼、郭登、莫肯等等。

在《神秘的魔法石》入面，搵到德思禮一家人出嚟嘅魯霸·海格因為聽到威農對鄧不利多出言不遜，嬲嬲哋嘅海格就幫達力變出一條豬尾，搞到佢哋一定要去倫敦一間私家醫院將條尾切咗去[5]。

達力嘅體重同身型因為威農同佩妮嘅縱容而持續增肥，直至喺《火盃的考驗》俾學校護士開始強制執行新嘅飲食制度，以至於佩妮堅持要全家人同佢一齊節食。另外，為咗令到達力振奮精神，佩妮特登將俾哈利嘅食物量縮減到比達力嘅食物量細得多。但係達力並唔知道嘅係，哈利喺自己睡房裡面有額外嘅食物儲備。

在《鳳凰會的密令》入面，15歲嘅達力學識咗拳擊，佢帶住佢班同黨成日去洽其他年紀細啲嘅細路仔。哈利返去過暑假嗰陣，兩隻俾桃樂絲·恩不里居派出嘅催狂魔（中文：催狂魔）攻擊達力同哈利，哈利最終運用護法咒（中文：哈利波特世界觀與設定#護法咒）打走催狂魔，救返自己同達力。達力喺俾催狂魔攻擊嗰陣被迫重溫自己最差嘅經歷。羅琳透露，達力見到自己嘅真實本性——一個殘忍、自私、暴力嘅惡霸，對其他人無任何感情；喺得知呢個事實之後令佢自己都O晒嘴[17][18]。

達力喺《死神的聖物》裡面搬離佢屋企前同哈利握手道別，同埋多謝佢喺催狂魔手上救咗自己一命；達力喺小說入面更進一步咁對哈利表現出發自內心嘅關切，哈利都對呢個表達咗感謝仲以達力嘅花名「大D」嚟稱呼佢。從呢點嚟睇，佢哋兩個可以話係達成咗和解。羅琳喺事後補充話達力後來結婚仲生咗兩個仔女，仲同哈利保持住密切嘅連繫。

「達力」呢個名其實是演化自英國嘅俚語「DUD」，原意係無聊嘅人[15]。羅琳話佢曾經短暫考慮過俾達力喺《死神的聖物》結局嗰陣帶著一個巫師細路出現喺國王十字車站，但佢好快就放棄咗呢個想法，因為佢覺得「任何潛藏嘅巫師基因都永遠不會同威農姨丈嘅DNA接觸」[19]。

喺電影入面，達力·德思禮嘅角色係由哈利·梅林（中文：哈利·米爾林）飾演。為咗飾演這個角色，梅林喺後續電影裡面無得唔著住一件肥仔裝嚟維持角色嘅形象，因為隨著電影劇情發展，呢個演員嘅體重隨之減少咗，但一定要維持角色嘅肥仔形象[20]。電影《死神的聖物》嘅其中一個刪除片段入面顯示咗哈利同達力嘅握手和解[21]。

瑪姬·德思禮

編輯
瑪姬·德思禮
首次出場《哈利波特：阿兹卡班的逃犯》
扮演帕姆·菲利絲（英文：Pam Ferris）
配音  龍寶鈿（中文：龍寶鈿）
詳細信息
性別女性

瑪姬·德思禮Marge Dursley係威農嘅家姐，雖然佢唔係哈利真正嘅親戚，但係因為德思禮家嘅關係，哈利都一定要叫佢做「瑪姬姑姑」。瑪姬嘅主要興趣係喺繁殖牛頭犬[22]。每當瑪姬去到德思禮家嗰陣，佢總係對哈利好蔑視，又成日侮辱佢嘅父母。哈利9歲嗰時曾經俾瑪姬養嘅一隻牛頭犬追到爬上樹。

喺《阿兹卡班的逃犯》入面，瑪姬姑姑一而再咁樣侮辱哈利嘅父母，因為咁就激嬲哈利，令佢無意之間用咗魔法將瑪姬姑姑變成咗一個大氣球嘅狀態，後來佢恢復到原來咁樣，但被魔法部修改咗記憶。自此之後，德思禮一家就唔再俾瑪姬同哈利有任何見面嘅機會[22]。

瑪姬·德思禮嘅角色喺電影入面係由潘·菲瑞絲（英文：Pam Ferris）飾演[23]。劇組喺拍攝瑪姬膨脹成氣球嘅場景嗰陣，對演員嚟講係煎熬嘅，因為佢一定要加上大量化妝同埋著好大件嘅連體衫[6]。

曾經有學者猜測：《哈利波特》入面瑪姬·德思禮嘅角色係對應現實中英國前首相戴卓爾夫人嘅諷刺[24]。

創作

編輯

羅琳曾指出瑪姬姑姑嘅創作靈感係嚟自佢自己嘅外婆弗里達Frieda，佢愛狗仲多過人[25][26]:8。德思禮Dursley呢個名源自於英格蘭格洛斯特郡嘅一個小鎮，小說作者羅琳細個嗰陣時曾經去過嗰度[27]。

2015年，羅琳喺《Pottermore（中文：Pottermore）》網站上發布咗一篇新文章，揭示咗德思禮一家唔鍾意哈利·波特嘅原因：當威農·德思禮同哈利嘅阿爸—詹姆·波特初次見面嗰陣，佢問詹姆揸咩車，對方就答佢話係飛天掃帚，喺答佢財務問題嗰陣，詹姆話佢喺古靈閣存咗好多黃金。呢樣嘢搞到威農以為詹姆喺度整蠱佢，最終兩家人就係因為咁就反面唔再來往[2][28][29]。

參考資料

編輯

參考資料

編輯
  1. ↑ Sarah Doran (2016-05-16). "The Dursleys weren't as bad as you think..." Radio Times (英文). 原著喺2020-09-29歸檔. 喺2018-06-18搵到.
  2. ↑ 2.0 2.1 〈罗琳双语揭秘弗农姨夫为啥讨厌哈利波特(图)〉。《新浪網》。2015-07-06。原著喺2018-06-18歸檔。喺2018-06-18搵到。
  3. ↑ J·K·罗琳 (2003年10月)。《哈利波特——鳳凰會的密令 （下）》。臺北：皇冠文化。ISBN 957-33-1986-1。
  4. ↑ 大衛·巴格特、蕭恩·克萊因 (2006年9月)。《哈利波特的哲學世界》。臺北：麥田出版。ISBN 978-986-173-124-7。
  5. ↑ 5.0 5.1 J·K·羅琳 (2001年3月)。《哈利波特——神秘的魔法石》。臺北：皇冠文化。ISBN 957-33-1724-9。
  6. ↑ 6.0 6.1 6.2 布萊恩·西布利著; 龐力、張銳譯 (2014年10月)。《哈利波特電影魔法書：八部電影幕後製作全記錄》。臺北：佳魁文化。ISBN 978-986-5712-89-1。
  7. ↑ 〈哈利波特阿姨家出售 開價近2,000萬台幣【影】〉。《台灣大紀元》。2016-09-20。原著喺2021-05-16歸檔。喺2018-06-18搵到。
  8. ↑ "'Privet Drive' Potter house up for sale". BBC News (英國英文). 2016-09-19. 原著喺2021-11-04歸檔. 喺2018-06-18搵到.
  9. ↑ Ough, Tom (2016-09-19). "For sale: Harry Potter's home in Privet Drive (complete with cupboard under the stairs)". The Telegraph (英國英文). ISSN 0307-1235. 原著喺2021-10-30歸檔. 喺2018-06-18搵到.
  10. ↑ 馬慧娟 (2016-09-19)。〈哈利波特阿姨家要賣! 開價約2千萬〉。《華視新聞網》 (臺灣中文)。原著喺2020-09-28歸檔。喺2018-07-05搵到。
  11. ↑ 陳筱惠 (2018-07-04)。〈哈利波特退燒 邪惡阿姨家降價百萬賣不掉〉。《臺灣蘋果日報》 (臺灣中文)。喺2018-07-05搵到。
  12. ↑ 邱怡萱 (2018-07-05)。〈電影熱潮退燒！哈利波特「老家」狂降價百萬賣不掉〉。《中時電子報》 (臺灣中文)。原著喺2018-07-08歸檔。喺2018-07-05搵到。
  13. ↑ 〈《哈利波特》姨丈　英男星李查葛瑞夫斯辭世〉。《臺灣蘋果日報》 (臺灣中文)。2013-03-29。原著喺2018-07-19歸檔。喺2018-06-18搵到。
  14. ↑ https://www.youtube.com/watch?v=V9DGXTDZMp8
  15. ↑ 15.0 15.1 15.2 〈《哈利·波特》人名各有深意 伏地魔代表"死亡的飞翔"〉。国际在线。2011-08-04。原著喺2018-07-03歸檔。喺2018-07-02搵到。
  16. ↑ "Deleted Scene from "Deathly Hallows" Shows Different Side to Disliked Character" (美國英文). HollywoodNews.com. 2011-03-24. 原著喺2020-08-19歸檔. 喺2018-06-18搵到.
  17. ↑ "J.K. Rowling Web Chat Transcript". The-Leaky-Cauldron.org (美國英文). 2007-07-30. 原著喺2012-02-15歸檔. 喺2018-06-18搵到.
  18. ↑ "'Harry Potter' Author J.K. Rowling Outs Dumbledore At New York Event". MTV News. 2007-10-19. 原著喺2009-08-01歸檔. 喺2018-09-20搵到.
  19. ↑ J.K.Rowling. "Section: Extra Stuff - Harry and Dudley: Future Hope?". J.K.Rowling Official Site. 原著喺2011-04-30歸檔. 喺2018-09-20搵到.
  20. ↑ "Harry Melling is unrecognisable from his Harry Potter character". Mail Online. 2015-07-31. 原著喺2020-11-06歸檔. 喺2018-06-18搵到.
  21. ↑ "The World's #1 Harry Potter Site - Deathly Hallows Movie, The Wizarding World, JK Rowling, and much more". MuggleNet. 2011-01-26. 原著喺2011年1月26日歸檔. 喺2018-06-18搵到.
  22. ↑ 22.0 22.1 J.K. Rowling. "Marge Dursley". Pottermore. 原著喺2019-10-02歸檔. 喺2018-06-18搵到.
  23. ↑ "Aunt Marge (Character)". IMDB. 原著喺2017-04-01歸檔. 喺2018-07-21搵到.
  24. ↑ "'Harry Potter lives in Thatcher's Britain'" (英國英文). 2007-10-26. ISSN 0307-1235. 原著喺2022-01-18歸檔. 喺2018-06-18搵到.
  25. ↑ Demetriou, Danielle (2000-06-30). "Harry Potter and the source of inspiration" (英國英文). ISSN 0307-1235. 原著喺2021-05-16歸檔. 喺2018-06-18搵到.
  26. ↑ J·K·羅琳; 琳賽·費瑟 (2002年7月)。《哈利波特的祕密：與J·K·羅琳對話》。臺北：皇冠。ISBN 957-33-1878-4。
  27. ↑ J.K. Rowling. "Vernon & Petunia Dursley". Pottermore. 原著喺2019-10-02歸檔. 喺2018-06-18搵到.
  28. ↑ Flood, Alison (2015-06-24). "JK Rowling reveals why the Dursleys dislike Harry Potter so much". the Guardian (英文). 原著喺2016-03-25歸檔. 喺2018-06-18搵到.
  29. ↑ Strang, Fay (2015-06-24). "JK Rowling reveals the Dursleys' backstory in latest Pottermore extract". mirror. 原著喺2021-04-12歸檔. 喺2018-06-18搵到.
由「https://zh-yue.wikipedia.org/w/index.php?title=德思禮一家&oldid=2176063」收