維基百科

上海

中華人民共和國直轄市
(由滬上跳轉過嚟)

31°13′49.5″N 121°28′25.2″E / 31.230417°N 121.473667°E / 31.230417; 121.473667

中華人民共和國 > 上海市
  想搵第二個意思嘅話，請睇上海 (搞清楚)。
  提示：呢篇文講嘅唔係雙開。
上海
上海市
從左上到右下：浦東陸家嘴、浦西外灘、豫園、南京路、世博園
從左上到右下：浦東陸家嘴、浦西外灘、豫園、南京路、世博園
----
簡稱：滬（上）
花名：申（申城）
標語：海納百川、追求卓越、開明睿智、大氣謙和
上海位置圖
上海位置圖
經緯度 北緯31°10′0″東經121°29′0″
國中華人民共和國 中華人民共和國
直轄市上海市
轄下一級政區16個區[1]
轄下二級政區106個鎮、2個鄉、107個街道。再下轄4588個居委、1558個村委[1]
建城年1292年[2]
開埠年1843年
設市年1927年
市長龔正
市委書記陳吉寧
政府駐地黃浦區人民大道200號
地理
總面積6,340.5[4] km²
市區面積5,299 km²
城市化率(2024)83.6%
海拔4[3] m
註市區面積據中文版，城市化率據日文版
人口
總人口(2023)24,874,500[5]
戶籍人口(2022)1,503.83萬
民族漢族 - 98.8%
回族 - 0.35%
官方語言標準官話
本地語言吳語蘇嘉滬小片上海話
經濟
GDP(2023)CN¥47,218.66億[5]
人均GDPCN¥190,270
HDI(2022)0.903
極高
時間
時區中國時區（UTC+8）
識別信息
電話區號021
郵政編碼200000 – 2021000
車牌滬A、B、D、E、F、G、H、J、K、L、M、N[6][7]
滬C（郊外）[8]
政區代碼310000
象徵
市樹白玉蘭
市花白玉蘭
網站： 上海市府

上海（粵讀：soeng6 hoi2；通用吳拼：zaon he；英文：Shanghai）係中國一城，亦係一埠。而家係中華人民共和國嘅直轄市，行政上叫上海市，佢係中國最大嘅都市。

上海係全球聞名嘅國際都會，係中國嘅商業、金融、工業、交通中心之一。佢坐落喺中國東部長江三角洲，面臨東中國海，喺長江入海口南岸。上海港係世界大港，2005年全年吞吐量達1808萬標準貨櫃。2010年，上海舉行世界博覽會。2014年，美國嘅智庫發表話，總合咗商貿、人才、文化、政治四方面，上海喺世界城市排名入面排第18位，其中商貿方面嘅評價尤其高[9]。

2023年尾，上海常住人口達2487.5萬人[5]，GDP達47,218.66億人民幣[5]，超過首都北京，係中國最大嘅都會。國務院將佢列爲國家中心城市之一。

上海嘅短名叫滬（粵拼：wu6；通用吳拼：wu。又叫滬上），古名叫申（粵拼：san1；通用吳拼：sen。又叫申城）。

史

編輯
内文：上海史

古代

編輯

遠古上海係海，靠沖積成地。大約喺6000年前，而家嘅上海西部，開始變陸地，有初民村落，而東部，去到兩千年前，先至成陸。春秋時，地屬吳國東境，戰國時屬楚國，佢曾經係楚國春申君黃歇封邑，貫穿現代上海嘅黃浦江，所以條江又叫春申江，而上海就叫「申」[10]。去到西元四、五世紀嘅晉朝，家下蘇州河，當時叫松江，呢帶同海皮一帶，居民多數捕魚為生，佢哋整咗竹編嘅捕魚架生，叫「扈」，而當時江流入海處叫「瀆」。所以，松江下游一帶就叫「扈瀆」，後尾改寫「扈」做「滬」[10]。「上海」因為松江（吳淞江）下游支流「上海浦」而得名。唐代中葉始置華亭縣（松江）。宋末置上海鎮。1292年（元）設上海縣。明興盛，1553年係抵倭寇築上海城，歸屬南直隸松江府管轄，松江府轄境係全國最大嘅棉紡地。大清跟明制歸屬江南省松江府，設江海關[11]。

近代

編輯

1840年，第一次鴉片戰爭後，按1842年簽嘅中英南京條約，上海成為通商口岸，對外開放。英國喺上海設立租界。開埠後，上海變成遠東最繁榮嘅港口，亦係經濟、金融中心，係近代亞洲，唯一國際大都市。當時畀人叫做「十里洋場。」家下上海市黃浦、靜安以及虹口、楊浦四區，當時係上海公共租界（以英美為主），長寧區係上海公共租界嘅越界築路區，盧灣、徐彙兩區主要係上海法租界[12]。當時上海各租界，唔受大清管，有完全行政同司法獨立。喺上海嘅租界公園門外，都會一塊告示牌，「華人與狗，不得入內。」因爲有租界，上海無畀戰火波及，重享有實際獨立地位同國際聯繫，因而繁盛一時。後尾，虹口、楊浦兩區，劃咗做日軍防區，成為日本勢力範圍，喺淞滬會戰期間，同華界一樣受到重創。

民國初年，租界以外嘅閘北同南市，叫華界，屬江蘇省。1927年，中華民國政府，喺華界設上海特別市，歸中華民國行政院直轄。同時將江蘇省上海縣、寶山縣十七市鄉，劃入特別市。1930年7月，改稱上海市。1937年日本侵華戰爭爆發，淞滬會戰之後，日軍打國軍，以武力套去華界。上海法租界同蘇州河以南嘅半個上海公共租界，經歷長達四年多嘅孤島時期。太平洋戰爭爆發後，日本向英美宣戰，跟住日軍攻入租界，日本佔領全個上海，一直到1945年，日本無條件投降爲止。第二次世界大戰結束後，根據中、美、英三國共同發表嘅《開羅宣言》，上海由中華民國佔領接管。1945年，上海由國民政府接管統治。

1946年，中華民國政府軍，同中共軍隊爆發大規模內戰（睇國共內戰）。1949年5月，中共嘅中國人民解放軍，擊敗中華民國嘅國民革命軍，佔領上海，同時對上海實行軍法管制。故此，大量人員、財產同機構撤離。

現代

編輯
 
浦東夜色

1949年，中華人民共和國定上海做直轄市，成為中國工業中心。1986年，國務院公佈，上海係國家歷史文化名城。1980年代中國改革開放後，上海經濟地位，受到華南各城挑戰，尤其係經濟特區。但1990年代後，上海重新成為中國經濟，金融同貿易中心。1993年浦東開發開放，加快城市發展速度。目前保持年人均GDP 6%以上嘅增長。目前，上海發展邁向國際經濟、金融、貿易同航運中心。

上海浦東、浦西，開始接通，浦江兩岸得以共同發展。1971年松浦大橋建成，黃浦江自始有大橋，1991年12月1號上海南浦大橋通車，1993年10月楊浦大橋通車，2003年6月28號盧浦大橋通車，黃浦江有條大橋；而隧道方面1970年9月打浦路隧道落成、1989年10月24日延安東路越江隧道通車，2003年9月29號大連路隧道通車。過江路越來越多，使陸家嘴翻天覆地，成為家下金融貿易區。1994年11月東方明珠電視塔完工、1999年3月18日金茂大廈開業、1999年8月上海國際會議中心開業，2008年夏季奧林匹克運動會舉辦前，陸家嘴重起緊中國最高建築，即係上海環球金融中心。

上海自從浦東開放後，接過好重要國際會議，增強國際影響力，目的係彰顯中國大陸經濟、社會迅速發展。2001年10月21號上海接咗亞太經濟合作組織，第九次領導人非正式會議，2006年6月15號上海合作組織，成員國元首理事會，第六次會議喺上海舉行。2010年，上海接咗2010年世界博覽會。此外，每年上海接唔少展會。會議展覧業，經已成為上海重要産業。

喺版圖上，1949年上海面積係636平方公里。1958年，江蘇省嘅上海、嘉定、寶山、松江、金山、川沙、南匯、奉賢、青浦、崇明10個縣劃歸上海市，上海市轄區範圍擴大到5910平方公里。到2003年末，上海面積6340.5平方公里。境內轄有崇明、長興、橫沙三個島嶼，其中崇明島面積超過1000平方公里，係目前中國嘅第三大島。

上海大事年表

編輯

地理

編輯

位置

編輯

上海喺北緯31度14分，東經121度29分[13]。上海喺長江口南岸，喺正中國海岸線中心點，係長江出海嘅門戶。地處長江三角洲沖積平原前緣，東瀕東海，北界長江，南臨杭州灣，北面同西北面係江蘇省，西南面同浙江省接壤[13]。上海嘅市區唔係就喺長江邊，而係喺順住長江支流黃浦江入啲嘅位置。

面積

編輯

上海市全市面積6,340.51平方公里，南北最長有120公里，東西最闊約100公里。其中市轄區2,648.6平方公里。

地形

編輯

上海市全境係沖積平原，只係西南部有部份火山岩丘。海拔平均高度喺4米左右，地勢平坦，山脈少而低小。西部有佘山、天馬山等，但高度都喺100米以下。上海市最高點係喺杭州灣內海拔103米嘅大金山。

島

編輯

上海市區嘅北部，長江嘅出口處有三個島同一啲啱出水面嘅沙洲。三個島即崇明島、長興島同橫沙島[4]，呢個係上海市最大嘅三個島，另外重有南部嘅金山嘴，大金山等島、崇明島以東35公里嘅佘山島。

崇明島係由長江帶落嚟嘅大量泥沙沖積而成，大唐武德元年（西元618年）僅係長江中嘅兩個沙洲仔，面積只有十幾平方公里。之後幾次嘅變遷，而家個島東西之間約80幾公里，南北之間闊約10-15平方公里，面積1041平方千米，係中國嘅第三大島同最大嘅沖積島[14]。

長興島同橫沙島喺崇明島以南嘅江口，將江水分做南北兩條水道。長興島俗稱鴨窩沙，露出水面未過百年，分有五部分：石頭沙、瑞豐沙、潘家沙、鴨窩沙、金帶沙。近40年來先至逐漸形成一個島。同吳淞口相對。橫沙島喺長興島東面，由橫沙島同元沙島組成，面積大約40平方公里[14]。

河

編輯

黃浦江同蘇州河（吳淞江）貫穿市區。黃浦江將上海分成浦東同浦西。澱浦河銜接澱山湖同黃浦江。大治河銜接黃浦江喺長江出海口。

黃浦江入長江嘅河口叫「吳淞口」，原本係吳淞江入長江嘅口，後來黃浦奪淞，變成黃浦入江口，而個名講落。而家吳淞口係個國際郵輪碼頭[15]，可以坐船去諸如崇明島呢啲島，亦可以坐出市。

氣候

編輯
 
平均溫度（紅色），降雨量（藍色）

上海屬亞熱帶季風氣候，四季分明，日照充分，雨量充沛。氣候溫和濕潤，春（4月2號~6月15號，共75日）、秋（9月18號~11月19號，共63日）較短，冬（11月20號~4月1號，共133日）、夏（6月16號~9月17號，共94日）較長[16][17]。汛期有春雨、梅雨、秋雨三個雨期，所以6月到9月嘅汛期集中咗一年六成以上嘅雨量[16]。

2011年嘅上海全市均溫係17.2℃[16]，而分開來睇，市區年均溫15.8℃，郊區年均溫15.2~15.7℃[17]。上海成系統嘅規範氣溫記錄係從1873年開始嘅，到1990年時累年均溫爲15.5℃，而歷年嘅均溫都有升高趨勢[17]。上海最凍時係一月到二月中旬，一月均溫3.6℃，平均最低氣溫0.5℃[17]。雖然係噉，上海冬天氣溫好少降到冰點以下，就一月到二月中旬，各旬均溫3~5℃，朝頭早平均最低0~1℃，喺呢5旬入邊，一日最低氣溫低過-5℃嘅嚴寒日，平均有4日，但噉就佔全年嚴寒日嘅八成[17]，所以上海冬天好少落雪，年均降雪日6.2日[18]，年均積雪日2.8日[18]，即使有積雪都唔深，通常最大雪深細過10釐米[18]，至於大雪就更加少見。不過呢陣時嘅天氣比較多雲，尤其2月幾嘅時候[19]。

而7、8月份係上海最熱嘅時候，喺正常年份呢時當值伏旱。七月均溫27.8℃，平均最高氣溫31.8℃[17]。雖然係噉，因爲上海喺海邊有海洋調節，相比同緯度嘅內陸地區、夏溫低啲而冬溫高啲。所以全年嘅高溫日唔多，一日最高氣溫超過35℃嘅暑熱日喺7、8月度平均有7.6日，而噉就佔全年高溫日嘅九成（全年高溫日約8.5日）[17]。不過天氣比較焗，7、8月時平均最低氣溫都去到24.7~24.8℃[17]，而相對濕度去到82~83%[20]，所以個天好翳ai3焗，好似焗桑拿噉。而喺夏、初秋時，會容易有從太平洋來嘅熱帶氣旋（颱風）吹襲。

喺極端氣溫方面，徐家匯度（1872年開始統計）錄得嘅極端最高氣溫係40.8℃（2013年8月7號）[21]、極端最低氣溫係-12.1℃（1893年1月19號）；國際交換站度（1951年開始統計）錄得嘅極端最高氣溫係39.9℃（2013年8月6號、8號）、極端最低氣溫係-10.1℃（1977年1月31號）[22][23]


上海市（1981～2010年平均、極値1951～2013年）氣候平均數據
月份 1月 2月 3月 4月 5月 6月 7月 8月 9月 10月 11月 12月 全年
歷史最高温 °C（°F） 22.1
(71.8) 		27.0
(80.6) 		29.6
(85.3) 		34.3
(93.7) 		35.5
(95.9) 		37.5
(99.5) 		39.0
(102.2) 		39.9
(103.8) 		38.2
(100.8) 		34.0
(93.2) 		28.7
(83.7) 		23.4
(74.1) 		39.9
(103.8)
平均高温 °C（°F） 8.1
(46.6) 		10.1
(50.2) 		13.8
(56.8) 		19.5
(67.1) 		24.8
(76.6) 		27.8
(82) 		32.2
(90) 		31.5
(88.7) 		27.9
(82.2) 		22.9
(73.2) 		17.3
(63.1) 		11.1
(52) 		20.6
(69.1)
每日平均氣温 °C（°F） 4.8
(40.6) 		6.6
(43.9) 		10.0
(50) 		15.3
(59.5) 		20.7
(69.3) 		24.4
(75.9) 		28.6
(83.5) 		28.3
(82.9) 		24.9
(76.8) 		19.7
(67.5) 		13.7
(56.7) 		7.6
(45.7) 		17.1
(62.8)
平均低温 °C（°F） 2.1
(35.8) 		3.7
(38.7) 		6.9
(44.4) 		11.9
(53.4) 		17.3
(63.1) 		21.7
(71.1) 		25.8
(78.4) 		25.8
(78.4) 		22.4
(72.3) 		16.8
(62.2) 		10.6
(51.1) 		4.7
(40.5) 		14.1
(57.4)
歷史最低温 °C（°F） −10.1
(13.8) 		−7.9
(17.8) 		−5.4
(22.3) 		−0.5
(31.1) 		6.9
(44.4) 		12.3
(54.1) 		16.3
(61.3) 		18.8
(65.8) 		10.8
(51.4) 		1.7
(35.1) 		−4.2
(24.4) 		−8.5
(16.7) 		−10.1
(13.8)
平均降水量 mm（英寸） 74.4
(2.929) 		59.1
(2.327) 		93.8
(3.693) 		74.2
(2.921) 		84.5
(3.327) 		181.8
(7.157) 		145.7
(5.736) 		213.7
(8.413) 		87.1
(3.429) 		55.6
(2.189) 		52.3
(2.059) 		43.9
(1.728) 		1,166.1
(45.909)
平均降水日數（≥ 0.1 mm） 9.9 9.2 12.4 11.2 10.4 12.7 11.4 12.3 9.1 6.9 7.6 7.7 120.8
平均相對濕度（%） 74 73 73 72 72 79 77 78 75 72 72 71 74
每月平均日照時數 114.3 119.9 128.5 148.5 169.8 130.9 190.8 185.7 167.5 161.4 131.1 127.4 1,775.8
出處：中國氣象局 國家氣象信息中心

政區

編輯
 
上海黃浦區（浦西）

中共管治初期，上海一共劃分咗20個市區同10個郊區。後來經過多次嘅行政區劃調整同撤縣建區。1992年建立嘅浦東新區，之前大部係川沙縣。原先嘅南市區同原黃浦區喺2000年合併成為新嘅黃浦區。各郊縣亦都從1980年代末起先後改係市轄區，具體嘅係：寶山區（1988年）、閔行區（1992年，之前大部係上海縣）、嘉定區（1992年）、金山區（1997年）、松江區（1998年）、青浦區（1999年）、奉賢區（2001年）、南匯區（2001年）、崇明縣（2016年）[24]。至2005年末，上海共有18個區、1個縣，共118個鎮，3個鄉，100個街道辦事處，3293個居民委員會同1991個村民委員會。至2016年尾，上海已經冇郊縣。

人口

編輯

全市常住人口達到1750萬。2005年，全市人口密度係每平方公里2750人（2004年尾）。上海係中國第一個出現人口自然變動負增長嘅省級行政區，人口自然增長率自1993年開始已經連續保持負增長。2005年，全市戶籍人口出生率係6.08‰，死亡率係7.54‰，自然增長率係-1.46‰。

  •  
    上海市1991年起戶籍人口數
  •  
    上海市1990年起人口自然變動圖表，其中：橙色係出生率，紫色係死亡率，紅色係自然增長率

人口來源

編輯

喺1949年以前，上海俾人叫做「十里洋場」。有好多外國租界。住咗好多外國人。好多來自白俄羅斯嘅猶太人為咗避開蘇聯紅軍，亦都着咗草到上海。英國人亦都帶來咗印度人到上海。呢啲外國人喺1949年以後，都已經離開咗上海。

1930年代嘅從中國各地來嘅移民係族群聚居。蘇北人大多居住喺楊浦區嘅定海路、虹口區嘅四川路以東、重有閘北區。廣東人聚集喺虹口區四川路一帶。[25]

喺毛澤東發起嘅知識青年上山下鄉嘅運動之中，由50年代中期到70年代尾，前後經歷咗25年，好多上海嘅青年被發放到大陸各地，亦都改變咗其它地區嘅人口組合。文革結束以後，上海嘅知青又陸續調回上海。

90年代後期，上海再次成為咗移民城市嘅目嘅地。大陸各地有好多人搬遷到上海定居。好多臺灣人，香港人喺滬常住嘅數目衆多。由於好多外國公司喺上海常年設有辦事處，所以好多外國人亦都常年定居喺上海。

大事

編輯

上海作係中國嘅重要嘅經濟政治中心，上海人民亦都積極參加過好多影響到中國命運嘅政治運動。響1843年之後，上海被迫開埠後，曾經係西方列強瓜分中國嘅據點。上海有好多外國租界，佢哋有自己嘅法律。

1919年五四運動中，為咗抗議巴黎和會中，外國列強肆意踐踏中國主權將德國喺山東嘅權益轉讓畀日本，即山東問題。同年6月6日，上海各界聯合會成立，反對開課、開市，聯合其它地區，告知上海嘅罷工主張。通過上海嘅三罷運動。

1918年至1925年間，中國國父孫中山同夫人宋慶齡曾經喺上海生活同從事各種政治活動。

1925年，五卅慘案亦都係喺上海發生。係當時嘅工人遊行抗議日本棉紗廠非法開除同毆打工人所引發嘅流血鎮壓事件。

1932年，一二八事變。係日本喺1931年九一八事變後，為咗將國際社會嘅視線從東北轉移，而喺上海挑起嘅中日兩國軍事衝突，時間長達一個多月。

上海係中國共產黨嘅誕生地。十大元帥陳毅亦做過上海市長。

上海亦係文化大革命時期，四人幫張春橋同王洪文活動嘅地方。喺上海亦發生咗好多重要事件。

喺1989年八九民運，上海各界人民同學生積極參加反腐敗，爭取民主自由嘅運動。上海出版嘅世界經濟導報因為發表激進文章，而被當時嘅上海市委書記江澤民下令關閉。

2006年，上海市勞動同社會保障局局長祝均一違法挪用32億勞動保障基金，借畀民營企業家張榮坤旗下嘅福禧投資公司用喺收購滬杭高速公路。因此北京中央政府100幾名調查人員前往上海，調查非法挪用社會保障基金嘅大案。原先嘅中共中央政治局委員，上海市委書記，陳良宇因此被撤職查辦。

方言

編輯

上海話係上海地區獨有嘅方言，屬吳語太湖片蘇滬嘉小片，南方方言嘅一種。亦都有人稱上海話係滬語。語音受早期移民中佔優勢嘅蘇州同寧波兩地影響巨大。同杭州話，蘇州話發音類似。

1930年代，係上海話嘅黃金時期。同香港類似，上海嘅作家們意譯或者音譯好多英文新單詞，用到書面文本中，通過當時上海極之發達嘅各種平面媒體進行傳播，然後俾普通話吸收。由1980年代後期開始，上海各個學校統一用普通話授課。好多學校對講方言嘅行為扣品行分處理。而且政府取消咗好多廣播電臺同電視節目中嘅上海話內容。上海話嘅造詞能力亦都開始嚴重衰退。而家上海仍然係一個吳語城市，普通話亦都很通用。隨住中國各地移民嘅日益增加，識講上海話嘅人開始減少。而家，已經很難招聘到發音合格嘅年輕滬劇演員。2005年以來，上海輿論界掀起一股「保衛上海話」嘅浪潮。[25]

海派文化

編輯

上海嘅文化被人叫做「海派文化」。它係喺中國江南傳統文化（吳文化）嘅基礎上，同開埠後傳入嘅對上海影響深遠嘅歐美文化等融合而逐步形成，既古老又現代，既傳統又時尚，區別喺中國文化，具有開放而又自成一體嘅獨特風格。毫無疑問，今天嘅上海係世界最時尚嘅都市之一。

改革開放以來上海舉辦過多次大型文化活動，而且建造咗多所全國一流嘅文化設施，包括上海大劇院、上海博物館、上海圖書館、上海影城等。歐洲風格嘅上海音樂廳因市政建設需要被移位元，但喺內部改建之後已經重新對公衆開放，以舉行交響樂音樂會係主。每年上海重會舉辦國際藝術節、國際電影節等文化活動。

人文

編輯

上海城隍廟坐落喺上海市最係繁華嘅城隍廟旅遊區，係上海地區重要嘅道教宮觀，始建喺明代永樂年間（1403-1424），至今已有近六百年嘅歷史。喺文化大革命時期，遭受重大嘅打擊，神像被毀，廟宇被挪為他用。現已修復。

1949年以前，上海係一個紙醉金迷嘅地方。當時上海著名嘅「百樂門」舞廳享有盛名，從英文「Paramount」得來。「大世界」亦係好出名嘅娛樂中心。好多電影院亦都係非常豪華。例如，大光明電影院始建於1928年，由德國傑出嘅建築師烏達克（L.E.HUDEC）設計，屬市級優秀保護建築。大光明電影院嘅歷史。國泰電影院原名國泰大戲院（Cathay Theatre）。建於1930年，由鴻達洋行設計，鋼筋混凝土結構，外牆採用紫醬紅嘅泰山磚，白色嵌縫，屬典型嘅裝飾藝術派風格，1932年1月1日，國泰大戲院正式對外營業。當天登喺《申報》上嘅廣告用語係：「富麗宏壯執上海電影院之牛耳，精致舒適集現代科學化之大成」。1949年以後，更名做國泰電影院，「文化大革命」期間曾經一度改名人民電影院。1994年被上海市人民政府命名係優秀歷史建築。

1918年至1925年間，中國國父孫中山亦都曾經喺繁華嘅淮海路以南，思南路東側嘅香山路上嘅一幢歐洲鄉村式樣嘅小洋房居住過。而家就被改做孫中山故居。

上海有許多歐美式樣嘅舊建築，其中喺外灘嘅一組歐洲風格嘅外國銀行，商家同飯店遺留落嚟嘅建築群一直以來就係上海嘅標誌，例如：花旗銀行，和平飯店等。但事實上喺市內重有好多一啲二、三十年代遺留落嚟嘅，風格迥異嘅花園別墅，例如丁香花園、沙遜別墅、馬勒住宅以及而家被用作上海市少年宮嘅嘉道理花園等。喺上海嘅市中心，重有當時嘅面積龐大嘅上海跑馬廳。

1927年，著名作家魯迅辭去中山大學職務，同年10月赴上海。喺上海成立咗中國左翼作家聯盟，翻譯、介紹外國嘅進步文學作品，寫咗好多雜文。1936年10月19日，喺上海逝世。佢嘅遺體安葬喺虹橋萬國公墓。1956年，魯迅墓遷移重建喺上海虹口公園。

電影，電視同其他

編輯

1949年前，中國嘅電影業基本上集中喺上海，而喺上海有過製片活動嘅電影企業，總數約200家。上海嘅電影製片業，若從資金來源劃分，可以分係外商、民營同國民黨官辦等3種類型，而雄踞上海影壇嘅當推民營電影企業，佔咗總數嘅90%以上。但係，喺眾多嘅民營企業中，大多數公司只係曇花一現，有啲公司甚至一片未拍，即已銷聲匿跡，而稍具規模、能均衡製片產産嘅，大概有十幾間。荷李活八大製片公司都喺上海設立發行機構，幾乎壟斷咗上海嘅整個電影發行市場。只有二三流影院先至播放國產片。

喺中國電影發展史上，起過較大影響同作用嘅，二三十年代有影壇五虎將之稱嘅明星影片股份有限公司（簡稱明星）、天一影片公司（簡稱天一）、聯華影業公司（簡稱聯華）、藝華影業公司（簡稱藝華）、新華影業公司（簡稱新華）等5家；戰後時期主要係昆侖影業公司（簡稱昆侖）同文華影業公司（簡稱文華）兩家。30年代嘅電通影片公司同40年代嘅昆侖影業公司，實質上係喺中國共產黨以民辦面目出現嘅電影公司。

上海因此出現咗好多知名嘅歌星同影星，周璿，阮玲玉，趙丹等。毛澤東嘅第三任妻子江青亦都曾經喺上海做過演員，名係藍蘋。

1949年以後，成立咗國營嘅上海電影製片廠，並對私營電影製片公司嘅改造，1953年2月，上海實行咗國營同民營電影嘅並軌，從此民營嘅電影公司消失。

80年代初，上海只有一個電視台 - 上海電視臺，後來有咗上海東方衛視等等。頻道亦都由一個，發展到好多唔同內容嘅頻道。1970年代，只有黑白電視信號。1980年代，轉做彩色電視信號。原來，只有喺晚上先至播出啲電視節目，發展到而家嘅全日24小時播放。

廣播事業亦都從原來一個單一嘅上海人民廣播電臺，演變成好多調頻，調幅各種唔同內容嘅電臺。

電視台

編輯

戲曲

編輯

海派特色嘅滑稽戲產生同抗日戰爭中期，由上海嘅曲藝「獨角戲」接受咗中外喜劇、鬧劇同江南各地方戲曲嘅影響而逐步形成嘅新興戲曲劇種。因為方言隔閡，只係流行喺上海、江蘇、浙江等嘅地區。一人演出嘅滑稽曲藝稱之為「獨角戲」。比較著名嘅滑稽演員有王無能，江笑笑，劉春山，嚴順開，周柏春，姚慕雙同王汝剛等。

滬劇係上海獨有嘅戲曲。

報章雜誌

編輯

上海喺1949年以前，就有好有名嘅報紙係申報。新民晚報創辦喺1929年，亦都係一份發行全國嘅有影響力嘅報紙。

小說

編輯

20世紀30年代著名作家張愛玲曾經寫過好多同上海有關嘅小說。《十八春》原名《半生緣》寫咗三十年代上海嘅一個悲慘嘅愛情故事。

重要文化節日

編輯

上海電視節係中國創辦最早嘅國際電視節，1986年創立至2006年，已經成功舉辦咗十二屆。

上海國際電影節，"金爵獎"創辦於1993年，第二年獲得國際電影製片人協會嘅認證，被歸為A類即非專門類競賽型電影節。2006年，上海國際電影節已舉辦咗7屆。

飲食

編輯

本地風味嘅上海菜又叫本幫菜。本幫名菜有好多。喺世界各地有華人嘅地方，都有以上海命名嘅餐館。

經濟

編輯

1949年以前，喺上海有好多外國銀行同公司。上海係當時中國嘅經濟貿易中心。上海不但只彙集住以中央銀行、中國銀行、交通銀行、中國農業銀行四大政府銀行為首嘅原國家資本同官僚資本金融機構以及外國在華金融機構。喺外灘附近聚集咗各國頗具實力嘅銀行：英國滙豐銀行、德國德華銀行、日本橫濱正金銀行、俄國華俄道勝銀行、法國東方彙理、美國花旗銀行、比利時華比銀行等組成咗「東方華爾街」。重擁有數量衆多嘅私人資本經營嘅銀行、錢莊同信託公司（以下簡稱私營行莊公司）。經歷咗1927至1937年「黃金時期」嘅發展，到抗日戰爭爆發前，上海嘅私營行莊公司已經達到咗105間；而經過抗日戰爭、解放戰爭時期，到1949年5月上海解放嗰陣，上海私營金融業嘅整體資金實力實際上已經大大削弱咗，但仍然重有119間私營銀行、80間錢莊同5間信託公司。到1952年底，上海私營金融機構嘅數量減至60幾間。1956年初，官方實行公私合營政策，最後全部合併係統一嘅公私合營銀行聯合總管理處。

喺1949年以後，有啲上海嘅資本家都已經着咗草到香港，臺灣，或者海外其它地方。亦都有一啲留喺上海，繼續經營。最後喺1956年初，都被公私合營。[26]

 
從外灘眺望浦東陸家嘴

上海係中國大陸經濟最發達嘅城市之一，2004年人均GDP6661美元，連續十年年均經濟成長超過8%。第三産業高度發達，其中最主要嘅産業包括咗金融業、房地産業、保險業以及運輸業等。喺浦東新區嘅陸家嘴係上海嘅新興金融中心，中國人民銀行上海總部2005年8月喺上海揭牌，主要職能係管理公開市場操作。全球500強企業中已有部分喺上海設立咗中國區總部、分公司同辦事處。

上海工業發達，國民黨政府統治時期同計劃經濟時期，上海嘅工業發展水平就已全國領先。改革開放初期，由於中央政策原因，中國東南地區飛速發展，一度使上海嘅工業面臨邊緣化嘅危機，但自90年來中期以來，隨住浦東新區嘅開發，以及財政轉移支付比重減少等多方面嘅原因，上海嘅工業又重新煥發咗新嘅生機。上海工業總產值佔全國嘅十分之一，主要以輕紡、重工業、冶金、石油化工、機械、電子工業為主，其它重有汽車、航空、航太等工業。張江高科彙集咗大量嘅高端製造業。農業佔總體經濟嘅比例較細，大約喺1.7%左右。

由於土地、勞動力成本日益升高，加上市政府經濟政策導向等原因，目前紡織業、重污染行業等低端製造業、勞動密集型産業開始逐漸搬到郊區或閂門，上海市整體産業結構進步明顯，已經形成逐漸鞏固自己嘅核心競爭力。

上海港係西太平洋地區最繁忙嘅港口之一，中國內地最大嘅港口。 2004年上海港貨物吞吐量達到3億7900萬噸，超過荷蘭鹿特丹成為世界第二大貨運港。 2005年上海港集裝箱吞吐量達到1808萬TEU（標準箱），保持繼新加坡、香港之後嘅世界第三大集裝箱港口地位，預計2006年全年吞吐量將超過2000萬TEU。港口吞吐量大約占全國總數嘅三分之一，目前正喺建設嘅大型深水海港洋山保稅港設計年集裝箱吞吐量係2200萬箱（2005年12月10日一期工程開港，2020年全部建成）。

上海經濟亦都受到其周圍省份嘅非經濟方面嘅競爭。上游省份GDP增長帶來嘅環境污染，尤其係來自黃浦江上游嘅飲用水污染，已經成為困擾上海發展同居民生活嘅一大難題。

 
上海展覽館

交通

編輯
内文：上海交通

歷史

編輯

上海嘅交通工具曾經五花八門、多種多樣，細到自行車、黃包車，大到馬車、小汽車。

1873年，法國人米拉睇到黃包車便利，向法租界公董局呈報計劃。1874年1月，黃包車從日本輸入上海。故此當時滬人又稱之為東洋車。凡喺上海租界上通行嘅黃包車要向工部局攞牌。抗戰前夕，黃包車已增至千幾架。後來三輪車興起，至1940年代後期逐漸被淘汰。1908年3月5號，英籍猶太地產商哈同經營嘅上海第一條有軌電車從南京路口至延安東路外灘通車，相繼發展咗12條有軌電車線路。到1963年8月15號凌晨零時17分，最後一架有軌電車尾班車從靜安寺開出，當當有聲嘅有軌電車從此退出上海。3點52分，第一架20路線無軌電車離開靜安寺起點站向外灘方向駛去。機動三輪車因為平，喺1970年代依然可以喺上海街頭見到。之後逐漸被淘汰。自行車曾經係上海最通用嘅交通工具。1980年代以後，私人逐漸開始買私人小轎車。

現況

編輯
 
上海地鐵

上海嘅市區交通較為發達，公共交通設施有：公交汽車巴士（包括大巴士同小巴士），公交電車巴士（目前只有無軌電車），黃浦江上輪渡，軌道交通（上海人叫地下段為地鐵，高架段就叫輕軌），基本上每一個住宅區周圍會有至少一個以上嘅公交線路停靠。以上呢啲公共交通設施都可以用上海公共交通卡，從而方便付費。

論公交線路數量同複雜性，上海擁有全世界最大嘅公共交通網絡同全世界最高嘅日公共交通客運量。上海全市公交有1100多條公交線路，密如蛛網，並且正以每年新辟、延伸、調整50多條公交線路嘅記錄持續擴充。按運營時間分，有日間公交車、「2」字頭嘅早晚高峰車同「3」字頭嘅夜宵車；按地域範圍分，有浦西、浦東、過江（含大橋、隧道線）同郊區線之分；按票務方式分，有單一票價1元（全程13公里以下嘅線路）或1.5元（全程超13公里嘅線路）嘅無人售票車，重有單一票價2元嘅空調車同多級票價嘅專線車（有「5」字頭嘅大巴專線、「6」字頭嘅浦東專線車、「8」字頭嘅中巴專線同「9」字頭嘅雙層車或空調大巴，重有10條空調旅遊專線以及觀光巴士）。

目前，大部分上海市民選擇公交巴士出行，但隨住軌道交通嘅逐步完善，市民嘅選擇方式將會趨向喺軌道交通出行。上海軌道交通線路目前建成五條線路：一號線（R1）、二號線（R2）、三號線（M3）、四號線（M4）、五號線（莘閔線），另外重有龍陽路站至浦東國際機場嘅上海磁浮示範運營線，總計近150公里里程。

就費用來講，輪渡仍然係最平嘅公交出行方式，票價普通乘客0.5元一位。公交車普通車1元（而家已經好難見），空調車兩元，大多無人售票。軌道交通6公里以内3元，6-16公里4元，16公里以上每10公里加收1元，冇設上限。由於國際油價普遍上揚，上海市區頂燈計程車亦全面向上調整，現時起步價係13元3公里，超過3公里以2.4元/公里加價；晚間23:00至第二日5:00期間，起步價係15元3公里，同日頭相比價格上漲30%。至於郊區，起步價係11元3公里，加價相同，亦係超過3公里以2.4元/公里加價。同時，市區同郊區出租汽車每搭一次就收1元燃油附加費。公交車同軌道交通喺晚間大部分都唔開，喺晚間計程車仍然係市民出行嘅選擇。

市內交通包括：

 
上海磁懸浮
  • 地鐵（已建成1、2、3、4、5、6、8、9、10、11、12號線）
  • 磁懸浮（由地鐵2號線龍陽路站至浦東國際機場）2002年12月31日首次運行，30公里長。
  • 公交車（巴士）
  • 計程車
  • 輪渡

睇：上海軌道交通

鐵路

編輯

上海係中國史上第一個建造營運鐵路嘅城市，而第一條營運鐵路係吳淞鐵路，橫跨今日嘅寶山區、楊浦區、虹口區同閘北區，全長14.5公里，連接吳淞碼頭同江灣鎮，喺1874年12月開工，1876年12月全線建成。後因清政府嘅干涉，喺1877年10月20號下令拆除。但20年之後嘅1897年2月27號，喺原吳淞鐵路嘅地方重新開始修築鐵路，改叫淞滬鐵路，建成初期全長6.8公里。淞滬鐵路係中國最早建成嘅一條鐵路，而家都重行緊，亦係中國政府官款修建嘅江南第一條鐵路。喺日本侵華戰爭期間淞滬鐵路係由日軍使用，佢哋建造當時遠東最大機場——江灣機場提供運輸，日本投降後，由國民政府接管，並投入客貨運，1960年初，上海公交線路體系發展使淞滬鐵路逐漸退出客運，只進行貨運。今日嘅淞滬鐵路早已進行多次擴建，總里程達到23.04公里，已成為上海鐵路網北環貨運嘅主要通道。

喺淞滬鐵路嘅建設過程中，同時辟建滬寧鐵路，當時滬寧鐵路嘅上海站多次易址，但喺最後選咗喺今日目中路、虯江路之間，寶山路西側地區，上海人俗稱老北站。滬甯鐵路喺1908年4月1號建成通車，當時嘅上海站亦喺1909年7月竣工正式啓用。1916年，滬、杭、甬鐵路同滬寧鐵路接軌通車，同上海站合站，從而改名係鐵路滬甯、滬杭甬兩路總站，由於當時南市建有鐵路客站（喺家下黃浦區，近南浦大橋嘅南車站路、車站前路地區），改叫鐵路上海北站。日軍佔領後成為上海站（上海駅），民國政府接管後改叫鐵路上海站，但由於上海站客流量大、車站細，上海站一直都好逼。1981年，中華人民共和國國務院批准喺鐵路上海東站原址新建鐵路上海站，1984年9月20號正式開工，1987年12月28號完工啓用。新上海站就成為咗今日嘅上海火車站，喺建成初期時係全國規模最大現代化車站。

當時上海北火車站相對應嘅重有上海南火車站，係當時滬杭鐵路起點。1907年開工，1909年正式通車。喺滬甯滬杭兩條鐵路未聯絡接通前，上海南火車站係上海赴杭州嘅唯一鐵路線，同時用作客貨運。作係當時上海重要交通樞紐，上海南火車站成為長江三角洲地區貨運量最大嘅火車站。1937年，淞滬抗戰爆發後，上海南火車站俾日軍猛烈轟炸，最終報慶。如今喺上海南火車站舊址，啲人只可以通過周圍嘅路名來感受當時火車站周邊嘅繁華景象。

如今上海市最主要嘅兩個火車站：上海火車站（舊稱北站、俗稱新客站）同上海火車南站由上海軌道交通一號線同三號線互相銜接，前者係1987年啓用嘅新上海火車北站，而後者喺2006年7月1日正式重新啓用。新上海火車南站喺2003年12月經中華人民共和國發改委批准正式開工，係一座全新嘅現代化火車站，佔地面積約23公頃，佢嘅原址係上海新龍華火車站。規劃中嘅滬杭磁懸浮鐵路亦會經過上海南站並設站。新上海南站已經響2006年建成，6月25號試行，7月1號起正式運行。南站嘅建設會為上海西南地區嘅交通帶來更多嘅便利。南站主站屋採用世界上獨一無二嘅圓盤形結構，並大量開發咗地下空間，從2007年起會有大量嘅商店入駐南站嘅底下商鋪，並成為上海西南地區除徐家彙之外嘅第二個大型商業中心。

上海鐵路車站 編輯
用緊嘅車站：
特等站：上海火車站-上海虹橋站-北郊站-南翔站
一等站：上海火車西站-上海火車南站-何家灣站
二等站：楊浦站-桃浦站-閔行站
三等站：安亭站-張廟站-新橋站-松江站-金山衛東站-金山衛西站
四等站：江橋鎮站-黃渡站-封浜站-楊行站-莘莊站-春申站-石湖蕩站-新浜站-楓涇站-七寶站-閔行西站-葉榭站-山陽站-江灣站-殷行站
五等站:匡巷站-光新路站-梅隴站-協興站-星華站-久星站-大方站
已廢棄車站：
長寧站-徐家彙站-上海北火車站（老北站）-上海南火車站（老南站）-新龍華站

航空

編輯

1911年，法國飛行家環龍揸蘇姆式雙翼飛機來上海作飛行表演，但係不幸機裂而冇命。呢次係上海人民第一次目睹到飛機嘅風采。1912年，留學英國學習飛行嘅厲汝燕學成回國，揸愛特立克式單翼機喺上海上空作試飛表演，呢次係中國人第一次喺上海領空揸飛機。

上海第一個民用機場，係虹橋機場，喺上海市西郊，1921年3月10日開始破土動工，主要工程喺係年6月底基本完成。虹橋機場工程完工之後，但因為航空署「扼喺經費不足」，閒置土地，連京滬航線亦都未能如期通航。國民政府喺南京成立後，隨住滬蓉航空線管理處嘅籌建，以及上海至南京航線嘅開航，虹橋機場先至正式被使用，1934年虹橋機場進行咗一次擴建，征地890畝。1937年8月13號，淞滬抗戰爆發，起因係虹橋機場事件，日本軍隊佔領之後，進行咗大規模改建同擴建使，令虹橋機場嘅佔地面積達2513畝，但大部分係強佔土地。

上海第二個民用機場，係喺龍華地區嘅龍華機場，龍華機場重早過虹橋機場建造，但係喺建成之後，一直用作軍用。龍華機場亦係上海市第一個由陸軍管轄嘅軍用機場。1929年，國民政府航空署決定將龍華機場改做民用機場，由於當時虹橋機場閒置土地，所以到1936年淞滬抗戰前龍華機場經不斷修建，已成為當時中國最好嘅一個民用機場。日軍佔領之後，亦對龍華機場進行咗一系列嘅擴建，主要係滿足日軍嘅戰鬥機停機需要。

1945年日本二戰投降後，虹橋同龍華兩大民用機場正式劃歸國民黨空軍管轄。之後龍華機場同虹橋機場相繼重新劃歸民用，但由於虹橋機場因為政府內部原因未能得到好嘅建設，相反龍華機場就擴建咗，已成為中國民用航空運輸嘅樞紐機場，而且喺當時遠東地區亦都係屈指可數嘅一個國際機場。

1949年中華人民共和國成立，虹橋機場成為空軍機場，龍華機場就繼續用作民用機場。隨住中華人民共和國經濟日益繁榮，相應民用航空事業得到非常迅速嘅發展，到1960年代中期，龍華機場由於緊靠市區，受淨空條件等限制，已經唔啱大型飛機起降，1963年中華人民共和國國務院總理周恩來批准，虹橋機場擴建成國際機場，準備將民航用途轉至虹橋機場，但起初係軍民合用機場。1966年8月，原本喺龍華機場起降嘅國內航班飛機轉到虹橋國際機場起降，同時規定龍華機場係「訓練基地同航班飛機嘅備降場」。1972年，駐虹橋機場空軍撤離。之後虹橋機場進行咗不斷嘅改革同修建擴建，1988年6月25號正式對外宣佈成為獨立嘅經濟實體並且喺上海浦東國際機場未啓用前成為中國前三大航空民用機場。而龍華機場最終喺1991年降格為畀小型固定翼同直升機用嘅通用航空嘅機場（2B通用機場）。

浦東開發開放後，上海以浦東係發展龍頭，發展速度驕人，虹橋國際機場已不堪重負。上海市政府決定建設浦東國際機場。

上海浦東國際機場喺上海市浦東嘅江鎮、施灣、祝橋濱海地帶，面積40平方公里，距離市中心約30公里。浦東機場一期工程喺1997年10月全面開工，1999年9月建成通航，成為上海市出現嘅第三個民用機場。但由於龍華機場已經唔再作民航運輸，故此上海浦東國際機場實際上係目前上海市第二個民用機場，主要負責國際航班。浦東機場二期航站區已經開工，二期航站樓綜合體工程設計目標年係2015年，同一期航站樓綜合體一起共同滿足6000萬人次嘅年旅客吞吐量；航站區最終總體規劃方案滿足8000萬人次年旅客吞吐量。滿足國家民航總局同上海市對對浦東機場建成亞太地區航空樞紐港嘅戰略要求，滿足上海經濟發展同2010年世博會嘅需求。

上海機場編輯

民用機場： 上海虹橋國際機場 | 上海浦東國際機場

2B通用機場： 上海龍華機場

軍用機場： 上海大場機場 | 上海崇明機場

已廢棄嘅機場： 上海江灣機場

公路

編輯

上海目前建設有內環線高架、中環線、外環線

水運

編輯

上海係中國最大嘅港口城市。從上海港出發嘅客貨輪，出海可抵達世界上400多個港口。由於搭船旅行速度太慢，目前除公平路碼頭同埋四日一班往大連嘅車客渡航線外，其餘沿海沿江嘅長途航線都已經停航。

原本喺外灘嘅十六鋪碼頭亦得番往南通、定海同普陀山等臨近地區嘅班船，但係喺2005年12月2號凌晨1點，上海十六鋪碼頭嘅兩幢大樓被成功爆破，有140多幾年歷史嘅上海十六鋪客運碼頭告別歷史舞臺，未來十六鋪碼頭只會當水上旅遊中心使用。

去崇明島之前，要分清上船地點，而去長興、橫沙島都係喺吳淞碼頭上船。另外，上海重有去韓國仁川、釜山，日本大阪、神戶嘅國際遊船，喺外虹橋碼頭上船。

上海港2005年嘅貨物總吞吐量達到4.43億噸，成為世界第一大貨運港口。

上海國際航運中心洋山深水港2005年12月10號正式開港，標誌住上海正向國際航運中心嘅目標大踏步地前進。

市域高速公路

編輯

上海市域高速公路以「A」做標識，後加數位序列進行命名。其中環線高速公路以十嘅整數倍命名，其它高速公路以十嘅整數號外嘅序列號命名。市域高速公路包括：

  • A20公路：外環線
  • A30公路：郊環線
  • A1公路：A20公路-浦東國際機場
  • A11公路：真北路-江蘇省界（滬甯高速公路上海段）
  • A12公路：真北路-江蘇省界（滬嘉瀏高速公路）
  • A13公路：A20公路-崇明縣-江蘇省界
  • A14公路：A30公路-長興島-崇明縣-江蘇省界
  • A2公路：A20公路-洋山保稅港
  • A3公路：A20公路-A30公路
  • A4公路：A20公路-浙江省界
  • A5公路：A12公路-A4公路（嘉金高速公路）
  • A6公路：A30公路-戚家墩碼頭（新衛高速公路）
  • A7公路：A30公路-浙江省界（新楓高速公路）
  • A8公路：A20公路-浙江省界（滬杭高速公路上海段）
  • A9公路：A20公路-江蘇省界（滬青平高速公路）

市內高架道路

編輯
  • 延安高架路（虹橋機場至外灘嘅東西向高架道路）
  • 內環高架路（楊浦大橋至南浦大橋環線高架道路，即內環線浦西段）
  • 南北高架路（盧浦大橋至外環線蘊川路立交嘅南北向嘅高架道路）
  • 逸仙高架路（內環線大柏樹立交至外環線寶山立交嘅高架道路）
  • 滬閔高架路（內環線漕溪北路立交至外環線莘莊立交嘅高架道路）
  • 中環高架路

旅遊

編輯
 
外灘

每年秋季（九月中旬至十月中旬）上海都會舉辦為期一個月嘅上海國際旅遊節。誠邀世界各地嘅旅遊者嚟上海參觀遊玩，2004年上海國際旅遊節喺年9月18號-10月6號舉行。

2004年上海舉辦一級方程式賽車大獎賽中國站嘅比賽，吸引咗數以十萬計嘅遊客嚟睇比賽。賽道喺嘉定，擁有各種室內外賽車運動，有著亞洲第一大嘅卡丁車場地。2005年至2008年，上海將連續舉辦三屆網球大師杯賽。「體育旅遊」經已已成為咗申城熱點之一。

商業區

編輯
 
南京路步行街

著名景觀

編輯
 
上海市容


宗教

編輯
 
徐家彙教堂 St. Ignatius Cathedral

教育

編輯

參閱：上海教育

高等院校

編輯

上海擁有100多所科研機構，10萬科研人員。

 
上海

主要技術培訓機構同院校

編輯

上海擁有100多所專業技術培訓機構，其中包括：

運動

編輯

著名人物

編輯

友好城市

編輯

至2005年末，上海已經同50個國家嘅66個地區結為友好城市關係或友好交流關係，下列其中部分地區。

   

相

編輯
  •  
    黃浦江畔浦東新貌
  •  
    磁懸浮列車從浦東國際機場出發
  •  
    豫園
  •  
    高樓大廈平地拔起
  •  
    上海銀行
  •  
  •  

中華人民共和國領導人

編輯
市委書記 任職時間 市長 任職時間
饒漱石 1949年5月—1950年1月 陳毅 1949年5月28日—1958年11月
陳毅 1950年1月—1954年10月 柯慶施 1958年11月—1965年4月（去世）
柯慶施 1954年10月—1965年4月（去世）
陳丕顯 1965年11月—1966年5月 曹荻秋 1965年11月—1967年2月
張春橋 1967年2月—1976年10月 張春橋 1967年2月—1976年10月
蘇振華 1976年10月—1979年1月 蘇振華 1976年10月—1979年1月
彭沖 1979年1月—1980年3月 彭沖 1979年1月—1980年3月
陳國棟 1980年3月—1985年6月 汪道涵 1981年4月—1985年7月
芮杏文 1985年6月—1987年11月 江澤民 1985年7月—1988年4月
江澤民 1987年11月—1989年8月 朱鎔基 1988年4月—1991年4月
朱鎔基 1989年8月—1991年4月 黃菊 1991年4月—1995年2月
吳邦國 1991年4月—1994年4月 徐匡迪 1995年2月—2001年12月
黃菊 1994年4月—2002年10月 陳良宇 2001年12月—2003年2月
陳良宇 2002年10月—2006年9月 韓正 2003年2月至今
習近平 2007年3月—10月
俞正聲 2007年10月至今

上海市有史以嚟全部市長情況詳見上海歷任市長一覽

註

編輯

攷

編輯
  1. ↑ 1.0 1.1 〈上海市城市总体规划（2017-2035年）〉 (PDF)。上海市人民政府。原先內容歸檔 (PDF)喺2020-12-01。
  2. ↑ 〈行政区划〉。上海市人民政府。原先內容歸檔喺5 May 2024。
  3. ↑ 〈上海概覽：地勢〉。原著喺2013年11月2號歸檔。喺2014年4月28號搵到。
  4. ↑ 4.0 4.1 〈上海概覽：土地面積〉。原著喺2014年11月14號歸檔。喺2014年4月7號搵到。
  5. ↑ 5.0 5.1 5.2 5.3 〈2023年上海市国民经济和社会发展统计公报〉。《上海市统计局》。原先內容歸檔喺2024-05-30。
  6. ↑ 〈東方網上海頻道：申城車牌號「六選一」啟用新編排法 重新從「滬A」排起〉。原著喺2015年6月1號歸檔。喺2014年7月10號搵到。
  7. ↑ 中國大陸車牌唔會有I、O，見中華人民共和國公共安全行業標準《中華人民共和國機動車號牌》 互聯網檔案館嘅歸檔，歸檔日期2018年5月3號，.中《5.9.1 序號編碼規則》。
  8. ↑ 知乎嘅問題，關於上海車牌嘅解答。
  9. ↑ 2014 Global Cities Index and Emerging Cities Outlook 互聯網檔案館嘅歸檔，歸檔日期2014年9月25號，.（2014年4月發表）
  10. ↑ 10.0 10.1 〈「申」、「滬」的由來〉。上海市政府。原著喺2018-06-14歸檔。喺2009-08-27搵到。
  11. ↑ 〈近代上海〉。上海市政府。原著喺2007-01-10歸檔。喺2009-08-27搵到。
  12. ↑ 〈上海縣誌:上海開埠、租界設立〉。上海市政府。喺2009-08-27搵到。{{cite web}}: CS1 maint: url-status (link)
  13. ↑ 13.0 13.1 〈上海概覽：地理位置〉。原著喺2013年11月9號歸檔。喺2014年4月28號搵到。
  14. ↑ 14.0 14.1 〈上海通誌：島嶼〉。原著喺2014年4月18號歸檔。喺2014年4月28號搵到。
  15. ↑ 新華網上海頻道：上海吳淞口國際郵輪碼頭通過竣工驗收 將正式運營[失咗效嘅鏈]
  16. ↑ 16.0 16.1 16.2 〈上海概覽：氣候〉。原著喺2014年11月14號歸檔。喺2014年6月9號搵到。
  17. ↑ 17.0 17.1 17.2 17.3 17.4 17.5 17.6 17.7 〈上海通誌：氣溫〉。原著喺2014年5月18號歸檔。喺2014年6月9號搵到。
  18. ↑ 18.0 18.1 18.2 〈上海通誌：降水〉。原著喺2014年8月18號歸檔。喺2014年8月22號搵到。
  19. ↑ 〈上海通誌：雲、霧〉。原著喺2014年8月18號歸檔。喺2014年8月22號搵到。
  20. ↑ 〈上海通誌：蒸發、濕度〉。原著喺2014年8月18號歸檔。喺2014年8月22號搵到。
  21. ↑ 〈今最高氣溫40.8℃ 明日再「奔」40℃〉。上海市公共氣象服務中心。喺2013-08-07搵到。
  22. ↑ 〈中國氣象科學數據共享服務網〉。原著喺2015年3月2號歸檔。喺2014年6月9號搵到。
  23. ↑ 〈氣候資源數據庫〉。原著喺2020年9月15號歸檔。喺2014年6月9號搵到。
  24. ↑ 〈崇明设区，县级行政建制在沪成历史〉。
  25. ↑ 25.0 25.1 〈山坳中嘅上海話〉。原著喺2009-05-01歸檔。喺2006-12-22搵到。
  26. ↑ 生存與消亡：上海私營金融業嘅公私合營

睇埋

編輯

出面網頁

編輯
 
維基同享有多媒體嘅嘢：
上海（類）
 
維基遊埠有呢篇旅遊嘅資源：上海（簡體中文）
 
喺開放街圖（Open Street Map）嘅上海地圖。
由「https://zh-yue.wikipedia.org/w/index.php?title=上海&oldid=2165890」收