唐人新年

新年san1 nin4係唐人曆裏面一年嘅開始，又叫做中華新年、新春。因為喺春天，所以北方人多數叫春節ceon1 zit3（簡化字：春节）。雖然1912年中華民國成立就轉用公曆，但係新年多數講唐人曆法，而公曆多數叫元旦。新年對唐人來講係好重要嘅節日。傳統來講，成個節係由正月初一到正月十五。而新年之前十二月唔同日子有唔同準備。廣東人會叫呢段日子做嘅嘢做過年。

對聯揮春同兩盤大桔

利是封

全盒

舞獅（加拿大卑詩省列治文）

唐人曆法因為要就埋月，又有閏月，一年長短唔定，所以同天文講嘅年，地球圍住太陽行咗啱啱一個圈唔同。不過，其實唐人都有呢種定義嘅年，就係做冬，即係冬節或冬至。

俗

《尚書》曰：「正元日，舜格于文祖。」又曰：「正月朔旦，受命于神，宗率百官，若帝之初。」《玉燭寶典》曰：「正月為端月。」正月首日稱元日，元，善之長也。元日亦曰上日、正朝、三元。南朝《荊土歲時記》曰：庭前爆竹，以辟山臊惡鬼也。山臊，後人或謂之年獸。古有正月飲屠蘇之俗。

新年日子

通常十二月尾到正月初，呢段日子都會用年開頭，例如十二月廿八，就叫年廿八；十二月三十，就叫年三十；正月初一，就叫年初一；如此類推。

唔同日子就另有叫法，年初一之前嗰晚，即係年三十晚或年廿九晚，就叫除夕，或者大除夕；年十五，即係新年最尾嗰日，叫元宵，或者元宵節。

習俗

新年習俗主題係去舊迎新。會趁年初一之前，將啲唔好嘅嘢掉咗佢，買過啲新。又或者將舊嘅嘢翻新。買新衫，剪頭髮，年廿八，洗邋遢，都係其中一部份。

廣東人會食團年飯，成家無論響邊都好，都會返屋企聚埋成家一齊食餐飯，代表一家團圓。到新正頭（年初一或者年初二），成家人又會食開年飯。

廣州民間嘅農曆新年習俗歌：

初一人拜神，初二人拜人，初三窮鬼日，初四人乞米，初五初六正是年，初七尋春去，初八八不歸，初九九頭空，初十打春去，十一打仔回，十二搭燈棚，十三人開燈，十四燈火明，十五祈完燈，采青走百病。

正月初一

呢日嗌元日，呢日凌晨啲街坊就會起身祭祖拜神、劏雞，兼且焚香、燒爆竹，意係搶春。

年初二

到初二朝頭早，家中婦女就要主持開鑊，落生油，煎蘿蔔糕、煎魚，準備埋開年飯。呢日又俗稱姑爺節，係返親家嘅日子。廣州一啲郊區農村仲有放生習俗，係買生鯉魚，用紅紙冚埋魚眼，拜完神後放生條魚落河塘。

年初三

呢日係赤口日，窮鬼日。呢日晨早起身屋企第一件事，就係掃窮鬼，掃走初一落來積落嘅垃圾，意味著掃走污糟同窮氣。

呢日大家通常唔會去拜年，因為初三赤口，又稱赤狗日。據話赤狗係執掌口怒嘅神，撞到易起口角，所以大家會晤出街費事惹屎上身。後生輩就唔會太在乎呢啲。

年初四

呢日係財神嘅生日，所以就有接財神，生日前一日各家就備齊啲酒席，同財神賀辰。儀式一般喺下晝到晚黑搞，準備供品有三牲、生果、茶、糖果等。如果舊年唔如意嘅就一碗清水、三支香祭灶王，舊年發達嘅就用雞鴨魚肉祭拜。

年初七

初七係人日，廣東人俗稱眾人生日。晨早廣州人會設埋豐盛嘅家庭筵席慶人日，必備七樣菜（芹菜、芥菜、菠菜、青蔥、大蒜等）製成嘅七寶羹。街坊回憶七寶羹包括芹菜、蒜、蔥、油麥菜、芫茜、黃芽白、生菜，開食前屋企長輩會講啲祝辭，如闔家清清白白、新年回春、聰明勤勞、諸事合算等，據話食咗七樣菜，呢年就有得執金拾銀，財運登門。據話民國以前，啲後生會群埋一齊游花地，揀埋最靚嘅女仔做人日皇后，由「皇后」來主持呢日啲活動。

年初八

俗語有話：初七七不去，初八八不歸。初七出門探親等人，初八就唔返屋企留喺親戚度住。

年初九

呢日係九皇誕，老廣州會拎啲雞鴨魚肉出來拜玉皇大帝。

初十同十一

廣州郊區農村，相鄰兩條村啲化骨龍呢兩日會打石仗（打春去），邊條村贏就代表新年會更好（啲大人收尾會趕啲細路返歸）。

初十二

呢日各家各戶都會點燈掛街邊，廣州啲村啲祠堂都會點埋燈。

正月十五

廣州人呢日會去睇花燈。而廣州郊區農村度，舊年添咗男丁嘅呢日都會去祖祠度掛個燈籠，表示向祖宗報到。呢日係元宵，要食湯圓。

過年好食嘅嘢

粵語地區過年興食以下呢啲嘢。

• 糕點：年糕、蘿蔔糕、芋頭糕、馬蹄糕、黃金糕
• 炸嘢：角仔、煎堆、笑口棗
• 全盒：糖蓮子、糖冬瓜、糖蓮藕、糖椰子、瓜子、開心果
• 熟食：發財好市（髮菜蠔豉）、生財大利（生菜豬脷）、撈起

至於臘八，食臘八粥，浸臘八蒜。至於小年，供麥芽糖。

至於除夕，同賀新春，共食團年飯。亦整餃子、年糕、春卷等。

睇埋der

• 農曆新年

出面網頁

• 維基同享中有關Chinese New Year嘅資源類