Wikipedia:是日正文/2020年5月
地球係太陽系入面嘅一粒行星。佢距離太陽 1.5 億公里遠，係太陽系嘅行星入面第三近太陽嘅－排正喺水星同金星之後。佢嘅質量係 5.97 × 1024 公斤左右，而半徑就大約係 6371 公里，密度有成每立方厘米 5.514 克。如果齋由大細嚟睇，佢喺太陽系嘅行星入面排第五，係太陽系嘅類地行星（Terrestrial planet；指主要由石頭構成嘅行星）入面最大粒嘅；同時佢係太陽系入面最密嘅行星。同其他行星一樣，地球曉自轉同公轉：佢大約每廿四個鐘頭會自轉一個圈（為止一日），每 365.26 日會圍住太陽公轉兜一個圈（為止一個太陽年）。佢嘅自轉產生咗晝夜，而公轉就產生咗一年嘅四季。同時，地球有粒自然衛星－月球－圍住佢轉。
地球嘅表面有成 71% 嘅面積俾水𢫏住－呢啲面積包括咗海、河、同埋湖呀噉，而淨低嘅就係由陸地板塊組成嘅各個大陸同埋島。除咗噉，兩極地區大部份地方長年俾冰覆蓋。再入少少，地球嘅內部分做外地核同內地核兩層，前者由熔化咗嘅金屬組成，而後者由固體嘅金屬組成。而喺地球嘅最外層，佢俾一浸氣體包住－即係所謂嘅大氣層。大氣層嘅主要成分係氮同氧呢兩種元素。地球係目前成個宇宙入面已知嘅行星當中唯一一個有生命存在嘅，而且佢仲係智人嘅屋企。佢喺大約 45 億 4 千萬年前形成，而月球就係喺嗰時嘅 1 千萬年之後開始圍住佢轉嘅。
地球形成咗 10 億年之後左右先至開始有生命，而隨住生物嘅進化，佢今日已經有住各種各樣嘅生物，好似各種嘅動物同植物－即係有生物多樣性。根據對化石同基因嘅研究，現代嘅人類喺大概 500 萬至 700 萬年之前出現，而且同現代嘅黑猩猩係近親。到咗廿一世紀頭，地球上大約有 74 億嘅人口。聯合國仲估話會愈嚟愈多。人類有得分做黃種人、白人、同埋黑人等多個人種，而呢柞人種入面又有啲亞種－例如係黃種人，就有得分做漢族同大和族等，而漢族仲有得細分類做包括粵人在內嘅各個民系－人類喺文化同血統上都好多樣化。(成篇文章……)