手指公姑娘

《手指公姑娘》（丹麥文：Tommelise，英文：Thumbelina）又有譯做《拇指姑娘》，係由丹麥作家安徒生寫嘅一個童話故事，喺1835年12月首次出版。個故仔寫嚟係預咗畀啲父母氹細路瞓覺用嘅。

插圖：白蝴蝶幫助手指公姑娘，拉住塊睡蓮葉前進。

《手指公姑娘》呢個故仔嘅主角叫手指公姑娘。佢人如其名，生得好細粒「得一隻手指公咁大daai1」。喺個故仔嘅情節當中，手指公姑娘接二連三遇到蠄蟝等嘅動物想夾硬娶佢做老婆，佢避開晒呢啲動物嘅迫婚，最後遇到一個同佢一樣咁細粒嘅靚仔國王，搵到真愛大團圓結局。

主角個名

《手指公姑娘》喺各語言入便嘅名如下：

• 丹麥文：Tommelise，嚟自 tommel，即係指手指公嘅名詞，單數主格非指定。
• 英文：Thumbelina，嚟自 thumb（手指公噉解），黐咗 -elina 呢個詞尾令隻字聽落似女仔名。
• 法文：Poucette，嚟自 pouce（指手指公），黐咗 -ette 呢個陰性詞尾令隻字聽落似指緊啲細小嘅嘢。
• 日本話：oyayubihime（平假名轉寫：おやゆびひめ，和漢轉寫：親指姫）

  —結合咗手指公（oyayubi）同埋公主（hime）。

• 韓國話：eomji gongju（諺文轉寫：엄지 공주）

  —都係結合手指公（eomji）同埋公主（gongju）。

• 語體中文：拇指姑娘
  • 標官：mǔ zhǐ gū niáng
• 貼近粵語嘅漢字名：手指公姑娘
  • 粵拼：sau2 zi2 gung1 gu1 noeng4

情節大要

插圖：手指公姑娘遇上一眾金甲蟲。

《手指公姑娘》嘅情節大致係以下噉嘅。

主角嘅誕生

話說喺好耐好耐以前有一個女人，佢好恨有細路，於是就走咗去搵女巫教路。

「你想要細路？好易啫嘛，嗱，我呢度有粒魔麥，你返屋企將粒魔麥種落個花盆度啦。」

恨細路嘅女人聽女巫吩咐，返屋企搵咗個花盆種粒魔麥。過咗冇耐，粒麥就開始生，生出咗一個鬱金香花冧lam1。女人見個花冧咁靚，忍唔住惜sek3咗個花冧一啖。點知佢一惜，個花冧就打開，入便有一個好細粒、得一隻手指公咁大嘅女仔。個女仔生得好可人，女人當場就決定想收養佢，仲幫佢改埋名，叫佢做手指公姑娘。

養母攞各種細小嘅物品，幫手指公姑娘整咗間好精緻嘅房：手指公姑娘張床用合桃仁嘅殼造，床褥係菫菜嘅花瓣，而張被就係玫瑰嘅花瓣；日頭嘅時候手指公姑娘會喺一張檯上便玩，檯上擺咗隻碟，隻碟有好淺嘅水，養母會喺水上便擺塊好大嘅鬱金香花瓣，手指公姑娘成日都會坐喺塊鬱金香花瓣上，當正塊花瓣係艇仔噉，一路撐艇仔一路唱歌。

手指公姑娘佢唔單只生得可愛，把聲仲好甜美。

畀蠄蟝挾走

有一晚，正當手指公姑娘瞓得好淰之際，有一隻又大又核突又立黐黐嘅蠄蟝乸靜靜雞偷入佢房。

「呢位姑娘仔生得真係可人。啱晒做我個仔嘅新娘！」

蠄蟝乸一嘢就掅cing3起手指公姑娘張床，將佢連人帶床噉挾gep6走咗。蠄蟝乸將手指公姑娘帶咗返屋企，而蠄蟝仔見到手指公姑娘生得咁靚，就同佢阿媽一齊興奮。然後兩仔乸就趁住手指公姑娘仲瞓緊，將佢擺咗喺一塊喺小溪上面浮吓浮吓嘅睡蓮葉上。兩隻蠄蟝就潛落水郁手起間房畀「準新人」住。

第二朝，手指公姑娘瞓醒。佢見到自己喺塊睡蓮葉上便（周圍都係好深嘅水，佢冇路可走）就嚇親，嚇到喊咗出嚟。喺呢個時候，蠄蟝兩仔乸由水底游返上嚟。

「吖，你醒咗嗱？嚟見吓我個仔啦！佢係你嘅未來老公呀！」

插圖：「姑娘仔你醒咗嗱？我個仔係你未來老公呀！」 插圖：「姑娘仔你醒咗嗱？我個仔係你未來老公呀！」

蠄蟝兩仔乸跟住就將手指公姑娘張床攞走，帶去泥下便嘅「新人房」嗰度。手指公姑娘想返屋企但又返唔到，就繼續喊。佢一路喊，水下便嘅一群魚一路睇住成件事嘅經過，就對手指公姑娘心生同情：

「冇陰功囉lo3，咁可愛嘅姑娘仔要被迫嫁畀核突蠄蟝。」

群魚然後就游去塊睡蓮葉下便，起勢噉咬塊葉嘅梗。唔使幾耐條梗就畀佢哋咬爛咗，於是塊睡蓮葉就甩咗出嚟，隨水漂流。

手指公姑娘坐住睡蓮葉，隨溪水向下游漂。佢一路漂流一路唱歌，唱唱吓有隻白色嘅蝴蝶飛埋嚟。蝴蝶好愛慕手指公姑娘把聲咁甜美，話要幫佢拉塊睡蓮葉前進。不過佢哋去到半路，有一隻金甲蟲飛過，仲一嘢捉實手指公姑娘條腰，將手指公姑娘捉走咗。

金甲蟲將手指公姑娘帶咗去樹上，請佢食蜜糖。樹上嘅甲蟲公見到手指公姑娘咁可人，個個爭住埋嚟睇，同時班甲蟲乸就個個喺度話手指公姑娘醜樣：

「佢得兩隻腳？真係肉酸到不得了！」

班甲蟲乸講到咁上下，班甲蟲公（最少把口）開始贊同。最後，佢哋將手指公姑娘掉deu6低喺朵雛菊上便。

樹林嘅生活

插圖：老鼠收留手指公姑娘。

插圖：手指公姑娘坐住燕子飛走。

搵唔到路返屋企嘅手指公姑娘，就唯有喺樹林入便過活。佢用草幫自己整咗張吊牀，肚餓頸渴嗰陣就靠住食花蜜同飲露水維生。後嚟冬天到咗，個天仲開始落雪，凍到手指公姑娘打晒冷震。

手指公姑娘四圍去，想搵笪暖啲嘅地方藏身。佢搵呀搵，最後搵到一個老鼠洞，佢敲老鼠洞嘅門，老鼠就應門：

「可憐嘅姑娘仔，入嚟坐坐啦。」

老鼠肯收留手指公姑娘畀佢喺老鼠洞過冬，而手指公姑娘為咗報答老鼠嘅恩惠，就做工人幫老鼠打理家頭細務。有一日，手指公姑娘去探住喺老鼠隔離嘅地鼠，途中發現一隻受咗傷嘅燕子，燕子其中一隻翼受咗傷，嚟唔切出發飛去溫暖嘅國度過冬，仲凍到僵晒（手指公姑娘佢哋初頭以為燕子死咗）。心哋好嘅手指公姑娘努力照料燕子，而燕子就喺手指公姑娘嘅照顧之下慢慢噉恢復元氣。

手指公姑娘一路照顧住燕子，卒之等到冬去春來。燕子見天氣暖返就飛走，手指公姑娘決定留低，但冇幾耐老鼠就開始叫手指公姑娘嫁畀地鼠。

「地鼠佢聽過你把甜美嘅聲，中意咗你呀。佢好有錢㗎，你有得嫁畀佢真係執到。」

手指公姑娘對地鼠冇咩好感，但係老鼠照樣安排婚禮。幾個月嘅時光話咁快就過去，到咗秋天，手指公姑娘同地鼠嘅「大婚之日」，地鼠嚟到，想帶手指公姑娘返去佢嗰個深入地底不見天日嘅竇嗰度。手指公姑娘好唔開心，諗住自己以後都唔會見到太陽。點知喺呢個時候，佢聽到燕子把聲—手指公姑娘抬頭就見到燕子，忍唔住一路喊晒口噉將成件事講晒畀燕子聽。

「咁慘呀aa4？不如噉啦，我橫掂都要去搵地方過冬，你坐上我背脊，我帶你去離呢度好遠嘅地方。」

就係噉，手指公姑娘坐住燕子飛走咗。

最尾嘅結局

手指公姑娘同燕子飛飛吓，去到溫暖嘅國度。到咗最後，燕子帶手指公姑娘去到一笪佈滿咗花嘅原野嗰度，手指公姑娘就喺呢度搵到佢嘅同類—每一朵花入便都有一個好似手指公姑娘咁細粒嘅男人或者女人，佢哋當中有一個戴住一頂金色嘅皇冠，呢個人就係細細人嘅國王。手指公姑娘一路望住英俊嘅國王，一路開始對國王產生好感，同時國王又望住手指公姑娘：

「佢係我見過咁多個女仔之中最可人嘅。」

國王即場就向手指公姑娘求婚。手指公姑娘好開心，答應同國王結婚。於是一對新人就喺一眾細細人嘅祝福同燕子嘅歌聲下成婚。

事後，燕子飛咗返去丹麥。佢喺一位作家嘅窗外面起咗個竇，仲對住嗰位作家唱歌，將成個故事講晒畀位作家聽。

睇吓

• 小人國
• 仙子

拎

• 《手指公姑娘》 （英文），《手指公姑娘》嘅一個英文譯版。
• 文學 / 手指公姑娘 （英文），電視橋段網講《手指公姑娘》裡便啲橋段。