忠心嘅約翰

《忠心嘅約翰》，又或者叫《忠臣約翰》，係格林童話有收錄嘅一個童話故事。呢個故仔嘅主角叫約翰，佢份人好忠心盡責，年老嘅國王臨終前吩咐佢叫佢要好好扶助王子，而王子後嚟繼承王位做咗新國王，約翰鞠躬盡瘁，仲為咗保護年輕國王而犧牲自己條命。年輕國王畀約翰嘅忠誠打動，最後肯負出重大嘅代價，令約翰起死回生。

呢幅插圖描繪嘅，係約翰喺老國王臨死前應承會用自己條命嚟保護王子。

嗌法

《忠心嘅約翰》喺各語言入便嘅名如下：

• 德文：Der treue Johannes —

Der	treue	Johannes
陽性主格指定冠詞	形容詞	專有名詞
	忠心嘅	約翰

• 英文：The Trusty John（信得過嘅阿莊）或者 The Faithful John（忠信嘅阿莊）。
• 法文：Le Fidèle Jean，意思同英文個名大致一樣。
• 粵文：
  • 漢字：忠心嘅約翰

    —粵拼：zung1 sam1 ge3 joek3 hon6

  • 漢字：忠臣約翰

    —粵拼：zung1 san4 joek3 hon6

  • 要留意嘅係，約翰係譯自德文 Johannes 嘅—呢個名可以算係英文 John 嘅德文版，讀音用國際音標寫係 /joˈhanəs/，類似粵拼：jo6 haan1 nat4s，當中頭嗰兩截音節似約翰呢兩隻漢字用粵音讀嘅發音。

情節

睇埋：格林童話

《忠心嘅約翰》有好幾個版本，唔同版本嘅情節有明顯出入。以下呢段情節，主要取自格林童話嗰個版本。

忠臣嘅承諾

王子：「呢間房有啲乜嘢喺入便？點解父王唔畀我入嘅ge2？」

話說好耐好耐以前有一位老國王，佢年紀好大而且患咗重病。有一日，老國王意識到自己就快死，就傳召佢嘅忠臣約翰。

「約翰，我冇幾耐命㗎喇。我而家最擔心嘅係我個仔。佢仲後生，好多嘢都未識，我死後，你記住要好好噉扶助佢，做佢養父嘅角色。」

約翰諗都唔諗就應承，話就算犧牲自己條命都會好好噉保護王子。

然後老國王就講低，叫約翰要帶王子睇勻成座城堡，但有一間房要鎖實唔好畀王子入。噉係因為房裡便有一幅畫像，描繪一位生得好靚嘅鄰國公主，王子見到幅畫實會即刻愛上公主，跟住就會為咗追求公主做傻事。老國王講完就斷咗氣。

公主嘅芳心

約翰照足國王吩咐，帶王子參觀城堡，睇勻晒城堡每一間房每一件寶物，但王子一路都留意住「鎖實咗嗰間房」。後嚟王子正式登基成為新國王（跟住落嚟會稱佢做年輕國王），就命令約翰打開神秘密室道門。一如老國王所料，年輕國王一入到去見到公主幅畫像，真係即刻畀公主嘅美貌迷到神魂顛倒，當場下定決心要娶公主做老婆。

「約翰，你係我嘅忠臣，你一定要幫我手贏取公主嘅芳心。」

年輕國王二話不說，搵晒全國上下最有料到嘅工匠返嚟，打造咗一大堆用黃金造嘅雕像、餐具同其他物品，諗住用呢啲禮物博取公主嘅好感。準備完畢，年輕國王就帶埋約翰，假扮商人坐船去搵公主。年輕國王一到步，就派約翰去公主嘅城堡，向公主嘅女僕展示啲黃金禮物。女僕見啲金器咁靚，就帶約翰去見公主，公主好開心，想買晒啲禮物。呢個時候，約翰開口：

「係噉嘅，噉樣嘅金器，我主人架船仲有好多。」

於是乎，約翰就成功帶咗公主上船。公主一上咗船，約翰就靜靜雞叫船員起航，而公主就掛住同假扮成商人嘅年輕國王傾偈同觀賞金器。過咗一陣，公主發覺架船駛離咗港口就開始驚，諗住班商人想圖謀不軌。就喺呢個時候，年輕國王揭開自己嘅真正身份，仲即場向公主求婚。對年輕國王產生咗好感嘅公主，願意嫁畀年輕國王—就係噉，年輕國王、公主、約翰同埋眾船員就慶祝住噉回航。

渡鴉嘅預言

回航途中，約翰聽到三隻識講嘢嘅渡鴉喺度預告未來：第一隻渡鴉講，話約翰佢哋一上岸就會見到隻駿馬，年輕國王一騎上隻馬就會被帶走失蹤；第二隻渡鴉就講，就算國王安然返到城堡都冇用，佢一到步就會見到一件好靚嘅飲衫，件衫望落似係用金銀造嘅，但實際上係硫磺，國王一著件衫上身就會被燒到得返棚骨；最後第三隻渡鴉補充，國王就算避得開頭兩劫都係結唔成婚，因為公主會喺婚宴上跳舞，佢跳吓跳吓會突然躂低，如果冇人由公主右胸嗰度吸三滴血再𦧲loe1返出嚟，公主就會死。約翰記住呢三隻渡鴉講嘅嘢。三隻渡鴉亦提到，如果有人將佢哋講過嘅說話講出去，嗰個人就會變成石頭。

冇幾耐，船返到王國。眾人一落船竟然就見到隻駿馬，年輕國王見到隻馬生得又大又靚，就想即場收養隻馬，仲想騎住佢返城堡。約翰醒返起渡鴉講過嘅嘢，二話不說郁手殺咗隻馬。在場嘅眾人都批評約翰嘅行為。但國王相信約翰嘅判斷，認定約翰此舉係為佢著想嘅。

然後眾人返到城堡，國王真係見到一件好靚嘅飲衫等住佢著。約翰又醒返起渡鴉講過嘅嘢，好快手噉搶走咗件衫，再將件衫掟落火堆度燒咗佢。其他僕人都批評約翰嘅行為。但國王依然相信約翰。

插圖：公主喺婚禮上跳跳吓舞暈低。 插圖：公主喺婚禮上跳跳吓舞暈低。

婚禮嗰晚，眾人喺城堡搞舞會。新人同一眾達官貴人一齊開始跳舞。跳跳吓，公主真係突然間躂低咗。約翰見到，就將公主抱去一間房度，由公主嘅右胸吸咗三滴血再𦧲返出嚟，公主先至恢復知覺。不過年輕國王見到，就大發雷霆，仲將約翰收咗監。

到咗最後，年輕國王決定要處死約翰，但係行刑前佢准約翰講幾句遺言。約翰如實將渡鴉講過嘅說話講返晒出嚟，國王聽到就覺得好後悔，覺得自己怪錯咗約翰，但係為時而晚—約翰講完，渡鴉嘅預言當場應驗，約翰變咗一座石像。

最終結局

悲痛不已嘅年輕國王下令，將變咗石像嘅約翰安放喺城堡嘅教堂裡便。打後公主做咗皇后，仲生咗對孖仔，而年輕國王、皇后同孖仔王子就平靜噉生活咗幾年。有一日，佢哋一家四口嚟咗教堂，孖仔王子喺度玩，而國王同皇后就望住約翰嘅石像。國王唉聲嘆氣噉：

「噢，約翰。我真係希望可以畀你呢個忠臣起死回生。」

下一刻，國王竟然聽到把聲：

「陛下，如果你想約翰返生，係有計嘅。你只係需要犧牲你對孖仔王子條命，就可以解除約翰身上個咒。」

國王聽到，即刻面都青埋。佢諗咗一大輪，諗起約翰對自己咁盡忠，而自己又錯怪咗約翰，覺得佢哋一家的確欠咗約翰。於是佢就狠下決定，攞起把劍準備去忍痛殺咗兩位小王子。點知下一刻，約翰嘅石像就開始變返血肉之軀—原來要破咒唔使殺兩位小王子，淨係需要國王下定決心做出自我犧牲嘅舉動就得。

就係噉，約翰返生，可以繼續服侍年輕國王。國王、皇后、兩位小王子同約翰就一齊幸福快樂噉生活落去。大團圓結局。

影響

呢幅插圖，描繪《忠心嘅約翰》入便嗰三隻識預知未來嘅渡鴉。

喺第一版嘅格林童話當中，《忠心嘅約翰》被收錄咗做第六個故事。

喺廿至廿一世紀初嘅世界，《忠心嘅約翰》以童話故事嚟講唔算好出名，遠遠冇《白雪公主》、《灰姑娘》同《小紅帽》等同屬格林童話嘅作品咁有影響力。不過《忠心嘅約翰》依然有試過畀人改編做戲，而且亦有一啲虛構作品用咗《忠心嘅約翰》嚟做佢哋嘅一部份，例如 DC 漫畫奇幻作品《Fables》就用咗忠心嘅約翰做佢哋其中一位配角。

睇埋

• 維基同享中有關忠心嘅約翰嘅資源類
• Púca：仙子一種，相傳係「人一騎上去，就會畀佢拐走」嘅妖馬。
• （英文） 信得過嘅阿莊—格林兄弟嘅童話故事
• （英文） 年老家臣，電視橋段網講年老忠臣相關嘅橋段，有用《忠心嘅約翰》嚟做例子。