文體學

文體學（粵拼：man4 tai2 hok6 ），又叫文體論或者風格學，係語言學嘅一個分支領域，專門研究語言嘅「風格」—例如攞一個語言群體嚟睇，佢哋口語講日常生活嘢用嘅詞彙，梗會同口語講學術知識有差異，而如果呢個群體有雙層語言情況，佢哋寫嘢可能會同口語（包括日常同學術口語）有好顯著嘅差異。

文體學唔純粹係語言學領域，仲涉及到文學同新聞學當中嘅一啲範疇。

基本概念

内文：語言學同寫作風格

睇埋：字頻率、統計學同頻率分佈

籠統啲講，講嘢或者寫嘢嘅風格可以大致界定做

一段語言整體上表現出嚟嘅獨特鮮明特性。

風格話到明係「獨特鮮明」，就表示一套風格一定透過比較得出嘅：例如而家話某位作家有佢嘅風格（一個個體有風格），就表示佢寫或者講嘅嘢同第啲作家比起嚟，有某啲零舍唔同嘅地方；又例如而家話香港人同澳門人口頭講故仔嘅風格有啲分別（一個群體有風格）—譬如香港人可能成日夾雜嚟自英文嘅借詞，而澳門人就比較多出自葡萄牙話嘅借詞，呢啲觀察都係透過比較先至留意得到嘅。

文體學跨越咗語言學同文學嘅範疇。最基本上，文體學會分析吓口語同文字嘅客觀語言特性，例如聽香港人同澳門人講粵語，要知道係咪真係「前者多啲英文借詞，後者多啲葡萄牙話借詞」，研究者大可以數吓呢啲字詞喺香港人嘅話語同澳門人嘅話語當中出現嘅頻率—可以靠非常客觀嘅數值嚟解答條問題。再進一步嘅分析，會嘗試探究呢啲特性背後「反映緊啲乜」或者「有啲咩深層意義」，例如已知某位作家嘅風格特別，零舍常用某類嘅字，文學評論工作者就有可能會話「噉係反映咗呢位作家嘅獨特諗嘢方式，而呢點係源自佢嘅成長背景」呀噉，而社會語言學嘅研究者亦有可能有興趣剖析唔同群體講嘢寫嘢嘅風格唔同，係反映緊咩社會現象。

重要概念

首先，思考一個顯而易見嘅事實：所有嘅文學，都源自創作者做嘅語言決策。想像以下噉嘅句子：

阿明打算今後花多啲時間陪佢嘅老婆同埋 _____。

上面句嘢嘅空格位，可以填屋企人或者家人。喺粵語白話文裡邊，無論創作者喺呢兩個選擇當中揀咗邊個，都能夠出到一句合理嘅句子。創作者要根據佢嘅個人喜好或者其他因素，決定要用邊一隻字詞。

搭配詞

内文：搭配詞

文獻計量

内文：文獻計量

睇埋：數碼人文學同語料庫

原則上，語言學跟嘅係科學方法，成日都會靠量化嘅方式嚟測試假說。廿一世紀初嘅文體學，好多時都會借用統計概念。想像家陣有位文體學研究者，佢想比較唔同時期嘅港產片啲粵語對白有咩分別，佢可以攞住手上嘅文獻或者口語紀錄（例如係劇本噉），由六個角度剖析段嘢，計吓唔同嘢嘅頻率，包括：

• 字符：標點符號、大細楷或者空格嘅使用；
• 字詞：詞彙嘅多變度、用嘅傾向係常見字定少見字；
• 句子：句子長度、句子嘅規律（例如會唔會某啲語序常見啲？）；
• 段落：段落長度、段落用乜嘢類型嘅字開頭、段落用乜嘢類型嘅字終結；
• 文法：詞性嘅 n-gram；
• 語義：會唔會某啲語義類型嘅字詞常見啲？

呀噉。研究者跟住就可以郁手做比較，睇吓唔同時期嘅作品嘅粵語對白喺呢啲特性嘅頻率同分佈上有咩差異。

睇埋

• 修辭手法
• 雙層語言
• 概率分佈
• 認知科學

文獻

• Abdulqader, K. A., Sha'ar, M. Y. M. A., & Alyasery, A. H. Corpus Stylistics: Style and Corpora Applications (PDF).

引咗

篇文用咗嘅行話或者專有名詞，英文（或者其他外語）名如下：

篇文引用咗以下呢啲文獻同網頁：

拎

• （英文） 文體學，不列顛百科全書