雙及物動詞

雙及物動詞（ditransitive verb）係可以有兩個賓語嘅動詞。

英文例子－

He handed Sarah the book（佢遞本書畀莎拉）

－hand 做動詞通常係指遞... 畀... 噉嘅意思，後面掕兩個名詞，第一個名詞表示收件物品嘅人，而第二個名詞表示件物品係乜。

基本概論

内文：動詞同及物

睇埋：文法

雙及物動詞顧名思義即係指掕住兩個賓語嘅動詞，通常會帶住傳遞或者接收等嘅意思。

幾句廿一世紀初廣東話例句：

例句	動詞	主題	接收者
明仔遞本書畀我。	遞	本書	我
瑪麗講咗佢啲秘密畀家姐知。	講咗... 知	佢啲秘密	家姐
我哋喺度教米高廣東話發音。	教	廣東話發音	米高
阿蟲仲爭我 3,000 文。	爭	3,000 文	我

... 呀噉。

廿一世紀初廣東話以外嘅語言，都會有雙及物動詞，例句：

1. （英文）Ming handed me the book.（明仔遞本書畀我。）
2. （法國話）Marie a confié ses secrets à sa grande sœur.（瑪麗講咗佢啲秘密畀家姐知。）
3. （英文）We are teaching Michael Cantonese pronunciation.（我哋喺度教米高廣東話發音。）
4. （日本話）Chun-san wa mada watashi ni 500-doru no shakkin ga aru.（阿蟲仲爭我 500 文。）
5. （清朝粵語） 我送禮物與秀才。（我送禮物畀秀才。）

語言類型

睇埋：詞句配列同文法格

唔同話，處理雙及物動詞嘅方法都可以唔同，例：廣東話表達「將一樣嘢交畀」噉嘅意思嗰時，係主題行先接收者行後嘅：

→ 畀本書我。（bei2 bun2 syu1 ngo5）

而標準官話表達同樣嘅意思嗰陣時，就係接收者行先主題行後：

→ 給我這本書。（拼音：gěi wǒ zhè běn shū）

語言類型學嘅研究者又會按雙及物動詞嘅特性嚟將語言分類。

直接間接

睇埋：直接雙及物配列

首先，一隻雙及物動詞定義上就實會涉及 3 嚿物體：

• A（Agent）－即係做出舉動嗰方；R（Recipient）－即係接受舉動嗰方；T（Theme）－即係舉動傳達嘅事物；

間接（indirective）雙及物配列即係 T = P，指隻語言會將 T 當正係得一個受體嘅及物動詞嘅 P 噉，係世上最常見（有估計話超過 50%）嗰隻雙及物配列。

除此之外，亦都有啲語言會採取直接（secundative）雙及物配列，即係 R = P，指隻語言會將 R 當正係得一個受體嘅及物動詞嘅 P 噉，估計有 17.2% 嘅語言都採取噉嘅做法。例如英文就被指有陣時會有直接雙及物配列噉嘅做法，例句：

I gave Mary the ball.（我畀咗個波畀瑪麗。）

－the ball（個波）好似一隻得一個受體嘅及物動詞嘅 P 噉，擺咗喺句子最尾度。

睇埋

• 及物
• 間接賓語