大埔道

大埔道同大埔公路（Tai Po Road），花名舊路，係香港第二長嘅路，由新九龍深水埗同旺角，去新界大埔。九龍市區部份叫大埔道，新界叫大埔公路。原本條路可以分成十一段，家下淨得九段。

歷史

英國由大清身上租到新界之後，英軍開條路以便控制新界，當時叫Frontier Road。由當時望角以北，過深水埗以北，經沙田，過新界管治中心嘅大埔，到上水。同青山道夾埋圍住新界中南北西一個圈。

後尾政府將深水埗以北嘅路，改名做大埔公路。而部份路段，亦改咗其他名。好似大埔一段，改名廣福道；大窩到粉嶺一段，叫大窩西支路；粉嶺到上水，變咗馬會道一截、沙頭角公路一截、新運路一截同粉嶺公路一截。部份路段，亦都拆咗，用來起屋等等。

大埔到上水，家下經已無咗大埔公路，由其他路代替咗。

大埔道喺九龍市區，喺新九龍內，由彌敦道、界限街交界起，經過深水埗，向西北伸廷，過郝德傑道就駁去大埔公路-琵琶山段。山上有交匯處，駁去呈祥道。

琵琶山段喺琵琶山南，由郝德傑道起，駁大埔道，經馬騮山，即係金山郊野公園，過山坳駁沙田嶺段。全段雙程行車。呢段路彎彎曲曲，路一邊係九龍水塘，有唔少馬騮出沒。

大埔公路沙田嶺段

沙田嶺段接琵琶山段，經沙田嶺山腰、徑口路，落沙田下城門道，全段雙程行車，原本駁大圍段，家下現時近大圍海福花園一段，改駁架空嘅青沙公路大圍段，去大埔公路沙田段。呢段彎彎曲曲，同獅子山對望。

大圍段由下城門道開始，經大圍外圍，到獅子山隧道公路同沙田正街交界，車只可入沙田市中心，去唔係直駁沙田段。呢段係分隔雙程行車。

大埔公路－沙田段

沙田段由大圍到沙田馬場，呢段個頭唔直駁大圍段，而係駁城門隧道公路同青沙公路。沙田段由城門隧道公路到吐露港公路一段，係九號幹線一截。沙田段城門隧道公路到沙田路一段，係四綫雙程行車；而沙田路到吐露港公路一段，係六綫雙程行車。沙田段由火炭路到吐露港公路，係快速公路。起喺沙田沖積地同新填地上，路勢平坦，同九廣鐵路火車路（家下東鐵綫）平排。

大埔公路－馬料水段

馬料水段喺上山段，由沙田馬場附近上山，初段喺九肚山下，過馬料水對上、香港中文大學、赤泥坪同大埔尾。全段雙程行車。

大埔公路－大埔滘段

大埔滘段由大埔尾，經大埔滘去到黃宜凹。全段雙程行車。

大埔公路－元洲仔段

元洲仔段上接大埔滘段，由黃宜凹起落山，經天橋跨過九廣鐵路火車路，經過元洲仔對出，再過廣福迴旋處，過大埔河爲止。佢駁廣福道同南運道交界，就係大埔墟範圍。

呢段路原本喺大埔海上，大埔河口。黃宜凹落山同九廣鐵路交界，過堤入海。一邊堤駁去元洲仔，一邊堤駁去運頭角入大埔。因爲咁叫元洲仔段。

大埔段改過名做大埔大街，之後又改名廣福道，係入大埔市區一段。呢段包括過林村河嘅廣福橋。原本南駁元洲仔段，北駁大窩段，後尾廣福橋變咗做行人橋，而起太和邨又剷咗一段，所以唔再完整。

大埔公路－大窩段

大窩段係孤立一段，家下同其他大埔公路分開。未有開大埔新市鎮之前，元洲仔段經廣福道可以直入大窩段。但家下畀太和邨隔斷。佢去到康樂園之後，可以駁原本叫大窩西段嘅大窩西支路。

大窩西段由康樂園去到和合石，家下改咗名。喺一九九零年代中期，改名粉嶺公路。喺側邊起高速公路時，變成大窩西支路。而高速公路就叫粉嶺公路，而東邊就有大窩東支路。呢段有唔少鄉，好似九龍坑、泰亨、南華莆。因爲喺沖積平原，呢段路都比較直同平。

位於崇基學院附近的11-1/2咪石碑

大埔公路沿途地方法，係用「大埔公路幾多咪」作做地址。「咪」即係英文「Mile」（英里）嘅廣東話音譯，代表嗰處，同尖沙咀碼頭，經彌敦道，行咗幾遠。

青山公路同清水灣道，都有類似里數。