一致 (文法)
文法上講嘅一致（粵拼：jat1 zi3；英文：agreement，簡寫 agr）係指緊一隻字詞要變樣，嚟就住另一隻同佢掕住嘅字。一般認為粵語並冇文法一致呢家嘢，不過歐洲語言就不溜都多文法一致規則。
基本例子
編輯例如响標準嘅英文裏面，be 呢隻字要就住佢掕嗰隻主語（主語動詞一致）。
| 如果主語 S 係... | be 要變做... | 例句 |
|---|---|---|
| I（我；第一身單數） | am | I am...（我係...） |
| You（你或者你哋；第二身） | are | You are... （你係...） |
| He/she（佢；第三身單數） | is | He is... / She is... （佢係...） |
即係話喺標準嘅英文入面，be 要同佢隻主語一致，先叫啱文法。
法文都有主語動詞一致特性，好似係動詞 manger（食... 噉解）噉：
| 如果主語 S 係... | manger 要變做... | 例句 |
|---|---|---|
| Je（我；第一身單數） | mange | Je mange...（我食...） |
| Tu（你；親切式[暫譯]第二身單數） | manges | Tu manges... （你食...） |
| Il/elle（佢；第三身單數） | mange | Il mange / elle mange... （佢食...） |
語言類型
編輯睇埋：語言類型學
唔同語言响文法一致相關嘅特性上可以有差異，例如英文有主語動詞一致特性，但粵語就冇[註 1]；法文要求名詞同相關形容詞喺性別同數量上都一致，但係英文就冇。
有啲語言可能會喺呢方面有更加複雜嘅變化，例如係要求隻動詞同賓語一致，或者要求隻動詞同隻間接賓語一致（例子可以睇吓格魯吉亞話），甚至係唔同情況下要用唔同嘅一致方式（例：情況 A 下動詞要同主語一致，情況 B 下動詞要同賓語一致）... 呀噉