英國阻礙香港民主自治制度謠言
英國阻礙香港民主自治制度謠言係指中國共產黨或者親中派喺回應香港人爭取政制改革、民主訴求嘅時候，會提到喺英屬香港時期，香港並無民主制度，甚至反過來質疑點解民主派當時無爭取民主。不過，其他人就反駁，話香港人喺好早期已經有爭取民主，而英國政府同香港政府喺第二次世界大戰後亦有喺香港推動民主同人權工作，但呢啲都受到中共干預同埋其他唔同因素，令1997年之前嘅香港最終未達到全面民主化。
部分散播呢種謠言嘅例子 編輯
- 中共喉舌《人民日報》喺2014年曾經發表評論，話「150多年間，自詡民主典範的英國沒有給過香港同胞哪怕一天的實在民主」、「直到1982年至1997年香港回歸前的15年間，港英政府抱着『不可告人』之心開啟了香港民主的『超速發展』之路。」[1]。
- 中共國務院喺2021年12月發布嘅《「一國兩制」下香港的民主發展》，亦錯誤咁樣聲稱香港喺英國殖民統治下從來無民主，反而係中共嘅支持下先至開始民主嘅發展[2]。
- 喺聯合國人權理事會第49屆會議期間，舉辦左個「香港明天更美好」主題視像邊會，當時嘅政務司司長李家超以港方代表發言講野，聲稱立左《港區國安法》之後，阻止左好多暴力暴亂嘅出現。佢仲話，香港嘅民主進程係喺中國恢復行使主權之後先開始[3]。
英國政府喺香港推動民主自治嘅工作 編輯
有啲反駁呢個謠言嘅人，就提出英國並唔係無推動民主自治，但結果未有好似其他殖民地咁獲得民主而獨立嘅地位（印度、巴基斯坦、錫蘭、馬來西亞、新加坡等）嘅原因，其中一個原因就係中共嘅阻撓[4]。
中共對楊慕琦計劃嘅干預 編輯
喺第二次世界大戰完結，楊慕琦上任港督之後，佢已經開始推動香港人人權，當中包括廢除種族隔離制度，給予華人多啲機會去參與政治活動同公共管理。佢仲一度提出後來被稱爲楊慕琦計劃嘅市議會方案，俾香港人更加多嘅機會管理自己嘅事[4][5][6]。
不過，呢個諗法就受到中共嘅干預。喺1958年，中華人民共和國國務院總理周恩來就通過來訪嘅英國朋友康德黎（Colonel Kenneth Cantlie）向英國首相麥美倫講明，唔接受香港變成好似新加坡咁嘅自治領狀態[4][7]。另外，華僑事務委員會主任廖承志喺1960年亦都話如果英國人真係喺香港建立自治政府，就會採取行動「解放」香港[4]。
之後，英國政府權衡輕重，認為相比起民主制度，確保中共唔用武力侵佔香港更為關鍵。結果，楊慕琦計劃就無再推行落去[4]。中共學者夏梓衿等就呢個計劃未有成功，就聲稱係英國「主動放棄」香港民主化計劃。但香港政治學者沈旭暉就反駁，話係中共一直反對英國賦予香港民主在先[8]。
楊慕琦計劃之後嘅民主進程 編輯
之後嘅港督戴麟趾亦本來有意推行香港民主進程，但係喺工聯會等親中派組織喺香港發起嘅六七暴動之後，以及中共壓力之下，民選議會嘅構想並冇實現，但佢仍然推動成立一啲諮詢機構，採納市民嘅建議[4]。
區議會、市政局同區域市政局嘅直選進程 編輯
香港喺1982年設立18區區議會，其中1／3（132席）係由直選產生。香港市政局喺1983年嘅選舉，首次容許所有年滿21歲嘅香港永久性居民登記做選民去投票，而直選議席同委任議席分別有15席。而去到1986年區域市政局成立，直選議席同委任議席分別有12席（另設官守議員3席同埋區議會間選成員9席），直選議席同樣係全民直選。
關於英屬香港時期香港人爭取民主嘅運動 編輯
香港人亦唔係只係喺主權移交前後先開始爭取民主。相反，其中一個最早期嘅民間爭取民主組織，可以追溯去到1963年成立嘅香港民主自治黨。另外，喺80年代，香港民主派亦曾經爭取過八八直選。
香港民主自治黨 編輯
香港民主自治黨（英文：Hong Kong Democratic Self-Government Party）係由香港企業家兼社會運動參與者馬文輝喺聯合國香港協會會員嘅基礎上，喺1963年同埋律師鄧漢齊、張六師、前中華民國國軍將領仲有中國民主社會黨創始人之一孫寶剛、前香港公務員史潔頓（G. S. Kennedy-Skipton）、加士（P.A. Gass）、教師曾健士（K. Hopkin-Jenkins）等多名華洋人士建立，香港歷史第一個以政黨命名嘅政治組織，成功註冊為香港合法社團[9][10][11][12]。
八八直選 編輯
香港民主派喺80年代，曾經透過香港政府嘅民意匯集處爭取八八年直選，並得到好多市民支持。但根據彭定康嘅回憶錄記載，英國當年為咗爭取中共將直選嘅承諾寫入基本法，向中共妥協而扭曲咗當時嘅民意，令到香港去到1991年先至有首次立法機關嘅直選。
1991年同1995年直選 編輯
去到1991年，香港人終於可以喺立法局選舉入面投票。當時民主派喺18個直選議席入面攞咗16席。而去到1995年喺當時港督彭定康提出新九組方案下，除咗20席地區直選，仲有9個選民基礎合共去到270萬人嘅「新九組」，變相直選議席。民主派取得過半議席，但因為北京違反「直通車」承諾，呢次選出嘅議員無辦法過渡到主權移交後嘅立法會。取而代之嘅係由北京控制嘅臨時立法會。
對於親中派散播呢種謠言嘅批評 編輯
謠言對港中關係影響 編輯
同亞洲金融風暴北京救港謠言一樣，中共有啲人深信呢個講法，甚至覺得係中共優待香港先比香港人有民主。所以，喺一啲港中矛盾問題上，呢啲人會認為明明中共對香港人咁好，但香港人就「反骨」、「唔聽話」。
參考 編輯
- ↑ 1.0 1.1 傑安迪 (2014-10-28). 〈中共曾多次反對港英政府引入選舉〉. 《紐約時報中文網》 (中文). 喺2022-01-03搵到.
- ↑ 頭條日報. 〈鄭若驊指《白皮書》表明英殖下無民主 回歸後中央支持發展民主〉. 《頭條日報 Headline Daily》 (中文). 喺2022-01-05搵到.
- ↑ 〈信報即時新聞 -- 李家超:香港民主進程是回歸後才開始〉. 《信報即時新聞》. 喺2022-05-16搵到.
- ↑ 4.0 4.1 4.2 4.3 4.4 4.5 〈港英時代爲何沒有民主〉. www.upmedia.mg 上報. 喺2021-12-28搵到.
- ↑ 〈香港戰後民主發展：功敗垂成的「楊慕琦計劃」〉. 《www.vjmedia.com.hk 輔仁文誌》. 原著喺2020-07-02歸檔. 喺2021-12-28搵到.
- ↑ 余震宇. 〈四十年代末期的政制改革（一）：楊慕琦計劃〉. ET Net. 喺2021-12-28搵到.
- ↑ 〈半世紀的香港政改：鮮為人知的史實〉. 《大紀元時報 香港》. 2019-07-11. 喺2021-12-28搵到.（香港繁體）
- ↑ 《【國際香港本傳・沈旭暉 019🇬🇧🇭🇰】楊慕琦方案的前因後果：英國真的拒絕香港民主化嗎?》, 喺2021-12-28搵到
- ↑ 致知，港獨之父馬文輝：六十年代的民主運動 （上） 互聯網檔案館嘅歸檔，歸檔日期2016年3月5號，.、（下） 互聯網檔案館嘅歸檔，歸檔日期2016年3月5號，., 2012-12
- ↑ 貝加爾 (2014年2月). 〈馬文輝與香港自治運動], 《思想香港》第三期〈自治．運動．本土〉〉 (PDF). 原先內容歸檔 (PDF)喺2016-03-04. 喺2015-03-03搵到.
{{cite web}}: Cite has empty unknown parameter:|dead-url=(help) - ↑ 〈港獨陽謀〉. 《蘋果日報 (香港)》. 2015-01-19. 原著喺2015-04-01歸檔. 喺2015-03-03搵到.
- ↑ 毛來由 (2015-02-22). 〈港人舉英治旗就係殖民奴才？——60年代的英屬香港自治城邦主張〉. 輔仁媒體. 原著喺2017-06-28歸檔. 喺2015-03-03搵到.
- ↑ 《英國一貫管殖民地都會給予自治同民主 中共至係香港無法民主自治嘅原因 香港人在潛移默化下已經英國化 將香港交還英國方為王道 黃世澤幾分鐘評論 20211227》 (英文), 喺2022-01-03搵到