維基百科

香港越南難民問題

香港越南難民問題係由70年代直到90年代尾嘅時候，不斷有越南船民嚟到香港嘅偷渡潮。呢個係困擾咗香港接近25年嘅問題，由1975年西貢淪陷，到2000年香港最後一個難民營收檔嘅期間，香港總共接收咗差唔多20萬位船民。大量船民雖然喺經濟同治安上為香港帶嚟咗沉重嘅負擔，不過呢個亦同時係香港歷嚟最龐大嘅國際人道救援行動[1]。

經過喺一艘35英尺長嘅漁船上面過咗8日之後，呢啲嚟自越南金蘭灣嘅難民，終於被安置到藍嶺號兩棲指揮艦 (LCC-19)之上。呢幅相喺1984年5月15號影低。
啟德難民營同新秀大廈

概況

編輯

越戰結束

編輯

越戰喺1961年爆發，至到1975年4月30號西貢淪陷之後結束，南越喺北越同越共游擊隊嘅進攻之下投降。唔少人對共產政權都感到恐懼，有能力嘅都通通逃亡。第一批進入香港嘅難民有3,743人，佢哋喺1975年5月4日跟住丹麥註冊嘅貨輪「嘉娜馬士基號」嚟到香港，呢批難民全數得到港府嘅收容，登岸之後亦都獲安排去到駐港英軍騰空之後嘅軍營度住，同時因為嗰日也係英國元首伊利沙伯二世抵達香港開始訪港行程嘅大日子[2]，女皇訪港嘅新聞將第一批越南難民到香港嘅消息完全蓋過，所以當時並冇引起太多香港市民嘅關注。隨後幾年都不時有難民抵港[3]。當時南北越實施緊半年嘅自由通行政策，期間有傳出話越南統一之後可能會維持南北分治。因爲期待南越高度自治，所以越南嘅出走人數仍相對溫和，但冇耐之後越共喺全國實施高壓嘅統治、展開一連串嘅清洗行動、充公越南華僑嘅資產[4]，又廢除南越貨幣，終於引發大規模嘅難民潮。

1978年12月，載住2,700幾位越南難民嘅台灣貨輪「匯豐號」駛入香港領海，英國駐港皇家海軍同香港水警喺海上截停「匯豐號」。但係由於船上嘅難民人數眾多，而歐美國家呢個時候，對庇護越南難民嘅審批條件越嚟越嚴格，港府又唔肯定佢哋能夠有第三國收容，所以唔允許難民船靠岸。雙方僵持咗三個幾禮拜，到1979年1月19號，因為船上嘅物資短缺同衛生情況太過惡劣，最終港府都係基於人道理由准許難民登岸[5]。

1979年2月8號，又有一艘載住2,600幾位難民嘅「天運號（英文：Skyluck）」喺夜幕之下進入香港領海。「天運號」係一艘排水量3,500噸嘅巴拿馬籍貨船，呢艘貨船被阻截之後，港府唔俾佢喺香港靠岸。因為驚難民船會陸續有嚟，而有冇第三國願意協助接收難民又唔知，所以「天運號」只能夠落錨停喺海中心，而港府就提供物資援助。直至4個半月之後，喺6月29號，有船民切斷咗貨船嘅錨鏈，成艘貨船喺風浪中漂流，直至撞到南丫島附近嘅石擱淺，跟住船身入水沉埋。啲船民都游到附近嘅岸邊，而警察又展開圍捕，最終所有船民都獲准登岸，被安置到非常擠擁、人數過萬嘅難民營。呢單持續咗幾個月嘅事件，演變成為深受國際關注嘅人道主義問題，聯合國亦召開會議討論越南難民危機，探討國際社會應該點樣分擔接收越南難民嘅責任，同時亦到為持續影響咗香港四分之一個世紀嘅香港越南船民問題寫低重要嘅一頁[6][7][8][9]。

第一收容港

編輯

1979年7月，英國政府喺日內瓦簽署咗一項關於處理越南難民問題嘅國際公約，其中內容包括將香港列為「第一收容港」。由越南出走嘅難民，將會由第一收容港先嚟接收，再由西方國家甄別難民資格。所有獲甄別為難民嘅人，就有機會去到願意接收難民嘅西方國家定居，剩下嘅就由第一收容港嘅政府遣返去原居地。當時香港同馬來西亞都同意先行接收難民同提供臨時庇護，而上岸之後嘅開支就會由聯合國難民署嚟承擔。同時，越共政府一路喺南越唔同嘅城市進行殘酷嘅清洗同“重新教育”嘅活動，大量越南難民一批批蜂擁而至，1979年嘅一年內就已經有超過68,700人抵港。雖然越南難民船亦都有前往馬來西亞、菲律賓、新加坡、台灣，甚至遠到日本同澳洲，但係由於東南亞國家同台灣對待越南難民嘅態度比較嚴苛，甚至會用武力將入境嘅難民船拖返公海。亦都有部分國家表明，唔會直接接收難民同唔會俾難民船喺本土靠岸，難民只能暫住喺外島嘅難民營。而香港因爲係英國統治所以喺區內嘅經濟水平相對較高，亦都比較重視人道處理所有尋求庇護者，所以大部分嘅船民都會選擇去香港。至到1980年已經有超過10萬位船民抵達香港[10]。

1970年代抵達香港嘅越南難民，最初都被安置喺駐港嘅英軍軍營，例如深水埗軍營嘅空置營房[11]。隨著難民不斷湧入香港，港府需要設立專門嘅難民營。早期嘅難民營都採取半開放嘅管理模式，管理較為寬鬆，難民獲簽發難民證之後，可以喺日頭出入難民營，有部分識講廣東話嘅難民甚至喺香港揾到嘢做，佢哋可以一邊賺取收入，一邊等第三國收容。

甄別政策

編輯

但係1979年開始，不斷有大量嘅難民湧到香港，港府喺1982年將難民營改為禁閉營模式，自此之後，新抵港嘅難民將會喺禁閉營被扣留，而難民一般都唔會獲批准離營，只能夠喺營入面活動，以減低難民嚟港嘅誘因。禁閉營設立初期，抵港嘅越南難民一度減少，但係之後又有上升嘅趨勢，因爲咁，港府喺1988年設立「甄別政策」，所有新抵港嘅船民先會解到指定嘅羈留營作為中轉站，以甄別難民資格，符合難民資格嘅難民會被轉到禁閉式難民營等候第三國收容，而如甄別結果決定唔係難民，就會被轉移到禁閉式運作嘅船民營等返越南，所以香港喺1980年代尾嘅難民同船民營可以分為三類：分別係喺1982年禁閉營政策實施之前，所有抵港難民嘅半開放式難民營；1982年開始設立嘅禁閉式難民營；同埋1988年實施「甄別政策」後嘅船民羈留營。

1983年，唔少逃到中國大陸嘅越南難民，因為誤信香港非法入境者可獲特赦嘅傳言而進入香港，而西方國家亦逐漸減少收容到香港嘅越南人。香港政府遂喺1988年6月16號開始，實施「甄別政策」，對偷渡到香港嘅越南人做背景審查，核實離開原居地前往香港嘅理據。喺甄別政策之下，因為受到政治迫害而抵達香港嘅越南居民被定義為「難民」，而因為經濟狀況而抵達香港嘅非難民就被定義為「船民」[10]。凡係因為經濟問題等非政治原因，而進入香港嘅越南船民，佢哋會被視為非法入境者，唔會獲安排去第三國，亦都唔會獲批香港居留權，只會被遣返去越南。呢個政策透過香港電台以越南話播放，試圖阻止大量越南人進入香港，而該段廣播成為廣為香港人熟悉嘅「北漏洞拉」廣播。甄別政策喺1994年10月正式宣佈完結。

1987年年頭，有一艘抵達香港嘅越南難民船喺海上被攔截，香港政府根據機制俾呢艘難民船兩個選擇：一係上岸無限期扣留，一係接受補給繼續行程，而船民最終選擇咗繼續行程。船上嘅人員簽署香港入境事務處嘅自行抉擇書同意離境，並且喺港府俾咗物資補給之後，離開香港領海繼續北上。當行到福建金門申請庇護嘅時候被拒絕，仲喺3月7號俾中華民國陸軍喺烈嶼嘅駐軍屠船滅口、隱暪文件、焚船毀證滅跡，造成咗三七事件。[12][13]

遣返政策

編輯

80年代後期，港英政府應中國政府提出嘅要求喺1997年主權移交前解決越南難民問題，港府開始同越南政府展開接觸，討論遣返越南人回國嘅問題，但越南政府最初只答應收回自願回國嘅船民。第一批自願遣返嘅越南人喺1989年成行，由港府安排嘅包機送返越南。到90年代，香港政府向越南政府提出交涉之後，越南政府同意收返滯留喺香港嘅國民，唔再以自願回國為先決條件，並且承諾唔會向被遣返越南嘅國民追究偷渡離境嘅責任，而港府之後對唔符合難民資格嘅越南船民開始執行有秩序嘅遣返行動。

港府最初實施嘅係「自願遣返」，幫接受勸說嘅越南船民返越南。雖然港府事先同越南當局達成協議，保證佢哋回國後唔會受到政治迫害，唔過甚少越南船民接受自願遣返，港府於是都係實施「強制遣返」，將越南船民分批從船民扣留中心押送到啟德機場，並由港府租用嘅L-100「大力士」運輸機（民用版C-130運輸機）將船民遣返越南[14]。喺呢個期間難民營入面曾經發生多次嘅衝突，除咗因為反對港府強制遣返之外，嚟自南越同北越嘅船民亦都互相經常喺營內發生爭執同集體打鬥，所以喺分配營房時需要將兩派船民分開。較大型嘅難民營騷動包括1992年2月喺石崗船民中心發生，同埋1994年4月喺白石船民中心發生嘅打鬥。第一件造成24位船民死亡，而第二件造成18位船民被控謀殺[15]。呢份案件由1993年11月到1994年11月做審訊，總共維持咗398日，甚至破咗刑事審判歷時最耐嘅世界紀錄。

至到1997年6月主權移交前夕，仍然有約3,400位冇居留權嘅越南人滯留喺香港。當中1,400位係難民，900位係船民，剩返嘅1,100位係非法入境者，而1,400位難民之中，大約一半因爲曾經犯罪而留有案底，所以都好難有第三國收容。

尾聲

編輯

隨住越南形勢嘅轉變，同香港因爲主權移交而造成嘅政治同社會變化，香港特區政府喺1998年1月9日取消「第一收容港」嘅政策[16]。2000年2月推出「融入政策」，為部分仍然滯留喺香港嘅難民或者船民提供申請香港居留權嘅途徑；被甄別為難民，但未能獲得第三國收容嘅越南難民；以同喺1988年實施甄別政策之前抵達香港，但仍然滯留香港嘅船民，可申請香港身份證同喺香港定居。由1975年至到2005年，香港總共收容咗超過20萬位嘅越南難民同船民，其中有143,714位難民得到外國收容，67,000幾位船民被遣返。直到2005年年底為止，有1,385名難民同船民獲准喺香港定居[17]。另外有小部分船民[18]，因為喺難民營觸犯法例而喺香港被羈留，當中又有小部分係喺1988年甄別政策實施之後抵達香港，但唔符合難民資格[19]。即使出獄之後，至到2021年仍然被無限期羈押喺大潭峽懲教所嘅智慧監獄等候最終處理方案同程序[20]。

英國政府將香港列為難民嘅「第一收容港」，但係出於人道嘅收容政策，卻使香港政府承受重擔。每收容一位越南難民，香港政府每年大約需要花費公帑1萬2千港元。至到1998年為止，聯合國難民專員公署欠下香港11.62億港元嘅債務，截至2015年都未有還款。不過特區政府回應嘅時候，承認冇權力強制聯合國機構還款，而非法入境者嘅收容開支一貫都係由扣留國承擔，香港亦都冇曾經向大陸逃港嘅非法入境者或者其原居地政府，追收暫時收容嘅款項[21][22]。

相關影視作品

編輯
  • 1981年電影《胡越的故事》
  • 1982年電影《投奔怒海》：描述南北越南统一之後嘅生活。
  • 1979年電視劇《抉擇》：朱江做嘅主角係一位越南難民，喺海上遇難，但係得到石堅做嘅好心老漁翁救起，跟住之後出人頭地，最終移民去美國。
  • 1988年電視劇《誓不低頭》：劇入面嘅歹角陸國榮（曾江做），本來喺越南已經係銀行經理，但係因為越戰令佢家散人亡而偷渡去香港投靠舅父（鄭君綿做）。到香港之後，因為求職不斷失敗，有幾次都俾舅母（李香琴做）笑佢，結果將舅父全家都殺哂，仲嫁禍埋俾好朋友謝文武（鄭少秋做），之後卻成為巨富。
  • 1989年電影《英雄本色III夕陽之歌》：由周潤發、梅艷芳同梁家輝主演，故事背景發生喺1974年嘅越南西貢，講述Mark哥（周潤發做）發跡之前喺越南嘅一段故事。
  • 1989年電視電影《難民營風暴》：由劉青雲、王書麒同徐忠信主演。
  • 1991年電視劇《今生無悔》：由黎明、周海媚同邵美琪擔綱演出，邵美琪扮演一位原本喺禁閉營度住嘅越南船民，後嚟偷走出難民營，並且同程朗（黎明扮嘅角色）相戀，但係唔受程朗嘅家人接受，幸好最終兩個人嘅戀情都得到家人嘅諒解。
  • 1992年電影《浮世戀曲》：陳耀成執導，一位雜誌女編輯敏珍（陳令智做）因為睇到挪威女演員莉芙·厄爾曼譴責香港政府遣送越南難民返越南，決意寫信俾佢，表達身為香港人嘅觀感。

相關地方

編輯
 
白石船民中心

睇埋

編輯

攷

編輯
  1. ↑ 〈香港政府宣布望後石難民營結束新聞稿〉。原先內容歸檔喺2020-11-27。喺2006-12-07搵到。
  2. ↑ 〈香港歷史上第一艘越南難民船〉。《經濟通》。2021-05-05。原先內容歸檔喺2022-11-16。喺2022-11-16搵到。
  3. ↑ 〈香港立法局1995年討論船民問題文件〉。原先內容歸檔喺2021-03-06。喺2006-12-07搵到。
  4. ↑ 〈從越南難民事件看香港現時的難民問題〉。中大學生報。原先內容歸檔喺2022-11-30。喺2022-11-30搵到。
  5. ↑ 〈匯豐號入港 為越南難民潮揭開序幕〉。星島日報。原先內容歸檔喺2022-11-16。喺2022-11-16搵到。
  6. ↑ 香港無綫電視，《由1967開始》，2009年12月21日
  7. ↑ "Skyluck refugee ship sunk of Lamma Island". 英屬哥倫比亞大學亞洲圖書館展藏. 喺2023-11-13搵到.{{cite web}}: CS1 maint: url-status (link)
  8. ↑ "Skyluck - A Journey through the Open Sea" (英文). skyluck1979.com. 原先內容歸檔喺2012-12-31. 喺2012-10-24搵到.
  9. ↑ Albert JIAO (2011-01-21)。〈神秘的Skyluck號〉。果殼網。原先內容歸檔喺2020-12-05。喺2012-10-24搵到。
  10. ↑ 10.0 10.1 〈不漏洞拉：你不知道的越南船民史（下）〉。原先內容歸檔喺2020-12-05。喺2022-11-24搵到。
  11. ↑ 〈尋找深水埗難民營原址〉。獨立媒體。原先內容歸檔喺2022-11-30。喺2022-11-30搵到。
  12. ↑ 管仁健 (2008年3月7日)。〈〈國軍屠殺越南難民的三七事件〉〉. 《〈你不知道的台灣·國軍故事〉》。文經社。ISBN 9789576636493。原先內容歸檔喺2022年10月18日。喺2022年10月20日搵到。
  13. ↑ 高涌誠 (2022年7月13日)。〈〈111司調0025 調查報告〉〉。台北：監察院全球資訊網。原先內容歸檔喺2022年8月3日。喺2022年10月20日搵到。
  14. ↑ 〈啟德機場大事年表（1924-1998年）〉。原先內容歸檔喺2021-06-24。喺2022-11-27搵到。
  15. ↑ 〈【蘋話當年】1992年石崗難民營爆騷亂24死〉。原先內容歸檔喺2020-06-08。喺2018-04-28搵到。
  16. ↑ 〈取消第一收容港政策〉。香港特別行政區政府新聞處網站。1998-01-08。原先內容歸檔喺2020-11-27。喺2011-02-07搵到。
  17. ↑ 亞洲電視新聞部資訊科 (編) (2007年12月22日)。《解密百年香港》。香港：明報出版社。頁 288-291頁。ISBN 9789628959945。
  18. ↑ 〈越南船民出獄5年　仍被囚羈留中心候免遣返聲請結果　自由無期〉。《眾新聞》。2021-09-24。原先內容歸檔喺2021-11-27。喺2022-11-19搵到。
  19. ↑ 〈越南船民出獄5年仍被羈留　絕望放棄免遣返聲請　「香港現在都無民主了，同越南無分別」〉。《眾新聞》。2021-12-07。原先內容歸檔喺2022-01-09。喺2022-11-19搵到。
  20. ↑ 〈懲教署出稿譴責《立場新聞》大潭峽懲教所報道失實　《立場》：曾就指控問懲教對方表示不作評論〉。《眾新聞》。2021-11-25。原先內容歸檔喺2022-01-09。喺2022-11-19搵到。
  21. ↑ 〈《追回聯合國難民事務高級專員署尚欠的暫支款項問題》，1998年，香港立法會，香港〉 (PDF)。原先內容歸檔 (PDF)喺2020-11-30。喺2007-10-08搵到。
  22. ↑ 〈《政府帳目委員會第三十一號報告書的跟進事項 追回聯合國難民事務高級專員署尚欠的暫支款項問題》，2015年，香港立法會，香港〉 (PDF)。原先內容歸檔 (PDF)喺2021-03-06。喺2016-10-27搵到。
  23. ↑ 立法局。〈立法{局保安事務委員會會議紀要〉。《保安事務委員會》。立法會行政管理委員會。原先內容歸檔喺2020-11-30。喺2020-02-29搵到。

出面網頁

編輯
由「https://zh-yue.wikipedia.org/w/index.php?title=香港越南難民問題&oldid=2163734」收