維基百科

廣州地鐵10號綫

中國廣東省廣州市嘅地鐵線

 廣州地鐵10號綫（粵拼：gwong2 zau1 dei6 tit3 sap6 hou6 sin3） ，又叫東沙綫dung1 saa1 sin3，係規劃緊嘅廣州地鐵路綫，代表色係■灰綠色。10號綫係3號綫拆解延長嘅產物，依家運營緊嘅3號綫支綫（石牌橋⇄天河客運站）係10號綫嘅其中一段。

廣州地鐵10號綫
概覽
營運地區 中華人民共和國，廣州
服務類 城市軌道交通
線路類 市區加密綫
線路長 25.8km
- 營運長 5.7km
車站總數 18
軌道標準 1435mm
列車偏組 6輛編組B型列車
營運資訊
營運時期 2006.12.26～而家
營運單位 廣州地鐵集團有限公司

呢條新線係當局打包通過嘅規劃方案，前期選址設置、乃至線網站場改建等，未有公開咁廣泛徵求市民嘅意見；到咗開工建設後，由政府公佈喺部分計劃站點嘅徵拆計劃，先至引起更廣泛嘅關注。唔少市民希望有關規劃應重新徵求返意見，同市民公開說明選線、設站嘅理由[1][2]。

規劃史

編輯

原主綫方案（天河客運站⇄西塱）

編輯
睇埋：廣州地鐵3號綫

喺2000年嘅規劃入邊，3號綫支綫喺體育西路北邊分岔，行天河路到華師附中西南邊轉向北行，下穿華師同埋華工，去到天河客運站為止。由於支綫喺體育西路同主綫南段一齊用兼貫通營運，所以主綫北段喺體育西路嘅中間路軌折返。主綫南段同北段通過正綫相接。

喺2007年嘅市兩會上，總工程師陳韶章提出咗份報告，話要將3號綫支綫拆解同延伸，成為10號綫。[3]

喺2010年尾、3號綫北延段通車後，原先嘅行車安排好快被證明唔合理。因為北延綫同南段之間嘅通勤需求非常大，而呢啲乘客要喺體育西路全部轉車，令體育西路站啲客流逼到爆。同時，體育西路站中間路軌原先被設計成原嚟嘅機場快綫（2007年規劃時同3號綫合併）嘅折返點，道岔離車站好遠，令北延綫行車間隔去到成4分半鐘，好難應對北延綫快速增長嘅客流。而支綫響市區分岔，重唔可以脫離南段獨立營運，要保證佢嘅行車間隔，就令到北延綫冇辦法開南北貫通嘅班次嚟解決情況，亦即係話支綫嘅間隔同北延綫嘅間隔互相牽制咗。由於3號綫客流重喺度不斷攀升，運能提升幾乎去到極限，所以後尾規劃就拆走咗支綫兼設計返主綫南北貫通。

拆走支綫之前嘅規劃，就出現過噉嘅問題：由於2002年起3號綫嗰時冇留低任何拆解條件，所以拆解工程會出現好多冬瓜豆腐。包括細到天河區交通大癱瘓，大到將3號綫嘅天河客運站到石牌橋段要成條停運呢啲細節[註 1]。重考慮到石牌橋站西邊嘅路面係2010年開通嘅BRT站。尤其喺天河路近體育中心南門地底，嗰度亦係1號綫、18號綫同埋APM、3號綫體育西路到林和西區間嘅隧道必經之地。加上支綫拆畀10號綫之後唔可以用返而家嘅體育西路站，要喺天河路地底新起個車站先至得。即使整出轉車結構，唔單止唔方便，相反轉車效率可能重慢過港鐵嘅中環站同香港站。亦考慮到支綫停運時段會增加其它地面巴士路綫嘅客流負擔嘅關係而一直拖住唔搞。

雖然呢份規劃最初喺2010年徵求意見之後確定咗，西邊總站最初喺東沙開發區入面，但2015年嘅方案話配合廣鋼新城嘅發展而延長到西塱[4]。

分拆報中央批准方案後

編輯

2016年1月7號廣州市規劃和自然資源局喺網上公示咗《廣州市新一輪城市軌道交通建設規劃方案》，入邊其中公示嘅10號線，係得起始站點、長度同功能定位等簡述，未有講到過具體站點嘅設置。2017年初，廣州將18號綫同其他9條綫路打包成為第三期建設規劃，經由廣東省發改委提交畀國家發改委審查。到咗3月20號，廣州地鐵第三期建設規劃獲得國家發改委批復，獲得咗立項嘅許可，而10號綫喺埋入邊[5]。而喺公眾諮詢時，條線計劃下穿中山大學南校區中軸線嘅方案，就引起咗第一次巨大爭議。

同年3月23號搞咗第一次環評公示[6]，其中西南段設計係過咗珠江泳場之後，喺中山大學範圍竟然係正中軸線南北穿過，俾好多中大學生猛咁鬧[7]。有好多學生同先生之所以鬧呢份規劃，係因為中山大學嘅中軸綫上邊好多包括懷士堂同埋四牌樓嘅乙丑進士牌坊在內嘅舊建築，即使做咗減震措施都好難保證到文物嘅安全問題；加上隔籬有間光學國家級實驗室同其他重點實驗室，由於佢哋啲設備有好嚴格兼腌尖嘅振動要求，即使起好咗嘅8號綫喺學校南門口經過，佢為咗避開地鐵營運對實驗數據出現誤差，都淨喺晚黑運作。實驗室方亦投訴10號綫規劃會影響緊要嘅實驗室正常運作。所以中山大學方面公開反對10號綫南北橫穿。喺嗰時，有好多喺中大讀書啲學生向地鐵方提出咗10號綫兜開中山大學嘅三個建議[8]：

建議 方案 優點 缺點
１ 喺五羊邨站之後轉左過海同二沙島，行下渡路，喺鷺江站轉8號綫。 避開五羊新城入面啲軍區同省委呢啲政府部門同軍事機密地方同埋一定程度減輕3號綫喺早晚高峰時段太多人出入站嘅負擔 唔經東湖站，冇份轉6號綫。
２ 將車站位改喺中山大學嘅南門，路線移去中大西邊或怡樂路。 站點唔變，既降低對實驗樓嘅影響，又可以更加好轉8號綫。 路線距離8號綫嘅中大站有成300～400m咁遠。
３ 去到東湖站繼續直行，入東曉路，直程喺曉港站轉8號綫 既完全唔干擾中山大學，又可以解決東曉路冇地鐵嘅問題。 唔經輕紡城站（而家嘅五鳳站），冇得轉11號綫。
好大機會冇得轉2號綫（唔經東曉南/江泰路）。

後嚟地鐵方改咗規劃，將路綫由下穿中山大學中軸綫改成從西北向東南下穿，以避開敏感建築，重將原先珠江泳場站向西移到濱江公園附近整車站。不過亦有投訴，話路綫喺中大南門整車站到中大站離得太遠，規劃方案重需要改進。由廣東省發展改革委員會提交嘅《廣州市城市軌道交通第三期建設規劃（2017～2023年）》喺獲批（發改基礎〔2017〕498號）公開嘅時候，先至喺《規劃》入邊附上完整嘅線網同站點設置簡圖[9]。而原下穿中大校區段嘅走線，經第一次嘅中大方面嘅輿論壓力而改到去穿西區下方，唔再直穿中軸線[10]。

持續變化

編輯

2017年7月21號，廣州地鐵方公佈咗份新一期嘅地鐵規劃，入面講到10號綫肯定將原先3號綫嘅東北角分岔（天河客運站⇄體育西路）拆走。雖然揀咗市民建議嘅第二份方案，但喺西南邊啲車站冇公佈到中山大學南門附近搞車站，路線亦改到行東曉路之後向東南插入怡樂路，轉入瑞康路[11]。

2017年11月13號，廣州地鐵官方又再一次公佈咗路線規劃，雖然路線同上次冇點變，但喺中山大學南邊加咗「中大南門站」，不過重係冇份轉8號綫[12]。

2018年6月2號，廣州地鐵官方同廣州市建設科技委員辦、廣州市城鄉建設委員會邀請咗喺北京、上海、天津、武漢、南寧、深圳同廣州等地嗰53位專家開咗個大會，傾到呢條綫嘅規劃有關事宜。而確定咗嘅轉車站多咗兩個——分別係寺右新馬路站（轉5號綫）同埋廣州大道中站（轉25號綫）。其中寺右新馬路站向東移到近住五羊邨站西邊隔籬[13]。早前話因為拆咗六運小區一棟九層樓高嘅住宅同太多地下管線改造、及早前起好嘅3號綫霸咗既有隧道位嘅理由初定喺天河路嗰邊搞嘅天河路站，後嚟俾天河又一城產權方反對地鐵方改成地下轉車通道。專家又將佢嘅站位計劃搬到體育西路以南近住規劃正嘅13號綫二期車站——花城廣場北站嗰頭[13]。

而2018年7月2號廣州地鐵亦喺網上公開咗獲批後嘅《規劃》內容同示意圖。結果係到呢個階段嘅示意圖，先見到具體計劃各站嘅設置[14]。

2018年7月30號，廣州地鐵負責設計嘅內部人士話，喺經過體育西路站方面，最好方案係整喺3號綫同13號綫嘅花城廣場北站兩站之間而實現4綫轉乘，但係需要拆走育蕾小區同六運小區入面幾間公屋[15]。即係話10號綫有可能會直接插到原先體育西路站南邊同13號綫花城廣場北站之間嘅轉車通道入面[15]。

到咗2020年10月當局再向外界公佈，為咗建設署前路站，同埋加多條接通東山口站嘅換乘通道，要徵收清拆署前路東側同廟前直街北側嘅建築[16]。由於呢一帶正位處廣州最具歷史文化底蘊嘅東山地方嘅咽喉，有唔少嘅政治遺址、文化名人故居，好快就引起咗市民更多嘅關注同討論。唔少得知公佈計劃嘅市民都表示咗反對，提出種種疑問，希望政府解釋返地鐵10號線署前路地鐵站嘅選址理由[17][16]。地鐵方面到咗11月初就宣佈話同市、區嘅部門商討後，決定暫時唔起換乘通道，將東側嘅陳樹人紀念館、越秀區圖書館等剔出徵拆範圍[18]，而廟前北街北側街區仲維持緊[19]。

施工

編輯

舊三號綫

編輯
  • 2003年5月18號，3號綫支綫正式開始郁手。到咗2006年中葉，全綫基本完工。
  • 2006年12月30號，3號綫支綫開始營運。

十號綫

編輯

其他延長計劃

編輯

2018年9月20號，廣州地鐵最新一期嘅招標文件話，為咗進一步發展廣鋼新城引出去佛山嘅支綫方案，加上佛山南海區人民政府，爭取將呢條地鐵引出條支綫插入南海入面[20]。

規劃路綫

編輯

10號綫成東北–西南走向，全長約25.8km，其中20.1km係新起；總共有18座車站，其中有13座車站同1座車輛段係新起。

走向

編輯

10號綫出天河客運站之後，先用返營運緊嘅3號綫支綫，去到石牌橋之後繼續向西行，喺天河路體育西路口東邊整新嘅天河路站，之後兜入廣州大道中，行到寺右新馬路同金穗路 交界之後轉入五羊新城，沿寺右新馬路同埋廟前直街一直行到東華北路之後轉向南，跟住東湖路海印橋東邊過江，再向南穿中山大學南校區，跟住行瑞康路，之後轉向西南入僑康路，過丫髻沙大橋東南邊，行到東沙開發區，轉向西行嗮成條規劃路之後轉去西北邊，行到西塱為止。

計劃車站

編輯

呢條路綫一共有18座車站，從東北到西南按順序分別係：天河客運站、五山、華師、崗頂、石牌橋、天河路、南方報社、寺右、署前路、東湖、濱江東、中大南門、五鳳、東曉南、石溪、大幹圍、東沙、廣鋼新城、西塱。

  • 而家天河客運站到石牌橋5站都喺度營運緊，屬3號綫支綫。淨底嘅站都係新起。
  • 冚唪唥嘅車站都係地下站。

轉車車站

編輯

以下轉車站喺路綫初步方案公佈咗：

用車

編輯

由於包含咗3號綫原嚟嘅支綫段，同時原嚟嘅車站缺乏改建條件，預計10號綫將會沿用3號綫嘅6節B型列車。

爭拗

編輯

線網相通好複雜

編輯

10號線第一次公佈嘅設計招標文件度，拆解後10號線係另設天河路站，同原有嘅體育西路站相距大概200米，雖註明可以換乘1、3號線體育西路站，但附圖度嘅天河路站兩個方案都唔見有換乘通道；註明同廣佛線換乘嘅石溪站，雖話會加建通道連接，但仲話到係喺非付費區換乘。照呢個計劃假如實際要喺呢兩個站度換乘，都係要先出閘行自己去第個車站，而且仲要排隊接受地鐵嘅安檢後先至可以入閘。呢個方案公佈後就引起咗一輪討論。而同時間10號線雖然有同既有嘅5號線、8號線有交匯，但方案係分別另設站場，而唔可以換乘5號線五羊邨站同8號線中大站；公佈嘅署前路站就位於1、6號線東山口站以南200米嘅距離，亦冇設計換乘設施。有市民建議地鐵方面可以考慮搭客嘅出行便利，改進返10號線可以換乘其他線路[21][22]。

隨後廣州地鐵方面就通過新聞稿話，天河路站會設返付費區換乘通道接返去體育西路站，保證換乘時唔使出多次閘。但換乘通道預計仲長過楊箕站嘅通道。至於具體點設置，廣州地鐵就話要等後續設計嘅確定[23]；而喺2018年6月上旬，因應廣州市建设科技委公佈嘅信息，10號線設計再加咗兩個換乘站，廣州地鐵相關負責人同新聞機構話，其中一個即係寺右新馬路站，可以換乘5號線嘅五羊邨站。至於其他資料地鐵相關負責人就話，要同規劃部門一齊繼續研究先有得交待[24]。到咗2020年10月地鐵再向外界公佈，署前路站可能會重新規劃做換乘站，因消息公佈後嘅徵拆引起咗巨大爭議（見下文），後尾地鐵又宣佈擱置計劃先；而中大站換乘8號線嘅問題，地鐵喺同10月尾回覆公眾意見時話，計劃等有足夠條件下再推進換乘改造[25]。

清拆歷史街區

編輯
内文：署前路站 § 規劃爭議

廣州地鐵宣佈咗重新設計署前路站嘅換乘方案後，向外界公佈埋國土擬拆方案，牽涉咗署前路東側同廟前直街北側嘅地皮。呢度係正處廣州最具歷史文化底蘊嘅老東山嘅咽喉處[16]，呢一帶有大批嘅政治遺址、文化名人故居，消息一出好快引起更多市民嘅關注同討論。唔少市民反對地鐵嘅清拆計劃，希望政府解釋返署前路地鐵站嘅選址理由；亦有受訪嘅市民認為，清拆呢度重建，可以改善附近嘅出行環境[26]。東山本地出身兼長居、有出版《記憶東山》一書嘅吳偉鵬就話表示，渠自己係發現咗9月中嘅署前路站徵收補償方案徵求意見公告，先至突然知道咗呢帶有計劃要拆遷[2]。據設計部門廣州市交通規劃研究院嘅匿名專家話，新嘅設計方案可以減低一號線同十號線喺體育西路站嘅換乘壓力，兼減低東山口站嘅進出壓力。而規劃、設計部門同時回應新聞機構話，後續會有文化遺產評估，仲唔會咁快發怖正式嘅徵收公告[27]。經公眾輿論嘅壓力地鐵後尾再宣佈，會擱置換乘通道嘅計劃先，暫將東側嘅建築剔出徵拆計劃，而東段廟前北街北側街區未有劃出範圍。地鐵方面強調冇剔出徵拆計劃嘅建築，都冇被評定做不可移動文物、歷史建築或歷史風貌建築，亦唔屬於當局劃定嘅街區核心保護範圍同建設控制地帶[19]。

註同攷

編輯
註
  1. ↑ 因為3號綫支綫喺2006年12月26號開通之後，石牌橋、崗頂、華師同五山、天河客運站成為啲客流大咗嘅站點。除咗天河客運站喺2013年12月28號開通咗6號綫之後分流咗一部分客流之外。
攷
  1. ↑ 李天研 (2020-10-13)。〈10号线署前路站有望实现三线换乘〉。《广州日报》 –透過新浪财经。
  2. ↑ 2.0 2.1 何姗 (2020-10-29)。〈"地铁设站应补充公众咨询环节 聆听市民意见"〉。《新快报》。
  3. ↑ 陈韶章：廣州地鐵技術創新回顧同思考
  4. ↑ 〈《广州市新一轮轨道交通（2015-2025）建设规划方案图》〉。原著喺2015年4月17號歸檔。喺2015年9月4號搵到。
  5. ↑ 〈廣州地鐵第三期建設規劃獲批〉。原著喺2018年8月30號歸檔。喺2017年4月15號搵到。
  6. ↑ 〈廣州地鐵第三輪各新綫環評第一次公示〉。原著喺2020年3月16號歸檔。喺2017年4月15號搵到。
  7. ↑ 〈【南方日报】地铁十号线"穿越"中大南校区？〉。《南方日報》。中山大學新闻网。2016-01-13。{{cite news}}: CS1 maint: url-status (link)
  8. ↑ 〈中大：绕下行吗 规划：挖得很深〉。《人民网》。中國日報網。2016-01-13。
  9. ↑ 〈国家发展改革委关于广州市城市轨道交通 第三期建设规划（2017-2023年）的批复〉。中华人民共和国发展和改革委员会。2017-03-23。喺2020-11-04搵到。
  10. ↑ 〈附件：广州市城市轨道交通第三期建设规划〉 (PDF)。中国政府网。2017-03-23。
  11. ↑ 〈广州地铁新线二次环评 三号线拆解十号线设14站〉。《廣州日報》。鳳凰網。2017-07-22。原著喺2017-07-22歸檔。喺2017-11-18搵到。
  12. ↑ 〈广州又有七条地铁线招标〉。《南方日報》。新浪。2017-11-13。
  13. ↑ 13.0 13.1 〈独家丨这条地铁太牛了！串联广州四城区N条线，换乘站增到10个！〉。《广州参考》。东方头条。2018-06-04。原著喺2020-09-08歸檔。喺2018-06-04搵到。
  14. ↑ 何姗 (2020-10-29)。〈"地铁设站应补充公众咨询环节 聆听市民意见"〉。《新快报》。
  15. ↑ 15.0 15.1 〈广州最忙地铁站，又多一条新线可换乘！还有机会四线换乘呢〉。《廣州日報》。大洋網。2018-07-30。原著喺2018-08-03歸檔。喺2018-08-03搵到。
  16. ↑ 16.0 16.1 16.2 何姗、方汝敏 (2020-10-29)。〈广州地铁10号线为何要设署前路站?〉。《新快报》。
  17. ↑ 谭超 (2020-11-02)。〈署前路地铁站征拆风波始末〉。《南方网》。
  18. ↑ 骆昌威 (2020-11-04)。〈广州地铁：10号线署前路站换乘通道调整，陈树人纪念馆等暂不拆〉。《广州日报》。
  19. ↑ 19.0 19.1 李天研 通讯员 穗铁宣 (2020-11-04)。〈陈树人纪念馆、越秀区图书馆暂不拆！广州地铁：10号线署前路站换乘通道调整为远期实施〉。《大洋网》。 {{cite news}}: Cite has empty unknown parameter: |6= (help)CS1 maint: url-status (link)
  20. ↑ 〈广州地铁多条规划新线露脸 10号线将延伸至南海〉。《廣州日報》。快報。2018-09-21。原著喺2020-09-08歸檔。喺2018-09-22搵到。
  21. ↑ 引用錯誤 無效嘅<ref>標籤；無文字提供畀叫做設計招標嘅參照
  22. ↑ 李天研 (2018-01-23)。〈三号线将拆解成十号线 换乘或需出站〉。《广州日报》。原先內容歸檔喺2018-01-23 –透過腾讯网。
  23. ↑ 李佳文 (2018-01-24)。〈今年底广州再通4条新线路 全市11区实现地铁全覆盖〉。《新快报》。
  24. ↑ 引用錯誤 無效嘅<ref>標籤；無文字提供畀叫做新增換乘站嘅參照
  25. ↑ 引用錯誤 無效嘅<ref>標籤；無文字提供畀叫做广州地铁对换乘的回复嘅參照
  26. ↑ 谭超 (2020-11-02)。〈署前路地铁站征拆风波始末〉。《南方网》。
  27. ↑ 徐振天、梁栋贤 (2020-10-28)。〈广州10号线署前路站引关注 现拟征迁方案或是最优〉。《羊城晚报》 –透過新浪新闻。

Template:廣州地鐵10號綫

由「https://zh-yue.wikipedia.org/w/index.php?title=廣州地鐵10號綫&oldid=2196737」收