表演藝術

演藝，或者叫表演藝術，係藝術嘅表現形式，可以由話劇、音樂、舞蹈、歌劇、音樂劇、魔術、雜技、Cosplay等形式表現出嚟。通常用兩種方式演繹，一種係唔出聲，凈係用肢體動作表達要表演嘅故仔；另一種係加埋說話、唱歌、笑話或者詩詞喺表演裏頭。

表演藝術同視覺藝術唔同，視覺藝術係指本質上用作品來呈現藝術，而作品係將視覺目的當成創作重點，例如繪畫、攝影、版畫同電影等，有關三維立體空間物件嘅作品，例如雕塑同建築就叫造型藝術。而表演藝術係用表演嘅人（表演者）嚟呈現藝術。呢個係表演藝術嘅特點，表演嘅人有演員、舞蹈員、音樂家、歌手、魔術師等。表演藝術亦都要同其他相關領域嘅工作者合作，例如曲詞創作者、劇場技術、編劇等。

表演藝術入邊有一種稱為行為藝術嘅項目，佢強調行為藝術者同觀眾交流。

戲劇、音樂、舞蹈同其他表演喺世界上每個文化都存在。音樂同舞蹈可以追溯到史前時期，雜技技巧亦可以追溯到古埃及時期。

歷史

西方表演藝術

歐洲嘅表演藝術可以追溯到西元前六世紀嘅希臘古典時代，例如劇作家索福克勒斯等創作嘅希臘悲劇。喺希臘化時代，喜劇亦都開始廣為流傳。之後到咗歐洲黑暗時代，表演藝術局限喺宗教劇，後嚟文藝復興嗰陣強調人文主義思想，喺音樂、舞蹈、歌劇都有好多作品。十八世紀，隨住莫扎特嘅《費加洛嘅婚禮》等喜歌劇，大眾開始接觸歌劇。十九世紀，美國嘅非裔藝術家開始發展爵士樂同藍調。現代舞喺二十世紀初開始受到注意。

華夏表演藝術

華夏文化中最早有文字記載嘅表演藝術喺商朝，以甲骨記錄有薩滿人跳舞。

跳舞

紐約市唐人街有好多粵籍華僑，佢哋過年會喺度舞南獅。

跳舞係演藝一種，定義上係要跳舞嘅人用自己嘅身體（尤其係四肢）作出一連串有節奏嘅郁動。喺絕大多數嘅現存舞種當中，跳舞用嘅節奏傳統上會係由音樂產生嘅^[1]。

啲人跳舞嘅目的可以有好多：跳舞嘅人好多時係表演者，當跳舞係種表演藝術，想用自己嘅身體郁動同音樂節奏之間嘅配合嚟娛樂觀眾同埋令觀眾覺得串舞有美感^[2]；不過另一方面，跳舞有陣時又會帶有藝術以外嘅文化意義，例如好多類型嘅草裙舞（Hula）喺古代嗰時係夏威夷等地嘅人嘅神聖舞－專門喺宗教場合嗰度跳、用嚟做拜神嘅作用嘅^[3]。

除咗文化同藝術上嘅作用之外，跳舞對健康同體能都有一定嘅幫助：跳舞好多時都好要求體力，例如芭蕾舞當中嘅男舞蹈員就成日都需要做出「捧起自己舞伴」等講求肌肉力量嘅動作；事實係，醫學上嘅研究經已表明，好多類型嘅舞蹈都具有幫跳嘅人提升身體嘅平衡力同肌肉力量等嘅正面效果，所以到咗廿一世紀初，有唔少人都鍾意以跳舞嚟做嗜好^[4]^[5]。

睇埋

攷

↑ Sondra Horton Fraleigh (1987). Dance and the Lived Body: A Descriptive Aesthetics. University of Pittsburgh Pre. p. 49. "Dance is human movement created and expressed for an aesthetic purpose."
↑ Joann Kealinohomoku (1970). Copeland, Roger; Cohen, Marshall (eds.). An Anthropologist Looks at Ballet as a Form of Ethnic Dance (PDF). What is Dance? Readings in Theory and Criticism (1983 ed.). New York: Oxford University Press.
↑ Nathaniel Emerson, The Myth of Pele and Hi'iaka. This book includes the original Hawaiian of the Pele and Hi'iaka myth and as such provides an invaluable resource for language students and others.
↑ Schiffer, T., Kleinert, J., Sperlich, B., Schulte, S., & Strüder, H. K. (2009). Effects of aerobic dance and fitness programme on physiological and psychological performance in men and women. International Journal of Fitness, 5(2).
↑ Angioi, M., Metsios, G. S., Koutedakis, Y., & Wyon, M. A. (2009). Fitness in contemporary dance: a systematic review. Int J Sports Med.

[1] Sondra Horton Fraleigh (1987). Dance and the Lived Body: A Descriptive Aesthetics. University of Pittsburgh Pre. p. 49. "Dance is human movement created and expressed for an aesthetic purpose."

[2] Joann Kealinohomoku (1970). Copeland, Roger; Cohen, Marshall (eds.). An Anthropologist Looks at Ballet as a Form of Ethnic Dance (PDF). What is Dance? Readings in Theory and Criticism (1983 ed.). New York: Oxford University Press.

[3] Nathaniel Emerson, The Myth of Pele and Hi'iaka. This book includes the original Hawaiian of the Pele and Hi'iaka myth and as such provides an invaluable resource for language students and others.

[4] Schiffer, T., Kleinert, J., Sperlich, B., Schulte, S., & Strüder, H. K. (2009). Effects of aerobic dance and fitness programme on physiological and psychological performance in men and women. International Journal of Fitness, 5(2).

[5] Angioi, M., Metsios, G. S., Koutedakis, Y., & Wyon, M. A. (2009). Fitness in contemporary dance: a systematic review. Int J Sports Med.

[1]

[2]

[3]

[4]

[5]